EXODUS 25

Omwene ta lombwele eeshali di yandjelwe etwali laKalunga

1Ndele Omwene okwa popya naMoses, ndele ta ti: 2“Lombwela Ovaisraeli va etele nge eeshaliyambo, keshe umwe ngaashi omwenyo tau mu lombwele mu nokweetela nge eeshaliyambo. 3Neeshaliyambo mu noku di tambula kuvo odedi: oshingoldo noshisiliveli noshikushu, 4neengodi doluvala lexuli naditilyana nodoluvala leulu, noshiyata sholiina nomalududi oikombo, 5oikafa yeedi ya shikwa yoikombo oo, noipa, oipilangi yomwoonde, 6omahooli olamba, edimba liwa lokomuvavo noidimba ya nyika nawa yokutwimina omwifi, 7noumanya vaoniks noumanya vamwe vokutula moshikutu shokomapepe nokapapa koponhulo. 8Vo nava dikile nge etwali liyapuki, Ame ndi kale mokati kavo. 9Etwali noinima aishe yalo i ningeni naanaa pashiyelekela Ame handi ku ulikile.

Oshikefa shomhangela youkaume

10“Vo ove nokuhonga oshikefa shomuti womwoonde. Oule washo omaludimbo avali netata, nolumbubu lasho oludimbo limwe netata noule wopombada oludimbo limwe netata. 11U noku shi vaeka noshingoldoelela, meni nokombada u noku shi vaeka. U noku shi vaeka olukambo loshingoldo la dingilila, la shakena. 12Shi telekela monhelekelo eengodo nhee doshingoldo u di pangelele komaulu asho ane. Eengodo mbali kombinga imwe yasho neengodo mbali kombinga ikwao yasho. 13Ndele honga omitengi mbali domuti womwoonde ndele di vaeka noshingoldo. 14Nomitengi odo di xwekela mo meengodo di li kombinga nombinga yoshikefa, oshikefa opo shi humbatwe nado. 15Omitengi di nokukala meengodo doshikefa. Do itadi kufwa mo nande. 16Opo nee ove to tula mo moshikefa omhango ei Ame ohandi ke i ku pa.

Oshituviko shekwatakanifo

17“Ove u nokuhonga oshituviko shekwatakanifo noshingoldo shovenevene. Oule washo omaludimbo avali netata, nolumbubu lasho oludimbo limwe netata. 18Ove u nokuninga yo ovakerubi vavali voshingoldo. U noku va hambula nokutunha, va kalekela eenhele adishe mbali doshituviko shekwatakanifo. 19Ndele ninga omukerubi umwe konhele imwe nomukerubi mukwao konhele ikwao. U nokuhambula ovakerubi u va kaleke keenhele adishe mbali doshituviko shekwatakanifo. 20Ovakerubi ve nokuyelula pombada omavava avo nosho ngaha tava uvike oshituviko shekwatakanifo nomavava avo. Noipala yavo ye litaalela. Oipala yovakerubi nai taalele oshituviko shekwatakanifo. 21Ndele oshituviko shekwatakanifo shi tula kombada yoshikefa. Ndelenee moshikefa u nokutula mo omhango ei handi ke i ku pa. 22Ndele opo tuu opo Ame ohandi ke ku shakeneka nokoshituviko shekwatakanifo pokati kovakerubi vavali ava ve li koshikefa omo omhango i li, Ame ohandi ke ku lombwela adishe odo u noku di lombwela Ovaisraeli.

Oshitaafula shomingome detaliko

23“Ove u nokupangela oshitaafula shomuti womwoonde, oule washo omaludimbo avali, nolumbubu lasho oludimbo limwe noule washo wopombada oludimbo limwe netata, 24Shi vaeka noshingoldo shovenevene, ndele shi kwatifa nolukambo loshingoldo tali shi dingilile. 25Ove u noku shi hongela olukambo likwao li fike peke, tali shi dingilile a shakena po; ndele ninga vali olukambo loulenga loshingoldo tali kala kombada yalo tali li dingilile. 26Shi hambulila eengodo nhee doshingoldo. Neengodo odo u noku di kwatifila keembinga dasho nhee, opomaulu asho ane. 27Eengodo nadi kale popepi nolukambo dokuxwekela mo omitengi, oshitaafula shi shiive okuhumbatwa. 28Omitengi u noku di honga domuti womwoonde, da vaekwa oshingoldo, oshitaafula shi shiive okuhumbatwa. 29U noku shi ningila yo omalonga asho nomatiti asho noikana yasho nomaholo asho okuyamba oikunwayambo; aishe ei u noku i ninga oshingoldoelela. 30Nomingome detaliko u noku di kaleka alushe koshitaafula koshipala shange.

Oshikwatelwalamba shoshingoldo

31“Ove u nokuninga yo oshikwatelwalamba shoshingoldoelela. Olupwelele lasho nomhadi yasho i nokuhambulwa; outai vasho neembulukutu dasho neenhemo dasho, aishe kumwe i nokukala oshinhimbu shimwe. 32Musho mu nokukala eemhanga hamano. Eemhanga nhatu doshikwatelwalamba tadi kala kombinga imwe, neemhanga nhatu kombinga ikwao yoshikwatelwalamba. 33Momhanga imwe mu nokukala eenhemo nhatu ngaashi eenhemo damandel, nombulukutu imwe nonhemo imwe, nomomhanga ikwao eenhemo nhatu ngaashi onhemo yaamandel nombulukutu imwe nonhemo imwe, osho shi nokukala meemhanga adishe hamano, di li moshikwatelwalamba. 34Ndelenee moshikwatelwalamba shoovene mu nokukala outai vane ngaashi eenhemo damandel neembulukutu neenhemo. 35Koshi yomhanga keshe ku nokukala ombulukutu. Osho ngaha meemhanga adishe di li hamano doshikwatelwalamba. 36Eembulukutu dasho neemhanga dasho odi nokuhambulwa oshinhimbu shimwe shoshingoldo shovenevene. 37Ove u noku shi ningila eelamba heyali, eelamba dasho di nokutulwa mo ngaha, opo di minikile onhele yoshipala shasho. 38Oidimifo yado nomalilo ado oku nokuningwa oshingoldoelela. 39Sho noinima yasho aishe i nokuningwa oshingoldo shovenevene shi fike peekilograma omilongo nhatu nanhano. 40Ndele tala nawa u shi ninge pashiyelekela we shi ulikilwa komhunda.

Currently Selected:

EXODUS 25: OKYB

Highlight

Copy