2 TIMOTEUS 4
4
Diinina oinakuwanifwa yoye
1Ohandi ku anifa koshipala shaKalunga noshOmwene Kristus Jesus, ou te uya okutokola ovanamwenyo novafi okokuholoka kwaye nokouhamba waye, 2udifa ondjovo; shi ninga mefimbo liwa nomefimbo lii; hanyena, vela ombedi, kumaida monheni nokulonga, 3osheshi otape uya efimbo vo tava kenyanana elongo la yuka, ndelenee pauhalu wavo otave ke likongela ovalongi ngaashi omatwi avo taa nyuwa. 4Nomatwi avo otave a pilike koshili, ndele tava pwilikine eengano. 5Ndelenee ove kala omulidiliki moinima aishe, humbata oudjuu, longa oshilonga shomuudifi wevaengeli, wanifa nawa oshilongayakulo shoye.
Oshishani shouyuki shomufindani
6Osheshi ame ohandi tilwashi nokuli ngaashi eyambo ndele efimbo lange lokutukuka ola fika. 7Ame onda lwa olwoodi liwa, onda xulifa etondoko, neitavelo nde li diinina. 8Opo nee nda tuvikililwa oshishani shouyuki handi ke shi pewa mefiku linya kOmwene, omutokoli omuyuki, ndelenee haame andike, naaveshe ava ve hole eholoko laye.
Omakumaido nomakundifo
9Endelela diva u uye kwaame. 10Osheshi Demas mokuhola ounyuni ou wopaife, okwa fiya nge po, ndele ta i kuTessalonika, Kreskens okwa ya kuGalatia, Titus okuDalmatia. 11Lukas oye aeke a kala pwaame. Kufa Markus, mu uye naye, osheshi ye e noshilonga kwaame a yakule nge. 12Tikikus onde mu tuma kuEfeso. 13Elwakani lange linya nda fiya kuTroas meumbo laKarpus, li etelela, fiku to uya, nomishangwa, unene omishangwa edi domapergamenti.
14Aleksander, omuhambwidi woshikushu, okwa ninga nge nai unene; Omwene ote ke mu pa shi fike poilonga yaye. 15Naave yo mu londoka, osheshi ye okwa lwifa eendjovo detu neenghono.
16Moihokolola yange yotete kapa li nande umwe ta popile nge, ndelenee aveshe ova fiya nge po. Eshi inashi va velifa eembedi. 17Ndelenee Omwene okwa kala pamwe naame, nokwa pameka nge, eudifo levaengeli opo li wanifwe kwaame novapaani aveshe ve li ude; ndele ame onda xupifwa mokanya konghoshi. 18Ndele Omwene ota ka mangulula nge mo mukeshe tuu oshilonga showii, ndele ta ka xupifa nge mouhamba waye womeulu. Kuye efimano alushe fiyo alushe. Amen.
19Kundifa Priskila naAkwila neumbo laOnesiforus. 20Erastus okwa fyaala muKorinto, Trofimus onde mu fiya muMileto, ta vele. 21Endelela, u uye fimbo okufu inaku ya. Eubulus ote ku kundile po naPudens naLinus naKlaudia novamwatate aveshe.
22Omwene Jesus Kristus na kale nomhepo yoye. Efilonghenda nali kale nanye.
Currently Selected:
2 TIMOTEUS 4: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
