ᔨᕆᒤᐊᐅᑉ ᐊᒡᓚᖏᑦ 50
50
ᐹᐱᓘᓂᒥᐅᑦ ᐱᔭᐅᓂᖓᑦ
1 #
ᐂᓮᐊᓯ 13:1—14:23; 47:1-15. ᒪᑯᐊ ᐊᑕᓂᐅᑉ ᐅᖃᐅᓯᕆᓚᐅᖅᐰᑦ ᔨᕆᒤᐊᒃᑯᑦ ᐅᖃᖅᑎᒥᒍᑦ ᐹᐱᓘᓂᒥᐅᑦ ᐱᓪᓗᒋᑦ, ᑲᐅᓪᑎᐊᒥᐅᑦ ᓄᓇᖓᑦ ᐱᑦᔪᑎᒋᓪᓗᒍ:
2“ᐃᓅᖃᑎᒌᒡᔪᐊᓂ ᐅᖃᐅᑎᒋᓯᐅᒃ ᑐᓴᖅᑕᐅᑎᓪᓗᒍᓗ,
ᓇᓗᓁᒃᑯᑕᖃᖅᓗᓯ ᐅᖃᐅᓯᕆᓯᐅᒃ,
ᑐᓴᖅᑕᐅᔭᕆᐊᓖᑦ ᐅᖃᐅᑎᒋᔧᓐᓇᕆᓯᐅᒃ ᐅᖃᖅᓗᓯᓗ,
ᐹᐱᓘᓂᒥᐅᑦ ᓵᓚᐅᓗᑎᒃ ᑎᒍᔭᐅᓂᐊᖅᐳᑦ,
ᒎᑎᖓᑦ ᐱᐊᓪ ᑲᓐᖑᓱᒃᑎᑕᐅᓂᐊᖅᐳᖅ,
ᒎᑎᖓᓪᓗ ᒥᕈᑖᒃ ᑲᑉᐱᐊᓱᒃᑎᑕᐅᓂᐊᖅᐳᖅ,
ᐊᑦᔨᖏᓪᓗ ᓴᓇᔭᐅᓯᒪᔪᑦ ᑲᓐᖑᓇᖅᑐᒥᒃ ᐊᑐᕐᖕᓂᐊᖅᐳᑦ,
ᒎᑎᒋᔭᓕᒫᖏᑦ ᑲᑉᐱᐊᓇᖅᑐᒦᑎᑕᐅᓂᐊᖅᐳᑦ!
3“ᐅᓐᓄᐊᓪᓗᐊᑉ ᓇᓛᓂᑦ ᑎᑭᑦᑐᓄᑦ ᐃᓅᖃᑎᒌᒡᔪᐊᓄᑦ ᐅᓇᑕᖅᑕᐅᔪᒫᖅᐳᑦ, ᓄᓇᖓᓗ ᓱᓁᕈᑦᔭᐅᓗᓂ ᓄᓇᒋᔭᐅᔪᓐᓃᖅᑎᑕᐅᔪᒫᖅᐳᖅ ᐃᓄᖕᓄᑦ, ᐆᒪᔪᓪᓗ ᐃᓄᖏᓪᓗ ᑕᒪᕐᖕᒥᒃ ᕿᒫᔪᒫᖅᐳᑦ.”
ᐃᓴᕆᐊᓕᒥᐅᑦ ᐅᑎᕐᖕᓂᒃᓴᖓᑦ
4ᑍᒃᑯᐊ ᐅᓪᓗᐃᑦ ᓇᓪᓕᐅᑎᒃᐸᑕ, ᐊᑕᓂᖅ ᐅᖃᖅᐳᖅ, “ᐃᓴᕆᐊᓕᒥᐅᑦ ᔫᑕᒥᐅᓪᓗ ᑲᑎᔪᒫᖅᐳᑦ, ᕿᐊᓗᑎᒡᓗ ᐊᑕᓂᕐᖕᒥᒃ ᒎᑎᒥᖕᓂᒃ ᕿᓂᕈᒫᖅᐳᑦ. 5ᓮᐅᓂᒧᐊᖅᑐᒥᒃ ᐊᖅᑯᑎᒥᒃ ᖃᐅᔨᔪᒪᓕᕈᒫᖅᐳᑦ, ᓵᕝᕕᒋᓕᖅᓗᒍᓗ, ᕾᓂᐊᖅᐳᑦ ᐊᑕᓂᕐᓗ ᐃᓅᖃᑎᒌᓐᓇᕈᒪᓕᕈᒫᖅᐹᑦ ᐊᖏᖃᑎᒌᖕᓂᖃᖅᓗᑎᒃ ᐳᐃᒍᖅᑕᐅᓂᐊᕈᓐᓃᖅᑐᒥᒃ.
6“ᐃᓄᖁᑎᒃᑲ ᓰᐱᑎᑐᑦ ᐊᓯᐅᓯᒪᓚᐅᕐᖕᒪᑕ, ᐰᖅᓯᔨᖏᑕ ᑕᒻᒪᖅᑎᓚᐅᕐᖕᒪᒋᑦ, ᖃᖅᑲᓂᓗ ᐃᓂᖃᓕᖅᑎᓪᓗᒋᑦ, ᐃᖏᕐᕋᖃᑦᑕᑐᐃᓐᓇᓕᖅᓗᑎᒃ ᖃᖅᑲᑎᒍᑦ ᐱᖑᖅᑎᒍᓪᓗ, ᒥᕐᖑᐃᖅᓯᕐᕕᒃᓴᒥᖕᓂᒃ ᐳᐃᒍᕋᒥᒃ. 7ᑖᒃᑯᓂᖓᓗ ᓇᓂᓯᔪᑦ ᓄᖑᕅᓚᐅᖅᐳᑦ, ᐊᑭᕋᖅᑐᖅᑎᖏᓪᓗ ᐅᖃᖅᐳᑦ, ‘ᐸᓯᔭᒃᓴᐅᓐᖏᓚᒍᑦ, ᐊᑕᓂᕐᖕᒧᑦ ᐊᔪᖅᑐᓕᓚᐅᕐᖕᒪᑕ ᐃᓂᒃᓴᑐᐊᕆᔭᒥᖕᓄᑦ ᓯᕗᓕᖏᑕ ᐊᑕᓂᕆᔭᖓᓐᓄᑦ.’
8 #
ᑕᑯᑎ 18:4. “ᐹᐱᓘᓂᒥᑦ ᕿᒫᓕᕆᑦᓯ; ᑲᐅᓪᑎᐊᒥᐅᑦ ᓄᓇᖓᑦ ᕿᒪᓕᖅᓯᐅᒃ, ᒎᑦᓰᑦ ᐊᖑᓴᓪᓗᖏᑎᑐᑦ ᐃᓅᖃᑎᓯ ᓯᕗᓕᓕᖅᓯᒋᒃ. 9ᑕᑯᒋᑦ, ᑲᐅᓪᑎᐊᒥᐅᑦ ᐊᑭᕋᖅᑐᖅᑎᒃᓴᖏᓐᓂᒃ ᐸᕐᖕᓁᕐᖕᓂᐊᕋᒪ, ᐅᓐᓄᐊᓪᓗᐊᑉ ᓇᓛᓂᑦ ᐃᓅᖃᑎᒌᒡᔪᐊᓂᒃ ᑕᐱᕇᓕᖅᑎᑦᓯᔪᒫᕋᒪ, ᐸᕐᖕᓇᖕᓂᐊᖅᐳᓪᓗ ᐹᐱᓘᓂᒥᐅᓂᒃ ᐅᓇᑕᕐᕕᖃᕈᒪᓗᑎᒃ, ᐅᓐᓄᐊᓪᓗᐊᒥᓐᖔᖅᑐᓄᑦ ᑎᒍᔭᐅᔪᒫᖅᐳᑦ ᐱᑎᒃᓯᖏᑕ ᖃᕐᔪᖏᑦ ᐅᓇᑕᕆᐅᖅᓴᓯᒪᔪᑎᑐᑦ ᑕᒪᐅᖕᒊᓐᓈᖅᑐᖃᕐᖕᓂᐊᓐᖏᓚᑦ. 10ᑲᐅᓪᑎᐊᒥᐅᑦ ᓇᒡᕚᖅᑕᒐᒃᓴᓐᖑᕈᒫᖅᐳᑦ ᓵᓚᒋᔨᒥᖕᓄᑦ, ᐱᖁᑎᖏᓐᓂᒡᓗ ᓇᒡᕚᖅᑕᖅᑐᑦ ᓈᒻᒪᒃᓯᔪᒫᖅᐳᑦ ᐱᔪᒪᔭᒥᖕᓂᒃ, ᐊᑕᓂᖅ ᐅᖃᖅᐳᖅ.”
ᐹᐱᓘᓂᒥᐅᑦ ᓵᓚᐅᓂᖓᑦ
11“ᖁᕕᐊᓱᒃᑲᑦᓯ ᓯᕆᓪᓗᓯᓗ, ᓇᒡᕚᖅᑕᕐᖕᓂᑦᓯᓐᓄᑦ ᐃᓄᖁᑎᒪ ᐱᖏᓐᓂᒃ, ᒥᓯᒃᑕᖅᐳᓯ ᐊᕐᖕᓇᓪᓗᒃᑎᑐᑦ ᐸᐅᕐᖓᒃᓴᓂᒃ ᓯᐊᒻᒪᖅᑎᕆᔪᑎᑐᑦ, ᓂᓪᓕᐊᓪᓗᓯᓗ ᕿᒻᒥᕐᔪᐊᑎᑐᑦ. 12ᐊᓈᓁᑦ ᑲᓐᖑᓱᒃᑎᑕᐅᕕᒃᔪᐊᕈᒫᖅᐳᖅ, ᐃᓕᖕᓂᒃ ᕿᑐᕐᖓᖅᑖᓚᐅᖅᑐᖅ ᐃᓕᕋᒃᑯᑦᔨᓂᐊᖅᐳᖅ, ᑕᑯᒋᑦ, ᐃᓅᖃᑎᒌᒡᔪᐊᓂᑦ ᐃᓱᒪᓇᖏᓐᓂᖅᐹᖑᓕᕈᒫᖅᐳᖅ, ᓱᓇᖃᔪᐃᑦᑐᓐᖑᖅᓗᓂ, ᓄᓇᖓᓗ ᐸᓂᖅᓗᓂ ᓯᐅᕋᕐᔪᐊᑎᑐᑦ. 13ᐊᑕᓂᕐᖕᒧᑦ ᓂᓐᖓᒡᕕᐅᓯᒪᓂᕐᖕᒥᖕᓄᑦ ᐃᓄᖃᕈᓐᓃᕈᒫᖅᐳᑦ ᓱᓇᖃᕈᓐᓃᖅᓗᓂᓗ, ᐹᐱᓘᓂᒥᒃ ᐊᖅᑯᓵᖅᑐᑦ ᑕᒪᕐᖕᒥᒃ ᑲᒪᓂᐊᕈᑎᒋᔪᒫᖅᐹᑦ ᑲᑉᐱᐊᓲᑎᒋᓗᒍᓗ ᓱᕋᒃᓯᒪᓂᖓᓄᑦ.
14“ᐹᐱᓘᓂᒥᐅᑦ ᐊᕙᑕᖏᖅᓗᒋᑦ ᐱᑎᒃᓵᓕᖅᓯᒋᒃ ᖃᕐᔪᓯ ᐊᒥᐊᒃᑯᑦᑍᓕᓗᒋᑦ ᐊᑕᓂᕐᖕᒧᑦ ᐊᔪᖅᑐᓕᓚᐅᕐᖕᒪᑕ. 15ᐊᕙᑖᓂᑦ ᓂᓪᓕᐊᓗᓯ ᐅᐸᓕᖅᓯᒋᒃ, ᓴᐱᓕᕈᑎᒃ ᐃᒻᒥᖕᓂᒃ ᑐᓂᑦᔪᑎᒋᓂᐊᕐᖕᒪᑕ, ᓇᐸᔪᕐᔪᐊᖏᑦ ᐅᕐᕈᔪᒫᖅᐳᑦ, ᐊᕙᓗᕐᔪᐊᖏᓪᓗ ᓱᕋᒡᓗᑎᒃ ᐊᑕᓂᐅᑉ ᐊᑭᓂᐊᕐᖕᓂᕆᖕᒪᒍ, ᐊᑭᓂᐊᕐᕕᒋᓕᖅᓯᐅᒃ ᑍᒫᓪᓗᐊᖅ ᐱᓂᐊᕐᖕᓂᕆᖃᑦᑕᖅᓯᒪᔭᖏᑎᑐᑦ ᐃᓕᑦᓯᓐᓄᑦ. 16ᑲᓐᖓᖅᓱᐃᔩᑦ ᐲᔭᖅᓯᒋᒃ ᐹᐱᓘᓂᒥᑦ, ᐱᕈᖅᓰᕕᖕᒥ ᓇᑲᑎᕆᔪᑎᑐᑦ ᐃᕕᖕᓂᒃ, ᐅᓇᑕᕈᒪᔪᑦ ᐱᓪᓗᒋᑦ, ᐃᓅᖃᑎᑐᖃᑦᓯᓐᓄᑦ ᐅᑎᓕᕆᑦᓯ, ᓄᓇᑐᖃᑦᓯᓐᓄᓪᓗ ᕿᒫᓕᕆᑦᓯ.”
ᐃᓴᕆᐊᓕᒥᐅᑦ ᓄᓇᒥᖕᓄᑦ ᐅᑎᕐᖕᓂᖓᑦ
17“ᐃᓴᕆᐊᓕᒥᐅᑦ ᓰᐱᑎᑐᑦ ᓯᐊᒻᒪᖅᓯᒪᕗᑦ ᓛᔭᓄᑦ ᒪᓕᑲᑕᒃᑕᐅᔪᑎᑐᑦ, ᓯᕗᓪᓕᖅᐹᖑᓪᓗᑎᒃ ᑖᒃᑯᓂᖓ ᑎᒍᓯᓚᐅᖅᐳᖅ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦ, ᑭᖑᓪᓕᖅᐹᖑᓪᓗᓂ ᓴᐅᓂᖅᑯᑦᑍᔪᑎᑐᑦ ᑍᒤᑦᑑᓯᒪᕗᖅ ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ. 18ᑍᒤᒻᒪᑦ ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ, ᐃᓴᕆᐊᓕᒥᐅᑦ ᒎᑎᖓᑦ ᐅᖃᖅᐳᖅ: ᑕᑯᒋᑦ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓ ᓱᒋᐊᕐᖕᓂᐊᖅᐸᕋ ᓄᓇᖁᑎᖓᓗ, ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖓᑦᑎᑐᑦ. 19ᐃᓴᕆᐊᓕᒥᐅᑦ ᓄᓇᖁᑎᖏᓐᓄᑦ ᐅᑎᖅᑎᑦᓱᒫᖅᐸᒃᑲ, ᓂᕆᓇᓱᒡᕕᒃᓴᖃᕈᓐᓇᖅᓯᔪᒫᖅᐳᑦ ᖃᖅᑲᒥ ᑳᕐᒥᐅᓪᒥ ᐹᓴᓂᒥᓗ, ᐊᑭᐊᑦᑐᖅᓗᑎᒃ ᓂᕆᔪᒤᕈᒫᖅᐳᑦ, ᐃᕗᕅᒥ ᒋᓕᐊᑎᒥᓗ. 20ᐅᓪᓗᓂ ᑍᒃᑯᓇᓂ, ᐊᑕᓂᖅ ᐅᖃᖅᐳᖅ, ᖃᐅᔨᓇᓱᐊᖅᑐᖃᕈᒫᖅᐳᖅ ᐃᓴᕆᐊᓕᒥᐅᑦ ᐸᓯᔭᒃᓴᐅᓂᖏᓐᓂᒃ, ᑭᓯᐊᓂᓕ ᓇᓂᓯᔪᖃᕈᒫᓐᖏᓚᖅ, ᔫᑕᒥᐅᓪᓗ ᐊᔪᕐᖕᓂᖏᓐᓂᒃ ᖃᐅᔨᓇᓱᐊᖅᑐᖃᕈᒫᖅᐳᖅ ᓇᓂᓯᔪᖃᕈᒫᖏᓐᓂᕗᖅ, ᐊᒥᐊᒃᑰᔪᑦ ᐃᓱᒪᒋᔪᓐᓁᕐᕕᒋᔪᒫᕋᒃᑭᑦ.”
ᒎᑎᐅᑉ ᐃᖅᑲᖅᑐᐃᓂᖓ ᐹᐱᓘᓂᒥᐅᓂᒃ
21“ᐅᓇᑕᕆᐊᖅᑕᐅᓕᑦ ᒥᕋᓮᒥᐅᑦ ᓄᓇᓕᖏᑦ, ᐱᑳᑦᒥᐅᓪᓗ ᒪᓕᒡᓗᒋᑦ ᑐᖁᕋᖅᑕᐅᓗᑎᒃ ᓄᖑᑕᐅᓕᑦ. ᐊᑕᓂᖅ ᐅᖃᖅᐳᖅ, ᑎᓕᓯᑦᔪᑎᓕᒫᒃᑲ ᐱᓂᐊᕈᑎᒋᓯᒋᒃ. 22ᐅᓇᑕᖅᑐᑦ ᑐᓴᒐᒃᓴᑑᓕᖅᐳᑦ ᓄᓇᓕᓕᒫᓂ, ᐅᓇᑕᖅᑐᓄᓪᓗ ᓯᖁᑦᑎᖅᑕᐅᔪᑦ. 23ᓄᓇᕐᔪᐊᕐᖕᒥᐅᓂᒃ ᓯᖁᑦᑎᕆᓚᐅᖅᑐᑦ ᑲᐅᑕᖅᑎᑐᑦ, ᓯᖁᒥᑕᐅᓯᒪᕗᖅ, ᐹᐱᓘᓂ ᓱᓇᖃᕈᓐᓃᖅᐳᖅ ᐃᓅᖃᑎᒌᒡᔪᐊᑦ ᓴᓂᐊᓂ. 24ᐹᐱᓘᓂᒥᐅᑕᐅᔪᓯ ᐱᔭᐅᕕᒃᓴᑦᓯᓐᓂᒃ ᐋᖅᑭᒃᓯᓚᐅᕋᒪ ᖃᐅᔨᑎᓐᓇᓯ ᐱᔭᐅᔪᒫᖅᐳᓯ, ᓇᓂᔭᐅᓗᓯ ᑎᒍᔭᐅᔪᒫᖅᐳᓯ, ᐊᑕᓂᖅ ᐊᑭᕋᖅᑐᓚᐅᕋᑦᓯᐅᒃ. 25ᐊᑕᓂᐅᑉ ᐅᓇᑕᐅᑎᓂ ᓴᖅᑭᑎᒻᒪᒋᑦ, ᓂᓐᖓᕕᒃᔪᐊᕐᖕᓂᕐᖕᒥᓄᓪᓗ ᓱᒋᐅᑎᓂ ᐊᑐᐃᓐᓇᕈᖅᐰᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐱᓇᓱᐊᒐᒃᓴᖃᓕᕐᖕᒪᑦ ᑲᐅᓪᑎᐊᒥᐅᑦ ᓄᓇᖁᑎᖓᓐᓂ. 26ᐅᖓᓯᒃᑐᓂᑦ ᐅᐸᒡᓗᒍ, ᐸᐅᕐᖓᒃᓴᒃᑯᕕᖏᑦ ᒪᑐᐃᖅᓯᐅᒃ, ᓂᐊᖂᔭᒃᓴᑎᑐᓪᓗ ᐹᐱᓘᓂᒥᐅᑦ ᐱᖑᐊᕐᔪᓕᐅᖅᓯᒪᑎᓯᐅᒃ, ᐊᒥᐊᒃᑯᖃᖏᓪᓗᒋᑦ ᓄᖑᑕᐅᓕᑦ. 27ᐊᖑᓴᓪᓗᓐᖑᕋᑖᖅᑐᖁᑎᖏᑦ ᑐᖁᕋᖅᑕᐅᓕᑦ, ᑐᖁᓮᕕᖕᒧᐊᖅᑕᐅᓗᑎᒃ ᑲᑉᐱᐊᓐᓇᒦᒃ ᑖᒃᑯᓄᖓ ᐅᓪᓗᖅ ᓇᓪᓕᐅᓯᒪᖕᒪᑦ ᓱᒋᐊᖅᑕᐅᕕᒃᓴᖓᑦ!
28“ᐹᐱᓘᓂᒥᑦ ᕿᒫᓂᑯᐃᑦ ᓮᐅᓂᒥ ᓄᓇᑖᕐᖕᓂᑯᐃᑦ ᐅᖃᐅᓯᖏᑦ ᑐᓵᓯᐅᒃ, ᐊᑕᓂᐅᑉ ᒎᑎᑦᑕ ᐊᑭᓂᐊᕐᕕᒋᕔᑦ, ᑐᒃᓯᐊᕐᕕᒡᔪᐊᖁᑎᓂ ᐱᑦᔪᑎᒋᓪᓗᒍ.
29 #
ᑕᑯᑎ 18:6. “ᐱᑎᒃᓵᖅᑏᑦ ᐹᐱᓘᓂᒧᑦ ᐱᑎᒃᓵᕆᐊᖅᑐᖁᔭᐅᓕᑦ, ᐊᕙᑕᖏᖅᑕᐅᓯᒪᓗᑎᒃ ᓯᓂᒃᑕᕆᐊᕐᕕᐅᓕᑦ, ᐊᑕᐅᓯᕐᖕᒥᒡᓘᓐᓃᑦ ᐊᓐᓇᒃᑐᖃᖅᑍᓕᓕ, ᐊᑭᓂᐊᕐᕕᐅᓕᑦ ᐱᓂᐊᕐᖕᓂᕆᖃᑦᑕᓚᐅᖅᑕᖏᑦ ᒪᓕᒡᓗᒋᑦ, ᐊᑕᓂᖅ ᐊᑭᕋᖅᑐᓚᐅᕐᖕᒪᑦᔪᒃ ᐃᓴᕆᐊᓕᒥᐅᑦ ᐃᑦᔪᕐᖕᓁᓐᓂᖅᐹᖁᑎᖓᑦ. 30ᑍᒤᒻᒪᑦ ᐃᓅᓱᒃᑐᖁᑎᖏᑦ ᑐᖁᕋᖅᑕᐅᔪᒫᖅᐳᑦ, ᐅᓇᑕᖅᑐᒃᓴᖁᑎᖏᓪᓗ ᑐᖁᑕᐅᓗᑎᒃ ᑕᒪᕐᖕᒥᒃ ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ, ᐊᑕᓂᖅ ᐅᖃᖅᐳᖅ.
31“ᑕᑯᒋᑦ ᐊᑭᕋᖅᑐᖅᐸᒋᑦ ᐱᔪᓐᓇᕋᓱᒋᓗᐊᓚᐅᕋᕕᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ, ᐅᓪᓗᖅ ᓱᒋᐊᖅᑕᐅᕕᒃᓴᖅ ᓇᓪᓕᐅᑎᕗᖅ. 32ᐱᔪᓐᓇᕋᓱᒋᓗᐊᓚᐅᖅᑐᖅ ᐅᕐᕈᔪᒫᖅᐳᖅ ᒪᑭᑎᑦᓯᔨᒃᓴᖃᕐᖕᓂᐊᓐᖏᓚᕐᓗ ᓄᓇᓕᖁᑎᖏᓐᓂ ᐃᑯᐊᓪᓔᔪᒫᖅᐳᖓ, ᐃᑯᐊᓚᔪᒧᓪᓗ ᖃᓂᒋᔭᖓᓃᑦᑐᓕᒫᑦ ᓄᖑᑕᐅᔪᒫᖅᐳᑦ.
33“ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ; ᐃᓴᕆᐊᓕᒥᐅᑦ ᔫᑕᒥᐅᓪᓗ ᐅᖁᒤᒃᓴᕐᖕᓇᖅᑐᒦᑉᐳᑦ ᑎᒍᓯᔨᒋᓚᐅᖅᑕᖏᑕ ᑎᒍᒥᐊᕐᖕᒪᒋᑦ ᓴᒃᑯᑦᓱᒪᓇᒋᓪᓗ. 34ᐱᐅᓕᔨᒃᓴᖓᑦ ᐱᔪᓐᓇᕐᖕᓂᕐᔪᐊᖃᖅᐳᖅ, ᐊᑎᖃᕋᒥ ᐊᑕᓂᕐᖕᒥᒃ ᐊᔪᒐᖃᖏᑦᑐᕐᔪᐊᕐᖕᒥᒃ. ᓴᐳᑦᔨᓇᓱᒡᓗᓂ ᐊᔪᐃᓐᓇᕈᓐᓇᖅᑐᖅ, ᓮᓕᑦᓯᐊᕐᖕᓂᕐᖕᒥᒃ ᑎᑭᑎᑦᓯᔪᒫᖅᐳᖅ ᓄᓇᕐᔪᐊᕐᖕᒧᑦ, ᐹᐱᓘᓂᒦᑦᑐᓪᓕ ᓮᓕᑦᓯᐊᕈᓐᓇᕈᒫᓐᖏᓚᑦ.
35ᐹᐱᓘᓂᒥᐅᑦ ᐅᓇᑕᖅᑕᐅᔪᒫᕐᖕᒪᑕ, ᐊᑕᓂᖅ ᐅᖃᖅᐳᖅ,
ᐃᓄᓕᒫᖏᑦ ᑎᑭᑕᐅᔪᒫᖅᐳᑦ
ᐊᖓᔪᖅᑳᖁᑎᖏᑦ ᓯᓚᑐᔪᖁᑎᖏᓪᓗ.
36ᐅᖃᖅᑎᖁᑎᖏᑦ ᓴᒡᓗᑐᔪᑦ ᑐᖁᑕᐅᔪᒫᖅᐳᑦ,
ᓯᓔᓐᓂᖏᑦ ᓇᓗᓇᕈᓐᓃᕈᒫᕐᖕᒪᑕ
ᐅᓇᑕᖅᑎᖁᑎᖏᑦ ᑐᖁᕋᖅᑕᐅᔪᒫᕐᖕᒪᑕ
ᑲᑉᐱᐊᓱᖕᓂᕐᔪᐊᖃᕈᒫᖅᐳᑦ.
37ᕿᒻᒥᕐᔪᐊᑦ ᕿᒧᒃᓯᐅᑎᓪᓗ ᑐᖁᑕᐅᔪᒫᖅᐳᑦ,
ᐅᓇᑕᖅᑎᑖᖑᓂᑯᐃᑦ ᓄᓇᖃᖅᑐᑐᖃᐅᖏᑦᑐᑦ ᑐᖁᑕᐅᖃᑕᐅᔪᒫᖅᐳᑦ,
ᐊᕐᖕᓇᖅᑎᑑᓕᕈᒫᖅᐳᑦ!
ᐊᔪᖅᓴᖏᑦᔪᑎᖏᑦ ᓇᒡᕚᖅᑕᒐᐅᔪᒫᖅᐳᑦ.
38ᐃᒪᖁᑎᓕᒫᖏᑦ ᓴᓗᐊᕈᒫᖅᐳᑦ,
ᒎᑎᓐᖑᐊᖃᕐᕕᑐᐃᓐᓇᐅᖕᒪᑦ,
ᐃᓄᖏᑦ ᑐᑮᕈᑎᔪᒫᖅᐳᑦ ᑲᑉᐱᐊᓱᖕᓂᕐᖕᒧᑦ.
39 #
ᑕᑯᑎ 18:2. “ᓯᐅᕋᕐᖕᒥᐅᑕᓄᑦ ᖁᐱᕐᕈᓄᑦ ᕿᒻᒥᖓᔪᓄᓪᓗ ᐃᓂᒋᔭᐅᓕᕈᒫᖅᐳᖅ ᓄᓇᖓᑦ, ᑎᖕᒥᐊᕐᔪᐊᓄᓪᓗ ᐋᔅᑐᕆᓯᓄᑦ ᐃᓂᒋᔭᐅᓕᖅᓗᓂ, ᐃᓄᖃᕈᓐᓃᕈᒫᖅᐳᖅ ᑭᖑᕚᕇᓂᑦ ᑭᖑᕚᕇᓄᑦ. 40#ᒨᓯᓯ ᓯᕗᓪᓖᑦ 19:24,25.ᒎᑎᐅᓪᓗ ᓄᖑᑕᐅᑎᑦᓯᓂᕆᓚᐅᖅᑕᖓᑐᑦ ᓱᑑᒪᒥᐅᓂᒃ ᒍᒨᕋᒥᐅᓂᒡᓗ, ᓄᓇᓖᑦ ᖃᓂᒋᔭᖓᓃᑦᑐᑦ ᐱᖃᓯᐅᑎᓗᒋᑦ, ᐊᑕᓂᖅ ᐅᖃᖅᐳᖅ, ᓄᓇᖃᕐᕕᐅᔪᓐᓃᕈᒫᖅᐳᖅ ᐃᓄᖃᐅᕈᓐᓃᖅᓗᓂᓗ.
41ᑕᑯᒋᑦ ᐅᓇᑕᖅᑐᒃᓴᒐᓮᑦ ᐅᓐᓄᐊᓪᓗᐊᑉ ᓇᓛᓂᑦ ᑎᑭᓕᖅᐳᑦ,
ᐃᓅᖃᑎᒌᒡᔪᐊᓂ ᐊᖓᔪᖅᑳᕐᔪᐊᕆᔭᐅᔪᑦ
ᓄᓇᐅᑉ ᐅᖓᓯᖕᓂᖅᐹᖓᓃᑦᑐᑦ ᐊᐅᓚᑦᔭᒃᑕᐅᓯᒪᕗᑦ.
42ᐅᓇᑕᕆᐊᖅᑐᑦ ᓱᒋᐅᑦᓯᔭᖅᐳᑦ ᐱᑎᒃᓯᓂᒃ ᖃᓗᒋᐊᓂᒡᓗ
ᓂᑲᒍᓱᖃᓐᖏᓚᑦ ᓇᒡᓕᖕᓂᖃᕋᑎᒡᓗ,
ᕿᒻᒥᕐᔪᐊᖏᑕ ᕿᑭᕐᕋᖏᑦ ᐃᒪᕐᕕᐅᑉ ᒪᓕᖏᑎᑐᑦ ᐃᒃᑑᓕᔮᖅᐳᑦ,
ᐅᓇᑕᕆᐊᖅᓯᒪᔪᑦ ᐋᖅᑭᒃᓯᒪᓂᕆᕙᒃᑕᖏᑎᑐᑦ ᐋᖅᑭᒃᓯᒪᓪᓗᑎᒃ
ᐅᐸᒍᑎᓕᖅᐳᑦ ᐹᐱᓘᓂᒧᑦ.
43ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ
ᑐᓴᖅᑎᑕᐅᒐᒥ ᑕᓕᖏᒃ ᓄᑮᕈᑎᕘᒃ,
ᑯᒃᓴᓱᖕᓂᕐᖕᒧᑦ ᐅᑯᒤᒃᓴᓕᖅᐳᖅ,
ᐋᓐᓂᐊᓕᖅᓗᓂᓗ ᐊᕐᖕᓇᑎᑐᑦ ᐃᕐᖕᓂᓱᒃᑐᑎᑐᑦ.
44“ᑕᑯᒋᑦ, ᓛᔭᑎᑐᑦ ᑕᕐᕆᓯᒪᕕᖕᒥᖕᓂᑦ ᔪᐊᕐᑕᓂᐅᑉ ᓯᓈᓂᑦ ᓴᖅᑭᑳᓪᓚᒃᑐᑎᑐᑦ ᓇᑎᕐᖕᓇᔪᖕᒧᑦ ᐃᕕᒃᓱᒐᖃᖅᑐᒧᑦ, ᐹᐱᓘᓂᒥᐅᑦ ᐊᖑᑦᓴᐅᑎᒋᔪᒫᖅᐸᒃᑲ ᕿᒫᑎᓪᓗᒋᑦ ᓄᓇᒥᖕᓂᑦ, ᑭᓇᒥᒃ ᑎᓕᔭᒃᓴᖃᖅᐳᖔ ᑍᒤᓕᐅᕈᓐᓇᖅᑐᒥᒃ? ᑭᓇ ᐅᕙᑦᑐᑦ ᑍᒤᑉᐹ, ᐅᕙᓐᓂᒃ ᐊᑭᓕᖃᕈᓐᓇᖅᑐᖅ? ᓰᐱᓕᕆᔨᑕᖃᖅᐹ ᐅᕙᓐᓂᒃ ᓴᐱᓯᓯᒪᔪᓐᓇᖅᑐᒦᒃ? 45ᑍᒤᒻᒪᑦ ᑐᓴᓕᖅᓯᒋᒃ ᐊᑕᓂᐅᑉ ᐹᐱᓘᓂᒥᐅᓄᑦ ᐱᓂᐊᕐᖕᓂᕆᔪᒪᔭᖏᑦ, ᐃᓱᒪᒋᓯᒪᔭᖏᓪᓗ ᑲᐅᓪᑎᐊᒥᐅᓄᑦ, ᐱᕈᕋᑖᕐᖕᓂᑯᐃᑦ ᐊᒡᓛᑦ ᓰᐱᖁᑎᖏᑦ ᐅᓂᐊᖅᓗᒋᑦ ᐊᐅᓪᓚᕈᑎᔪᒫᖅᐰᑦ, ᓇᑎᕐᖕᓇᖅ ᐃᕕᒃᓱᒐᓕᒃ ᓂᕆᓇᓱᒡᕕᖓᑦ ᓯᖁᑦᑎᕐᖕᓂᐊᖅᐸᕋ ᐊᑭᓂᐊᕐᕕᒋᓗᒋᑦ. 46ᐹᐱᓘᓂᒥᐅᑦ ᑎᒍᔭᐅᓂᕋᖅᑕᐅᓂᖓᑦ ᑐᓴᖅᑕᐅᒍᓂ ᓄᓇᕐᔪᐊᖅ ᓴᔪᒍᒫᖅᐳᖅ, ᕿᐊᓂᖓᓗ ᑐᓴᖅᑕᐅᔪᒫᖅᐳᖅ ᐃᓅᖃᑎᒌᒡᔪᐊᓄᑦ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 50: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.