ᒫᑯᓯᐅᑉ ᐊᒡᓚᖏᑦ 6
6
ᔩᓱᓯᐅᑉ ᓇᕐᕈᒋᔭᐅᓂᖓ ᓈᓴᕇᑎᒥ
ᒫᑎᐅᓯ 13:53-58; ᓘᑲᓯ 4:16-30
1ᔩᓱᓯ ᑕᕝᕙᓐᖓᑦ ᐊᐅᓪᓚᕋᒥ ᓄᓇᑐᖃᒥᓄᐊᖅᐳᖅ; ᐃᓕᓐᓂᐊᖅᑎᖏᑕ ᒪᓕᒃᐹᑦ. 2ᓴᐸᑎᒥᒃ ᐊᔪᕆᖅᑐᐃᓕᖅᐳᖅ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖓᓐᓂ; ᐃᓄᐃᑦ ᐊᒥᓱᑦ ᐅᖃᓪᓚᒃᑎᓪᓗᒍ ᑐᓵᔪᑦ ᑕᒪᕐᖕᒥᒃ ᑲᒪᓂᐊᖅᐳᑦ, ᐅᖃᕐᓗᑎᒃ, “ᓇᑭᒻᒪᑯᐊ ᐃᓕᑕᕕᓂᐊᓗᖏᑦ ᖃᓄᕐᖑᓇ ᓯᓚᑦᑐᖅᑐᕕᓂᖅ? ᖃᓄᕐᓗ ᑲᒪᓇᖅᑐᐊᓗᖕᓂᒃ ᐱᓇᓱᐊᖃᑦᑕᖅᐸ? 3ᕿᔪᓕᕆᔨᐅᓐᖏᓛᖅ ᒥᐊᕆᐅᑉ ᐃᕐᖕᓂᖓ ᖃᑕᓐᖑᑎᖏᓪᓗ ᔧᒥᓯ, ᔫᓯᓗ, ᔫᑕᓯᓗ, ᓮᒨᓂᓗ ᓇᔭᖏᓪᓗ ᓇᔪᖅᑎᒋᓐᖏᓚᕘᑦ?” ᑍᒤᒻᒪᑦ ᑲᒪᒋᔪᒪᔪᓐᓃᖅᐹᑦ.
4 #
ᔪᐊᓇᓯ 4:44. ᔩᓱᓯᐅᑉ ᐅᖃᐅᑎᕔᑦ, “ᓇᓚᐅᑦᑍᔪᖅ ᐅᐱᒋᔭᐅᓂᑭᑦᑑᕗᖅ, ᓄᓇᑐᖃᕐᖕᒥᓂ, ᐃᓚᒥᓂ, ᐊᖏᕐᕋᒥᓂᓗ.”
5ᑕᕝᕙᓂ ᑲᒪᓇᖅᑐᓕᔪᓐᓇᓐᖏᓚᖅ ᖃᓄᑐᐃᓐᓇᖅ, ᖃᓂᒪᔪᓪᓕ ᐃᓔᓐᓇᖏᑦ ᐸᑎᒻᒥᕔᑦ ᐋᖅᑭᒃᑕᐅᓪᓗᑎᒡᓗ. 6ᔩᓱᓯ ᑲᒪᓂᐊᖅᐳᖅ, ᐃᓄᐃᑦ ᐅᒃᐱᕈᓱᖏᓐᓂᖏᓐᓂᒃ.
ᔩᓱᓯᐅᑉ ᐃᓕᓐᓂᐊᖅᑎᒥᓂᒃ 12ᓂᒃ ᑎᓕᓯᓂᖓ
ᒫᑎᐅᓯ 10:5-15; ᓘᑲᓯ 9:1-6
ᑭᖑᓂᖓᒍᑦ ᓄᓇᓕᖕᓄᐊᖅᐳᖅ ᑕᒫᓂ ᖃᓂᒋᔮᓃᑦᑐᓄᑦ ᐊᔪᕆᖅᑐᐃᓪᓗᓂ. 7ᐃᓕᓐᓂᐊᖅᑎᓂ 12 ᕾᖁᕔᑦ, ᑎᓕᓪᓗᒋᑦ ᒪᕐᕉᓈᖅᑎᓪᓗᒋᑦ, ᐱᔪᓐᓇᕐᖕᓂᖅᑖᖅᑎᓪᓗᒋᓪᓗ ᐊᓂᕐᖕᓂᕐᓗᖕᓂᒃ ᐊᓂᑎᑦᓯᔪᓐᓇᕐᖕᓂᕐᖕᒥᒃ, 8ᐃᒫᒃ ᐅᖃᐅᑎᕔᑦ, “ᓱᓇᑐᐃᓐᓇᕐᖕᒥᒃ ᓇᒃᓴᖅᑍᓕᒋᑦᓯ ᐃᖏᕐᕋᑎᓪᓗᓯ, ᐊᔭᐅᑉᐱᐊᓕᔭᑐᐃᓐᓇᕆᑦᓯ; ᓂᐊᖂᔭᒋᖏᓪᓗᓯ, ᐃᒃᐱᐊᕐᔪᓕᔭᖏᓪᓗᓯ, ᑮᓇᐅᔭᒡᒋᖏᓪᓗᓯᓗ. 9ᐃᑎᒐᒍᓯᖅᓯᒪᓗᓯ, ᐊᓐᓄᕌᒥᒡᓗ ᐊᑎᔭᒃᓴᒡᒋᒃᑲᓐᓂᖏᓪᓗᓯ.” 10ᐃᒫᒃ ᐅᖃᐅᑎᒋᕔᑦ, “ᓇᓪᓕᐊᓐᓄᑐᐃᓐᓇᖅ ᑐᓐᖓᓱᒃᑎᑕᐅᒍᑦᓯ ᑕᕝᕙᓃᒋᑦᓯ ᐃᒡᓗᒥ, ᑕᕝᕙᓐᖓᑦ ᓄᓇᒥᑦ ᐊᐅᓪᓚᓚᐅᖏᓐᓂᑦᓯᓐᓂᑦ. 11#ᐋᐴᓯᑕᓖᑦ 13:51.#ᓘᑲᓯ 10:4-11.ᓄᓇᓕᖕᓄᑦ ᑎᑭᒍᑦᓯ ᐃᓄᖏᓐᓂᑦ ᑐᓐᖓᓱᒃᑎᑕᐅᖏᒃᑯᑦᓯ, ᐃᓕᑦᓯᓐᓂᒡᓗ ᓈᓚᒍᒪᖏᑉᐸᑕ, ᕿᒪᓕᕈᑦᓯᒋᒃ ᐃᑎᒐᓯ ᓴᓃᔭᖅᑕᒃᓴᕆᕙᓯ ᑕᒪᓐᓇ ᓇᓗᓁᒃᑯᑕᐅᓂᐊᕐᖕᒪᑦ ᓈᒻᒪᒋᔭᐅᖏᓐᓂᖏᓐᓂᒃ.”
12ᑕᕝᕙ ᐃᓕᓐᓂᐊᖅᑎᖏᑦ ᐊᐅᓪᓚᖅᐳᑦ ᐊᔪᕆᖅᑐᐃᓪᓗᑎᒃ ᐃᓄᐃᑦ ᐊᔪᕐᖕᓂᕐᖕᒥᖕᓂᑦ ᖃᕿᐊᓕᖁᓪᓗᒋᑦ. 13#ᔧᒥᓯ 5:14.ᐊᓂᕐᖕᓂᕐᓗᖕᓂᒃ ᐊᒥᓱᓂᒃ ᐊᓂᑎᑦᓯᕗᑦ, ᓇᐹᖅᑑᑉ ᐸᐅᕐᖓᖏᑕ ᐅᖅᓱᖏᓐᓄᑦ ᖃᓂᒪᔪᑦ ᐊᒥᓱᑦ ᐅᖅᓱᖅᑎᖅᐸᒃᓗᒋᑦ ᐋᖅᑭᒃᐰᑦ.
ᔪᐊᓇᓯ ᐹᑉᑎᑎᕆᔨᐅᑉ ᑐᖁᑕᐅᓂᖓ
ᒫᑎᐅᓯ 14:1-12; ᓘᑲᓯ 9:7-9
14 #
ᒫᑎᐅᓯ 16:14; ᒫᑯᓯ 8:28; ᓘᑲᓯ 9:19. ᐊᖓᔪᖅᑳᕐᔪᐊᓪᓕ ᐃᕉᑕᓯᐅᑉ ᑕᒪᓐᓇ ᑐᓴᐅᒪᓕᖅᐹ; ᔩᓱᓯᐅᑉ ᐱᓇᓱᐊᕐᖕᓂᖓ ᓇᓂᑐᐃᓐᓇᖅ ᑐᓴᐅᒪᔭᐅᓕᕐᖕᒪᑦ. ᐃᓚᖏᑦ ᐅᖃᖃᑦᑕᕐᖕᒪᑕ, “ᔪᐊᓇᓯ ᐹᑉᑎᑎᕆᔨ ᑐᖁᖓᔪᓂᑦ ᒪᑭᓯᒪᕗᖅ; ᑍᒤᒻᒪᑦ ᐱᔪᓐᓇᕐᖕᓂᖃᖅᐳᖅ ᑲᒪᓇᖅᑐᓂᒃ ᐱᓇᓱᐊᕈᓐᓇᕐᖕᓂᕐᖕᒥᒃ.”
15ᐃᓚᖏᓪᓕ ᐅᖃᖅᐳᑦ, “ᑖᓐᓇ ᐃᓔᑦᔭᐅᕗᖅ.” ᐃᓚᖏᓪᓕ ᐅᖃᕆᕗᑦ, “ᓇᓚᐅᑦᑍᔫᕗᖅ, ᑍᑦᓱᒪᓂᐊᓗᒃ ᓇᓚᐅᑦᑍᔫᕙᓚᐅᖅᑐᑎᑐᑦ.”
16ᑕᒪᓐᓇ ᐃᕉᑕᓯᐅᑉ ᑐᓴᕋᒥᐅᒃ ᐅᖃᖅᐳᖅ, “ᔪᐊᓇᓯᐅᕗᖅ ᐹᑉᑎᑎᕆᔨ, ᓂᐊᖁᐃᖅᑕᐅᑎᓚᐅᖅᑕᕋ, ᑐᖁᖓᔪᓂᑦ ᒪᑭᓯᒪᓕᖅᐳᖅ.” 17#ᓘᑲᓯ 3:19,20.ᐃᕉᑕᓯᐅᑉ ᔪᐊᓇᓯ ᑎᒍᔭᐅᖁᓚᐅᕋᒥᐅᒃ, ᕿᓚᒃᓱᖅᑕᐅᑎᓪᓗᒍᓗ ᑎᒍᔭᐅᓯᒪᕕᖕᒧᐊᖅᑕᐅᑎᓚᐅᖅᐹ ᐃᕉᑎᐊᓯᒥᒃ ᐱᑦᔪᑎᖃᕐᓗᓂ, ᓄᑲᖓᑕ ᐱᓕᑉᐴᓯᐅᑉ ᓄᓕᐊᕆᒐᓗᐊᖅᑎᓪᓗᓂᐅᒃ; ᓄᓕᐊᖅᑖᕆᓚᐅᕋᒥᐅᒃ. 18ᔪᐊᓇᓯ ᐹᑉᑎᑎᕆᔨᐅᑉ ᐃᕉᑕᓯ ᐅᖃᐅᑎᖃᑦᑕᓚᐅᕐᖕᒪᒍ, “ᐃᓕᖕᓄᑦ ᓈᒻᒪᓐᖏᓚᖅ ᓄᓕᐊᖅᑖᕈᕕᑦ ᓄᑲᖅᐱᑦ ᓄᓕᐊᖓᓂᒃ.”
19ᐃᕉᑎᐊᓯᐅᑉ ᔪᐊᓇᓯ ᑐᖁᑕᐅᑦᔪᑎᒃᓴᖅᓯᐅᖃᑦᑕᓚᐅᖅᐹ. ᑭᓯᐊᓂ ᑐᖁᑕᐅᑎᑦᓱᓐᓇᓚᐅᓐᖏᓛ. 20ᐃᕉᑕᓯᐅᑉ ᔪᐊᓇᓯ ᐃᓕᕋᒋᓚᐅᕐᖕᒪᒍ, ᖃᐅᔨᒪᒐᒥᐅᒃ ᓇᓛᒎᕐᖕᒪᑦ ᐃᑦᔪᕐᖕᓁᑑᓪᓗᓂ, ᑍᒤᒻᒪᑦ ᓴᐳᑎᓯᒪᓚᐅᖅᐹ. ᑐᓵᓕᕌᖓᒥᐅᒃ ᖁᐊᖅᓵᖅᑎᑕᐅᒻᒪᕆᒃᐸᒃᑲᓗᐊᕐᓗᓂ ᐅᖃᓪᓚᓕᕌᖓᑦ; ᓈᓚᒋᐊᖓ ᖁᕕᐊᒋᓪᓗᓂᐅᒃ.
21ᐃᕉᑍᐊᓯ ᐱᕕᒃᓴᖃᑦᓯᐊᓕᑍᓐᓇᓚᐅᖅᐳᖅ ᐃᕉᑕᓯᐅᑉ ᐃᓅᓕᕐᕕᒃᓯᐅᕐᕕᖓᓂ ᐊᖓᔪᖅᑳᖁᑎᒥᓂᒃ ᓂᕆᑎᑦᓯᓕᕐᖕᒪᑦ ᒐᕙᒪᖁᑎᖏᑕ ᖁᕝᕙᓯᖕᓂᖅᐹᖁᑎᖏᓐᓂᒃ, ᐅᓇᑕᖅᑐᒃᓴᖁᑎᖏᑕᓗ ᐊᖓᔪᖅᑳᒻᒪᕆᖏᓐᓂᒃ, ᒐᓕᓕᐊᒥᐅᓄᓪᓗ ᐊᐅᓚᑦᓯᔨᐅᔪᓂᒃ. 22ᐃᕉᑎᐊᓯᐅᑉ ᐸᓂᖓ ᑕᕝᕗᓐᖓᓚᐅᕐᖕᒪᑦ ᑖᓂᓯᕐᓗᓂᓗ ᓵᖏᓐᓂ, ᑕᒪᓐᓇ ᐃᕉᑕᓯᐅᑉ ᖁᕕᐊᒋᕚ ᓂᕆᔭᖅᑐᖅᑎᓯᒪᔭᖏᑕᓗ ᖁᕕᐊᒋᒋᕚᑦ; ᐊᖓᔪᖅᑳᕐᔪᐊᖅ ᓂᕕᐊᖅᓯᐊᒧᑦ ᐅᖃᖅᐳᖅ, “ᓱᓇᒥᒃ ᐱᑎᑕᐅᔪᒪᒍᕕᑦ ᐱᔪᒪᑉᕕᒋᓚᐅᓐᖓ ᓱᓇᑐᐃᓐᓇᑦᓯᐊᒥᒃ ᐱᔪᒪᔭᕐᖕᓂᒃ ᑐᓂᓯᕕᒋᓂᐊᖅᐸᒋᑦ.” 23ᐃᕉᑕᓯᐅᑉ ᐅᖃᐅᑎᕚ, “ᓱᓕᑦᓯᐊᖅᐳᖓ ᓱᓇᑐᐃᓐᓇᑦᓯᐊᒥᒃ ᐱᔪᒪᔭᕐᖕᓂᒃ ᑐᓂᓯᕕᒋᓂᐊᖅᐸᒋᑦ, ᐊᖓᔪᖅᑲᐅᕕᓐᓃᑦᑐᓕᒫᑦ ᐊᕕᒃᓗᒋᒃ ᐱᔪᒪᒐᔭᕈᕕᒋᑦ ᐱᑎᑦᓱᓐᓇᖅᐸᒋᑦ.”
24ᓂᕕᐊᖅᓯᐊᖅ ᑕᕝᕙᓐᖓᑦ ᐊᓂᕗᖅ, ᐊᓈᓇᒥᓄᑦ ᐅᖃᕆᐊᖅᑐᕐᓗᓂ, “ᓱᓇᒥᒡᓕ ᐱᔪᒪᓂᐊᓕᖅᑐᖓ?” ᐊᓈᓇᖓᑕ ᑭᐅᕚ, “ᔪᐊᓇᓯ ᐹᑉᑎᑎᕆᔨᐅᑉ ᓂᐊᖁᖓᓂᒃ.”
25ᓂᕕᐊᖅᓯᐊᖅ ᑐᐊᕕᕐᓗᓂ ᐅᑎᖅᐳᖅ ᐊᖓᔪᖅᑳᕐᔪᐊᕐᖕᒧᑦ, ᐱᔪᒪᔭᒥᓂᒃ ᐅᖃᖅᐳᖅ, “ᐃᓕᖕᓄᑦ ᑐᓂᓯᕕᐅᔪᒪᕗᖓ ᒫᓐᓇ ᔪᐊᓇᓯ ᐹᑉᑎᑎᕆᔨᐅᑉ ᓂᐊᖁᖓᓂᒃ ᐊᓪᓕᕋᕐᖕᒦᑎᓪᓗᒍ.”#6:25 ᐴᒍᑕᕐᖕᒦᑎᓪᓗᒍ
26ᑕᒪᓐᓇ ᐊᖓᔪᖅᑳᕐᔪᐊᑉ ᖁᕕᐊᓱᑎᒋᖏᒃᑲᓗᐊᕐᓗᒍ; ᓂᕕᐊᖅᓯᐊᑉ ᐱᔪᒪᔭᖓᓂᒃ ᕿᐱᓗᒍᓐᓇᓐᖏᓚᖅ ᐅᖃᕕᒋᔭᕇᖅᑲᐅᒐᒥᐅᒃ ᓂᕆᔭᖅᑐᖅᑎᓯᒪᔭᖏᑕ ᓵᖏᓐᓂ. 27ᑍᒤᒻᒪᑦ ᐅᓇᑕᖅᑐᒃᓴᒥᒃ ᑕᕝᕔᓐᓇᖅ ᑎᓕᓯᕗᖅ ᔪᐊᓇᓯᐅᑉ ᓂᐊᖁᖓᓂᒃ ᐂᒃᓕᖁᓪᓗᒍᑦ. ᐅᓇᑕᖅᑐᒃᓴᖅ ᐊᓂᕗᖅ ᑎᒍᔭᐅᓯᒪᕕᖕᒧᑦ ᐅᐸᒃᓗᓂᐅᒃ, ᔪᐊᓇᓯ ᓂᐊᖁᐃᖅᐹ; 28ᓂᐊᖁᖓ ᓇᒃᓴᖅᐹ ᐊᓪᓕᕋᕐᖕᒥ#6:28 ᐊᓪᓕᕋᖅ ᑐᑭᖃᖅᑐᖅ ᐴᒍᑕᖅ ᐅᕝᕙᓗ ᐊᕙᑉᓯᓛᖅ ᐃᓕᓯᒪᑎᓪᓗᒍ, ᑐᓂᓪᓗᒍ ᓂᕕᐊᖅᓯᐊᕐᖕᒧᑦ; ᓂᕕᐊᖅᓯᐊᓪ ᐊᓈᓇᒥᓄᑦ ᑐᓂᕚ. 29ᔪᐊᓇᓯᐅᓪᓕ ᐃᓕᓐᓂᐊᖅᑎᖏᑕ ᑕᒪᓐᓇ ᑐᓴᕋᒥᑦᔪᒃ, ᑕᕝᕗᓐᖓᖅᐳᑦ ᑎᒥᖓ ᐂᓪᓗᒍ, ᐃᓗᕕᕐᕆᐊᖅᑐᕐᓗᒍ.
ᔩᓱᓯᐅᑉ ᓂᕆᑎᑦᓯᓂᖓ 5,000ᓂᒃ
ᒫᑎᐅᓯ 14:13-21; ᓘᑲᓯ 9:10-17; ᔪᐊᓇᓯ 6:1-14
30ᐋᐴᓯᑕᓖᑦ ᐅᑎᕋᒥᒃ ᔩᓱᓯ ᑲᑎᕚᑦ, ᐅᓂᒃᑳᕐᕕᒋᓪᓗᒍ ᐱᓇᓱᐊᕐᖕᓂᕆᓚᐅᖅᑕᒥᖕᓂᒃ ᑕᒤᓐᓂᒃ ᐊᔪᕆᖅᑐᐃᓂᕆᓚᐅᖅᑕᒥᖕᓂᒡᓗ. 31ᔩᓱᓯᐅᑉ ᐅᖃᐅᑎᕔᑦ, “ᐅᕙᒍᑑᓗᑕ ᐊᐅᓪᓚᓚᐅᖅᑕ ᐃᓄᑑᕕᒋᔪᓐᓇᖅᑕᑦᑎᓐᓄᑦ, ᑕᕾᖅᓯᑬᓐᓇᕈᓐᓇᕐᖕᓂᐊᕋᑦᓯ.” ᑕᕝᕙᓂ ᐃᓄᐃᑦ ᐊᒥᓱᑦ ᕾᑲᑕᓗᐊᕐᖕᓂᖏᓐᓄᑦ, ᓂᕆᔪᓐᓇᖅᓯᑎᑕᐅᓚᐅᕈᓐᓃᕐᖕᒪᑕ. 32ᑍᒤᒻᒪᑦ ᐅᒥᐊᒃᑯᑦ ᐊᐅᓪᓚᓕᖅᐳᑦ ᑖᒃᑯᑑᔪᒪᓪᓗᑎᒃ ᐃᓄᖃᖏᑦᑐᒥ.
33ᐃᓄᐃᑦ ᐊᒥᓱᑦ ᑕᑯᒐᒥᒃ ᐊᐅᓪᓚᓕᖅᑐᓂᒃ ᑭᓇᒃᑰᓂᖏᓐᓂᒡᓗ ᐊᐅᓪᓚᓯᔪᑦ ᖃᐅᔨᑐᐊᕋᒥᒃ, ᓇᑭᑐᐃᓐᓇᖅ ᓄᓇᓕᖕᓂᑦ ᐱᓱᓯᕗᑦ ᓄᓇᒃᑯᑦ, ᑐᐊᕕᕐᓗᑎᒃ ᓯᕗᓂᖓᓐᓂᓗ ᐅᐸᒐᓱᐊᖅᑕᖓᓄᐊᖅᐳᑦ.#6:33 ᐂᕕᒋᔭᖓᓄᐊᖅᐳᑦ 34#ᒨᓯᓯ ᓯᑕᒪᖏᑦ 27:17; ᐊᑕᓃᑦ ᓯᕗᓪᓖᑦ 22:17; ᑯᕉᓂᑲ ᐂᑉᐸᖏᑦ 18:16; ᐃᓯᑭᐊᓕ 34:5; ᒫᑎᐅᓯ 9:36.ᔩᓱᓯᓕ ᐅᒥᐊᒥᑦ ᓂᐅᒐᒥ ᐃᓄᖕᓂᒃ ᐅᓄᖅᑐᒻᒪᕆᖕᓂᒃ ᑕᑯᒐᒥ, ᓇᒡᓕᒍᓱᒻᒪᕆᓕᖅᐳᖅ ᑖᒃᑯᓂᖓ, ᓰᐱᑎᑐᑦ ᑍᒤᒻᒪᑕ ᐰᖅᓯᔨᖃᖏᑦᑐᑎᑐᑦ. ᑍᒤᒻᒪᑦ ᐊᔪᕆᖅᑐᓕᖅᐰᑦ ᐊᒥᓱᓂᒃ ᐊᑦᔨᒌᖏᑦᑐᓂᒃ. 35ᐅᓐᓄᓕᕐᖕᒪᑦ, ᐃᓕᓐᓂᐊᖅᑎᖏᑕ ᐅᐸᒃᐹ ᐅᖃᐅᑎᓪᓗᒍ, “ᒫᓐᓇ ᐅᓐᓄᓗᐊᓕᕐᖕᒪᑦ, ᑕᒫᓂ ᐃᓄᖃᖏᑦᑐᒦᑲᑦᑕ; 36ᐃᓄᐃᑦ ᐊᐅᓪᓚᖅᑎᓚᐅᒃᑭᑦ, ᑕᒪᐅᖓ ᖃᓂᒋᔭᒥᖕᓄᑦ ᓄᓇᓕᖕᓄᑦ ᐱᕈᖅᓰᕕᓕᖕᓄᑦ ᓄᓇᓕᖕᓄᓪᓗ ᐂᓂᐊᕐᖕᒪᑕ, ᓇᖕᒥᓂᖅ ᓂᕿᒃᓴᒥᖕᓂᒃ ᓂᐅᕕᕋᓱᐊᕐᖕᓂᐊᕐᖕᒪᑕ.”
37ᔩᓱᓯᐅᓪᓕ ᑭᐅᕔᑦ, “ᐃᓕᑦᓯ ᓂᕆᔭᒃᓴᖅᑖᑎᓕᖅᓯᐅᒃ.” ᐃᓕᓐᓂᐊᖅᑎᖏᑦ ᐅᖃᖅᐳᑦ, “ᓂᐊᖂᔭᖅᑖᕆᐊᖅᑐᖁᕕᑎᒎᑦ ᑮᓇᐅᔭᓂᒃ 200ᓂᒃ ᓯᐅᓪᕕᕆᓂᒃ ᐊᑐᕐᓗᑕ, ᓂᕆᑎᑦᓯᑦᔪᑎᒋᓂᐊᖅᑕᑦᑎᓐᓂᒃ?”
38ᐅᖃᐅᑎᕔᑦ, “ᖃᑦᓯᓂᒃ ᓂᐊᖂᔭᖃᖅᐱᓰ? ᐊᑏ ᑕᑯᔭᖅᑐᓚᐅᕆᑦᓯ,” ᑕᑯᔭᖅᑐᕋᒥᒃ ᐅᖃᐅᑎᕚᑦ, “ᓂᐊᖂᔭᖅᑕᖃᖅᐳᖅ ᑕᓪᓕᒪᓂᒃ ᐃᖃᓗᒃᑕᖃᕐᓗᓂᓗ ᒪᕐᕉᖕᓂᒃ.”
39ᑕᕝᕙ ᔩᓱᓯᐅᑉ ᐃᓕᓐᓂᐊᖅᑎᓂ ᑎᓕᕔᑦ, ᐃᓄᐃᑦ ᐃᒻᒥᒍᑦ ᑲᑎᓐᖓᐅᕐᓗᑎᒃ ᐃᖅᓯᕙᖃᑎᒌᖁᓪᓗᒋᑦ ᓄᓇᒥ ᐃᕕᒃᓱᒐᓕᖕᒥ. 40ᑕᕝᕙ ᐃᒃᓯᕚᓕᖅᐳᑦ ᑲᑎᓐᖓᐅᕐᓗᑎᒃ, ᐃᓚᖏᑦ 100ᐅᓪᓗᑎᒃ, ᐃᓚᖏᓪᓗ 50ᐅᓪᓗᑎᒃ. 41ᓂᐊᖂᔧᑦ ᑕᓪᓕᒪᑦ ᑎᒍᕔᑦ ᐃᖃᓘᒡᓗ ᒪᕐᕉᒃ, ᕿᓚᖕᒧᑦ ᐋᕐᓗᕐᓗᓂ, ᒎᑎ ᖁᔭᒋᕚ, ᓂᐊᖂᔧᑦ ᐊᒡᒍᖅᐰᑦ, ᐃᓕᓐᓂᐊᖅᑎᒥᓄᑦ ᑐᓂᓪᓗᒋᑦ ᐃᓄᖕᓄᑦ ᑐᓂᐅᖅᑲᐅᑎᒋᔭᐅᖁᓪᓗᒋᑦ; ᐃᖃᓘᒡᓗ ᒪᕐᕉᒃ ᐊᒡᒍᖅᐹᒃ ᑕᒤᓐᓄᑦ. 42ᑕᒪᕐᖕᒥᒃ ᓂᕆᕗᑦ ᑳᒍᓐᓃᕐᓗᑎᒃ. 43ᐃᓕᓐᓂᐊᖅᑎᖏᑦ 12ᓂᒃ ᐃᕕᐅᔭᕐᖕᓂᒃ ᑕᑍᕗᑦ, ᐊᒡᒍᖅᓯᒪᔪᓂᒃ ᐊᒥᐊᒃᑯᒋᔭᐅᔪᓂᒃ ᓂᐊᖂᔭᓂᒃ ᐃᖃᓗᖕᓂᒡᓗ. 44ᐊᖑᑎᑦ ᓂᕆᓚᐅᖅᑐᑦ ᐅᓄᕐᖕᓂᖃᓚᐅᖅᐳᑦ 5,000ᓂᒃ.
ᔩᓱᓯᐅᑉ ᐱᓱᖕᓂᖓ ᐃᒪᐅᑉ ᖄᖓᒍᑦ
ᒫᑎᐅᓯ 14:22-33; ᔪᐊᓇᓯ 6:15-21
45ᐱᔭᕇᑐᐊᕋᒥᒃ ᔩᓱᓯᐅᑉ ᐃᓕᓐᓂᐊᖅᑎᓂ ᐅᒥᐊᒧᑦ ᐃᑭᖁᓕᖅᐰᑦ, ᐊᐅᓪᓚᖁᓪᓗᒋᑦ ᓯᕗᓪᓕᐅᓗᑎᒃ ᐱᑦᓮᑕᒧᐊᖁᓪᓗᒋᑦ, ᑕᓯᐅᑉ ᐊᑭᐊᓃᑦᑐᒧᑦ; ᔩᓱᓯᓕ ᓇᖕᒥᓂᖅ ᐃᓄᒐᓴᒡᔪᐊᓂᒃ ᐊᖏᕐᕋᖁᔨᓕᖅᐳᖅ. 46ᐃᓄᐃᑦ ᐊᐅᓪᓚᖅᑎᑦᑕᕇᕋᒥᒋᑦ, ᖃᖅᑲᒧᑦ ᒪᔪᐊᖅᐳᖅ ᑐᒃᓯᐊᕆᐊᖅᑐᕐᓗᓂ. 47ᐅᓐᓄᒃᑎᓪᓗᒍ, ᐅᒥᐊᖅ ᑕᓯᐅᑉ ᕿᑎᖓᓃᓕᖅᐳᖅ, ᔩᓱᓯᓕ ᐃᓄᑑᕗᖅ ᓄᓇᒥ. 48ᑕᑯᓪᓗᓂᓗ ᐃᓕᓐᓂᐊᖅᑎᒥᓂᒃ ᐊᒃᓱᕈᕐᓗᑎᒃ ᐊᒡᒍᒧᑦ ᐃᐳᓐᓇᓱᐊᖅᑐᓂᒃ, ᐊᓄᕆᒧᑦ ᐊᒡᒍᕋᕋᒥᒃ; ᐅᓪᓛᓐᖑᓕᖅᑎᓪᓗᒍ ᓯᕿᓐᖑᔭᖅ ᓯᑕᒪᓐᖑᖅᑎᓪᓗᒍ ᐅᐸᓕᖅᐰᑦ, ᐃᒪᐅᑉ ᖄᖓᒍᑦ ᐱᓱᒃᓗᓂ. ᐅᒥᐊᑦ ᓴᓂᖅᑯᓐᓂᐊᖅᑑᔭᓕᖅᖢᒋᑦ. 49ᐃᓕᓐᓂᐊᖅᑎᖏᑦ ᑕᑯᒐᒥ ᐃᒪᐅᑉ ᖄᖓᒍᑦ ᐱᓱᒃᑐᒥᒃ ᐃᓅᖏᑦᑐᐊᓗᒥᒃ ᑕᑯᓇᓱᒋᓪᓗᑎᒃ, ᕾᒐᓛᓕᖅᐳᑦ; 50ᑕᑯᒐᒥᑦᔪᒃ, ᐊᖏᔪᒥᒃ ᖁᐊᖅᓵᖓᓕᖅᐳᑦ.
ᑕᕝᕔᓐᓇᖅ ᐅᖃᐅᑎᕔᑦ, “ᖁᐊᖅᓵᖓᓇᓯ, ᐅᕙᖓᐅᕗᖓ; ᐃᖅᓯᓇᓯ.” 51ᐅᒥᐊᒧᑦ ᐃᑭᖕᒪᑦ ᐃᑭᒪᖃᑎᒋᓕᕐᓗᒋᑦ ᐊᓄᕆ ᐃᑯᓪᓚᖅᐳᖅ. ᐃᓕᓐᓂᐊᖅᑎᖏᑦ ᑲᒪᕕᒡᔪᐊᓕᖅᐳᑦ, 52ᓂᕆᑎᑦᓯᓚᐅᕐᖕᓂᖓᓂᒃ ᑐᑭᓯᕚᓪᓕᕈᑎᖃᓚᐅᕐᖕᓂᖏᓐᓇᒥᒃ, ᐆᒻᒪᑎᖏᑦ ᓯᑎᓗᐊᓚᐅᕐᖕᒪᑕ.
ᔩᓱᓯᐅᑉ ᖃᓂᒪᔪᓂᒃ ᐋᖅᑭᒃᓯᓂᖓ ᒋᓂᓴᕇᑎᒥ ᓄᓇᒥ
ᒫᑎᐅᓯ 14:34-36
53ᑕᓯᖅ ᐃᑳᕋᒥᑦᔪᒃ, ᓄᓇᓕᖕᓄᑦ ᑎᑭᑉᐳᑦ ᒋᓂᓴᕆᑎᒧᑦ, ᐅᒥᐊᑎᒃ ᐱᑐᒃᐹᑦ. 54ᐅᒥᐊᒥᑦ ᓂᐅᖕᒪᑕ, ᔩᓱᓯ ᑕᕝᕔᓐᓇᖅ ᐃᓕᑕᕆᔭᐅᕗᖅ. 55ᑐᐊᕕᕐᓗᑎᒃ ᑐᓴᖅᑎᑦᓯᔭᖅᑐᑦᐳᑦ ᓄᓇᓕᖕᓂᒃ ᖃᓂᒋᔭᒥᖕᓃᑦᑐᓂᒃ, ᐃᓄᐃᑦ ᑐᓴᑐᐊᕋᒥᒃ ᔩᓱᓯᐅᑉ ᓇᓃᓐᓂᖓᓂᒃ ᖃᓂᒪᔪᖁᑎᒥᖕᓂᒃ ᑖᑦᓱᒧᓐᖓᐅᑦᔨᕗᑦ ᓇᓚᕕᖏᓐᓃᑎᓪᓗᒋᑦ. 56ᓇᒧᑐᐃᓐᓇᖅ ᑎᑭᑦᑕᕌᖓᑦ; ᓄᓇᓕᖕᓄᑦ, ᐃᒡᓗᒐᓴᖕᓄᓪᓗ, ᐱᕈᖅᓰᕕᖃᖅᑐᓄᓪᓗ, ᐃᓄᐃᑦ ᖃᓂᒪᔪᖁᑎᒥᖕᓂᒃ ᐊᖅᑯᑏᑦ ᐊᖅᑯᓵᒐᓪᓚᕆᐅᓂᖏᓐᓄᑦ ᐂᑎᑦᓯᖃᑦᑕᖅᐳᑦ, ᖃᓂᒪᔪᖁᑎᖏᑦ ᔩᓱᓯᐅᑉ ᐊᓐᓄᕌᖏᑕ ᓯᓂᖓᓂᒡᓘᓐᓃᑦ ᐊᒃᑐᖅᓯᔪᓐᓇᖁᓪᓗᒋᑦ; ᐊᒃᑐᖅᓯᔪᓕᒫᑦ ᔩᓱᓯᐅᑉ ᐊᓐᓄᕌᖓᓂᒃ ᐋᖅᑭᒃᑕᐅᕗᑦ.
Currently Selected:
ᒫᑯᓯᐅᑉ ᐊᒡᓚᖏᑦ 6: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
