2 TIMOTEUS 2
2
Likolelela mefilonghenda
1Oove hano, omumwange, likolelela mefilonghenda eli li li muKristus Jesus; 2ndele osho wa uda kwaame mokati keendobwedi dihapu, shi yandja kovalumenhu ve shi okulineekelwa, va wana oku shi longa vakwao yo.
3Ove, humbata oudjuu, ngaashi omukwaita muwa waKristus Jesus. 4Kape na omukwaita te lipyakidile oipalwifa, osheshi a hala okuwapalela ou, e mu shivila moukwaita. 5Ndele ou ta kala mefiyafano, ita pewa oshishani, ngeenge ita fiyafana po pamaufo. 6Omunepya ou te lihepeke oye e nokupewa tete oiimati. 7Diladila nawa eshi handi shi ku lombwele, osheshi Omwene ote ku pe omayele moinima aishe.
8Dimbulukwa, Jesus Kristus, ou a nyumunwa movafi, Oye a dja mepata laDavid pavaengeli lange, 9mulo handi humbata oudjuu fiyo omeemhango, nda fa omukolokoshi; ndelenee eendjovo daKalunga inadi mangwa. 10Onghee ohandi lididimikile ashishe eshi omolwovahoololwa, opo navo yo va mone exupifo li li muKristus Jesus noshinge shaalushe. 11Ondjovo ei oi shii okulineekelwa:
“Osheshi ngeenge twa fyeni pamwe naye,
ohatu ka kaleni yo tu nomwenyo pamwe naye;
12ngeenge hatu lididimikeni,
ohatu ka kaleni nokupangela yo pamwe naye;
ndelenee ngeenge ohatu mu likale,
Oye ote ke tu likala yo.
13Fye ngeenge twa kala inatu diinina,
Oye ta kala omudiinini,
osheshi Ye ita dulu okulikala Ye mwene.”
Omukriste ne livangeke eemhata neendjovo dongaho
14Va dimbulukifa oinima ei noku va lombwela koshipala shOmwene, vaha patafane eendjovo dongaho dihe na nande ekwafo, ndelenee otadi kanifa ovapwilikini. 15Diinina, u monike kuKalunga oove omufindani momayeleko, omulongi ita fi ohoni oshilonga shaye, e shii okutukula nawa ondjovo yoshili. 16Ndelenee livangeka eendjovo da nyata nomapopyaano ongaho, osheshi ava tava kwatafana nado, ovo tava ka pwila mo moudinikalunga, 17ndele eendjovo davo otadi ka tandavela muvo ngaashi oudu wombulwa, vamwe vomuvo Himeneus naFiletus, 18vo ova kanduka mo moshili, eshi tava ti: enyumuko ola ningwa nale, ndele tava nyono po eitavelo lavamwe. 19Nande ongaha, ekanghameno la pama laKalunga tali kala la pamenena, ndele ou na oshihako eshi: “Omwene ava vaye oku va shii, nakeshe tuu ou ta ifana edina lOmwene, na efe ouhenouyuki.” 20Ndelenee meumbo linene ihamu kala oiyuma yoshingoldo noyoshisiliveli aike, ohamu kala yo yoiti noyedu, imwe oya fimana, ikwao inai fimana. 21Hano, ngeno ope na ou te liyelifa mwaai, ye ota ningi oshiyuma sha fimana sha yapulwa shi noshilonga kumwene washo, sha wapalela keshe tuu oshilonga shiwa.
Shikuleni ouyuki nombili nelididimiko
22Ndelenee inda onhapo yokahalu kounyasha, ndele shikula ouyuki neitavelo, nohole nombili pamwe naava tava ifana Omwene nomutima wa yela. 23Ndele hanyena omapulapulo a nyika oulai, ndele ehe neendunge, osheshi u shi shii, oo otaa dala eemhata; 24ndelenee omupiya wOmwene ina wapala okutwa eemhata, oye e nokukala e nonheni naaveshe, omulongi ta shiiva okulonga nokulididimikila owii; 25ye e nokupukulula ovanandubo e nombili, ngeno Kalunga e va pe elidilululo opo va shiive oshili, 26ndele va ninge vali eendunge, va kololokwe, va manguluke mo momwiyo waSatana, ou e va manga okulonga ehalo laye.
Currently Selected:
2 TIMOTEUS 2: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
