JEREMIA 34
34
Sedekia nOvajuda tava xunganekelwa ehandu
1Nebukadnesar, ohamba yaBabilon eshi ya homona Jerusalem noilando ikwao aishe, ye mwene nomatanga aye aeshe noilongo aishe yomedu olo tali pangelwa kuye noiwana aishe, ondjovo ei yOmwene oya hanga Jeremia, tai ti: 2“Omwene Kalunga kaIsrael ota ti ngaha: Inda u ka lombwele Sedekia, ohamba yaJuda u tye: ‘Omwene ota ti: Tala, oshilando eshi ohandi shi yandje momake ohamba yaBabilon, ndele tai shi xwike po. 3Ndele ove mwene ito di mo onhapo momake aye, ndelenee oto kwatwa shili, ndele to yandjwa momake aye, nomesho oye otaa ka talafana nomesho ohamba yaBabilon, ndele tamu popyafana okanya nokanya, ndele ove to i kuBabilon.’ 4Ndelenee pwilikina ondjovo yOmwene, oove Sedekia, ohamba yaJuda! Omwene ote ku popi ndele ta ti: ‘Ove ito fi keongamukonda. 5Ove oto fi nombili nongaashi ooxokulu eehamba odo da li komesho yoye, nosho ove yo oto ka twiminwa pokufya kwoye noimbodi yedimba, ndele to lilwa eenghali tava ti: “Woo ohamba!” ’ Osheshi Ame nde di popya, Omwene osho ta ti.” 6Ndele eendjovo odo adishe omuxunganeki Jeremia okwe di shiivifila Sedekia, ohamba yaJuda muJerusalem, 7fimbo ovakwaita vohamba yaBabilon tava lwifa Jerusalem noilando aishe yomuJuda, ei ya fyaala po inai tewa, Lakis naAseka, osheshi oyo aike ya xupa yomoilando yomuJuda ya li ya pamekelwa oku i popila. 8Ondjovo yOmwene oya hanga Jeremia, ohamba Sedekia eshi a ninga ehangano novanhu vaye aveshe vomuJerusalem, nokwe va ingidila emangululo, 9nokutya, keshe umwe na lekele omupika waye omulumenhu nakeshe umwe omupika waye omukainhu; ovalumenhu Ovaheberi novakainhu Ovaheberi va efiwe, paha kale nande omunhu ta kaleke omumwaina Omujuda moupika. 10Ndele ovalumenhu aveshe noshiwana ashishe osho sha hangika sha ya mehangano olo, osha uda kutya keshe umwe e nokumangulula omupika waye omulumenhu nomukainhu vaha kale vali ovapika nova dulika ndele tave va mangulula. 11Ndelenee komesho ove lialuluka nova ka tala ko ovapika vavo ovalumenhu novakainhu, ve va mangululile, ndele ove va fininika vali va kale ovapika ovalumenhu novakainhu. 12Opo nee ondjovo ei yOmwene ya dja kOmwene oya hanga Jeremia tai ti: 13“Omwene Kalunga kaIsrael ota ti ngaha: Ame onda ninga ehangano nooxokulu, eshi nde va tembula mo medu laEgipiti nomonhele youpika nonda tya: 14‘Pexulilo lomudo omutiheyali, keshe umwe womunye u nokumangulula Omuheberi omukweni, ou a landifwa kwoove, ndele e ku longela omido hamano, mu efa a manguluke.’ Ndelenee ooxokulu ova li inava hala okuuda nge nokupwilikina eendjovo dange. 15Ndelenee paife nye omwe lidilulula nomwa longa eshi sha wapala momesho ange, eshi mwa mangulula keshe umwe omupika waye, ndele mwa ninga ehangano koshipala shange motembeli ya lukilwa edina lange. 16Ndelenee paife omwe lialuluka vali nomwa nyatekulula edina lange, eshi nye mwa alula nokufininika keshe umwe omupika waye omulumenhu nomukainhu, mwe va lekela, mwe va efa, nomwe va fininika va kale ovapika veni ovalumenhu novakainhu. 17Onghee hano Omwene ota ti ngaha: Nye omwa kala inamu uda nge ndele inamu ingidila keshe umwe komumwaina nokomukwao emangululo. Tala, ohandi mu ingidile emanguluko. Omwene osho ta ti, mu yandjelwe eongamukonda noudu wolutapo nondjala, nohandi mu ningi oshitilifa shomoilongo aishe yokombada yedu. 18Novalumenhu ovo va nyona ehangano lange, inava wanifa eendjovo dehangano lange, ve li ninga koshipala shange eshi va taula onhana yeyambo pokati nova enda pokati koinhimbu yayo ivali; ohandi ke va ninga ngaashi va ninga onhana; 19ovanenenhu vomuJuda novakulunhu vomuJerusalem, omalenga omouhamba novapristeli novanhu aveshe vomoshilongo, ovo va endele mokati keenhumba donhana. 20Ovo tuu ovo handi va yandje momake ovatondadi vavo, nomake avo va nangela eemwenyo davo, noimhu yavo otai ka ninga eendja deedila dokeulu nodoifitukuti yokombada yedu. 21Ndele Sedekia, ohamba yaJuda, nomalenga aye ohandi ke a yandja momake ovatondadi vavo nomomake aava hava nangele eemwenyo davo, nokutya komatanga ovakwaita vohamba yaBabilon, ovovo ve mu fiya po. 22Taleni, Omwene osho ta ti: Ame ohandi va lombwele nohandi ke va alulila koshilando eshi, ve shi lwife noku shi nangala ndele ve shi xwike po nomundilo, noilando yomuJuda ohandi i fefa ofuka ihe novanhu.”
Currently Selected:
JEREMIA 34: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
