ᒫᑯᓯᐅᑉ ᐊᒡᓚᖏᑦ 8
8
ᔩᓱᓯᐅᑉ ᓂᕆᑎᑦᓯᓂᖓ ᐃᓄᖕᓂᒃ 4,000ᓂᒃ
ᒫᑎᐅᓯ 15:32-39
1ᐅᓪᓗᓂ ᑍᒃᑯᓇᓂ, ᐃᓄᒐᓴᒡᔪᐊᑦ ᑲᑎᒪᓕᕆᕗᑦ, ᑖᒃᑯᐊ ᓂᕆᔭᒃᓴᖃᖏᒻᒪᑕ, ᐃᓕᓐᓂᐊᖅᑎᓂ ᕾᖁᕔᑦ ᐅᖃᐅᑎᓪᓗᒋᑦ, 2“ᐅᑯᐊ ᐃᓄᒐᓴᒡᔪᐊᑦ ᐃᓚᑦᓱᒋᕙᒃᑲ, ᐅᕙᑦᑎᓐᓃᓕᕐᖕᒪᑕ ᐅᓪᓗᓂᒃ ᐱᖓᓱᓂᒃ, ᓂᕿᒃᓴᖃᕋᑎᒃ; 3ᐊᖏᕐᕋᖁᒍᒃᑭᑦ ᓱᓇᒥᒡ ᓂᕆᑎᓐᓇᒋᑦ, ᐊᖏᕐᕋᐅᓕᕐᓗᑎᒃ ᓄᑮᕈᑎᓂᐊᖅᐳᑦ; ᐃᓚᖏᑦ ᐅᖓᓯᒃᑐᒥᑦ ᐱᓯᒪᖕᒪᑕ.”
4ᐃᓕᓐᓂᐊᖅᑎᖏᑕ ᑭᐅᕚᑦ, “ᖃᓄᖅ ᑕᒫᓂ ᓱᓇᖃᔪᐃᑦᑐᒥᑦ ᐅᑯᐊ ᐃᓄᒐᓴᐃᑦ ᓂᕆᔭᒃᓴᖅᑖᕋᔭᖅᐹᑦ?”
5ᔩᓱᓯᐅᑉ ᐊᐱᕆᕔᑦ, “ᖃᑦᓯᓂᒃ ᓂᐊᖂᔭᖃᖅᐱᓰ?”
ᑖᒃᑯᐊ ᐅᖃᖅᐳᑦ, “7ᓂᒃ.”
6ᔩᓱᓯᐅᑉ ᐃᓄᒐᓴᒡᔪᐊᑦ ᓄᓇᒧᑦ ᐃᖏᖁᕔᑦ; ᓂᐊᖂᔧᑦ 7 ᑎᒍᕔᑦ, ᖁᔭᓕᔭᕇᕋᒥᓗ ᐊᕕᒡᓗᒋᑦ ᐃᓕᓐᓂᐊᖅᑎᒥᓄᑦ ᑐᓂᕔᑦ ᐃᓄᒐᓴᒡᔪᐊᓄᑦ ᑐᓂᐅᖅᑬᖁᓪᓗᒋᑦ; ᑕᕝᕙ ᐃᓕᓐᓂᐊᖅᑎᖏᑦ ᑍᒤᓕᐅᖅᐳᑦ. 7ᐃᖃᓗᑯᓗᖕᓂᒃᑕᐅᖅ ᐅᓄᖏᑦᑐᓂᒃ ᐱᑕᖃᕆᕗᑦ; ᖁᔭᓕᑦᔪᑎᒋᔭᕇᕋᒥᒋᑦ, ᐃᓕᓐᓂᐊᖅᑎᓂ ᐃᓄᖕᓄᑦ ᑐᓂᐅᖅᑬᖁᒋᕔᑦ. 8ᓂᕆᕗᑦ, ᓈᒻᒪᒃᓯᓪᓗᑎᒃ; ᐃᕕᐅᔭᓂᒡᓗ 7ᓂᒃ ᑕᑍᕗᑦ ᑖᒃᑯᐊ ᐊᒥᐊᒃᑯᖏᓐᓂᒃ ᐊᒡᒍᖅᓯᒪᔪᓂᒃ. 9ᐃᓄᒐᓴᒡᔪᐊᑦ ᐅᓄᕐᖕᓂᖃᓚᐅᖅᐳᑦ 4,000 ᖃᓂᒋᔮᓂ. 10ᔩᓱᓯᐅᑉ ᐃᓄᐃᑦ ᐊᐅᓪᓚᖁᓕᖅᐰᑦ; ᑕᕝᕔᓐᓇᕐᓗ ᐅᒥᐊᒧᑦ ᐃᑭᕗᖅ ᐃᓕᓐᓂᐊᖅᑎᓂ ᐃᓚᒋᓪᓗᒋᑦ, ᑖᓪᒪᓅᑕᐅᑉ ᖃᓂᒋᔮᓄᐊᖅᐳᑦ.
ᐹᕆᓯᑦ ᑲᒪᓇᖅᑐᓕᖁᔨᓂᖓᑦ ᔩᓱᓯᒥᒃ
ᒫᑎᐅᓯ 16:1-4
11 #
ᒫᑎᐅᓯ 12:38; ᓘᑲᓯ 11:16. ᐹᕆᓯᑦ ᐃᓚᖏᑦ ᔩᓱᓯᒧᐊᖅᐳᑦ ᐅᖃᖃᑎᒋᓪᓗᒍ ᐆᒃᑐᖅᐹᑦ, ᕿᓚᖕᒥᑦ ᓇᓗᓁᒃᑯᑕᕐᖕᒥᒃ ᑲᒪᓇᖅᑐᒥᒃ ᓴᖅᑭᑎᑦᓯᖁᓪᓗᒍ. 12#ᒫᑎᐅᓯ 12:39; ᓘᑲᓯ 11:29.ᔩᓱᓯᓕ ᐊᖏᔪᒥᒃ ᐊᓂᖅᓴᐅᒥᓪᓗᓂ ᐅᖃᐅᑎᕔᑦ, “ᓱᖕᒪ ᐅᓪᓗᒥᐅᓕᖅᑐᖅ ᐃᓄᐃᑦ ᑲᒪᓇᖅᑐᓕᖁᔨᕚᑦ? ᓱᓕᔪᒥᒃ ᐅᖃᐅᑎᕙᑦᓯ, ᓇᓗᓁᒃᑯᑕᕐᖕᒥᒃ ᐅᓪᓗᒥᐅᔪᖅ ᐃᓄᐃᑦ ᑐᓂᓯᕕᐅᓂᐊᓐᖏᓚᑦ.”
13ᕿᒪᒃᐰᑦ ᑕᕝᕙ, ᐅᒥᐊᒧᑦ ᐃᑭᒋᕗᖅ ᑕᓯᐅᑉ ᐊᑭᐊᓄᐊᓕᕐᓗᓂ.
ᐹᕆᓯᑦ ᐃᕉᑕᓯᐅᓪᓗ ᐳᕙᓪᓚᖅᑯᑎᖏᑦ
ᒫᑎᐅᓯ 16:5-12
14ᐃᓕᓐᓂᐊᖅᑎᖏᑦ ᓂᐊᖂᔭᒡᒋᕆᐊᒃᓴᖅ ᐳᐃᒍᖅᑐᕕᓂᐅᖕᒪᑕ; ᐊᑕᐅᓯᕐᖕᒥᒃ ᓂᐊᖂᔭᒥᒃ ᐱᓯᒪᒐᓗᐊᖅᐳᑦ ᑕᕝᕙᓂ ᐅᒥᐊᒥ. 15#ᓘᑲᓯ 12:1.ᖃᐅᔨᒪᓇᓱᐊᖁᓪᓗᒋᑦ ᐅᖃᐅᑎᕔᑦ, “ᑲᒪᑦᓯᐊᕆᑦᓯ, ᐅᑦᔨᖅᓱᕐᓗᓯ ᐹᕆᓯᑦ ᐃᕉᑕᓯᐅᓪᓗ ᐳᕙᓪᓚᖅᑯᑎᖏᓐᓂᒃ.”#8:15 ᐳᑦᔪᓯᐅᑎᖏᓐᓂᒃ
16ᐃᓕᓐᓂᐊᖅᑎᖏᑦ ᐃᒻᒥᖕᓄᑦ ᐅᖃᖃᑎᒌᓕᖅᐳᑦ, ᐅᖃᕐᓗᑎᒃ, “ᑍᒫᖑᓇ ᐅᖃᖅᑐᖅ ᓂᐊᖂᔭᖃᖏᓐᓂᑦᑎᓐᓄᑦ.”
17ᔩᓱᓯᐅᑉ ᖃᐅᔨᒪᒐᒥᒋᑦ, ᐅᖃᐅᑎᕔᑦ, “ᓱᖕᒪᑦ ᐃᓕᑦᓯᓐᓄᑦ ᐅᖃᖃᑎᒌᒃᐱᓰ ᓂᐊᖂᔭᖃᖏᓐᓂᑦᓯᓐᓂᒃ? ᓱᓕ ᖃᐅᔨᒪᓐᖏᓚᓰ ᐅᕝᕙᓗ ᑐᑭᓯᓐᖏᓚᓰ ᐆᒻᒪᑎᓯ ᓯᑎᔪᐊᓘᕚᑦ? 18#ᔨᕆᒤᐊ 5:21; ᐃᓯᑭᐊᓕ 12:2; ᒫᑯᓯ 4:12.ᐃᔨᖃᕐᓗᓯ ᑕᑯᔪᓐᓇᓐᖏᓚᓰ? ᓯᐅᑎᖃᕐᓗᓯᓗ ᑐᓴᕈᓐᓇᓐᖏᓚᓰ? 19ᐃᖅᑲᐅᒪᓐᖏᓚᓰ ᓂᐊᖂᔧᑦ ᑕᓪᓕᒪᑦ ᐊᒡᒍᕋᒃᑭᑦ ᐃᓄᖕᓄᑦ 5,000ᓄᑦ, ᖃᑦᓯᓂᒃ ᐃᕕᐅᔭᓂᒃ ᐊᒥᐊᒃᑯᓂᒃ ᑕᑍᓚᐅᖅᐱᓰ?” ᑖᒃᑯᐊ ᐅᖃᐅᑎᕚᑦ, “12ᓂᒃ ᑕᑍᓚᐅᖅᐳᒍᑦ.”
20“ᓂᐊᖂᔭᓂᒡᓗ 7ᓂᒃ ᐊᒡᒍᐃᒐᒪ ᐃᓄᖕᓄᑦ 4,000ᓄᑦ, ᖃᑦᓯᓂᒃ ᐃᕕᐅᔭᓂᒃ ᑕᑍᓚᐅᖅᐱᓯ ᐊᒥᐊᒃᑯᖏᓐᓂᒃ?”
ᐅᖃᐅᑎᕚᑦ, “7ᓂᒃ ᑕᑍᓚᐅᖅᐳᒍᑦ.”
21ᐅᖃᐅᑎᕔᑦ, “ᓱᓕ ᑐᑭᓯᓐᖏᓚᓰ?”
ᔩᓱᓯᐅᑉ ᑕᐅᑐᖏᑦᑐᒥᒃ ᑕᐅᑐᓕᖅᑎᑦᓯᓂᖓ ᐱᑦᓮᑕᒥ
22ᐱᑦᓮᑕᒧᑦ ᑎᑭᑉᐳᑦ, ᐃᓄᐃᑦ ᐃᓚᖏᑦ ᑕᕝᕗᓐᖓᐅᑦᔨᕗᑦ ᑕᐅᑐᖏᑦᑐᒥᒃ, ᕿᓄᕕᒋᕚᑦ ᑖᑦᓱᒥᖓ ᐊᒃᑐᖅᓯᖁᓪᓗᒍ. 23ᑕᐅᑐᖏᑦᑐᖅ ᑕᓯᐅᕐᓗᒍ ᓄᓇᓖᑦ ᓯᓚᑖᓄᐊᕈᑎᕚ; ᐃᔨᖏᒃ ᓄᕙᒥᑦᑕᓚᐅᕐᓗᒋᒃ ᐸᑎᒻᒥᓚᐅᕐᓗᒍ ᐊᐱᕆᕚ, “ᓱᓇᑐᐃᓐᓇᒥᒃ ᑕᑯᕖᑦ?”
24ᑕᑯᓇᓱᐊᕋᒥ ᐅᖃᖅᐳᖅ, “ᐃᓄᖕᓂᒃ ᑕᑯᕗᖓ; ᑭᓯᐊᓂ ᓇᐹᖅᑑᔮᖅᑐᑦ ᐱᓱᑲᑕᒃᑐᑦ.”
25ᑕᕝᕙ ᐃᔨᖏᒃ ᐊᒃᑐᒃᑲᓐᓂᖅᐹᒃ; ᑕᕝᕙ ᑕᑯᑦᓯᐊᕋᓱᐊᕋᒥ ᐃᔨᖏᒃ ᑕᐅᑐᖕᓂᕆᓚᐅᖅᑕᒥᑐᑦ ᑕᐅᑐᑦᓯᐊᓕᖅᐴᒃ, ᑕᒤᓐᓂᒃ. 26ᑕᕝᕙ ᐊᖏᕐᕋᖁᓕᖅᐹ ᐅᖃᐅᑎᓪᓗᒍᓗ, “ᓄᓇᓕᖕᓄᑦ ᑕᕝᕗᖓ ᐃᑎᖅᑍᓕᒋᑦ.”
ᐲᑦᑐᕉᓯᐅᑉ ᔩᓱᓯᒥᒃ ᓇᓗᓁᖅᓯᓂᖓ ᙭ᔅᑑᓯᐅᓂᖓᓂᒃ
ᒫᑎᐅᓯ 16:13-20; ᓘᑲᓯ 9:18-21
27ᐃᓕᓐᓂᐊᖅᑎᓂ ᐃᓚᒋᓪᓗᒋᑦ ᐊᐅᓪᓚᖅᐳᑦ, ᓄᓇᓕᖕᓄᑦ ᓯᓴᕆᐊ ᐱᓕᐰᑉ ᖃᓂᒋᔮᓄᑦ; ᐊᖅᑯᑖᓂ ᐱᓱᒃᓗᑎᒃ ᐃᓕᓐᓂᐊᖅᑎᓂ ᐊᐱᕆᕔᑦ, “ᐃᓄᐃᑦ ᑭᓇᐅᓇᓱᒋᕚᖔ?”
28 #
ᒫᑯᓯ 6:14,15; ᓘᑲᓯ 9:7,8. ᑖᒃᑯᐊ ᑭᐅᕚᑦ, “ᐃᓚᖏᑕ ᔪᐊᓇᓯ ᐹᑉᑎᑎᕆᔨᐅᓇᓱᒋᕚᑎᑦ; ᐃᓚᖏᑕᓕ ᐃᓔᑦᔭᐅᓇᓱᒋᕚᑎᑦ; ᐃᓚᖏᓐᓄᑦ ᓇᓚᐅᑦᑍᔪᓄᑦ ᐃᓚᒋᔭᐅᓇᓱᒋᔭᐅᕗᑎᑦ.”
29 #
ᔪᐊᓇᓯ 6:68,69. ᐊᐱᕆᕔᑦᓕ, “ᐃᓕᑦᓯᓕ ᑭᓇᐅᓇᓱᒋᕕᓯᓐᖔ?”
ᐲᑦᑐᕉᓯᐅᑉ ᑭᐅᕚ, “᙭ᔅᑑᓯᐅᕗᑎᑦ.”#8:29 “᙭ᔅᑑᓯ” “ᒥᓮᐊᓯ” ᐊᑦᔨᒌᖕᒪᑎᒃ ᑐᑭᖃᖅᐳᖅ ᐅᖅᓱᖅᑎᑕᐅᓯᒪᔪᖅ ᓂᕈᐊᖅᑕᐅᓯᒪᓂᕐᖕᒥᓄᑦ
30ᔩᓱᓯᐅᑉ ᐃᓂᖅᑎᒪᕆᒃᐰᑦ ᑭᓇᑐᐃᓐᓇᕐᖕᒧᑦ ᐅᖃᖁᓇᒋᑦ ᑭᓇᐅᓂᕐᖕᒥᓂᒃ.
ᔩᓱᓯᐅᑉ ᐅᖃᐅᓯᖃᕐᖕᓂᖓ ᐋᓐᓂᐊᑎᑕᐅᓂᒃᓴᒥᓂᒃ ᑐᖁᑕᐅᓂᒃᓴᒥᓂᒡᓗ
ᒫᑎᐅᓯ 16:21-28; ᓘᑲᓯ 9:22-27
31ᑕᑉᕙ ᐃᓕᓐᓂᐊᖅᑎᓂ ᐊᔪᕆᖅᑐᖅᐰᑦ ᐃᓅᑉ ᐃᕐᖕᓂᖓ ᐋᓐᓂᐊᑎᑕᐅᔭᕆᐊᖃᕐᖕᓂᖓᓂᒃ ᐊᖏᔪᒥᒃ, ᔪᑎᑦ ᐊᖓᔪᖅᑳᖏᓐᓄᑦ ᓇᕐᕈᒋᔭᐅᒻᒪᕆᒍᒫᕐᖕᓂᒥᓂᒃ ᑐᓂᕐᕈᓯᖅᑎᑦᓯᔨᓪᓗ ᐊᖓᔪᖅᑳᖏᓐᓄᑦ, ᐱᖁᔭᓂᒡᓗ ᐃᓕᓮᔨᓄᑦ, ᑐᖁᑕᐅᔪᒫᕐᖕᓂᒥᓂᒡᓗ, ᐅᓪᓗᐃᑦ ᐱᖓᔪᐊᓐᓂ ᒪᑭᑦᓱᒫᕐᖕᓂᒥᓂᒃ. 32ᑕᒪᑐᒥᖓ ᐊᓐᖏᒍᑎᓇᒋᑦ ᐅᖃᐅᑎᕔᑦ. ᐲᑦᑐᕉᓯᐅᑉ ᓴᓂᕐᕙᖃᑎᒋᓪᓗᒍ ᐃᓂᖅᑎᒻᒪᕆᓕᖅᐹ. 33ᐃᓕᓐᓂᐊᖅᑎᒥᓄᑦ ᕿᕕᐊᕐᓗᓂ, ᐲᑦᑐᕉᓯ ᓱᐊᒃᐹ, ᐅᖃᕐᓗᓂ, “ᓵᑖᓇᓰ ᑐᓄᓐᓄᐊᕆᑦ! ᐃᓱᒪᒋᔧᑦ ᒎᑎᒥᑦ ᐱᖏᒻᒪᑦ, ᐃᓄᖕᒥᓪᓕ ᐱᕗᖅ.”
34 #
ᒫᑎᐅᓯ 10:38; ᓘᑲᓯ 14:27. ᔩᓱᓯ ᐃᓄᖕᓂᒃ ᐃᓕᓐᓂᐊᖅᑎᒥᓂᒡᓗ ᕾᖁᔨᕗᖅ ᐅᖃᐅᑎᓪᓗᒋᑦ, “ᐅᕙᓐᓂᒃ ᒪᓕᒍᒪᔪᖅ, ᐃᒻᒥᓂᒃ ᐃᓱᒪᒋᔪᒃᓴᐅᓐᖏᓚᖅ ᓴᓐᓂᖓᔪᓕᖕᒥᓂᒡᓕ ᐃᖅᓱᒡᓗᓂ ᐅᕙᓐᓂᒃ ᒪᓕᒃᑐᒃᓴᐅᕗᖅ. 35#ᒫᑎᐅᓯ 10:39; ᓘᑲᓯ 17:33; ᔪᐊᓇᓯ 12:25.ᓇᓪᓕᐊᑦ ᐃᓅᓯᕐᖕᒥᓂᒃ ᐱᐅᓕᒃᓯᔪᒪᔪᖅ ᐊᓯᐅᔨᓂᐊᖅᐳᖅ; ᓇᓪᓕᐊᓪᓕ ᐃᓅᓯᕐᖕᒥᓂᒃ ᐊᓯᐅᔨᔪᖅ ᐅᕙᓐᓂᒃ ᐱᑦᔪᑎᖃᕐᓗᓂ ᐅᖃᐅᓰᓪᓗ ᑐᓴᕈᒥᓇᖅᑐᑦ ᐱᑦᔪᑎᒋᓗᒋᑦ ᑖᓐᓇ ᐃᓅᓯᕐᖕᒥᓂᒃ ᐱᐅᓕᒃᓯᓂᐊᖅᐳᖅ. 36ᐃᓄᒃ ᓱᓇᒥᒃ ᐱᕙᓪᓕᐅᑎᖃᕋᔭᖅᐹ ᓯᓚᕐᔪᐊᓕᒫᒥᒃ ᐱᖃᓕᕋᓗᐊᕈᓂ ᓇᖕᒥᓂᕐᓗ ᐃᓅᓯᕐᖕᒥᓂᒃ ᐊᓯᐅᔨᓗᓂ? 37ᓱᓇᒥᒃ ᑐᓂᓯᔪᒃᓴᐅᕚ ᐃᓅᓯᖓᑕ ᐅᑎᖅᑎᑕᐅᑦᔪᑎᒃᓴᖓᓂᒃ? 38ᓇᓪᓕᐊᑦ ᐅᕙᓐᓂᒃ ᑲᓐᖑᓲᑎᖃᖅᐸᑦ ᐊᔪᕆᖅᑐᐃᑦᔪᑎᒋᔭᓐᓂᒡᓗ ᐅᕙᓂ ᓯᓚᕐᔪᐊᕐᖕᒥ ᒎᑎᖃᖏᑦᑐᓂ ᐱᐅᖏᑦᑐᓕᔪᓂᓗ, ᐃᓅᑉ ᐃᕐᖕᓂᖓᑕ ᑲᓐᖑᒋᔪᒫᕆᕚ, ᑎᑭᓕᕈᓂ ᐊᑖᑕᖓᑕ ᓂᖅᑐᕐᖕᓇᕐᖕᓂᕐᔪᐊᖓᓂ ᐂᖏᓖᓂ ᐃᑦᔪᕐᖕᓁᑦᑐᑦ ᐱᖃᑎᒋᓗᒋᑦ.”
Currently Selected:
ᒫᑯᓯᐅᑉ ᐊᒡᓚᖏᑦ 8: EAIB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.