EXODUS 26

Etwali liyapuki

1“Netwali liyapuki li nokuningwa neefaila omulongo doliina iwa ya tungwa neengodi da poshelwa kumwe neengodi domavala nodopurpuri noditilyana da fa ohonde mudo mwa fanekelwa ovakerubi. U noku di tunga ngaashi ovanongo hava tungu. 2Oule wofaila keshe u nokukala omaludimbo omilongo mbali nahetatu nomutamo wofaila keshe omaludimbo ane. Ounene weefaila u nokukala u fike pamwe. 3Eefaila nhano di nokuhondjelwa kumwe. Nosho vali eefaila nhano di nokuhondjelwa kumwe. 4Ndele u nokuhondjela komingenge dofaila yotete oumbululu veengodi doluvala leulu. Nosho yo u nokuninga komungenge wofaila yaxuuninwa yomeefaila da hondjelwa kumwe. 5Mofaila imwe namu tyuulwe oumbululu omilongo nhano, nosho yo oumbululu omilongo nhano ve nokutyuulwa komungenge wofaila ikwao. Oumbululu ve nokukala va yukililafana. 6Ove u nokuninga yo eehake doshingoldo omilongo nhano nokukwatakanifa kumwe eefaila neehake, imwe kumwe noikwao, opo etwali li ninge limwe.

7“U nokuninga vali oikutu yomalududi oikombo i ninge oshiuvikifo okuuvika etwali liyapuki: u nokuninga yo oikutu omulongo nashimwe. 8Oule woshikutu keshe omaludimbo omilongo nhatu nolumbubu loshikutu keshe omaludimbo ane. Oikutu aishe omulongo nashimwe i nokukala i fike pamwe. 9Noikutu itano u noku i hondjela kumwe i ninge shimwe, noikutu ikwao ihamano u noku i hondjela kumwe, i ninge shimwe. Noshikutu oshitihamano shi tunga we shi tonyena kumwe u shi tule komesho yetwali. 10Ndele momunghulo wofaila yaxuuninwa yomeefaila da hondjelwa mumwe, u nokuninga mo oumbululu omilongo nhano, nosho yo momunghulo wofaila yaxuuninwa yomeefaila dikwao da hondjelwa mumwe u nokuninga mo oumbululu omilongo nhano. 11Ove u nokuninga yo eehake omilongo nhano doshikushu noku di xwekela moumbululu. Ndele ove u nokukwatela kumwe etwali, opo li ninge limwe alike. 12Ndele ombinga yofaila ya xupa i nokweendjelela konima yetwali. 13Noludimbo olo tali xupu po moule wofaila nali endjelele kombinga nombinga yetwali oku li tuvika. 14Oshituviko shetwali lehangano u noku shi ninga noipa yeedi noyoikombo ya shikwa.

Eengudi detwali lehangano

15“U nokuningila etwali lehangano eengudi domwoonde da yukilila. 16Oule wongudi u nokukala eemeta nhee, noupapi wongudi keshe etata lometa. 17Mongudi keshe mu nokukala eemhanga mbali da kwatakanifwa. Osho ngaha u nokuningila eengudi adishe detwali liyapuki. 18Neengudi detwali liyapuki u nokuninga ngaha: eengudi omilongo mbali kombinga yokoumbuwanhu. 19Ove u nokuninga koshi yeengudi omilongo mbali oikwatelwamhadi omilongo nhee yoshisiliveli. Koshi yongudi imwe oikwatelwamhadi ivali keemhanga dayo mbali, noikwatelwamhadi ivali koshi yongudi ikwao keemhanga dayo mbali. 20Nokombinga ikwao yetwali liyapuki langhele koumbangalanhu eengudi omilongo mbali, 21pamwe noikwatelwamhadi yado omilongo nhee yoshisiliveli: oikwatelwamhadi ivali koshi yongudi imwe, noikwatelwamhadi ivali koshi yongudi ikwao. 22Nokombinga yokonima yetwali liyapuki, langhele kouninginino ove u nokuninga eengudi heyali. 23Nosho yo u nokuninga eengudi mbali meekolonela detwali kombinga yokonima. 24Nado di nokukala mbali di li kumwe okudja poshi fiyo opombada fiyo okombululu yotete. Osho adishe mbali. 25Hano osho ngaha tapa kala oikwatelwamhadi omulongo naihamano yoshisiliveli meengudi hetatu nokutya, oikwatelwamhadi ivali koshi yongudi imwe, noikwatelwamhadi ivali koshi yongudi ikwao.

26“Ove u nokuninga eenhikifo domwoonde: nhano keengudi dokombinga imwe yetwali liyapuki; 27neenhikifo nhano keengudi dokombinga ikwao yetwali liyapuki. Nosho yo eenhikifo nhano keengudi dokombinga yokonima yetwali liyapuki langhele kouninginino. 28Nonhiikifo yopokatielela i nokukala pokatielela keengudi komunghulo umwe fiyo okomunghulo mukwao. 29Ndele ove u nokuvaeka eengudi noshingoldo. Noumbululu neenhele deenhikifo u noku di vaeka noshingoldo. Neenhikifo yo u noku di vaeka noshingoldo. 30Osho ngaha u nokudika etwali liyapuki ngaashi wa ulikilwa komhunda.

31“Ove u nokutunga vali oshiyatatukulifo neengodi domavala nodopurpuri noditilyana da fa ohonde noliina iwa ya tungwa neengodi da poshelwa kumwe. Ove u noku shi tunga ngaashi ovanongo hava tungu, musho mwa fanekelwa ovakerubi. 32Ndele ove u noku shi endjelelifa keengudi nhee domwoonde, da vaekwa noshingoldo, nodi neehake notadi kala ofika moikwatelwamhadi ine yoshisiliveli. 33Ndele ove u nokweendjelelifa oshiyatatukulifo koshi yeehake, ndee twala ko oshikefa shoundobwedi meni konima yoshiyatatukulifo. Noshiyatatukulifo tashi ningi kunye oshitukulifo pokati kOuyapuki nOuyapuki wOuyapuki. 34Ndele nye mu nokutula oshituviko shekwatakanifo kombada yoshikefa shondobwedi mOuyapuki wOuyapuki, 35ndele tula oshitaafula pondje kombinga yoshiyatatukulifo noshikwatelwalamba kombinga yokoumbuwanhu yetwali sha shaama noshitaafula. Ndelenee oshitaafula u noku shi tula kombinga yokoumbangalanhu. 36Ove u nokuningila oshivelo shetwali oshiidilifoyata neengodi domavala nodopurpuri noditilyana da fa ohonde noliina iwa ya tungwa neengodi da poshelwa kumwe, oshilonga shomaluvala mahapu. 37Ndele ningila oshiidilifoyata eengudi nhano domwoonde no di vaeka noshingoldo. Neehake dado yo di nokukala oshingoldo. Nokudo u nokuteleka monhelekelo oikwatelwamhadi itano yoshikushu.

Currently Selected:

EXODUS 26: OKYB

Highlight

Copy