JEREMIA 36
36
Omishangwa domaxunganeko aJeremia tadi xwikwa po kohamba
1Ndele momudo omutine waJehoiakim yaJosia, ohamba yaJuda, ondjovo ei oya dja kOmwene oya hanga Jeremia, tai ti: 2“Kufa omushangwatonywa, u shangele mo eendjovo adishe odo nde di ku lombwela, nda popya Israel naJuda noinima aishe, okudja kefiku olo nda hovela oku ku lombwela, okomafiku aJosia fiyo onena. 3Kashiimba epata laJuda tali ka uda omupya oo aushe nde u li diladilila notali lialuluka keshe umwe kondjila yaye ii, opo ndi va dimine po oilonga yavo ii nomatimba avo. 4Ndele Jeremia okwa ifana Baruk yaNeria. Ndele Baruk okwa shangela mo momushangwatonywa eendjovo adishe dOmwene da dja mokanya kaJeremia, e di mu lombwela. 5Ndele Jeremia okwa lombwela Baruk ndele ta ti: Ame nghi nomhito, itandi dulu okuya motembeli yOmwene. 6Inda ko hano, u leshe momushangwatonywa we u shanga, eendjovo dOmwene da dja mokanya kange, u di leshele momatwi ovanhu omotembeli yOmwene mefiku lelidiliko. Osho yo di leshela momatwi Ovajuda aveshe ava tave uya mo, tava di koilando yavo. 7Kashiimba mokwiilikana nokulinyongamena kOmwene tava ka ilikana, keshe umwe te lialuluka kondjila yaye ii. Osheshi ehandu laye noupyuhandu waye udjuu, Omwene a hala okuhandukila ovanhu ava.” 8Ndele Baruk yaNeria okwa ninga naanaa ngaashi omuxunganeki Jeremia e mu lombwela, nokwa lesha mo momushangwatonywa eendjovo dOmwene, e di leshela motembeli yOmwene.
9Ndelenee momudo omutitano waJehoiakim yaJosia, ohamba yaJuda mohani onhimugoi, elidiliko ola ingidilwa koshipala shOmwene, aveshe ova shivwa, ovanhu aveshe vomuJerusalem naaveshe vokoilando yomuJuda ve uya kuJerusalem. 10Ndele Baruk okwa lesha omushangwatonywa, eendjovo daJeremia, omotembeli yOmwene, medimo laGemarja yaSafan, omushangi moluumbo lokombada, poshivelo shipe shotembeli yOmwene, e di leshela momatwi ovanhu aveshe. 11Ndele Mikaia yaGemarja yaSafan, eshi a uda eendjovo adishe dOmwene, omomushangwatonywa, 12okwa ya kouhamba omolupale lomushangi nokwa hanga mo omalenga omakulunhu aeshe, e li omutumba oo aa: Elisama, omushangi womouhamba, naDelaja yaShemaia naElnatan yaAkbor naGemarja yaSafan naSedekia yaHanania pamwe novakulunhu vakwao. 13Opo nee Mikaia okwe va shiivifila adishe edi a uda, Baruk eshi e di lesha momatwi ovanhu aveshe, eendjovo domomushangwatonywa, 14opo nee ovanhu aveshe va tuma Jehud yaNetanja yaSelemja yaKus kuBaruk, ndele tava ti: “Kufa omushangwatonywa ou we u leshela ovanhu, ove u uye oku.” Ndele Baruk yaNeria okwa kufa omushangwatonywa nokwa ya kuvo. 15Ndele ove mu lombwela tava ti: “Kala omutumba ove u tu leshele.” Ndele Baruk okwe va leshela. 16Eshi va uda eendjovo odo adishe, ova haluka ndele va talafana, ndele tava lombwele Baruk, tava ti: “Eendjovo odo adishe otu noku di shiivifila ohamba.” 17Ndele ova pula Baruk tava ti: “Tu lombwela hano: eendjovo edi owe di shanga ngahelipi; oda dja kokanya kaJeremia mbela?” 18Baruk okwa nyamukula: Eendjovo odo adishe okwe di tumbulila nge nokanya kaye, ndele ame onde di shangela momushangwatonywa nondomo. 19Opo nee ovakulunhu ova lombwela Baruk: Indeni nye naJeremia mu ka hondame, paha kale nande umwe a shiiva apa mu li. 20Ndele ova ya kohamba molupale lomeni, ndele omushangwatonywa ove u fiya molupale laElisama, omushangi, ndele ova shiivifila ohamba oinima ei aishe.
21Opo nee ohamba oya tuma Jehud, a ka tale ko omushangwatonywa kolupale laElisama. Opo Jehud okwe u lesha moipafi yohamba nomoipafi yovakulunhu venya aveshe, va li ofika koshipala shohamba. 22Ndelenee ohamba oya hangika i li omutumba molupale lopokufu, osheshi okwa li ohani onhimugoi, nomundilo womakala wa li moshikwatelwa wa kala moipafi yayo. 23Ndele shimha tuu Jehud a lesha omapandja atatu ile ane, ohamba otai a kwata ndele tai a tetaula po nokambele komushangi, ndele tai a ekele moshikwatelwa shomakala, fiyo omushangwatonywa aushe wa pya po moshikwatelwa shomakala. 24Ndelenee vo inava haluka va pombaule oikutu yavo, hahamba hamalenga aye aa a uda eendjovo adishe odo. 25Ndele nande Elnatan naDelaja naGemarja va ilikana neenghono ohamba iha xwike po omushangwatonywa, yo inai va uda. 26Ndele ohamba oya lombwela Jerahmeel, omona wohamba naSeraja yaAsriel naSelemja yaAbdel va ka tale omushangi Baruk nomuxunganeki Jeremia. Ndelenee Omwene okwe va holeka.
27Ohamba eshi ya xwika po omushangwatonywa neendjovo odo da shangelwa mo, Baruk e di shanga da dja mokanya kaye, eendjovo dOmwene oda hanga Jeremia tadi ti: 28“Kufa omushangwatonywa umwe, ove u shangele mo eendjovo adishe odo dotete, da li momushangwatonywa winya wotete wa xwikwa po kuJehoiakim, ohamba yaJuda.” 29Ndele mokupopya Jehoiakim, ohamba yaJuda, u nokutya: Omwene ota ti ngaha: “Owa xwika omushangwatonywa ou nokutonga: omolwashike wa shangela mo ngaha kutya, ohamba yaBabilon otai uya shili ndele tai hanauna po oshilongo eshi novanhu noimuna ote i mane po sheke? 30Onghee Omwene ota popi Jehoiakim, ohamba yaJuda ndele ta ti ngaha: Ye ita ka kala e noludalo tali kala omutumba kolukalwapangelo laDavid. Oshimhu shaye otashi ka ekelwashi shi nangale moupyu womutenya nomoutalala woufiku, 31ndele ohandi ke mu handukila, oye mwene noludalo laye novapiya vaye molwoulunde wavo. Ndele kombada yavo nayoonakukala muJerusalem nokombada yovalumenhu vomuJuda ohandi ka eta omupya aushe ou, nde u va lombwela, nande vo inava uda nge.” 32Opo nee Jeremia okwa kufa omushangwatonywa umwe ndele te u pe Baruk omushangi, omona waNeria. Ndele ye okwa shanga eendjovo adishe ngaashi edi domomushangwatonywa wa xwikwa po momundilo kuJehoiakim, ohamba yaJuda. Ndele mwa wedwa eendjovo dihapu da fa odo.
Currently Selected:
JEREMIA 36: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
