MATEUS 11
11
Jesus naJohannes Omushashi
(Luk. 7:18-35)
1Ndele okwa ningwa, Jesus eshi a mana okulombwela ovalongwa vaye omulongo navavali oipango ei, okwa ehena ko nokulonga nokuudifa moilando yavo.
2Ndele Johannes eshi a li modolongo okwa uda oilonga yaKristus nokwa tuma kuye ovalongwa vaye 3nondaka ei: “Oove tuu ou nakuuya, ile tu nokuteelela umwe?” 4Opo nee Jesus okwe va nyamukula ndele ta ti: “Indeni mu ka hepaululile Johannes edi tamu di udu naai tamu i mono: 5ovapofi otava mono ko, noingudu otai ende, novanashilundu otava yelifwa, novafitamatwi otava udu ko, novafi otava nyumunwa, neehepele otava udifilwa evaengeli. 6Ndele omunelao oye ou ita limbililwa nge.”
7Opo nee eshi va dja po, Jesus okwa hovela okulombwela ovanhu, ta popi Johannes ndele ta ti: “Mombuwa omwa ka talele mo shike? Olumbungu mbela tali nyenganyengifwa komhepo? 8Ile omwa ka talele ko shike hano? Okumona omunhu a djala oikutu iwa ipu? Tala, ovo hava djala oikutu iwa ipu, ohava kala meengulu deehamba. 9Ile omwa ka talele ko shike? Okutala omuxunganeki ngeno? Oshili handi mu lombwele: Oye e dule omuxunganeki. 10Ndele oye tuu ou a shangwa kwa tiwa:
‘Tala, ohandi ku tetekelifile omutumwa wange,
oye e noku ku longekidila ondjila.’
11Oshili handi mu lombwele: mwaava va dalwa kovakainhu kaku nomunene e dule Johannes Omushashi; ndele ou munini e dulike kwaaveshe mouhamba womeulu, oye e mu dule. 12Ndelenee okomafiku aJohannes Omushashi, fiyo opaife ouhamba weulu otau tondokelwa, novahomoni tave u hakana. 13Osheshi omaxunganeko aeshe ovaxunganeki nomhango oya xulila muJohannes; 14ndele ngeenge mwa hala okutambula: oye Elia kwa li e nokuuya. 15Ou e nomatwi, na ude ko!
16“Ndelenee epupi eli ohandi li yeleke nashike? Olo la fa ounona, ve li omutumba poilandelo tava ingidile vakwao, 17ndele tava ti:
‘Ofye otwe mu shikila eenyalilo, nye inamu tutula oudano,
notwa imba omaimbilo eenghali, ndele onye inamu lila.’
18Osheshi Johannes okwe uya, oye ita li noita nu, ndele vo va tya: ‘Oye e nondemoni.’ 19Omona wOmunhu okwe uya, ta li nota nu, vo notava ti: ‘Tala, omufukulume nongholwe, kaume kovafutifi nokovalunde.’ Ndele ounongo wa hololwa koilonga yavo kufye, owa yuka.”
Oilando inai lidilulula
(Luk. 10:13-15)
20Opo tuu Ye okwa hovela okutangunina oilando inya mwa ningilwa oilonga yaye ihapu yeenghono, osheshi oyo inai lidilulula: 21“Woo, ove Korasin! Woo, ove Betsaida! Osheshi ngeno muTirus nomuSidon mwa ningilwa oilonga yeenghono, ngaashi inya ya ningilwa punye, ngeno yo ye lidilulula nale mokudjala eeshako nomokulidedaula momute. 22Ndelenee ohandi mu lombwele: Tirus naSidon otai ningi hixwe, i mu dule efiku olo letokolo. 23Naave yo Kapernaum, oto ka lengwa fiyo omeulu? Ahowe, oto ka kulukila fiyo omoshovafi! Osheshi ngeno muSodom mwa li mwa ningilwa oilonga ei yeenghono ya ningilwa mwoove, ngeno oko shi li nopaife. 24Ndelenee ohandi mu lombwele: Edu laSodom otali ningi hixwe li ku dule efiku letokolo.”
Jesus ta hambelele Xe
(Luk. 10:21-22)
25Opomafiku enya Jesus okwa popya ndele ta ti: “Ohandi ku hambelele, Tate, Omwene weulu nowedu, osheshi oinima ei Ove we i holeka ovanongo novanaendunge, ndele we i hololela eehanana. 26Heeno, Tate, osheshi osho tuu ngaha she ku wapalela. 27Oinima aishe Ame nde i pewa kuTate, ndele kaku na ou ta shiiva Omona, Tate Oye tuu aeke, ndele kaku na ou ta shiiva Tate, Omona Oye tuu aeke, naau Omona a hala oku mu hololela.
Jesus ta ifana ava va loloka
28“Ileni kwaame, nye amushe hamu longo nomwa lolokifwa, Ame ohandi mu pe etulumuko. 29Litwikeni ondjoko yange nye mu lilonge kwaame, osheshi Aame omunambili, momutima onde lininipika; ndele tamu monene eemwenyo deni etulumuko. 30Osheshi ondjoko yange oiwa nomutengi wange omupu.”
Currently Selected:
MATEUS 11: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
