ᒫᑯᓯᐅᑉ ᐊᒡᓚᖏᑦ 5
5
ᔩᓱᓯᐅᑉ ᐊᓂᕐᖕᓂᕐᓗᒃᑕᐅᓯᒪᔪᒥᒃ ᐋᖅᑭᒃᓯᓂᖓ
ᒫᑎᐅᓯ 8:28-34; ᓘᑲᓯ 8:26-39
1ᑕᕝᕙ ᔩᓱᓯ ᐃᓕᓐᓂᐊᖅᑎᖏᓪᓗ ᑕᓯᕐᔪᐊᑉ ᒐᓕᓕᐊᑉ ᐊᑭᐊᓄᑦ ᑎᑭᑉᐳᑦ, ᒋᕌᓴᒥᐅᑦ ᓄᓇᖓᓄᑦ. 2ᐅᒥᐊᒥᑦ ᓂᐅᖕᒪᑦ, ᐊᖑᒻᒧᑦ ᐅᐸᒃᑕᐅᕗᖅ ᐃᓗᕕᖃᕐᕕᖕᓂᓐᖔᖅᑐᒥᑦ ᑖᓐᓇ ᐊᓂᕐᖕᓂᕐᓗᒃᑕᐅᓯᒪᕗᖅ. 3ᐃᓗᕕᕐᖕᓂ ᐃᓂᖃᖅᑐᖅ; ᑭᓇᒧᓪᓘᓐᓃᑦ ᐊᑦᑐᖏᖅᑕᐅᔪᓐᓇᕈᓐᓃᖅᑐᖅ, ᐊᖅᓵᖅᑑᔭᓄᓪᓘᓐᓃᑦ;#5:3 ᕿᓚᐅᖑᔭᓄᓪᓘᓐᓃᑦ 4ᐃᑎᒐᖏᑦ ᐊᒡᒐᖏᓪᓗ ᐊᑦᓱᖏᖅᑕᐅᖃᑦᑕᖅᓯᒪᒐᓗᐊᖅᐳᑦ ᐊᑦᑐᖏᐅᑎᓄ ᓴᕕᕋᔭᖕᓄᑦ, ᐊᖅᓴᖅᑐᔭᓄᓪᓗ,#5:4 ᕿᓚᐅᖑᔭᓄᓪᓘᓐᓃᑦ ᑖᒃᑯᐊᓕ ᕿᒃᑐᕌᖃᑦᑕᖅᐰᑦ, ᓴᕕᕋᔧᓪᓗ ᐃᑎᒐᖏᑕ ᐊᑦᑐᖏᐅᑎᖏᑦ ᓱᕋᒃᑎᖅᐸᒃᓗᓂᒋᑦ; ᓴᓐᖏᓗᐊᕐᖕᓂᖓᓄᑦ ᑭᓇᒧᓪᓘᓐᓃᑦ ᐱᓯᒪᔭᐅᔪᓐᓇᕈᓐᓃᖅᑐᖅ. 5ᐅᓪᓗᒃᑯᑦ ᐅᓐᓄᐊᑯᓪᓗ ᐃᓗᕕᖅᑎᒍᑦ ᐱᓱᑲᑍᓐᓇᖃᑦᑕᖅᑐᖅ ᖃᖅᑲᓂ ᓂᓪᓕᐊᖃᑦᑕᖅᐳᖅ, ᐃᒻᒥᓂᒃ ᑭᓪᓕᐊᖃᑦᑕᕐᓗᓂ ᐅᔭᖅᑲᓄᑦ.
6ᐅᖓᓯᒃᑐᒦᓪᓗᓂ ᔩᓱᓯ ᑕᑯᒐᒥᐅᒃ; ᑕᑦᓱᒧᖓ ᐅᓪᓚᒃᓯᕗᖅ ᓵᖓᓄᐊᕋᒥ ᓰᖅᑯᕐᓗᓂ ᑐᒃᓯᐊᕐᕕᒋᕚ; 7ᕾᒐᓛᕐᓗᓂ ᓂᐱᖁᖅᑐᓪᓗᓂ ᐅᖃᖅᐳᖅ, “ᐅᕙᓐᓅᑦ ᖃᓄᐃᓕᐅᕆᐊᖅᑐᖅᐲᑦ ᔩᓱᓰ, ᒎᑎᐅᑉ ᖁᑦᓯᖕᓂᖅᐹᑉ ᐃᕐᖕᓂᖓ? ᒎᑎᐅᑉ ᓵᖓᓂ ᕿᓄᕕᒋᕙᒋᑦ, ᐋᓐᓂᖅᓯᖅᑍᓕᓐᖓ.” 8ᑖᓐᓇ ᑍᒫᒃ ᐅᖃᖅᐳᖅ, ᔩᓱᓯ ᐅᖃᕐᖕᒪᑦ “ᐊᓂᕐᖕᓂᕐᓘᒃ ᑕᕝᕙᓐᖓᑦ ᐃᓄᖕᒥᑦ ᐊᓂᒋᑦ!”
9ᔩᓱᓯᐅᑉ ᐊᐱᕆᕚ, “ᑭᓇᐅᕖᑦ?”
ᑭᐅᕗᖅ, “ᓕᒋᐅᓂᒥᒃ ᐊᑎᖃᖅᐳᖓ; ᑕᕝᕙᓂ ᐊᒥᓱᐊᓘᒐᑦᑕ!” 10ᑖᑦᓱᒪ ᐊᔪᐃᓐᓇᖅᓗᓂ ᕿᓄᕕᒌᓕᖅᐹ ᐊᓂᕐᖕᓂᕐᓗᐃᑦ ᑕᒫᓐᖓᑦ ᓄᓇᒥᑦ ᐊᐅᓪᓚᖅᑎᑕᐅᖁᓇᒋᑦ.
11ᑕᒫᓂᓕ ᓄᓇᒥ ᖃᓂᒋᔮᓂ ᑰᒃᑰᓯᑕᖃᖅᐳᖅ ᐊᒥᓱᓂᒃ, ᖃᖅᑲᐅᑉ ᓯᕕᖓᓂᖓᓂ ᓂᕆᓇᓱᒃᑐᓂᒃ; 12ᐊᓂᕐᖕᓂᕐᓗᐃᑦ ᔩᓱᓯ ᕿᓄᕕᒋᕚᑦ, “ᑰᒃᑰᓯᓄᐊᖁᓚᐅᖅᑎᒍᑦ.” 13ᑕᕝᕙ ᔩᓱᓯᐅᑉ ᑍᒫᒃ ᐱᖁᕔᑦ. ᐊᓂᕐᖕᓂᕐᓗᐃᑦ ᐃᓄᖕᒥᑦ ᐊᓂᒐᒥᒃ ᑰᒃᑰᓯᓄᑦ ᐃᑎᖅᐳᑦ; ᑰᒃᑰᓯᑦ ᑖᒃᑯᐊ ᐅᓄᖅᑐᐊᓘᕗᑦ ᑲᑎᓪᓗᒋᑦ 2,000 ᖃᓂᒋᔮᓃᑉᐳᑦ, ᐸᖓᓕᒃᓯᒐᒥᒃ ᐃᓐᓈᕈᒃᑯᑦ ᐃᔪᒃᑲᖅᐳᑦ ᑕᓯᕐᖕᒧᑦ, ᐃᒫᓂ ᐃᐱᓪᓗᑎᒃ.
14ᐊᖑᑏᑦ ᑰᒃᑰᓯᓂᒃ ᑲᒪᔩᑦ ᕿᒪᒃᓯᕗᑦ, ᐅᖃᕆᐊᖅᑐᕐᓗᑎᒃ ᐃᓄᖕᓄᑦ ᓄᓇᓕᖕᓃᑦᑐᓄᑦ ᐱᕈᖅᓰᕕᖕᓃᑦᑐᓄᓪᓗ. ᐃᓄᐃᓪᓗ ᕾᕗᑦ ᑕᑯᔭᖅᑐᕐᓗᑎᒃ ᖃᓄᐃᓕᐅᖅᑐᖃᕐᖕᓂᕐᖕᒪᖔᑦ. 15ᔩᓱᓯᒧᐊᕋᒥᒃ, ᐊᖑᑦ ᑕᑯᕚᑦ ᐊᓂᕐᖕᓂᕐᓗᒃᑕᐅᓯᒪᓚᐅᖅᑐᖅ, ᐃᒃᓯᕚᓕᖅᑐᖅ, ᐊᓐᓄᕌᖅᓯᒪᓪᓗᓂᓗ ᐃᓱᒪᖃᑦᓯᐊᓕᖅᑐᖅ, ᐃᓄᐃᑦ ᑲᑉᐱᐊᓱᓕᖅᐳᑦ. 16ᖃᐅᔨᓚᐅᖅᑐᑦ ᑕᒪᑐᒥᖓ ᐅᓂᒃᑳᖅᐳᑦ ᐊᖑᑦ ᐊᓂᕐᖕᓂᕐᓗᖕᓄᑦ ᐃᓗᒻᒥᖅᑕᐅᓯᒪᓚᐅᖅᑐᒥᒃ, ᑰᒃᑰᓰᓪᓗ ᖃᓄᐃᓕᓚᐅᕐᖕᒪᖔᑕ.
17ᐃᓄᐃᑦ ᔩᓱᓯᒥᒃ ᑕᕝᕙᓐᖓᑦ ᓄᓇᒥᖕᓂᑦ ᐊᐅᓪᓚᖁᔨᓕᖅᐳᑦ.
18ᐅᒥᐊᒧᑦ ᐃᑭᓕᖅᑎᓪᓗᒍ, ᐊᖑᑎᐅᑉ ᐊᓂᕐᖕᓂᕐᓗᒃᑕᐅᓯᒪᓚᐅᖅᑑᑉ ᕿᓄᕕᒋᕚ, ᒪᓕᒍᒪᓪᓗᓂ.
19ᔩᓱᓯᐅᓪᓕ ᒪᓕᖁᓐᖏᓛ, ᐃᒫᒃ ᐅᖃᐅᑎᓪᓗᒍ, “ᐊᖏᕐᕋᓕᕆᑦ ᐃᓚᓐᓇᕆᔭᕐᖕᓄᑦ, ᐅᖃᐅᑎᓗᒋᑦ ᖃᓄᑎᒋ ᐊᑕᓂᕐᖕᒧᑦ ᐱᓂᐊᕐᕕᐅᓯᒪᓂᕆᔭᕐᖕᓂᒃ, ᖃᓄᑎᒋᓗ ᐱᑦᑎᐊᕐᕕᐅᓂᕆᓯᒪᔭᕐᖕᓂᒃ ᑖᑦᓱᒧᖓ.”
20ᐊᖑᑦ ᕿᒪᕉᑎᒐᒥ ᑎᑲᐳᓖᓯᒧᑦ ᓄᓇᒧᑦ ᖁᓕᓂᒃ ᐃᒡᓗᒐᓴᒡᔪᐊᓕᖕᓂᒃ ᑍᔭᐅᔪᒧᑦ ᐂᕗᖅ, ᐅᓂᒃᑳᕐᕕᒋᓗᒋᑦ ᖃᓄᖅ ᔩᓱᓯᒧᑦ ᐱᓂᐊᕐᕕᐅᓚᐅᕐᖕᓂᕐᖕᒥᓂᒃ; ᑕᒪᕐᖕᒥᒃ ᑐᓴᖅᑐᑦ ᑲᒪᓂᐊᒻᒪᕆᒃᐳᑦ.
ᔧᕉᓯᐅᑉ ᐸᓂᖓ ᐊᕐᖕᓇᐅᓪᓗ ᔩᓱᓯᐅᑉ ᐊᓐᓄᕌᖏᓐᓂᒃ ᐊᒃᑐᖅᓯᓂᖓ
ᒫᑎᐅᓯ 9:18-26; ᓘᑲᓯ 8:40-56
21ᔩᓱᓯ ᐅᒥᐊᒃᑯᑦ ᑕᓯᐅᑉ ᐊᑭᐊᓄᑦ ᐅᑎᕐᖕᒥᖕᒪᑦ, ᐃᓄᒐᓴᒡᔪᐊᓂᑦ ᐊᕙᓗᔭᐅᕗᖅ; ᑕᓯᐅᑉ ᓯᓈᓃᑎᓪᓗᒍ ᓱᓕ ᑎᑭᕝᕕᒋᔭᖓᓂ. 22ᔧᕉᓯ, ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᑕ ᐊᖓᔪᖅᑳᖏᑦᑕ ᐃᓚᖓᑦ, ᑎᑭᑉᐳᖅ; ᔩᓱᓯ ᑕᑯᒐᒥᐅᒃ, ᐃᑎᒐᖏᓐᓄᑦ ᓰᖅᑯᕐᓗᓂ ᐅᑯᕗᖅ. 23ᕿᓄᕕᒋᕚ, ᐅᖃᕐᓗᓂ, “ᐸᓂᑯᓗᒐ ᐊᒃᓱᐊᓗᒃ ᖃᓂᒪᓪᓗᓂ ᑐᖁᑐᐃᓐᓇᕆᐊᖃᓕᕐᖕᒪᑦ. ᕾᓗᑎᑦ ᐸᑎᒻᒥᔭᖅᑐᓚᐅᕈᒃ, ᐋᖅᑭᒃᑯᓂ ᐃᓅᓂᐊᕐᖕᒪᑦ.”
24ᔩᓱᓯᐅᑉ ᒪᓕᓕᖅᐹ. ᐃᓄᒋᐊᒃᑐᕐᔪᐊᓪᓗ ᒪᓕᒃᐳᑦ ᐊᒡᓛᑦ ᓂᓐᓂᐅᖅᑎᓕᕐᓗᒍ ᐊᕙᑎᓕᒫᖓᓂᑦ.
25ᑕᕝᕙᓂ ᐊᕐᖕᓇᖅᑕᖃᖅᐳᖅ ᐊᑯᓂᐊᓗᒃ ᐊᐅᓈᖏᓐᓇᖅᑐᒥᒃ ᐊᕐᕌᒍᓂᒃ 12ᓂᒃ. 26ᐊᑯᓂ ᐊᒃᓱᕈᕈᑎᒋᓯᒪᕚ ᐋᖅᑭᒃᑕᐅᓇᓱᐊᕋᓗᐊᕐᓗᓂ ᐋᓐᓂᐊᓯᐅᖅᑎᒻᒪᕆᖕᓄᑦ, ᐊᕐᖕᓇᐅᑉ ᐱᖁᑎᓕᒫᓂ ᓄᖑᓚᐅᖅᐰᑦ, ᐋᖅᑭᒃᑕᐅᕙᓪᓕᐊᓇᓂᓕ ᐱᐅᔪᓐᓃᖅᐸᓪᓕᐊᑐᐃᓐᓇᖅᐳᖅ. 27ᔩᓱᓯ ᐅᓂᒃᑲᐅᓯᐅᑎᓪᓗᒍ ᑐᓴᖅᓯᒪᓕᕋᒥᐅᒃ, ᐃᓄᒐᓴᒃᔪᐊᑎᒍᑦ ᑭᖑᓂᖓᓂᑦ ᒪᓕᒃᓗᒍ ᐊᓐᓄᕌᖓ ᐊᒃᑐᖅᐹ. 28ᐃᓱᒪᓕᕋᒥ, “ᐊᓐᓄᕌᖏᓪᓘᓐᓃᑦ ᐊᒃᑐᕈᓐᓇᕈᒃᑭᑦ, ᐋᖅᑭᒃᑕᐅᓂᐊᖅᐳᖓ.”
29ᑕᕝᕔᓐᓇᖅ ᐊᐅᓈᕐᖕᓂᖓ ᓄᖅᑲᖅᐳᖅ; ᐃᒻᒥᓂᒃ ᐃᓗᒥᒍᑦ ᐃᒃᐱᖕᓂᖅᐳᖅ ᐋᖅᑭᒃᑕᐅᓂᕐᖕᒥᓂᒃ ᖃᓄᐃᑦᔪᑎᒥᓂᒃ. 30ᔩᓱᓯ ᖃᐅᔨᕗᖅ ᐱᔪᓐᓇᕐᖕᓂᖅ ᐃᒻᒥᓂᑦ ᐊᓂᖕᒪᑦ, ᑕᕝᕔᓐᓇᖅ ᐅᑎᒧᑦ ᕿᕕᐊᖅᐳᖅ ᐃᓄᒐᓴᒡᔪᐊᓄᑦ, ᐅᖃᕐᓗᓂ, “ᑭᐊ ᐊᓐᓄᕌᒃᑲ ᐊᒃᑐᕐᖕᒪᒋᑦ?”
31ᐃᓕᓐᓂᐊᖅᑎᖏᑕ ᐅᖃᐅᑎᕚᑦ, “ᑕᑯᕗᑎᑦ ᐃᓄᒐᓴᒡᔪᐊᑦ ᓂᓐᓂᐅᖅᑎᒻᒪᑎᑦ ᐊᕙᑎᓕᒫᕐᖕᓂᑦ, ᓱᖕᒪ ᐅᖃᖅᐱᑦ, ᑭᐊ ᐊᒃᑐᖅᐹᖓ?”
32ᓱᖁᓯᕋᓂᓕ ᕿᓂᖅᐳᖅ ᑭᓇᒧᑦ ᐊᒃᑐᖅᑕᐅᖕᒪᖔᕐᖕᒥ. 33ᐊᕐᖕᓇᖅ ᖃᐅᔨᒐᒥ ᐋᖅᑭᒃᑕᐅᓂᕐᖕᒥᓂᒃ ᐅᐸᒍᑎᓯᕗᖅ, ᓴᔪᒡᓗᓂ ᐃᓕᕋᓱᖕᓂᕐᖕᒧᑦ ᓵᖓᓄᑦ ᐅᑯᓪᓗᓂ, ᐅᖃᐅᑎᕚ ᖃᓄᐃᓐᓂᓕᒫᒥᓂᒃ. 34ᔩᓱᓯᐅᑉ ᐅᖃᐅᑎᕚ, “ᐸᓃᒃ ᐅᒃᐱᕐᖕᓂᕕᑦ ᐋᖅᑭᒃᐹᑎᑦ; ᐃᓱᒪᔮᖏᓪᓗᑎᑦ ᕿᒪᕉᑎᓕᕆᑦ, ᐋᖅᑭᒃᑕᐅᒐᕕᑦ ᖃᓄᐃᑦᔪᑎᒋᔭᕐᖕᓂᑦ.”
35ᓱᓕ ᐅᖃᓪᓚᒃᑎᓪᓗᒍ, ᐅᖃᕆᐊᖅᑐᖅᑐᒥᒃ ᕾᔪᖃᖅᐳᖅ ᔧᕉᓯᐅᑉ ᐃᒡᓗᖓᓂᓐᖔᖅᑐᒥᒃ ᐅᖃᕐᓗᓂ, “ᐸᓃᑦ ᑐᖁᕗᖅ. ᓱᖕᒪᑦ ᓱᓕ ᐊᔪᕆᖅᑐᐃᔨ ᕾᑎᓐᓇᓱᐊᖅᐱᐅᒃ?”
36ᔩᓱᓯ ᐅᖃᐅᓯᕆᔭᖏᓐᓂᒃ ᑲᒪᓇᓂ, ᔧᕉᓯ ᐅᖃᐅᑎᕚ, “ᐃᓱᒫᓗᖏᓪᓗᑎᑦ, ᐅᒃᐱᑐᐃᓐᓇᕆᑦ.” 37ᑕᕝᕙ ᑭᓇᒃᑯᑐᐃᓐᓇᕐᖕᓂᒃ ᒪᓕᖁᔨᔪᓐᓃᖅᐳᖅ ᐲᑦᑐᕉᓯ ᔧᒥᓯᑯᒡᓗ ᔪᐊᓇᓯᑯᒃ ᓄᑲᕇᒃ ᒪᓕᖁᔭᑐᐊᕆᕔᑦ. 38ᔧᕉᓯᐅᑉ ᐃᒡᓗᖓᓄᑦ ᑎᑭᓐᓇᒥᒃ, ᑕᕝᕙᓂ ᑕᑯᕗᖅ ᐅᐃᒪᔮᖅᑐᓂᒃ, ᑐᓵᓪᓗᓂᓗ ᓂᐱᖅᑯᑐᓪᓗᑎᒃ ᕿᐊᔪᓂᒃ. 39ᔩᓱᓯ ᑕᕝᕗᖓ ᐃᑎᕋᒥ, ᐅᖃᐅᑎᕔᑦ, “ᓱᖕᒫᑦ ᐅᐃᒪᔮᖅᐱᓯ ᕿᐊᓪᓗᓯᓗ? ᐅᓇ ᓂᕕᐊᖅᓯᐊᖅ ᑐᖁᖓᓐᖏᓚᖅ ᓯᓂᑐᐃᓐᓇᖅᐳᖅ.”
40ᑖᒃᑯᐊ ᔩᓱᓯᒥᒃ ᓱᓕᔪᖅᓴᖏᓂᕐᖕᒧᑦ ᒥᑕᐅᑎᖃᓕᖅᐳᑦ. ᐃᓘᓐᓇᓕᒫᑎᒃ ᐊᓂᑎᑉᐰᑦ, ᓂᕕᐊᖅᓯᐊᑉ ᐊᑖᑕᖓ ᐊᓈᓇᖓᓗ ᐃᓕᓐᓂᐊᖅᑎᓂᓗ ᐱᖓᓱᑦ ᐃᑎᕈᓐᓇᖅᑎᑕᑐᐊᕆᕔᑦ, ᑕᕝᕗᖓ ᓂᕕᐊᖅᓯᐊᑉ ᓇᔪᖅᑕᖓᓄᑦ ᐃᑎᖅᐳᑦ. 41ᓂᕕᐊᖅᓯᐊᖅ ᐊᒡᒐᖏᑎᒍᑦ ᑎᒍᓪᓗᒍ ᐅᖃᐅᑎᕚ, “ᑕᓕᑕ ᑰᒤ” ᐃᒫᒃ ᑐᑭᓕᒃ, “ᓂᕕᐊᖅᓯᐊᑯᓘᒃ, ᐅᖃᐅᑉᐸᒋᑦ ᒪᑭᑦᑎᑦ.”
42ᑕᕝᕔᓐᓇᖅ ᓂᕕᐊᖅᓯᐊᖅ ᒪᑭᑉᐳᖅ ᐱᓱᑲᑕᓕᕐᓗᓂ; ᑖᓐᓇ ᐊᕐᕌᒍᖃᖅᐳᖅ 12ᓂᒃ, ᑖᒃᑯᐊ ᑕᕝᕔᓐᓇᖅ ᑲᒪᓂᐊᕐᖕᓂᕐᖕᒧᑦ ᑎᑭᑕᐅᓕᖅᐳᑦ.
43ᐃᓂᖅᑎᒻᒪᕆᒃᐰᑦ ᑕᒪᑐᒥᖓ ᐃᓄᐃᑦ ᖃᐅᔨᑎᑕᐅᖁᓇᒋᑦ, ᐅᖃᐅᑎᓪᓗᒋᓪᓗ ᓂᕕᐊᖅᓯᐊᖅ ᓂᕆᑎᑕᐅᖁᓪᓗᒍ.
Currently Selected:
ᒫᑯᓯᐅᑉ ᐊᒡᓚᖏᑦ 5: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.