ᔨᕆᒤᐊᐅᑉ ᐊᒡᓚᖏᑦ 49
49
ᐊᑕᓂᐅᑉ ᐃᖅᑲᖅᑐᐃᓂᖓ ᐊᒧᓁᑎᒥᐅᓂᒃ
1 #
ᐃᓯᑭᐊᓕ 21:28-32; 25:1-7; ᐂᒨᓯ 1:13-15; ᔨᐸᓁᐊ 2:8-11. ᐊᒧᓁᑎᒥᐅᑦ ᐱᓪᓗᒋᑦ, ᐃᒫᒃ ᐊᑕᓂᖅ ᐅᖃᖅᐳᖅ, “ᐃᓴᕆᐊᓕᒥᐅᑦ ᑭᖑᕚᒃᓴᖅᑖᕐᖕᓂᖏᒻᒪᑖ? ᑭᖑᕐᖑᑦᔨᔪᒃᓴᖃᓐᖏᓛᖅ? ᖃᓄᐃᒻᒪᓪᓕ ᒫᓕᑭ ᒑᑎᒥᐅᓂᒃ ᑎᒍᓯᓯᒪᕚ? ᐊᒧᓁᑎᒥᐅᓂᒡᓗ ᐃᓄᖃᐅᖅᓗᑎᒃ ᓄᓇᓕᖏᑦ. 2ᑍᒤᒻᒪᑦ, ᑕᑯᒋᑦ, ᐅᓪᓗᐃᑦ ᓇᓪᓕᐅᑦᓱᒫᖅᐳᑦ, ᐊᑕᓂᖅ ᐅᖃᖅᐳᖅ, ᐅᓇᑕᕆᐊᖁᔨᓗᖓ ᓂᓪᓕᕈᒫᕋᒪ ᕌᐸᒥᐅᓄᑦ ᐊᒧᓁᑎᒦᑦᑐᓄᑦ, ᓄᓇᓕᕕᓂᑐᐃᓐᓇᐅᓕᕈᒫᖅᐳᑦ, ᓄᓇᓖᓪᓗ ᖃᓂᒋᔭᖓᓃᑦᑐᑦ ᐃᑭᓐᓂᑯᐃᓐᓇᐅᓕᖅᓗᑎᒃ, ᐃᓴᕆᐊᓕᒥᐅᓪᓗ ᐊᖅᓵᖅᓯᔪᒫᖅᐳᑦ ᐊᖅᓵᖅᓯᔨᒋᓚᐅᖅᑕᒥᖕᓂᒃ, ᐊᑕᓂᖅ ᐅᖃᖅᐳᖅ. 3ᕼᐃᓴᐸᓂᒥᐅᑕᐅᔪᓯ ᓂᐹᖅᓗᓯ ᕿᐊᓕᕆᑦᓯ, ᐂᒥᐅᑦ ᐊᓯᕈᖅᑕᐅᖕᒪᑕ, ᕌᐸᒥᐅᑦ ᐊᕐᖕᓁᑦ ᕿᐊᓕᕆᑦᓯ! ᐆᒪᔫᑉ ᒥᖅᑯᖏᓐᓂᒃ ᓴᓇᓯᒪᔪᓂᒃ ᐊᓐᓄᕌᖅᓗᓯ ᐅᒡᒍᐊᕐᖕᓂᑦᓯᓐᓂᒃ ᓴᖅᑭᑎᑦᓯᓕᕆᑦᓯ, ᐊᕙᒻᒧᑐᐃᓐᓇᓕᕆᑦᓯ ᐊᕙᓗᕐᔪᐊᑉ ᐃᓗᐊᓂ, ᒎᑎᓯ ᒫᓕᑭ ᑎᒍᔭᐅᓗᓂ ᐊᐅᓪᓚᕈᑦᔭᐅᖕᒪᑦ ᑐᓂᕐᕈᓯᖅᑎᑦᓯᔨᖁᑎᖏᑦ ᐊᖓᔪᖅᑳᖁᑎᖏᓪᓗ ᐱᖃᓯᐅᑦᔭᐅᓪᓗᑎᒃ. 4ᓱᖕᒪᑦ ᐅᓇᖕᒥᓁᔭᐅᑎᖃᖅᐱᓰ ᓇᖅᓴᖁᑎᑦᓯᓐᓂᒃ ᐱᕈᖅᑐᖃᑦᓯᐊᖅᐸᒃᑐᓂᒃ, ᐃᓕᑦᓯ ᐊᓯᓐᓂᐊᖅᑎᐅᔪᓯ ᐊᔪᖅᓴᖏᑦᔪᑎᑦᓯᓐᓂᒃ ᑕᑎᖃᖅᓗᓯ ᐅᖃᖅᐸᒃᐳᓯ, ‘ᐅᓇᑕᖅᑕᐅᓂᐅᔭᓐᖏᓚᒍᑦ.’ 5ᑕᑯᒋᑦ, ᑲᑉᐱᐊᓇᖅᑐᒧᑦ ᑎᑭᕝᕕᐅᑎᓐᓂᐊᖅᐸᑦᓯ, ᐊᕙᑎᑦᓯᓐᓂᑦ ᐱᔪᓂᒃ, ᐊᑕᓂᖅ ᕿᓚᖕᒥᐅᒐᓴᒡᔪᐃᑦ ᒎᑎᖓ ᐅᖃᖅᐳᖅ, ᑕᒪᑦᓯ ᓄᓇᑦᓯᓐᓂᑦ ᐊᐅᓪᓚᕈᑦᔭᐅᔪᒫᖅᐳᓯ, ᕿᒫᓂᑯᐃᓪᓗ ᐃᓂᒃᓴᖃᕈᒫᓐᖏᓚᑦ.
6“ᑕᒪᑐᒪᓕ ᑭᖑᓂᖓᒍᑦ ᐊᒧᓁᑎᒥᐅᑦ ᐱᔪᓐᓇᖅᓯᑎᑦᓯᐊᕈᒫᕆᕙᒃᑲ, ᐊᑕᓂᖅ ᐅᖃᖅᐳᖅ.”
ᐊᑕᓂᐅᑉ ᐃᖅᑲᖅᑐᐃᓂᖓ ᐄᑐᒥᒥᐅᓂᒃ
7 #
ᐂᓮᐊᓯ 34:5-17; 63:1-6; ᐃᓯᑭᐊᓕ 25:12-14; 35:1-15; ᐂᒨᓯ 1:11,12; ᐅᐸᑍᐊ 1:1-14; ᒪᓚᑬ 1:2-5. ᐄᑐᒥᒥᐅᑦ ᐱᓪᓗᒋᑦ, ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ, “ᑏᒪᓐᒥᐅᑦ ᓯᓚᑐᓂᖃᕈᓐᓃᖅᐹᑦ? ᐃᓱᒪᒃᓴᖅᓯᐅᖅᑎᖏᑦ ᐃᓱᒪᑦᓯᐊᕈᓐᓁᓪᓕᖕᒪᑖ? ᓯᓚᑐᓂᖏᑦ ᐊᓯᐅᓯᒪᕚᑦ? 8ᕿᒫᓕᕆᑦᓯ, ᕾᕈᓱᖕᓂᓗ ᐃᔨᖅᓯᒪᑐᐃᓐᓇᓕᕆᑦᓯ ᑏᑕᒥᐅᑕᐅᔪᓯ, ᐄᓴᐅᑉ ᑭᖑᕚᖏᑦ ᐊᓯᕈᖅᑕᐅᑎᓐᓂᐊᕋᒃᑭᑦ ᓱᒋᐊᓕᕈᒃᑭᑦ. 9ᐸᐅᕐᖓᓂᒃ ᓄᓂᕙᒃᑏᑦ ᕿᒤᓂᑯᖃᖅᐸᓐᖏᓛᑦ ᐅᓄᖏᑦᑑᖓᓗᐊᓃᒃ? ᑎᒡᓕᒃᑏᓪᓗ ᐅᓐᓄᐊᒃᑯᑦ ᑎᒡᓕᒐᕌᖓᒥᒃ ᐱᔪᒪᔭᒥᖕᓂᒃ ᑭᓯᐊᓂ ᐱᕙᓐᖏᓛᑦ? 10ᐄᓴᐅᑉ ᑭᖑᕚᖏᑦ ᓱᓁᕈᑎᓂᐊᖅᐸᒃᑲ, ᐃᔨᕋᖅᑐᕐᕕᖏᓪᓗ ᓴᖅᑭᑎᓐᓂᐊᖅᐸᒃᑲ, ᐃᔨᖅᓯᒪᕖᕈᑎᑯᓪᓗᒋᑦ ᕿᑐᕐᖓᖏᑦ, ᐃᓚᖏᓪᓗ, ᐃᓅᖃᑎᖏᓪᓗ ᓄᖑᓐᓂᐊᖅᐳᑦ, ᑭᖑᕚᒃᓴᖃᒃᑲᓐᓂᕈᓐᓃᖁᓪᓗᒋᑦ. 11ᐃᓕᐊᕐᔪᖁᑎᓯ ᕿᒪᒃᓯᐅᒃ, ᑲᒪᒋᓂᐊᖅᐸᒃᑲ, ᐅᐃᒡᒐᕐᖕᓂᖁᑎᓯᑦᑕᐅᖅ ᐅᕙᓐᓂᒃ ᑕᑎᖃᕈᓐᓇᕐᖕᓂᐊᖅᐳᑦ.
12“ᐃᒫᒃ ᐊᑕᓂᖅ ᐅᖃᖅᐳᖅ, ᐃᒥᕐᒐᒃᓴᖁᑎᓐᓂᒃ ᐃᒥᕆᐊᖃᖏᑦᑑᒐᓗᐊᑦ ᐃᒥᕐᖕᓂᐊᖅᐳᑦ, ᓱᒋᐊᖅᑕᐅᓚᐅᖅᓯᒪᖏᓪᓗᑎᑦ ᐃᓅᔪᒃᓴᐅᕖᑦ? ᓱᒋᐊᖅᑕᐅᖏᑦᑑᓂᐊᓐᖏᓚᑎᑦ, ᐃᒥᖃᑕᐅᔪᒃᓴᐅᕗᑎᓪᓕ ᐃᒥᖅᑕᐅᔪᒃᓴᒥᒃ. 13ᐅᖃᒻᒪᕆᒃᐳᖓ, ᐊᑕᓂᖅ ᐅᖃᖅᐳᖅ, ᐳᔾᕋᒥᐅᑦ ᓄᓇᓕᕕᓂᑐᐃᓐᓇᐅᓕᕈᒫᖅᐳᑦ, ᑕᑯᒥᓁᑦᑐᕐᔪᐊᖑᓕᖅᓗᑎᒃ, ᐸᓯᔭᒃᓴᐅᔪᒫᖅᐳᑦ ᐅᖃᕐᖕᓂᖅᓘᑎᒃᓴᐅᓕᖅᓗᑎᒡᓗ, ᓄᓇᓕᖁᑎᓕᒫᖏᑦ ᓄᓇᓕᕕᓂᑐᐃᓐᓇᐅᓕᕈᒫᖅᐳᑦ.
14“ᐊᑕᓂᕐᖕᒥᑦ ᑐᓴᒐᒃᓴᒥᒃ ᐅᖃᐅᑎᔭᐅᓚᐅᖅᐳᖓ, ᑐᓴᖅᑎᑦᓯᔨ ᐃᓅᖃᑎᒌᒡᔪᐊᓄᑦ ᐅᖃᕆᐊᖅᑐᖅᑎᑕᐅᕗᖅ, ᐃᒫᒃ, ‘ᑲᑎᖅᓱᓕᕆᑦᓯ ᐅᓇᑕᕆᐊᕐᖕᓂᐊᕋᑦᓯᒋᒃ.’ 15ᑕᑯᒋᑦ, ᐃᓅᖃᑎᒌᒡᔪᐊᑦ ᐊᑯᓐᓂᖓᓂ ᒥᑭᓐᓂᖅᐸᐅᑎᑦᓱᒫᖅᐸᒋᑦ, ᐃᓄᖕᓄᓪᓗ ᓇᕐᕈᒋᔭᒃᓴᐅᓗᑎᑦ. 16ᑲᑉᐱᐊᓱᒃᑎᑦᓯᓂᕆᖃᑦᑕᖅᑕᑦᓯᓐᓄᑦ, ᐱᐅᔪᕆᓂᑦᓯᓐᓄᓪᓗ ᐅᐃᕕᕐᕆᔭᐅᕗᓯ, ᐃᓈᕈᐃᑦ ᕾᕈᓱᖏᓐᓂ ᐊᖏᕐᕋᖃᖅᐳᓯ, ᐳᖅᑐᔪᒦᓐᓇᓱᐊᖅᓗᓯᓗ ᐊᖏᕐᕋᖃᕈᒪᓪᓗᓯ ᐳᖅᑐᓂᖅᐹᓃᑦᑐᓂᒃ ᓇᒃᑐᕋᓕᐅᑉ ᐃᕙᕕᖃᕐᕕᖏᑎᑐᑦ, ᐃᓂᒋᔭᑦᓯᓐᓂᑦ ᑲᑕᒃᑎᑦᓱᒫᖅᐸᑦᓯ, ᐊᑕᓂᖅ ᐅᖃᖅᐳᖅ.
17“ᐄᑐᒥᒥᐅᑦ ᑕᑯᒥᓁᑦᑐᕐᔪᐊᓐᖑᕈᒫᖅᐳᑦ, ᐊᖅᑯᓵᖅᑐᑦ ᒥᑕᐅᑎᒃᓴᖅᐸᒍᒫᖅᐳᑦ ᑕᑯᔭᒥᖕᓂᒃ, ᑖᑦᓱᒪ ᓯᖁᑦᑎᖅᓯᒪᓂᖓᓄᑦ. 18#ᒨᓯᓯ ᓯᕗᓪᓖᑦ 19:24,25.ᓲᖅᓗᑦᑕᐅᖅ ᓱᑑᒪᒥᐅᑦ ᒍᒨᕋᒥᐅᓪᓗ ᐊᓯᕈᖅᑕᐅᓂᕆᓚᐅᖅᑕᖓᑎᑐᑦ, ᓄᓇᓕᐅᖃᑎᒌᑦᑕᐅᖅ ᐊᓯᕈᖅᑕᐅᖃᑕᐅᔪᒫᖅᐳᑦ, ᐊᑕᓂᖅ ᐅᖃᖅᐳᖅ, ᑕᕝᕙᓂ ᓄᓇᖃᖅᑐᖃᕈᓐᓃᕈᒫᕐᖕᒪᑦ ᐃᓄᖕᓄᑦ ᓄᓇᒋᔭᐅᔪᒪᔪᓐᓃᕈᒫᕐᖕᒪᑕ. 19ᑕᑯᒋᑦ, ᐃᒤᑦᓱᒫᖅᐳᖅ ᓛᔭᑎᑐᑦ ᓇᐹᖅᑐᐃᑦ ᐃᒻᒧᐊᓂ ᓴᖅᑭᑳᓪᓚᒃᑐᑎᑐᑦ ᓇᑎᕐᖕᓇᒧᑦ ᔪᐊᕐᑕᓂᐅᑉ ᑰᖓᓄᑦ, ᑍᒫᒃᑕᐅᖅ ᐄᑐᒥᒥᐅᑦ ᐊᖑᔪᒫᖅᐸᒃᑲ ᓄᓇᖓᓐᓂ ᑕᕝᕔᓐᓇᖅ, ᓇᓪᓕᐊᓐᓂᒃ ᑍᒤᓕᐅᖅᑐᒃᓴᒥᒃ ᓂᕈᐊᕈᓐᓇᖅᐳᖔ, ᑭᓇ ᐅᕙᑦᑐᑦ ᑍᒤᑉᐹ? ᐊᑭᓕᖃᕈᓐᓇᖅᑐᖅ ᐅᕙᓐᓂᒃ? ᓰᐱᓕᕆᔨᑕᖃᖅᐹ ᐅᕙᓐᓂᒃ ᐊᑭᕋᖅᑐᕈᓐᓇᖅᑐᒥᒃ? 20ᑐᓴᖅᓯᐅᒃ ᐊᑕᓂᐅᑉ ᐸᕐᖕᓁᕈᑦᔨᓂᖓ ᐄᑐᒥᒥᐅᓂᒃ, ᐱᓇᓱᐊᕈᒪᓂᕆᔭᖓᓗ ᑏᒪᓐᒥᐅᓄᑦ, ᓄᕐᕋᖁᑎᖏᑦ ᐊᐅᓪᓚᕈᑎᓂᐊᖅᐰᑦ, ᐃᓄᖏᓪᓗ ᑲᑉᐱᐊᓱᕕᒡᔪᐊᕈᒫᖅᐳᑦ ᐱᓂᐊᕐᕕᐅᓂᕐᖕᒥᓄᑦ. 21ᐅᕐᕈᒃᐸᑕ ᓄᓇ ᓴᔪᒃᐱᓗᒍᒫᖅᐳᖅ, ᕿᐊᓂᖓᓪᓗ ᑐᓴᖅᑕᐅᔪᒫᖅᐳᖅ ᐊᒐᐸᒥᐅᓄᑦ ᐃᒪᕐᖕᒥ ᐊᐅᐸᓗᒃᑕᒥ. 22ᑕᑯᓕᕆᑦ ᓇᒃᑐᕋᓕᖕᒥᒃ ᐊᐅᖅᓵᖅᑐᒥᒃ ᐃᓴᕈᖏᒃᑕᓗ ᐃᓵᖓᓂᖏᒃ ᐅᓕᒃᓯᕘᒃ ᐳᔾᕋᒥᐅᓂᒃ, ᐅᓪᓗᒥ ᑍᑲᓂ ᐄᑐᒥᒥᐅᑦ ᐅᓇᑕᖅᑎᖁᑎᖏᑦ ᐃᒃᐱᒍᓱᖕᓂᖃᕈᒫᖅᐳᑦ ᐊᕐᖕᓇᐅᑉ ᐃᕐᖕᓂᓱᒃᑑᑉ ᐃᒃᐱᒍᓱᖕᓂᖓᑎᑐᑦ.”
ᐊᑕᓂᐅᑉ ᐃᖅᑲᖅᑐᐃᓂᖓ ᑕᒫᓯᑰᓯᒥᐅᓂᒃ
23 #
ᐂᓮᐊᓯ 17:1-3; ᐂᒨᓯ 1:3-5; ᓴᑲᕅᐊ 9:1. “ᑕᒫᓯᑰᓯᒥᐅᑦ ᐱᓪᓗᒋᑦ ᕼᐊᒫᑎᒥᐅᑦ ᐋᕐᐹᑦᒥᐅᓪᓗ ᑲᒪᓂᐊᖅᐳᑦ, ᑐᓴᕈᒥᓇᖏᑦᑐᒥᒃ ᑐᓴᖅᑎᑕᐅᓯᒪᒐᒥᒃ, ᕿᑲᕈᓐᓇᕈᓐᓃᖅᐳᑦ ᐃᒪᕐᕕᐅᑉ ᒪᓕᖏᑎᑐᑦ. 24ᑕᒫᓯᑰᓯᒥᐅᑦ ᖁᐊᖅᓵᖓᓂᕐᖕᒧᑦ ᓄᑭᖏᕈᑎᓕᕋᒥᒃ, ᕿᒪᒃᓯᕗᑦ, ᐅᐃᒻᒪᒃᐳᑦ ᐋᓐᓂᐊᓂᕐᖕᒧᓪᓗ ᕿᒃᓵᒃᐳᑦ, ᐊᕐᖕᓇᑎᑐᑦ ᐃᕐᖕᓂᓱᒃᑐᑎᑐᑦ. 25ᐃᒡᓗᒐᓴᒡᔪᐊᑦ ᐊᔪᖏᓐᓂᖏᓐᓄᑦ ᖁᕕᐊᒋᔭᐅᓚᐅᖅᑐᑦ, ᐃᓄᖃᓚᐅᖅᓯᒪᖏᑦᑐᑎᑐᑦ ᕿᒪᒃᑕᐅᕗᖅ. 26ᐃᓅᓱᒃᑐᖁᑎᖏᑦ ᐊᖅᑯᑎᖏᓐᓂ ᑐᖁᕋᖅᑕᐅᔪᒫᖅᐳᑦ, ᐅᓪᓗᒥᓗ ᑍᑲᓂ ᐅᓇᑕᖅᑎᖁᑎᖏᑦ ᓄᖑᑕᐅᔪᒫᖅᐳᑦ, ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ. 27ᑕᒫᓯᑰᓯᐅᑉ ᐊᕙᓗᕐᔪᐊᖓ ᐃᑯᐊᓪᓚᒃᑎᑦᓱᒫᖅᐸᕋ, ᐱᓐ-ᕼᐊᑖᓪᓗ ᐃᒡᓗᕐᔪᐊᖓ ᐃᑯᐊᓚᔪᒧᑦ ᓄᖑᑕᐅᔪᒫᖅᐳᖅ.”
ᑮᑕᐅᑉ ᑭᖑᕚᖏᑕ ᐃᖅᑲᖅᑐᖅᑕᐅᓂᖏᑦ ᕼᐃᓴᒥᐅᓪᓗ
28ᑭᑕᕆᐅᑉ ᑭᖑᕚᖏᑦ ᐱᓪᓗᒋᑦ ᕼᐂᔭᒥᐅᓪᓗ ᐊᐅᓚᑕᖏᑦ, ᓂᐱᑯᓁᓴᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᓇᑕᖅᑐᒃᓴᖁᑎᖏᓐᓄᑦ ᐅᐸᒃᑐᖅᑕᐅᓚᐅᖅᑐᑦ, ᐃᒫᒃ ᐊᑕᓂᖅ ᐅᖃᖅᐳᖅ, “ᑭᑕᕆᐅᑉ ᑭᖑᕚᖏᑦ ᐅᓇᑕᕆᐊᓕᖅᓯᐅᒃ ᐃᓅᖃᑎᒌᖑᓂᖓᑦ ᐊᓯᕈᖅᑕᐅᓕ! 29ᑐᐱᖏᑦ ᐆᒪᔪᖁᑎᖏᓪᓗ ᐱᔭᐅᔪᒫᖅᐳᑦ, ᐊᖏᕐᕋᖏᑦ ᐱᖁᑎᖏᓪᓗ ᐊᐅᓪᓚᕈᑦᔭᐅᓗᑎᒃ, ᑳᒥᓕᖁᑎᖏᓪᓗ ᐊᐅᓪᓚᕈᑎᔭᐅᔪᒫᖅᐳᑦ ᑖᒃᑯᓇᓐᖓᑦ, ᐃᓄᐃᓪᓗ ᑲᑉᐱᐊᓇᕐᖕᓂᕅᔪᒫᖅᐳᑦ ᓇᓂᑐᐃᓐᓇᖅ.
30“ᑐᐊᕕᖅᓗᓯ ᕿᒫᒋᑦᓯ, ᕾᕈᓱᖕᓃᑐᐃᓐᓇᕆᑦᓯ ᕼᐂᔭᒥ ᓄᓇᖃᖅᑐᓯ, ᐊᑕᓂᖅ ᐅᖃᖅᐳᖅ, ᓂᐱᑯᓁᓴ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐱᔪᒪᓪᓗᓯ ᐃᓱᒪᒃᓴᖅᓯᐅᕈᑎᒋᖕᒪᓯ, ᐱᓇᓱᐊᕐᖕᓂᕆᔪᒪᔭᒥᓂᒡᓗ ᐃᓕᑦᓯᓐᓄᑦ ᐋᖅᑭᒃᓱᐃᓕᖅᐳᖅ. 31ᐃᓅᖃᑎᒌᒡᔪᐊᑦ ᐃᓕᒪᓱᖏᑦᑐᑦ ᐅᓇᑕᕐᕕᐅᓂᐊᕋᓱᒋᓗᑎᒃ ᐅᐸᒃᑐᓕᖅᓯᐅᒃ, ᐊᑕᓂᖅ ᐅᖃᖅᐳᖅ, ᓄᓇᓕᒡᔪᐊᖏᑦ ᐃᑎᖅᑕᕐᕕᖃᖏᑦᑐᑦ ᐃᑎᕇᒃᑯᑎᖃᕋᑎᒡᓗ ᐃᓄᖏᑦ ᐱᔭᐅᑦᔧᒃᑯᑎᖃᖏᑦᑐᑦ.
32“ᑳᒥᓕᖁᑎᖏᑦ ᑎᒎᖅᑲᒐᒃᓴᐅᓂᐊᖅᐳᑦ, ᐆᒪᔪᖁᑎᒐᓴᒃᔪᐊᖏᓪᓗ ᐱᑖᕆᔭᒃᓴᐅᓗᑎᒃ, ᐊᓄᕆᓄᑦ ᓯᐊᒻᒪᖅᑎᑦᓱᒫᖅᐸᒃᑲ ᓄᔭᕐᖕᒥᖕᓂᒃ ᑭᐱᓯᓯᒪᔪᑦ, ᓇᑭᑐᐃᓐᓇᖅ ᑲᑉᐱᐊᓇᖅᑐᓂᒃ ᑎᑭᕝᕕᐅᑎᑦᓱᒫᖅᐸᒃᑲ, ᐊᑕᓂᖅ ᐅᖃᖅᐳᖅ. 33ᕼᐂᔭ ᕿᒻᒥᐅᔮᖅᑐᓄᑦ ᐃᓂᑖᖑᔪᒫᖅᐳᖅ ᐃᓄᖃᖏᓐᓂᖓᓄᑦ, ᓄᓇᖃᕐᕕᐅᔪᓐᓃᕈᒫᕐᖕᒪᑦ ᐃᓄᖃᖅᑐᒃᓴᐅᔪᓐᓃᖅᓗᓂᓗ.”
ᐊᑕᓂᐅᑉ ᐃᖅᑲᖅᑐᐃᓂᖓ ᐃᓛᒥᐅᓂᒃ
34ᐃᒫᒃ ᐊᑕᓂᖅ ᐅᖃᓚᐅᖅᐳᖅ ᔨᕆᒤᐊᒧᑦ ᐅᖃᖅᑎᒥᓄᑦ ᐃᓛᒥᐅᑦ ᐱᑦᔪᑎᒋᓪᓗᒋᑦ ᔨᑎᑬᐊ ᔫᑕᒥᐅᓄᑦ ᐊᖓᔪᖅᑳᕐᔪᐊᕆᔭᐅᓕᓵᖅᑎᓪᓗᒍ. 35ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᖅᐳᖅ, “ᑕᑯᒋᑦ, ᐃᓛᒥᐅᑦ ᐱᑎᒃᓯᖏᑦ ᓇᐱᔪᒪᕙᒃᑲ, ᐱᔪᓐᓇᐅᑎᒋᓂᖅᐹᕆᔭᖏᑦ. 36ᐃᓛᒥᐅᑦ ᐊᓄᕆᓂᑦ ᓯᑕᒤᓂᑦ ᐱᔪᓂᑦ ᐊᓄᕌᕐᕕᐅᑎᑦᓱᒫᖅᐸᒃᑲ, ᓯᐊᒻᒪᖅᑎᓪᓗᒋᓪᓗ ᐊᓄᕇᑦ ᓯᑕᒪᑦ ᐊᓄᕌᕐᕕᖏᓐᓄᑦ, ᐃᓅᖃᑎᒌᒡᔪᐊᓕᒫᑦ ᐃᓛᒥᐅᓄᑦ ᕿᒫᕕᒋᔭᐅᓯᒪᔪᐃᓐᓇᐅᓕᓚᐅᖅᑳᖅᑎᓐᓇᒋᑦ. 37ᐃᓛᒥᐅᑦ ᐊᑭᕋᖏᓐᓄᑦ ᑲᑉᐱᐊᓱᒃᑎᑕᐅᑎᑦᓱᒫᕋᒃᑭᑦ, ᑖᒃᑯᓂᖓ ᑐᖁᑦᓯᔪᒪᔪᓄᑦ ᑲᑉᐱᐊᓇᖅᑐᒧᑦ ᑎᑭᕝᕕᐅᑎᑦᓱᒫᖅᐸᒃᑲ ᓂᓐᖓᕕᒡᔪᐊᖅᓯᒪᓂᓐᓄᑦ, ᐊᑕᓂᖅ ᐅᖃᖅᐳᖅ, ᐅᓇᑕᖅᑐᓄᑦ ᐱᔭᐅᑎᑦᓱᒫᖅᐸᒃᑲ ᓄᖑᑕᐅᖏᓐᓂᓕᒫᖏᓐᓂ. 38ᐃᓛᒥᐅᓂ ᐊᖓᔪᖅᑲᐅᕕᒃᑖᕐᖕᓂᐊᖅᐳᖓ, ᐊᖓᔪᖅᑳᕐᔪᐊᖏᑦ, ᐊᖓᔪᖅᑳᖁᑎᖏᓪᓗ ᐊᓯᕈᖅᑕᐅᖁᓪᓗᒋᑦ, ᐊᑕᓂᖅ ᐅᖃᖅᐳᖅ. 39ᑍᒤᓕᐅᕋᓗᐊᖅᑎᓪᓗᒋᑦ ᐃᓛᒥᐅᑦ ᐱᔪᓐᓇᖅᓯᑎᑦᓯᐊᕈᒫᕆᕙᒃᑲ, ᐅᓪᓗᓂ ᑎᑭᑦᓱᒫᖅᑐᓂ, ᐊᑕᓂᖅ ᐅᖃᖅᐳᖅ.”
Currently Selected:
ᔨᕆᒤᐊᐅᑉ ᐊᒡᓚᖏᑦ 49: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.