EXODUS 24

Ehangano tali kolekwa nohonde

1Opo nee Ye okwa lombwela Moses, ndele ta ti: “Londa, u ye kOmwene onye naAron naNadab naAbihu novakulunhu omilongo heyali vOvaisraeli, mu ke mu fimaneke nokulinyongamena mu li kokule. 2Ndele Moses oye aeke na ehene popepi nOmwene, ndelenee venya vaha ehene po. Novanhu vaha londe ko pamwe naye.”

3Ndele Moses e uya nokwa hepaululila ovanhu eendjovo adishe dOmwene neenghedimhango adishe daye. Opo nee ovanhu aveshe va nyamukula nondaka imwe, ndele tava ti: “Eendjovo adishe da popiwa kOmwene ohatu ke di wanifa.” 4Ndele Moses okwa shanga eendjovo adishe dOmwene. Nongula inene ye e lilongekida nokwa tunga oaltari pefina lomhunda nomamanya omulongo naavali edimbulukifo pamapata omulongo naavali aIsrael. 5Ndele okwa tuma ovalumenhu ovanyasha Ovaisraeli. Vo ova yamba omaxwikiloyambo ndele va tomena Omwene eemhedi omapanduloyambo. 6Ndele Moses okwa kufa mohonde etata layo nokwe i tila moiyuma yeyambo, netata lohonde okwa shamina oaltari. 7Ndele okwa kufa ko oramata yehangano ndele e i leshela momatwi ovanhu. Ndele vo ova tya: “Ashishe eshi Omwene e shi tonga, ohatu ke shi wanifa nokudulika kusho.” 8Opo nee Moses okwa kufa ko ohonde nokwe i shamina kovanhu ndele ta ti: “Ohonde ei oyehangano Omwene e li ninga nanye opaendjovo adishe edi.”

9Moses naAron, Nadab naAbihu novakulunhu omilongo heyali vaIsrael va londa ko. 10Vo ova mona ko Kalunga kaIsrael, nokoshi yeemhadi daye okwa li oshinima sha fa olupanda lasafir, tashi taima ngaashi eulu lo vene. 11Ndele Ye ina kuma neke laye ovahoololwa vaIsrael, ndele vo va tala Kalunga nova lya nova nwa. 12Ndele Omwene okwa lombwela Moses: “Londa komhunda u uye kwaame u menekele po, opo ndi shiive oku ku pa oipelende yomamanya nomhango noipango nde i shangela mo oku va longa.” 13Opo nee Moses nomupiya waye Josua ova fikama. Ndele Moses okwa londa komhunda yaKalunga. 14Ndele okwa lombwela ovakulunhu: “Mu tu teelele apa fiyo hatu aluka kunye. Ndele taleni, Aron naHur ove li punye; ava ve noihokolola nava ye kuvo.” 15Moses eshi a londa komhunda, oshilemo sha uvika omhunda. 16Noshinge shOmwene sha kala komhunda yaSinai, noshilemo she i uvika omafiku ahamano. Mefiku etiheyali Ye okwa ifana Moses moshilemo. 17Okutalwa kwoshinge shOmwene momesho Ovaisraeli okwa li ngaashi omundilo tau lungwinifa konhele yomhunda. 18Ndele Moses okwa ya meni loshilemo ndele okwa londa komhunda. Ndele Moses okwa li komhunda omitenya omilongo nhee nomaufiku omilongo nhee.

Currently Selected:

EXODUS 24: OKYB

Highlight

Copy