ᔨᕆᒤᐊᐅᑉ ᐊᒡᓚᖏᑦ 51
51
ᐹᐱᓘᓂᒥᐅᑦ ᐃᖅᑲᖅᑐᖅᑕᐅᓂᖓᑕ ᐃᓚᖓ
1ᐃᒫᒃ ᐊᑕᓂᖅ ᐅᖃᖅᐳᖅ, “ᑕᑯᒋᑦ ᐊᓯᕈᐃᔨᐅᑉ ᐱᔪᓐᓇᕐᖕᓂᖓ ᐊᐅᓚᑦᔭᒃᑎᓐᓂᐊᖅᐸᕋ ᐹᐱᓘᓂᒥᐅᓄᑦ ᓕᐸ ᑲᒤᒥᐅᓪᓗ ᐃᓄᖏᓐᓄᑦ. 2ᐹᐱᓘᓂᒥᐅᓄᑦ ᑎᑭᑎᑦᓯᔪᒫᖅᐳᖓ ᓴᓃᔭᖅᓗᒍ ᓱᓁᕈᑦᔭᐅᖁᓪᓗᒍ ᓄᓇᖓᑦ, ᐊᓯᕈᖅᑕᐅᕕᒃᓴᖓᑦ ᓇᓪᓕᐅᑎᒃᐸᑦ ᐊᑭᕋᖅᑐᖅᑕᐅᑎᑦᓱᒫᖅᐸᕋ ᓇᑭᑐᐃᓐᓇᖅ. 3ᐱᑎᒃᓵᖅᑏᑦ ᐱᑎᒃᓯᒥᖕᓂᒃ ᐊᒃᓱᓈᓕᖅᓯᑦᑍᓕᓕᑦ, ᐅᓇᑕᐅᑎᒥᖕᓂᒡᓗ ᐊᓐᓄᕌᖅᑍᓕᓕ, ᐃᓅᓱᒃᑐᖁᑎᖏᑦ ᐊᒥᐊᒃᑯᔭᐅᑦᑍᓕᓕᑦ ᐅᓇᑕᖅᑎᖁᑎᖏᓪᓗ ᓄᖑᑕᐅᓕᑦ. 4ᑲᐅᓪᑎᐊᒥᐅᑦ ᓄᓇᖓᓂ ᑐᖁᕋᕈᒫᖅᐳᑦ, ᐊᖅᑯᑎᖏᓐᓂ ᐃᑭᓕᖅᑕᐅᔪᒫᖅᐳᑦ. 5ᐃᓴᕆᐊᓕᒥᐅᑦ ᔫᑕᒥᐅᓪᓗ ᕿᒪᒃᑕᐅᓯᒪᓐᖏᓚᑦ ᒎᑎᒥᖕᓄᑦ ᐊᑕᓂᕐᖕᒧᑦ ᐊᔪᒐᖃᖏᑦᑐᕐᔪᐊᕐᖕᒧᑦ ᓄᓇᖓᑦ ᐸᓯᔭᒃᓴᐅᒐᓗᐊᖅᑎᓪᓗᒍ ᐃᓴᕆᐊᓕᒥᐅᑦ ᐃᑦᔪᕐᖕᓁᓐᓂᖅᐹᖁᑎᖓᑦᑕ ᓵᖓᓂ. 6ᐹᐱᓘᓂᒥᑦ ᕿᒫᓕᕆᑦᓯ ᐃᓅᔪᒪᒍᑦᓯ, ᐊᔪᖅᑐᓕᓂᖏᓐᓄᑦ ᐊᓯᕈᖅᑕᐅᑦᔪᑎᖃᖅᑍᓕᒋᑦᓯ, ᐊᑕᓂᐅᑉ ᐊᑭᓂᐊᕐᖕᓂᒃᓴᖓ ᓇᓪᓕᐅᑎᖕᒪᑦ, ᐊᑕᓂᐅᑉ ᐊᑭᓂᐊᕐᕕᒋᓂᐊᕐᖕᒪᒋᑦ ᐊᑭᓂᐊᕐᕕᐅᔭᕆᐊᖃᕐᖕᓂᖏᑦ ᒪᓕᒡᓗᒋᑦ. 7#ᑕᑯᑎ 17:2-4; 18:3.ᐹᐱᓘᓂᒥᐅᑦ ᑏᑐᑎᑎᑐᑦ ᒎᓗᑎᑐᑦ ᑍᒤᓚᐅᖅᐳᑦ ᐊᑕᓂᐅᑉ ᐊᒡᒐᖏᓐᓂ ᓄᓇᕐᔪᐊᕐᖕᒥᐅᓂᒡᓗ ᐋᖓᔮᓕᖅᑎᑦᓯᓚᐅᖅᐳᑦ, ᐃᓅᖃᑎᒌᒡᔪᐊᑦ ᐃᒥᖅᑎᓚᐅᕐᖕᒪᑦᔪᒃ ᕔᓂᖁᑎᒥᖕᓂᑦ ᑐᑭᖃᕈᓐᓃᖅᐳᑦ. 8ᐹᐱᓘᓂᒥᐅᑦ ᐊᔪᓕᑳᓪᓚᒍᒫᖅᐳᑦ ᐊᓯᕈᖅᑕᐅᓗᑎᒡᓗ, ᕿᐊᑦᔪᑎᒋᓕᖅᓯᐅᒃ! ᐃᑭᖏᓐᓄᑦ ᒥᖑᐊᕈᑎᒃᓴᖅᓯᒋᑦᓯ, ᐋᖅᑭᒐᔭᕐᖕᒪᖔᑦ ᐆᒃᑐᖅᑕᐅᖁᓪᓗᒋᑦ. 9#ᑕᑯᑎ 18:5.ᐹᐱᓘᓂᒥᐅᑦ ᐋᖅᑭᒍᓐᓇᕋᔭᓚᐅᖅᑑᒐᓗᐊᑦ ᐋᖅᑭᒃᑕᐅᓐᖏᓚᕐᓕ, ᕿᒪᒡᓗᒍ ᓄᓇᑐᖃᑦᑎᓐᓄᑦ ᐂᓕᖅᑕ, ᐃᖅᑲᖅᑐᖅᑕᐅᓂᒃᓴᖓ ᐊᖏᓗᐊᓕᕐᖕᒪᑦ ᐱᕈᖅᓯᒪᓗᐊᓕᖅᓗᓂᓗ.
10“ᐊᑕᓂᐅᑉ ᓮᒻᒪᐅᑎᓯᒪᖕᒪᑎᒍᑦ, ᕾᒋᑦᓯ, ᐅᖃᐅᓯᕆᓚᕗᑦ ᓮᐅᓂᒥ ᐊᑕᓂᐅᑉ ᒎᑎᑦᑕ ᐱᓂᐊᕐᖕᓂᕆᔭᖏᑦ.
11“ᖃᕐᔪᓯ ᑮᓐᓇᒃᓴᓕᖅᓯᒋᒃ ᓴᐴᓗᑕᓯᓗ ᑎᒍᓗᒋᑦ! ᐊᑕᓂᐅᑉ ᒥᑏᔅᑯᑦ ᐊᖓᔪᖅᑳᕐᔪᐊᖏᑦ ᐊᐅᓚᑦᔭᒃᑎᒻᒪᒋᑦ ᐹᐱᓘᓂᒥᐅᓂᒃ ᐊᓯᕈᐃᔪᒪᓪᓗᓂ ᐃᓱᒪᒋᔭᖃᕐᖕᒪᑦ, ᐊᑕᓂᖅ ᐊᑭᓂᐊᕈᒫᕐᖕᒪᑦ ᑐᒃᓯᐊᕐᕕᒃᔪᐊᖁᑎᓂ ᐱᑦᔪᑎᒋᓗᓂᐅᒃ. 12ᐹᐱᓘᓂᒥᐅᑦ ᐊᑭᕋᖅᑐᕐᕕᒋᓕᖅᓯᒋᒃ ᓇᓗᓁᒃᑯᓯᔭᖅᓗᓯᓗ, ᖃᐅᔨᓴᖅᑎᐅᔪᑦ ᐱᔪᓐᓇᖅᓯᑎᒋᐊᒃᑲᓐᓂᖅᓯᐅᒃ, ᐅᓐᓄᐊᖅᓯᐅᖅᑏᓪᓗ ᐅᐸᓗᐃᓗᒋᑦ ᐱᒋᐊᕐᖕᓂᕆᓂᐊᖅᑕᑦᓯᓐᓂᒃ ᐋᖅᑭᒃᓱᐃᓕᕆᑦᓯ ᐊᑕᓂᐅᑉ ᐋᖅᑭᒃᓯᒪᔭᓂ ᑲᔪᓯᑎᓐᓂᐊᕐᖕᒪᒍ ᐹᐱᓘᓂᒥᐅᓄᑦ ᐅᖃᖅᓯᒪᔭᓂ. 13#ᑕᑯᑎ 17:1.ᐃᒪᖁᑎᖃᖅᑐᓯ ᐅᓄᖅᑐᓂᒃ, ᓄᓇᖃᖅᑐᓯᓗ ᐊᔪᖅᓴᖏᑦᔪᑎᒃᓴᖃᖅᑐᓂᒃ, ᐊᔪᓕᕐᕕᒃᓴᓯ ᑎᑭᑉᐳᖅ, ᐃᓅᑦᔪᑎᒃᓴᖃᕈᓐᓃᕐᕕᒃᓴᓯ ᓈᕗᖅ. 14ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕕᒍᑎᒋᕗᖅ ᐃᒻᒥᓂᒃ, ᐅᓇᑕᖅᑐᒃᓴᓂᒃ ᑕᑕᑕᐅᑎᑦᓱᒫᖅᐸᑦᓯ ᐱᒡᓕᖅᑕᐅᔮᖅᑐᑎᑐᑦ ᐅᓄᖅᑎᒋᔪᓂᒃ, ᕾᒐᓛᕈᒫᖅᐳᓪᓗ ᐃᓕᑦᓯᓐᓂᒃ ᓵᓚᖃᕐᖕᓂᑎᒃ ᐱᑦᔪᑎᒋᓗᒍ.”
ᐃᓐᖏᐅᑎ ᒎᑎᒥᒃ ᓂᖅᑐᐃᓂᕐᖕᒧᑦ
15ᐊᑕᓂᐅᑉ ᐱᔪᓐᓇᕐᖕᓂᕐᖕᒥᓄᑦ ᓄᓇ ᓴᓇᓚᐅᖅᐹ;
ᓯᓚᕐᔪᐊᕐᓗ ᐱᓐᖑᖅᑎᓚᐅᖅᐹ ᓯᓚᑐᓂᕐᖕᒥᓄᑦ
ᕿᓚᒡᓗ ᓯᐊᒻᒪᖓᑎᑉᐹ ᑐᑭᓯᐅᒪᑦᓯᐊᕐᖕᓂᕐᖕᒥᓄᑦ.
16ᓂᐱᒥᓄᑦ ᓂᓪᓕᕌᖓᑦ ᓯᓚ ᐃᒃᑑᓕᔮᕈᓐᓇᖅᐳᖅ,
ᓄᕗᔭᓂᒃ ᓴᖅᑭᑎᑦᓯᔪᓐᓇᖅᑐᖅ ᓄᓇᕐᔪᐊᑉ ᑭᒡᓕᖓᓂᑦ,
ᓯᓚᓗᓕᕌᖓᑦ ᖃᐅᒻᒪᓪᓚᖃᖅᑎᑦᓯᔪᓐᓇᖅᐳᖅ,
ᐊᓄᕌᓕᖅᑎᑦᓯᕙᒃᑐᖅ ᐊᓄᕆᒃᑯᕕᖁᑎᒥᓂᑦ.
17ᐃᓄᓕᒫᑦ ᑐᑭᓯᒪᓐᖏᓚᑦ ᖃᐅᔨᒪᓇᑎᒡᓗ;
ᒎᓗᒥᒃ ᓴᓇᓐᖑᐊᖅᑏᑦ
ᒎᑎᓐᖑᐊᓕᐊᒥᖕᓂᒃ ᑲᓐᖑᓲᑎᒃᓴᓕᐅᖅᐸᒃᐳᑦ,
ᓴᓇᓐᖑᐊᖅᑕᖏᑦ ᓱᓕᖏᒻᒪᑕ ᐊᓂᕐᖕᓂᖃᕋᑎᒡᓗ.
18ᐊᑐᕐᖕᓇᓐᖏᓚᑦ ᒥᑕᐅᑎᒋᔭᒃᓴᓕᐅᑐᐃᓐᓇᖅᐳᑦ,
ᖃᐅᔨᓇᓱᐊᖅᑕᐅᒃᐸᑕ ᐊᑐᖅᑐᒃᓴᐅᖏᓐᓂᖏᑦ
ᓇᓗᓇᕈᓐᓃᕋᔭᖅᐳᑦ.
19ᔧᑰᓪᓕ ᒎᑎᖓ ᑖᒃᑯᑎᑐᓇᖅ ᑍᒤᓐᖏᓚᖅ,
ᑕᒤᓐᓂᒃ ᐱᓐᖑᖅᑎᑦᓯᔨᐅᖕᒪᑦ,
ᐃᓄᖁᑎᖏᑕᓗ ᑭᖑᕚᕇᖏᑦ ᐱᒋᐊᖅᑎᓯᒪᕔᑦ,
ᐊᑕᓂᕐᖕᒥᒃ ᐊᔪᒐᖃᖏᑦᑐᕐᔪᐊᕐᖕᒥᒃ ᑖᓐᓇ ᐊᑎᖃᖅᐳᖅ.
ᐊᑕᓂᐅᑉ ᑲᐅᑕᐅᔭᖓ
20ᐊᑕᓂᖅ ᐅᖃᖅᐳᖅ,
“ᑲᐅᑕᕆᕙᒋᑦ ᓱᒋᐅᑎᒋᓪᓗᑎᓪᓗ ᐅᓇᑕᖅᑎᓪᓗᖓ;
ᐊᑐᖅᓗᑎᑦ ᐃᓅᖃᑎᒌᒡᔪᐊᓂᒃ ᐊᐅᓚᑦᔧᓯᒪᕗᖓ,
ᐊᑐᖅᓗᑎᓪᓗ ᐊᖓᔪᖅᑲᐅᕕᒃᔪᐊᓂᒃ ᐊᓯᕈᐃᓯᒪᕗᖓ.
21ᐊᑐᖅᓗᑎᑦ ᐊᓯᕈᐃᓚᐅᖅᐳᖓ
ᕿᒻᒥᕐᔪᐊᓂᒃ ᐃᑭᒪᔨᐊᖏᓐᓂᒡᓗ,
ᐊᑐᖅᓗᑎᓪᓗ ᐊᓯᕈᐃᓚᐅᖅᐳᖓ
ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᐃᑭᒪᔨᐊᖏᓐᓂᒡᓗ.
22ᐊᑐᖅᓗᑎᑦ ᐊᓯᕈᐃᓚᐅᖅᐳᖓ
ᐊᖑᑎᓂᒃ ᐊᕐᖕᓇᓂᒡᓗ,
ᐊᑐᖅᓗᑎᓪᓗ ᐊᓯᕈᐃᓚᐅᖅᐳᖓ
ᐃᓄᑐᖃᐅᓕᖅᑐᓂᒃ ᐃᓅᓱᒃᑐᓂᒡᓗ,
ᐊᑐᖅᓗᑎᑦᑕᐅᖅ ᐊᓯᕈᐃᓚᐅᖅᐳᖓ
ᓄᓖᑦᑐᓂᒃ ᐅᐃᒡᒐᓱᖕᓂᒡᓗ.
23ᐊᑐᖅᓗᑎᑦ ᐊᓯᕈᐃᓚᐅᖅᐳᖓ
ᓰᐱᓕᕆᔨᓂᒃ ᓰᐱᖁᑎᖏᓐᓂᒡᓗ,
ᐊᑐᖅᓗᑎᓪᓗ ᐊᓯᕈᐃᓚᐅᖅᐳᖓ
ᐆᒪᔪᓕᕆᔨᓂᒃ ᐆᒪᔪᖁᑎᖏᓐᓂᒡᓗ,
ᐊᑐᖅᓗᑎᑦᑕᐅᖅ ᐊᓯᕈᐃᓚᐅᖅᐳᖓ
ᐊᐅᓚᑦᓯᔨᓂᒃ ᐊᖓᔪᖅᑳᖑᔪᓂᒡᓗ.”
ᐹᐱᓘᓂᒥᐅᑦ ᐊᑭᓂᐊᖅᑕᐅᓂᖓ
24ᐊᑕᓂᖅ ᐅᖃᖅᐳᖅ, “ᑕᐅᑐᒃᑎᓪᓗᓯ ᐹᐱᓘᓂ ᐊᑭᓂᐊᓛᖅᐸᕋ ᑕᕝᕙᓂᓗ ᓄᓇᖃᖅᑐᑦ ᑲᐅᓪᑎᐊᒥᐅᑦ, ᐱᐅᖏᑦᑐᓕᓂᕆᓚᐅᖅᑕᖏᓐᓄᑦ ᓮᐅᓂᒥ. 25ᑕᑯᒋᑦ, ᐊᑭᕋᕆᓕᖅᐸᒋᑦ ᐊᓯᕈᖅᓮᔨᑐᐃᓐᓇᐅᒐᕕᑦ, ᓄᓇᕐᔪᐊᓕᒫᒥ ᐊᓯᕈᐃᔨᐅᒐᕕᑦ, ᐊᑕᓂᖅ ᐅᖃᖅᐳᖅ. ᑕᓖᒃᑲᒃ ᐃᓵᒃᑎᒍᒃᑭᒃ ᐃᓐᓈᕉᑉ ᓯᓇᕐᔪᐊᓂᑦ ᐃᔪᒃᑲᕈᕕᑦ, ᖃᖅᑲᐅᓕᕈᒫᖅᐳᑎᑦ ᐃᑭᓐᓂᑯᑎᑐᑦ ᑍᒤᓕᖅᓗᑎᑦ. 26ᐃᒡᓗᓕᐅᖅᑐᓄᑦ ᑎᕆᖅᑯᒃᓴᒥᒃ ᐅᔭᕋᒃᓴᖅᑖᕐᕕᐅᓚᐅᖅᓯᒪᒃᔮᓐᖏᓚᑎᑦ, ᑐᓐᖓᕕᒃᓴᐅᓂᐊᖅᑐᒥᒡᓘᓐᓃᑦ ᐅᔭᕋᒃᑖᕐᕕᐅᓂᐊᓐᖏᓚᑎᑦ, ᓱᓁᕈᓯᒪᔪᒫᕋᕕᑦ ᐃᓱᖃᖏᑦᑐᒧᑦ, ᐊᑕᓂᖅ ᐅᖃᖅᐳᖅ.
27“ᓄᓇᓕᖕᓂ ᓇᓗᓁᒃᑯᑕᕐᖕᒥᒃ ᓴᖅᑭᑦᑎᓕᕆᑦᓯ, ᖁᖁᐊᕈᑦ ᓂᓪᓕᖅᑎᓕᖅᓯᐅᒃ ᐃᓅᖃᑎᒌᒡᔪᐊᓪᓗ ᐊᑐᐃᓐᓇᕈᖅᑎᓕᖅᓯᐅᒃ ᐅᓇᑕᕆᐊᖁᓪᓗᒋᑦ, ᕾᖁᔨᓕᕆᑦᓯ ᐊᖓᔪᖅᑲᐅᕕᖕᓂᒃ ᐅᑯᓂᖓ; ᐊᕋᕌᑦᒥᐅᓂᒃ, ᒥᓐᓂᒥᐅᓂᒃ, ᐊᔅᑭᓇᔅᒥᐅᓂᒡᓗ, ᑖᒃᑯᐊ ᐊᐅᓚᑦᓯᔨᒋᓂᐊᖅᑕᖏᓐᓂᒃ ᓇᓗᓁᖅᓯᓗᓯ ᕿᒻᒥᕐᔪᐊᒦᑦᑐᓂᒃ ᑎᓕᓯᓕᕆᑦᓯ ᐱᒡᓕᖅᑕᐅᔮᖅᑐᑎᑐᑦ ᐅᓄᖅᑎᒋᔪᓂᒃ. 28ᐃᓅᖃᑎᒌᒡᔪᐊᑦ ᐅᓇᑕᕆᐊᖅᑐᒃᓴᓕᐊᕆᓗᒋᑦ ᐅᐸᓗᖕᒊᔭᓕᖅᓯᒋᒃ ᐹᐱᓘᓂᒧᑦ, ᒥᑏᔅᒥᐅᑦ ᐊᖓᔪᖅᑳᕐᔪᐊᖏᑦ ᐊᐅᓚᑦᓯᔨᖁᑎᖏᓪᓗ, ᐊᖓᔪᖅᑳᖁᑎᖏᓪᓗ, ᓄᓇᓖᓪᓗ ᑖᒃᑯᓄᖓ ᐊᐅᓚᑕᐅᔪᑦ. 29ᓄᓇ ᓴᔪᒃᐱᓗᒃᐳᖅ ᐋᓐᓂᕇᓯᖅᑐᑎᑐᑦ, ᐊᑕᓂᐅᑉ ᐹᐱᓘᓂᒥᐅᓄᑦ ᐊᑭᓂᐊᕐᖕᓂᕆᔪᒪᔭᖓ ᓇᓪᓕᐅᑎᖕᒪᑦ, ᐹᐱᓘᓂᒥᐅᑦ ᓄᓇᖓᑦ ᓱᓁᕈᑦᔭᐅᖕᒪᑦ ᓄᓇᖃᕐᕕᐅᔪᓐᓇᕈᓐᓃᖅᐳᖅ ᑭᓇᒃᑯᑐᐃᓐᓇᕐᖕᓄᑦ. 30ᐹᐱᓘᓂᒥᐅᑦ ᐅᓇᑕᖅᑎᖁᑎᖏᑦ ᓴᐱᓕᖅᐳᑦ, ᐱᔭᐅᑦᑍᓕᕕᖕᒥᓃᒃᑲᓗᐊᖅᓗᑎᒃ, ᑕᖃᓂᕐᖕᒧᑦ ᐊᕐᖕᓇᑎᑐᑦ ᑍᒤᓕᕐᖕᒪᑕ, ᐊᖏᕐᕋᖏᑦ ᐃᑯᐊᓪᓚᒃᑕᐅᖕᒪᑕ, ᐃᑎᖅᑕᕐᕕᖏᑕᓗ ᓴᕕᕋᔭᒃᑕᖏᑦ ᓯᖁᑦᑎᖅᑕᐅᖕᒪᑕ. 31ᑐᐊᕕᖅᑐᒥᒃ ᑐᓴᖅᑎᑦᓯᔩᑦ ᐅᐃᒍᓕᕇᒡᓗᑎᒃ ᑐᓴᖅᑎᑦᓯᔭᖅᑐᖅᐳᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᐃᒡᓗᒐᓴᒡᔪᐊᖁᑎᖏᑕ ᐱᔭᐅᓂᖏᓐᓂᒃ ᐃᓱᐊᓂᑦ ᐃᓱᐊᓄᑦ. 32ᑰᑦ ᐃᑳᕈᑎᖃᕈᓐᓃᖅᑎᑕᐅᕗᑦ, ᐃᒡᓗᐃᑦ ᐱᔭᐅᑦᔧᖅᓯᒪᔪᑦ ᐃᑯᐊᓪᓚᒃᑕᐅᕗᑦ, ᐅᓇᑕᖅᑏᓪᓗ ᐅᐃᒻᒪᒃᑎᑕᐅᕗᑦ. 33ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐃᓴᕆᐊᓕᒥᐅᑦ ᒎᑎᖓᑦ ᐅᖃᖅᐳᖅ; ᐹᐱᓘᓂᒥᐅᑦ ᐸᓂᖓ ᓂᐊᖂᔭᒃᓴᓂᒃ ᓴᓃᔧᕕᒃᑎᑐᑦ ᑍᒤᑉᐳᖅ, ᑐᓪᓕᕋᖅᑕᐅᓚᐅᖅᓗᓂ ᑲᑎᖅᓱᐃᕕᒃᓴᖓ ᓇᓪᓕᐅᑎᔪᒫᕆᕗᖅ.”
34ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ
ᔨᕉᓴᓕᒥᐅᖑᔪᒍᑦ ᓂᕆᓚᐅᖅᐹᑎᒍᑦ,
ᒪᕐᕋᑎᑐᑦ ᐃᓗᓕᖃᖏᑦᑐᑎᑐᑦ ᑍᒤᑎᓚᐅᖅᐹᑎᒍᑦ,
ᖁᒡᓗᒋᐊᑎᑐᑦ ᐄᕚᑎᒍᑦ,
ᓂᕆᓚᐅᖅᓗᓂᑎᒍᓪᓗ ᐅᕆᐊᕆᕚᑎᒍᑦ.
35ᓮᐅᓂᒥᐅᑦ ᐅᖃᖅᓕᑦ,
“ᐹᐱᓘᓂᒥᐅᑦ ᐊᑭᒋᐊᖅᑕᐅᔪᒃᓴᐅᕗᑦ
ᐋᓐᓂᐊᑎᑦᓯᓂᕆᓚᐅᖅᑕᖏᑎᑐᑦ.”
ᔨᕉᓴᓕᒥᐅᑦᑕᐅᖅ ᐅᖃᖅᓕᑦ,
“ᑲᐅᓪᑎᐊᒥᐅᑦ ᑐᖁᕋᖅᑕᐅᓕᑦ ᑐᖁᕅᓯᒪᓂᖏᑎᑐᑦ.”
ᐊᑕᓂᐅᑉ ᐃᓴᕆᐊᓕᒥᐅᑦ ᐃᑲᔪᕐᖕᓂᐊᖅᐰᑦ
36ᑍᒤᒻᒪᑦ, ᐃᒫᒃ ᐊᑕᓂᖅ ᐅᖃᖅᐳᖅ, “ᑕᑯᒋᑦ, ᓴᐳᑎᓂᐊᖅᐸᑦᓯ ᓯᕐᖕᓈᖅᓗᖓ ᐊᑭᒋᐊᕈᑎᓂᐊᖅᐸᑦᓯ; ᑕᕆᐅᖁᑎᖏᑦ ᐃᒤᕈᑎᑎᓐᓂᐊᖅᐸᒃᑲ, ᓄᓇᒥᓪᓗ ᑰᒃᑐᖁᑎᖏᑦ ᓴᓗᐊᖅᑎᓪᓗᒋᑦ. 37ᐹᐱᓘᓂᒥᐅᑦ ᖃᑦᑎᒃᓯᓯᒪᓕᕈᒫᖅᐳᑦ ᓄᓇᓕᕕᓂᑐᐃᓐᓇᐅᓕᕈᑎᒃ, ᑎᕆᒐᓂᐊᖓᔪᓄᑦ ᐃᓂᐅᓕᕐᖕᓂᐊᖅᐳᖅ ᑕᑯᒥᓁᑦᑐᕐᔪᐊᖑᔪᒫᖅᐳᖅ, ᐃᓄᖃᖏᓪᓗᓂᓗ. 38ᐃᓄᖏᑦ ᓛᔭᑎᑐᑦ ᓂᓪᓕᐊᕗᑦ, ᓛᔮᕋᖅᑎᑐᓪᓗ ᖃᓕᖑᐊᖅᓗᑎᒃ. 39ᐆᒻᒪᕆᒃᓴᕐᖕᓂᖏᓐᓂ ᓂᕆᕕᒃᔪᐊᖅᑎᑦᓱᒪᕙᒃᑲ, ᐋᖓᔮᓕᖅᑎᓪᓗᒋᓪᓗ, ᐃᒡᓚᒪᔭᖁᓪᓗᒋᑦ ᑍᒤᑦᑑᓕᖅᓗᑎᒃ ᓯᓂᓕᕈᑎᒃ ᐃᖅᑯᒻᒪᓐᖏᓮᓐᓇᖁᓪᓗᖏᑦ, ᐊᑕᓂᖅ ᐅᖃᖅᐳᖅ. 40ᑐᖁᑕᐅᑎᑦᓱᒫᖅᐸᒃᑲ ᓄᕐᕋᐅᔭᑎᑐᑦ, ᑐᖁᑕᐅᔭᖅᑐᖅᑎᓪᓗᒋᓪᓗ ᓰᐱᑎᑐᑦ ᐊᖑᓴᓪᓗᖅᑎᑐᑦ ᒎᑦᓯᑎᑐᓪᓗ.”
ᐹᐱᓘᓂᐅᑉ ᐃᓱᓕᑎᑕᐅᓂᖓ
41ᐊᑕᓂᖅ ᐅᖃᖅᐳᖅ, “ᓯᓵᒃ ᐹᐱᓘᓂ ᓵᓚᒋᔭᐅᓗᓂ ᐱᔭᐅᔪᒫᖅᐳᖅ, ᓄᓇᕐᔪᐊᕐᖕᒥᐅᓄᑦ ᓂᖅᑐᖅᑕᐅᓂᖅᐹᖑᕙᒃᑐᖅ ᑕᑯᒥᓁᑦᑐᕐᔪᐊᖑᓕᕈᒫᖅᐳᖅ ᐃᓅᖃᑎᒌᒡᔪᐊᓄᑦ ᑕᑯᔭᐅᓗᑎᒃ. 42ᑕᕆᐅᑉ ᐅᓕᑎᓐᓂᖓᓄᑦ ᐹᐱᓘᓂᒥᐅᑦ ᑎᑭᑕᐅᔪᒫᖅᐳᑦ, ᐃᖏᐅᓕᒡᔪᐊᖏᓐᓄᓪᓗ ᐅᓕᒃᑕᐅᔪᒫᖅᐳᖅ. 43ᓄᓇᓕᖁᑎᖏᑦ ᓱᓁᕈᑎᔪᒫᖅᐳᑦ, ᐸᓂᖅᓗᑎᒃ ᓯᐅᕋᕐᔪᐊᑎᑐᑦ ᑍᒤᓕᖅᓗᑎᒃ ᓄᓇᖃᕐᕕᐅᔪᓐᓃᖅᓗᑎᒡᓗ, ᐃᖏᕐᕋᔪᓄᓪᓗ ᐊᖅᑯᑎᐅᔪᓐᓃᖅᓗᑎᒃ. 44ᐹᐱᓘᓂᒥᐅᑦ ᒎᑎᒋᔭᖓᑦ ᐱᐊᓪ ᓱᒋᐊᕈᒫᖅᐸᕋ, ᒥᕆᐊᖅᑎᓪᓗᒍᓗ ᐄᔭᕕᓂᖏᓐᓂᒃ, ᐃᓅᖃᑎᒌᒡᔪᐊᓄᑦ ᐅᐸᒃᑕᐅᕙᒍᓐᓃᕈᒫᖅᐳᖅ.
“ᐹᐱᓘᓂᒥᐅᑦ ᐊᕙᓗᕐᔪᐊᖓ ᐅᕐᕈᔪᒫᕐᖕᒪᑦ. 45ᐃᓄᖁᑎᒃᑲ ᑕᕝᕙᓐᖓᑦ ᐊᓂᓕᕆᑦᓯ! ᐅᓪᓚᒃᓯᓕᕆᑦᓯ ᐃᓅᔪᒪᒍᑦᓯ! ᕿᒫᓗᓯ ᐊᑕᓂᐅᑉ ᓂᓐᖓᖕᓂᕐᔪᐊᖓᓂᑦ. 46ᑲᑉᐱᐊᓱᖕᓂᐊᕋᓯ ᓯᕘᕋᓇᓯᓗ, ᐅᖃᐅᓯᐅᕈᓘᔭᖅᑐᓂᒃ ᑐᓴᓕᕋᓗᐊᕈᑦᓯ ᐊᕐᕌᒍᑕᒫᑦ ᐅᖃᐅᓯᐅᕈᓘᔭᖅᑐᑦ ᐅᖃᐅᓯᐅᖃᑦᑕᕐᖕᒪᑕ ᑲᑉᐱᐊᓇᖅᑐᖃᕐᖕᓂᕅᔪᑦ ᓄᓇᒥ, ᐊᖓᔪᖅᑳᖑᔪᓪᓗ ᐊᖓᔪᖅᑳᖑᖃᑎᒥᖕᓄᑦ ᐊᑭᕋᖅᑐᕐᖕᓂᕋᖅᑕᐅᔪᑦ. 47ᑍᒤᒻᒪᑦ, ᑕᑯᒋᑦ, ᐅᓪᓗᐃᑦ ᓇᓪᓕᐅᑎᔪᒫᖅᐳᑦ ᐹᐱᓘᓂᒥᐅᑦ ᒎᑎᖏᓐᓂᒃ ᓱᒋᐊᖅᓯᔪᒫᕐᖕᓂᕋ, ᓄᓇᓕᒫᖓᑦ ᐱᐅᔪᓐᓃᖅᑎᑦᓱᒫᖅᐸᕋ, ᑐᖁᕋᖅᑕᐅᓂᑯᐃᑦ ᓄᓇᖓᓐᓂ ᓇᓂᑐᐃᓐᓈᕈᒫᖅᐳᑦ. 48#ᑕᑯᑎ 18:20.ᕿᓚᖕᒥᓗ ᓄᓇᒥᓗ ᓯᕆᑦᔪᑕᐅᔪᒫᖅᐳᖅ ᐹᐱᓘᓂ, ᐅᓐᓄᐊᓪᓗᐊᑉ ᓇᓛᓂᑦ ᐊᓯᕈᐃᔪᒃᓴᑦ ᑎᑭᑦᓱᒫᕐᖕᒪᑕ, ᐊᑕᓂᖅ ᐅᖃᖅᐳᖅ. 49#ᑕᑯᑎ 18:24.ᐃᓴᕆᐊᓕᒥᐅᓂ ᑐᖁᕋᖅᑕᐅᖃᑦᑕᖅᓯᒪᔪᑦ ᐱᓪᓗᒋᑦ ᐹᐱᓘᓂᒥᐅᑦ ᑲᑕᒍᑎᒋᔪᒫᖅᐰᑦ, ᑍᒫᒃᑕᐅᖅ ᓄᓇᖃᖅᑐᑦ ᐅᓄᖅᑐᑦ ᑲᑕᖃᑦᑕᖅᓯᒪᖕᒪᑕ ᐹᐱᓘᓂᒥᐅᑦ ᑐᖁᕅᖃᑦᑕᖅᓯᒪᓂᖏᓐᓄᑦ.”
ᐊᑕᓂᐅᑉ ᐅᖃᐅᑦᔨᓂᖓ ᐃᓴᕆᐊᓕᒥᐅᓂᒃ ᐹᐱᓘᓂᒦᑦᑐᓂᒃ
50“ᐅᓇᑕᖅᑐᓂ ᑐᖁᑕᐅᓐᓂᖏᒃᑯᑦᓯ ᐊᐅᓪᓚᑲᐅᑎᒋᔪᒃᓴᐅᕗᓯ ᓄᖅᑲᖓᑐᐃᓐᓇᖏᓪᓗᓯ! ᐊᑕᓂᖅ ᐃᖅᑲᖅᓯᐅᒃ ᐅᖓᓯᒃᑐᒦᓐᓂᑦᓯᓐᓄᑦ, ᔨᕉᓴᓕᒻᓗ ᐃᓱᒪᒋᓯᐅᒃ. 51ᑲᓐᖑᓇᖅᑐᒥᒃ ᐊᑐᖅᑎᑕᐅᒐᑦᑕ, ᒥᑕᐅᑎᒋᔭᐅᓯᒪᓂᑦᑎᓐᓄᑦ ᑲᓐᖑᓱᓕᖅᐳᒍᑦ, ᐃᓅᖃᑎᒋᓚᐅᖅᓯᒪᓐᖏᑕᑦᑎᓐᓄᑦ ᑐᒃᓯᐊᕐᕕᒡᔪᐊᖅ ᐊᑕᓂᐅᑉ ᐃᑦᔪᕐᖕᓁᑦᑐᖁᑎᖓ ᐃᓵᖅᑕᐅᓯᒪᖕᒪᑦ. 52ᑍᒤᒻᒪᑦ, ᑕᑯᒋᑦ, ᐅᓪᓗᐃᑦ ᑎᑭᑦᓱᒫᖅᐳᑦ, ᐊᑕᓂᖅ ᐅᖃᖅᐳᖅ, ᒎᑎᒋᔭᖏᑦ ᓱᒋᐊᕈᒫᕋᒃᑭᑦ, ᓄᓇᖏᓐᓂᓗ ᓇᓂᑐᐃᓐᓇᖅ ᓂᐹᔪᖃᕈᒫᖅᐳᖅ ᐃᑭᓕᖅᑕᐅᓂᑯᓂᒃ. 53ᐹᐱᓘᓂᒥᐅᑦ ᕿᓚᖕᒧᑦ ᑎᑭᐅᓯᒪᔪᓐᓇᕋᓗᐊᖅᐸᑕ, ᐱᔭᐅᑦᔧᖅᓯᒪᓂᖓᓄᑦ ᐅᓇᖕᒥᓇᖏᒃᑲᓗᐊᖅᐸᑕ, ᐊᓯᕈᐃᔪᒃᓴᓂᒃ ᑎᑭᕝᕕᐅᑎᑦᓱᒫᖅᐸᒃᑲ, ᐊᑕᓂᖅ ᐅᖃᖅᐳᖅ.”
ᐹᐱᓘᓂᒥᐅᑦ ᓱᓕ ᓱᕋᒃᑎᖅᑕᐅᕙᓪᓕᐊᓂᒃᓴᖓ
54“ᓈᓚᒋᑦᓯ, ᕿᐊᔪᑦ ᑐᓴᖅᓴᐅᕗᑦ ᐹᐱᓘᓂᒥᑦ,
ᐊᓯᕈᖅᑕᐅᔪᑦ ᑐᓴᖅᓴᐅᖕᒪᑕ,
ᑲᐅᓪᑎᐊᒥᐅᑦ ᓄᓇᖓᓂ.
55ᐊᑕᓂᐅᑉ ᐹᐱᓘᓂᒥᐅᑦ ᐊᓯᕈᕈᒫᖅᐰᑦ,
ᓂᐱᕐᔪᐊᖏᑦ ᓂᐰᖅᑎᓪᓗᒋᑦ,
ᐊᑭᕋᖏᓐᓄᑦ ᑎᑭᑕᐅᔪᒫᖅᐳᑦ ᒪᓕᒡᔪᐊᑎᑐᑦ,
ᐊᑭᕋᖏᑕ ᐅᓇᑕᖅᑎᖁᑎᕐᔪᐊᖏᓐᓄᑦ.
56ᐹᐱᓘᓂᒥᐅᑦ ᑎᑭᑕᐅᓂᐊᕐᖕᒪᑕ ᐊᓯᕈᐃᔨᒧᑦ
ᐅᓇᑕᖅᑎᖁᑎᖏᑦ ᑎᒍᔭᐅᓂᐊᖅᐳᑦ,
ᐱᑎᒃᓯᖏᓪᓗ ᓱᕋᒃᑎᖅᑕᐅᓗᑎᒃ.
ᒎᑎ ᐊᑕᓂᖅ ᐊᑭᓂᐊᖅᑎᐅᖕᒪᑦ,
ᐊᑭᓂᐊᕈᒫᖅᐰᑦ ᖁᓚᕐᖕᓇᖏᑦᑐᒥᒃ.
57ᐊᖓᔪᖅᑳᖁᑎᖏᑦ ᓯᓚᑐᔪᖁᑎᖏᓪᓗ ᐋᖓᔮᓕᖅᑎᓐᓂᐊᖅᐸᒃᑲ,
ᐊᐅᓚᑦᓯᔨᖏᑦ ᐅᓇᑕᖅᑐᒃᓴᖁᑎᖏᑦ ᐅᓇᑕᖅᑐᒃᓴᓪᓗ
ᐊᖓᔪᖅᑳᖏᑦ ᐱᖃᓯᐅᑎᓗᒋᑦ,
ᓯᓂᓕᕈᑎᒃ ᑐᐸᒍᒫᓐᖏᓚᑦ;
ᐊᖓᔪᖅᑳᖑᓂᖅᐹᖅ ᕿᓚᖕᒥᐅᒐᓴᒡᔪᐃᑦ ᐊᑕᓂᖓᓂᒃ
ᐊᑎᖃᖅᑐᖅ ᑕᒪᑐᒥᖓ, ᐅᖃᖅᐳᖅ.
58ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ,
ᐹᐱᓘᓂᒥᐅᑦ ᐊᕙᓗᕐᔪᐊᖓ ᐃᑦᔪᔪᐊᓘᒐᓗᐊᖅ
ᓄᖑᑎᑕᐅᓗᓂ ᒪᓂᖅᑲᒦᓕᕈᒫᖅᐳᖅ,
ᐃᑎᖅᑕᕐᕕᖏᓪᓗ ᐃᑯᐊᓪᓚᒃᑕᐅᓗᑎᒃ.
ᐃᓄᐃᑦ ᐱᓇᓱᐊᕕᒃᔪᐊᕐᖕᓂᕆᓚᐅᖅᑕᖏᑦ ᐊᑐᕐᖕᓇᕐᖕᓂᖃᓐᖏᓚᑦ,
ᐃᓅᖃᑎᒌᒡᔪᐊᓪᓗ ᓴᓇᖃᑦᑕᖅᓯᒪᔭᖏᑦ ᐃᑯᐊᓪᓚᖅᑯᑎᒃᓴᓐᖑᖅᐳᑦ.”
ᔨᕆᒤᐊᑉ ᐅᖃᐅᓯᖏᑦ ᐹᐱᓘᓂᒧᑦ
59ᐅᑯᐊ ᐅᖃᐅᓰᑦ ᔨᕆᒤᐊᐅᑉ ᑐᓂᑦᔪᑎᒋᓚᐅᖅᐰᑦ ᐅᓇᑕᖅᑏᑦ ᐊᖓᔪᖅᑳᖓᓐᓄᑦ ᓯᕅᐊᒧᑦ ᓂᕅᐊᐅᑉ ᐃᕐᖕᓂᖓᓄᑦ, ᒪᕼᐊᓮᐊᐅᑉ ᐃᕐᖑᑕᖓᓄᑦ, ᐹᐱᓘᓂᒧᐊᓕᖅᑎᓪᓗᒍ ᔫᑕᒥᐅᑦ ᐊᖓᔪᖅᑳᕐᔪᐊᖓᓐᓂᒃ ᔨᑎᑬᐊᒥᒃ ᐱᖃᑎᖃᖅᓗᓂ ᐊᐅᓚᑦᓯᓂᖏᑕ ᐊᕐᕌᒍᐃᑦ ᓯᑕᒪᒋᓕᖅᑕᖓᓐᓂ, ᓯᕅᐊ ᐅᓇᑕᖅᑏᑦ ᐊᖓᔪᖅᑳᕆᓚᐅᖅᐹᑦ. 60ᔨᕆᒤᐊᐅᑉ ᑎᑎᕋᓚᐅᖅᑕᖏᓐᓂᑦ ᐊᒡᓚᑎᒍᑦ ᐃᒧᑦᑕᖅᑐᑎᒍᑦ, ᐹᐱᓘᓂᒥᐅᓄᑦ ᑎᑭᐅᑎᔪᒫᖅᑐᓂᒃ ᐹᐱᓘᓂᒥᐅᓪᓗ ᐊᑐᕈᒫᖅᑕᖏᓐᓂᒃ ᐅᖃᐅᓯᖃᖅᑐᓂᒃ. 61ᔨᕆᒤᐊ ᓯᕅᐊᒧᑦ ᐅᖃᖅᐳᖅ, “ᐹᐱᓘᓂᒧᑦ ᑎᑭᒃᑯᕕᑦ, ᑖᒃᑯᐊ ᐅᖃᓕᒫᕈᒫᖅᐸᑎᑦ ᓂᐱᖃᑦᓯᐊᖅᓗᑎᑦ ᐃᓄᖕᓄᑦ. 62ᐅᖃᖅᓗᑎᓪᓗ, ‘ᐊᑕᓃᖅ, ᐅᖃᓚᐅᕋᕕᑦ ᑖᒃᑯᐊ ᓄᓇᓖᑦ ᐊᓯᕈᕈᒫᕐᖕᓂᕋᖅᓗᒋᑦ ᓇᔪᒐᒃᓴᐅᔪᓐᓃᖁᓪᓗᒋᑦ ᐆᒪᔪᓄᑦ ᐃᓄᖕᓄᓪᓗ, ᓱᓇᖃᕈᓐᓁᕈᒫᕐᖕᒪᑦ ᐃᓱᖃᖏᑦᑐᒧᑦ.’ 63#ᑕᑯᑎ 18:21.ᐊᒡᓔᑦ ᐅᑯᐊ ᐅᖃᓕᒫᕇᕈᕕᒋᑦ ᐅᔭᖅᑲᒥᒃ ᕿᓚᒃᓯᕕᒋᓗᒋᑦ ᑰᑉ ᐃᕗᕅᑎᐅᑉ ᕿᑎᖓᓄᑦ ᐃᒋᑦᓱᒫᖅᐸᑎᑦ. 64ᐅᖃᖅᓗᑎᓪᓗ, ‘ᐹᐱᓘᓂᑦᑕᐅᖅ ᑍᒫᒃ ᑭᕕᑎᑦᓱᒫᖅᐸᕋ ᒪᑭᒃᑲᓐᓂᕈᓐᓁᖅᓗᓂᓗ ᑲᑉᐱᐊᓇᖅᑐᓄᑦ ᑎᑭᕝᕕᐅᑎᑦᓱᒫᕋᒃᑯ, ᐃᓄᖏᓪᓗ ᑲᑕᒍᒫᖅᐳᑦ.’”
ᑕᕝᕗᖓ ᑎᑭᓪᓗᒋᑦ ᔨᕆᒤᐊᐅᑉ ᐅᖃᐅᓯᖏᑦ ᐃᓱᓕᑉᐳᑦ.
Currently Selected:
ᔨᕆᒤᐊᐅᑉ ᐊᒡᓚᖏᑦ 51: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
