MATEUS 10
10
Jesus ta tumu ovalongwa vaye omulongo navavali
(Mark. 3:13-19; 6:7-13; Luk. 6:13-16; 9:1-6; 12:2-7; 12:8-9)
1Ndele opo Ye okwa ifana ovalongwa vaye omulongo navavali, ndele okwe va pa epangelo lokutaataa mo eemhepo da nyata nolokuvelula oudu aushe noungone keshe, 2ndele omadina ovayapostoli omulongo navavali oyaa: wotete oSimon, a ifanwa Petrus, naAndreas, ondenge yaye, naJakob yaSebedeus naJohannes, ondenge yaye; 3Filippus naBartolomeus, Tomas naMateus, omufendelifi; Jakob yaAlfeus, naLebbeus, edina laye limwe Tadeus; 4Simon omuladi naJudas Iskariot, oye tuu ou e mu kengelela.
5Ovava omulongo navavali Jesus e va tuma ko, nokwe va lombwela ndele ta ti: “Inamu ya nondjila tai i kovapaani, nande omoshilando shimwe shOvasamaria inamu ya mo, 6ndele indeni tete keedi odo da kana domeumbo laIsrael. 7Ndele keshe apa tamu ende, va lombweleni mu tye: ouhamba weulu wa ehena popepi. 8Veluleni ovanaudu, nyumuneni ovafi, yelifeni ovanashilundu, teni mo eendemoni. Onye mwa tambula oshali, yandjeni yo oshali. 9Inamu lilongelela momakwamo eni oingoldo noisiliveli ile ongopolo, 10hakutu lokweenda nalo, haikutu ivali, haenghaku ile odibo; osheshi omulongi a wana okupewa oipalwifa yaye. 11Ndele mukeshe moshilando ile momukunda tamu fiki mo, puleni, olyelye a wana, nye mu kale meumbo laye, fiyo tamu ka ehena komesho. 12Ndele ngeenge tamu i meumbo, likundeni nombili. 13Ndele eumbo olo ngeenge la wana, ombili yeni nai kale mo; ndele ngeenge inali wana, ombili yeni nai shune kunye. 14Ndele ngeenge itamu tambulwa mo neendjovo deni itadi pwilikinwa, djeni mo meumbo olo ile moshilando osho, nye mu pupule ondwi keemhadi deni. 15Oshili handi mu lombwele: edu laSodom nolaGomorra otali kala lixwepo, li dule oshilando osho efiku letokolo.
16“Tala, Ame ohandi mu tumu ngaashi eedi mokati komambungu; kaleni hano mwa lungama ngaashi omayoka nongaashi eenghuti muhe na oshipo. 17Ndelenee lungameni ovanhu, osheshi otave mu yandje koiongalele yovatokoli ndele tave mu dengele meeshinagoga davo; 18ndele tamu twalwa komalenga nokeehamba omolwange, shi va ningile ondobwedi, moipafi yavo noyovapaani. 19Ndelenee ngeenge tave mu yandje kovatokoli, inamu kala noshisho mu tye ngahelipi ile mu popye shike, osheshi onye tamu pewa efimbo tuu olo odo mu noku di popya. 20Osheshi hanye tamu popi, ndele omhepo yaXo tai popi munye.
21“Ndelenee omumwaxe ta yandje omumwaxe mokufya, naxe omona waye, nounona otava ka twa ondubo novakulunhu vavo, ndele tave va dipaifa. 22Ndele edina lange otamu ke li tondelwa kwaaveshe; ndele ou te lididimike fiyo okexulilo, oye ta xupifwa. 23Ndele ngeenge tave mu taataa moshilando shimwe, tembukileni kushikwao; osheshi oshili handi mu lombwele: onye itamu mane okweenda oilando aishe yaIsrael fiyo Omona wOmunhu te uya.
24“Omulongwa ke dule omulongi waye, nomupiya ke dule omwene waye. 25Osha wanena omulongwa, ngeenge ta ningwa ngaashi omulongi waye, nomupiya ngeenge ta ningwa ngaashi omwene waye. Mwene weumbo ngeenge ve mu ifana Belsebul, hano unene tuu ovaneumbo vaye osho tave va ifana.
26“Hano inamu va tila. Osheshi kaku na osho sha tuvikilwa itashi ka tuvikululwa, ndele kaku na osho sha holekwa itashi ka shiivika. 27Keshe tuu eshi handi shi mu lombwele momilaulu, shi hepaululeni pouyelele. Ndele eshi tamu shi udu okunongofwelwa momatwi, shi hepaululeni kombada yeenduda. 28Ndele inamu tila ava tava dipaa olutu, vo itava dulu okudipaa omwenyo; ndele tileni shili ou ta dulu okunyonaunina moheli omwenyo nolutu. 29Oonamusheshe vavali ihava landwa ngeno okapeni kamwe akeke? Ndele kaku na nande umwe ta wile poshi, oXo ngeenge ina hala. 30Ndele osho eexwiki deni adishe dokomutwe oda valwa yo. 31Hano inamu tila; onye mu dule oonamusheshe vahapu.
32“Opo nee keshe tuu ou ta hepaulula nge povanhu, naame ohandi mu hepaulula puTate meulu. 33Ndele ou te lidimbike nge povanhu, naame ohandi mu lidimbike puTate meulu.
34“Inamu tya, Ame onde uya ndi ete ombili kombada yedu, inandi uya okweeta ombili, ndelenee eongamukonda. 35Osheshi Ame nde uya okweeta ondubo pokati komumati naxe, nokakadona naina, noshitenya omukainhu nainamweno. 36Ndele novaneumbo vomunhu mwene otava ningi ovatondi vaye.
37“Keshe ou e hole xe ile ina komesho yange, oye ina wapalela nge; nakeshe tuu ou e hole omona waye omumati ile okakadona komesho yange, oye ina wapalela nge; 38ndele keshe ou ita kufa omushiyakano waye ye ita shikula nge, oye ina wapalela nge. 39Oye ou te limonene omwenyo waye, oye te u kanifa, naau ta kanifile nge omwenyo waye, oye te u limonene.
40“Ndele ou te mu tambula, oye ta tambula nge, naau ta tambula nge, oye ta tambula ou a tuma nge. 41Ou ta tambula omuxunganeki omolwedina lomuxunganeki, oye ta pewa ondjabi yomuxunganeki; naau ta tambula omuyuki omolwedina lomuyuki, oye ta pewa ondjabi yomuyuki. 42Nakeshe ou ta nwefa umwe waava vaxupi eholo lomeva omolwedina lomulongwa, oshili handi mu lombwele: Oye ita ka kanifa ondjabi yaye.”
Currently Selected:
MATEUS 10: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
