2 TIMOTEUS 3
3
Momafiku axuuninwa ouyuki otau pumbu
1Ndelenee kala u shi shii, momafiku axuuninwa otape ke uya omafimbo madjuu, 2osheshi ovanhu otava kala nokulihola voovene, ovanalwisho voimaliwa, ovalitangi, novalinenepeki novasheki, vehe neduliko kovakulunhu, vehe shii kupandula, vehe neitavelo, 3vehe nohole, vehe nombili, ovalundili, ovahenalidiliko, ovakwanyanya, ovatondi vouwa, 4ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga; 5ovo ve nemoniko longaho letilokalunga, ndelenee tava shilike eenghono dalo. Naava ve li ngaha, va kukuma. 6Vamwe vomuvo hava pumine momaumbo, tava heke ovakainhu ava va lololwa koulunde, ndele tava telaanifwa kouhalu u lili nau lili, 7ava tava kala alushe nokulilonga, ndelenee vo kave na apa tava ka fika keshiivo loshili. 8Ngaashi naanaa Jannes naJambres va li va twa ondubo naMoses, osho yo ava ve nondubo noshili, vo ovanhu va nyonauka meendunge, itava dulu momayeleko eitavelo. 9Ndelenee vo kave na apa tava ehene komesho, osheshi oulai wavo otau ka holokela aveshe, ngaashi waavenya wa holoka yo.
Omakumaido
10Ndelenee ove wa ninga omushikuli wange momalongo nomeenghedi, meemhangela, meitavelo, moutalanheni, mohole, melididimiko, 11momataatao, momayehameko, ngaashi ame nda hepekelwa muAntiokia nomuIkonium nomuListra. Omataatao oku fike peni nde a humbata! Ndelenee Omwene okwa xupifa nge mo muo aeshe. 12Ndele aveshe ovo va hala okukala metilokalunga muKristus Jesus, otava ka hepekwa. 13Ndelenee ovanhu vai novakengeleledi otava ka ehena komesho mowii nokupukifa nokupuka. 14Ndelenee ove kala mwaai we i longwa ndele ou i shii shili, osheshi ou mu shii ou e i ku longa, 15ndele omishangwa diyapuki ou di shii nghee wa dja mounona woye, edi di neenghono doku ku longa eendunge, u xupifwe mokwiitavela Kristus Jesus. 16Omishangwa adishe da yandjwa keenghono dOmhepo yaKalunga odi shii kulonga nokukumaida nokupukulula nokutekula mouyuki, 17omunhu womuKalunga opo a kale a wana nokwa wanenena oshilonga keshe shiwa.
Currently Selected:
2 TIMOTEUS 3: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
