JEREMIA 35
35
Ovarekabi tava ningi oshihopaenenwa shaJuda
1Pomafiku aJehoiakim yaJosia, ohamba yaJuda, ondjovo ya dja kOmwene, oya hanga Jeremia, tai ti: 2“Inda ko kOvarekabi, ove u popye navo, ove u va ete motembeli yOmwene okedimo limwe lonhumba, ove u va pe omaviinyu okunwa.” 3Opo nee ame onda kufa Jaasanja yaJeremia yaHabasinja novamwaina novana novakwapata aveshe Ovarekabi, 4ndele ame onde va twala kotembeli yOmwene omedimo lovana vaHanan yaJigdalja, omulumenhu waKalunga, edimo la shaama nedimo lovakulunhu, kombada yedimo laMaasea yaSallum, omukeleli woposhivelo. 5Ndele ovana vomepata lOvarekabi onde va dikila oitoo yomaviinyu i yadi, nomaholo, ndele nde va lombwela: “Nweni omaviinyu. 6Ndelenee vo ova nyamukula tava ti: Ahowe, fye ihatu nu omaviinyu, osheshi Jonadab, omona waRekab, tatekulu, okwe tu lombwela ta ti: Nye novana veni kaleni ihamu nu omaviinyu fiyo alushe, 7inamu tunga eengulu ile inamu kuna ombuto ile inamu twika oikokola yomiviinyu, nye inamu kala nayo. Ndelenee nye omu nokukala momatwali omafiku eni aeshe, opo mu kale nomwenyo mule moshilongo omo tamu ka kala mo ovaendanandjila. 8Ndele fye otwa dulika kondaka yatate Jonadab, omona waRekab koinima aishe ye e i tu lombwela, fye ihatu nu omaviinyu momafiku etu aeshe, ofye vene novakainhu vetu novana vetu ovamati novana vetu oukadona. 9Ndele fye itatu tungu eengulu tu kale mo, osho yo katu noikokola yomiviinyu ile omapya nombuto; 10ndele otwa kala momatwali ndele twa dulika notwa ninga naanaa ngaashi tate Jonadab e tu lombwela.” 11Ndelenee opa ningwa, Nebukadnesar, ohamba yaBabilon, eshi a homona oshilongo, otwa popya ndele hatu ti: Fikameni, tu yeni kuJerusalem, fye tu ye oita yOvakaldea noita yOvaarami onhapo. Osho ngaha fye otwa kala muJerusalem.
12Opo nee ondjovo ei yOmwene oya hanga Jeremia tai ti: 13Omwene womatanga ovakwaita, Kalunga kaIsrael, ota ti ngaha: Inda u ka lombwele ovalumenhu vomuJuda noonakukalamo muJerusalem u tye: Nye inamu hala okudulika kouteku wange, nye mu ude eendjovo dange, Omwene ta ti? 14Eendjovo daJonadab yaRekab e di lombwela ovana vaye nokutya, vaha nwe omaviinyu, ove di diinina, vo inava nwa omaviinyu fiyo onena, ndelenee ova dulika koshipango shaxekulu. Ndelenee Ame onde mu lombwela efimbo alishe, ndelenee nye inamu uda nge. 15Ndele Ame inandi fya ounye oku mu tumina ovapiya vange ovaxunganeki efimbo alishe, vo va tye: Lialulukeni, keshe umwe kondjila yaye ii, nye mu wapaleke oilonga yeni, ndele inamu shikula oikalunga, mu i longele, opo nee nye tamu ka kala medu leni nde li mu pa, onye nooxokulu. Ndelenee nye inamu pwilikina nomatwi eni inamu ameka kwaame. 16Heeno, oludalo laJonadab yaRekab la wanifa oshipango shaxekulu, e shi va lombwela, ndelenee ovanhu ava ihava udu nge. 17Onghee hano Omwene, Kalunga komatanga ovakwaita, Kalunga kaIsrael, ota ti: “Tala, kombada yoonakukalamo muJuda nomuJerusalem ohandi tumu oiponga ei aishe nde i va lombwela; osheshi Ame onde va lombwela, ndele vo inava hala okuuda nge, ndele Ame onde va ifana, ndelenee vo inava itavela nge.” 18Ndele Jeremia okwa lombwela epata lOvarekabi, ndele ta ti: Omwene womatanga ovakwaita, Kalunga kaIsrael ota ti: “Nye eshi mwa dulika koshipango shaxokulu Jonadab, ndele mwa diinina oipango yaye aishe, nomwa wanifa aishe ei ye e mu lombwela, 19onghee hano Omwene womatanga ovakwaita, Kalunga kaIsrael, ota ti: Mepata laJonadab, omona waRekab itamu ka pumba omulumenhu ou ta ka kala ofika koshipala shange fiyo alushe.”
Currently Selected:
JEREMIA 35: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
