ᐃᓗᐊᖅᓮᔩᑦ ᐊᒡᓚᖏᑦ 9
9
ᐊᐱᒥᓕᒃ
1ᐊᐱᒥᓕᒃ ᔨᕈᐸᐅᓕᐅᑉ ᐃᕐᖕᓂᖓ ᓄᓇᓕᖕᓄᐊᓚᐅᖅᐳᖅ ᓯᑭᒻᒧᑦ ᐊᓈᓇᖓᑕ ᖃᑕᓐᖑᑎᖏᓐᓄᑦ ᐅᖃᐅᑎᓪᓗᒋᓪᓗ ᐊᓈᓇᖓᑕ ᑭᖑᕚᓕᒫᖏᑦ, 2“ᐊᐱᕆᓚᐅᖅᓯᐅᒃ ᓯᑭᒻᒥ ᓄᓇᖃᖅᑐᑦ, ‘ᐃᓕᑦᓯᓐᓄᑦ ᓇᓪᓕᐊᑦ ᐱᐅᓂᖅᓴᐅᕙ? ᔨᕈᐸᐅᓕᐅᑉ#9:2 ᔨᕈᐸᐅᓕᐅᑉ ᐅᕝᕙᓗ ᒋᑎᐅᓂᐅᑉ ᐃᕐᖕᓂᖏᓐᓄᑦ 70ᓄᑦ ᐊᐅᓚᑕᐅᓗᓯ, ᐅᕝᕙᓘᓐᓃᑦ ᐊᖑᒻᒧᑦ ᐊᑕᐅᓯᕐᖕᒧᑦ? ᐃᖅᑲᐅᒪᒋᑦᓯ ᐅᕙᖓ ᓇᖕᒥᓂᖅ ᑎᒥᖃᑎᒋᒐᑦᓯᓐᖓ ᐊᐅᖃᑎᒋᓪᓗᖓᓗ.’” 3ᐊᓈᓇᖓᑕ ᐃᓚᖏᑦ ᐅᖃᖃᑎᖃᓚᐅᖅᐳᑦ ᓯᑭᒻᒥᐅᓂᒃ ᑖᑦᓱᒪ ᐅᖃᐅᓯᐅᖁᔭᖏᓐᓂᒃ ᑐᓴᕋᒥᒃ, ᑕᕝᕙ ᐃᓄᓕᒫᑦ ᓯᑭᒻᒥᐅᑦ ᒪᓕᒍᒪᓚᐅᖅᐳᑦ ᐊᐱᒥᓕᒃᒥᒃ, ᐅᖃᖅᓗᑎᒃ, “ᖃᑕᓐᖑᑎᕗᓄᓇ.” 4ᑐᓂᕚᓪᓗ 70ᓂᒃ ᐅᖁᒤᓐᓂᓕᖕᓂᒃ ᓯᐅᓪᕕᕆᓂᒃ ᐰᓕ-ᐱᕆᑎᒧᑦ ᑐᒃᓯᐊᕐᕕᖕᒥᑦ ᐱᔪᓂᒃ, ᐊᐱᒥᓕᑭᓗ ᑖᒃᑯᓇᓐᖓᑦ ᑮᓇᐅᔭᖅᑖᕆᔭᒥᓂᑦ ᐱᓇᓱᐊᖅᑎᑖᓚᐅᖅᐳᖅ ᐃᓄᑦᓯᐊᕙᐅᖏᑦᑐᓂᒃ ᐃᒃᐱᒍᓱᑦᓯᐊᖏᑦᑐᓂᒡᓗ, ᒪᓕᒃᑎᑖᕆᓪᓗᒋᑦ. 5ᐊᑖᑕᒥᑕᓗ ᐃᒡᓗᖓᓄᐊᖅᐳᖅ ᐅᐸᕋᒦᑦᑐᒧᑦ, ᐅᔭᕋᒥ ᐊᑕᐅᓯᕐᖕᒥ ᐊᑎᓕᖕᒥ ᖃᑕᓐᖑᑎᓂ 70 ᑐᖁᑉᐰᑦ ᔨᕈᐸᐅᓕᐅᑉ ᐃᕐᖕᓂᖏᑦ, ᓄᑲᖅᓯᖅᐹᖅ ᔨᕈᐸᐅᓕᐅᑉ ᐃᕐᖕᓂᖓ ᔫᑕᒻ, ᐃᔨᕋᒥ ᑐᖁᑕᐅᓚᐅᓐᖏᓚᖅ. 6ᓯᑭᒻᒥ ᐱᑦ-ᒥᓗ ᓄᓇᖃᖅᑐᓕᒫᑦ ᑲᑎᕗᑦ ᓇᐹᖅᑐᕐᔪᐊᑉ ᐆᒃ ᓴᓂᐊᓂ ᓇᐸᔪᐊᓗᖕᒥ ᓯᑭᒻᒥ, ᑕᕝᕙᓂ ᐊᐱᒥᓕᒃ ᓂᐊᖂᓯᖅᐹᑦ ᐊᖓᔪᖅᑳᕐᔪᐊᓐᖑᖅᑎᓪᓗᒍ.
7ᔫᑕᒻᓗ ᑕᒪᑐᒥᖓ ᐅᖃᐅᑎᔭᐅᒐᒥ, ᐂᕗᖅ ᖃᖅᑲᒧᑦ ᒋᕆᔨᐅᑉ ᖄᖓᓂ ᓇᖏᖅᓗᓂ ᕾᒐᓛᕐᕕᒋᕔᑦ, “ᓈᓚᒃᓯᓐᖓ ᓯᑭᒻᒥᐅᑕᐅᔪᓯ ᒎᑎᒧᑦ ᓈᓚᒃᑕᐅᔪᓐᓇᖁᓪᓗᓯ! 8ᑍᑦᓱᒪᓂ ᓇᐹᖅᑐᐃᑦ ᐅᖅᓱᒧᑦ ᒥᖑᐊᖅᓯᓪᓗᑎᒃ ᐊᖓᔪᖅᑳᕐᔪᐊᕆᔪᒪᔭᒥᖕᓂᒃ. ᐅᖃᖅᓗᑎᒃ, ᓇᐹᖅᑐᓄᑦ ᐅᖅᓱᒃᓴᓕᖕᓄᑦ, ‘ᐊᖓᔪᖅᑳᕐᔪᐊᖅᑖᕆᓚᐅᖅᓚᑦᑎᒋᑦ.’ 9ᓇᐹᖅᑐᖅ ᐅᖅᓱᒃᓴᓕᒃ ᑭᐅᕗᖅ, ‘ᐅᖅᓱᖅ ᐅᕙᓐᓂᑦ ᐱᔪᖅ ᓴᒃᑯᑕᒃᓴᕆᕙᕌ, ᑕᒪᑐᒨᓇ ᒎᑏᑦ ᐃᓄᐃᓪᓗ ᐅᐱᒋᔭᐅᑦᔪᑎᒃᓴᕆᕚᑦ, ᓇᐹᖅᑐᐃᑦ ᖁᓛᑦᑎᒍᑦ ᑕᑯᒃᓴᐅᖁᓪᓗᒍ ᐊᓄᕆᒧᑦ ᐊᐅᓚᔪᖅ?’ 10ᓱᓕ ᓇᐹᖅᑐᑦ ᐅᖃᕆᕗᑦ ᓇᐹᖅᑐᒧᑦ ᐱᒋᓕᒃᓴᒧᑦ, ‘ᕾᓗᑎᑦ ᐊᖓᔪᖅᑳᓐᖑᓚᐅᕆᑦ ᐅᕙᑦᑎᓐᓄᑦ.’ 11ᓇᐹᖅᑐᕐᓕ ᐱᒋᓕᖕᓂᒃ ᐸᐅᕐᖓᓕᒃ ᑭᐅᕗᖅ, ‘ᐸᐅᕐᖓᒃᑲ ᒪᒪᖅᑐᑦ ᓰᕐᖕᓇᖅᑐᓪᓗ ᑐᓂᔭᕆᐊᖃᖅᐸᒃᑳ ᓇᐹᖅᑐᑦ ᖄᖏᑎᒍᑦ ᐊᓄᕆᒧᑦ ᐊᐅᓚᑎᑕᐅᓗᖓ?’ 12ᑍᒤᒻᒪᑦ ᓇᐹᖅᑐᓕᒫᑦ ᐅᖃᕆᕗᑦ ᐱᕈᖅᑐᓄᑦ ᕔᓂᒃᓴᓕᖕᓄᑦ, ‘ᕾᓗᑎᑦ ᐊᖓᔪᖅᑳᕐᔪᐊᖅᑖᕆᓚᐅᖅᓚᑦᑎᒋᑦ.’ 13ᕔᓂᒃᓴᓕᒡᓕᒃ ᑭᐅᕗᖅ, ‘ᕔᓂᓕᐅᕐᖕᓂᕐᖕᒥᒃ ᓄᖅᑲᕆᐊᖃᕋᔭᖅᐳᖓ, ᖁᕕᐊᓱᒃᑎᑦᓯᔪᒥᒃ ᑕᒤᓐᓂᒃ ᒎᑎᓂᒃ ᐃᓄᖕᓂᒡᓗ, ᓇᐹᖅᑐᑦ ᖄᖏᑎᒍᑦ ᐊᓄᕆᒧᑦ ᐊᐅᓚᓗᖔ?’ 14ᑕᕝᕙ ᓇᐹᖅᑐᓕᒫᑦ ᐅᖃᕆᕗᑦ ᐅᖅᐱᒐᕐᖕᓄᑦ, ‘ᕾᓕᕆᑦ ᐊᖓᔪᖅᑳᕐᔪᐊᑖᕆᓕᖅᓚᑦᑎᒋᑦ.’ 15ᐅᖅᐱᒊᑦ ᐅᖃᖅᐳᑦ ᓇᐹᖅᑐᓄᑦ, ‘ᐱᖁᓪᓚᕆᒃᑯᑦᓯᓐᖓ ᐅᖅᓱᒧᑦ ᒥᖑᐊᖅᓗᖓ ᐊᖓᔪᖅᑳᕐᔪᐊᓐᖑᑎᒃᑯᑦᓯᓐᖓ ᐃᓕᑦᓯᓐᓄᑦ, ᐊᑏ ᕾᓕᕆᑦᓯ ᐃᔨᖅᓯᒪᓗᓯ ᑕᕐᕋᓕᓂᓐᓂ; ᑍᒤᓐᖏᑐᐊᕈᑦᓯ ᐃᑯᒪᒥᒃ ᓄᐃᑎᑦᓯᓂᐊᖅᐳᖓ ᐅᖅᐲᑦ ᐃᑯᐊᓪᓚᒡᓗᒋᑦ ᓕᐸᓇᓂᐅᑉ ᓇᐹᖅᑐᖏᑦ ᓰᑕᕇᑦ ᓯᑎᔪᔧᑦ.’”
16“ᒫᓐᓇᓕ ᑕᕝᕙ, ᓱᓕᑦᓯᐊᖅᓗᓯ ᐅᐱᓐᓇᑦᓯᐊᖅᓗᓯᓗ ᐱᓂᐊᕐᖕᓂᑦᓯᒍᑦ ᐊᐱᒥᓕᒃ ᐊᖓᔪᖅᑳᕐᔪᐊᓐᖑᖅᑎᒍᑦᓯᐅᒃ ᔨᕈᐸᐅᓕᐅᓪᓗ ᐃᓚᖏᑦ ᐱᓂᐊᕐᕕᒋᑦᓯᐊᖅᓗᒋᑦ, ᐱᓇᓱᐊᑦᓯᐊᕐᖕᓂᕆᓚᐅᖅᑕᖏᑕ ᐊᑭᓕᖅᑕᐅᔭᕆᐊᖃᕐᖕᓂᖏᑦ ᒪᓕᒡᓗᒋᑦ- 17ᐊᑖᑕᒪ ᐅᓇᑕᐅᑎᓚᐅᖅᐹᓯ ᐃᒻᒥᓂᒡᓗ ᐊᑦᑕᕐᖕᓇᖅᑐᒃᑰᖅᑎᓚᐅᖅᐳᖅ, ᓴᐳᑎᓪᓗᓯᓗ ᒥᑎᐊᓂᒥᐅᑦ ᐱᔪᓐᓇᕐᖕᓂᖏᓐᓂᑦ. 18ᐅᓪᓗᒥᓕ ᐊᑖᑕᒪ ᐃᓚᖏᓐᓂᒃ ᐊᑭᕋᖅᑐᓕᖅᐳᓯ ᐃᕐᖕᓂᖏᑦ ᑐᖁᓚᐅᕋᑦᓯᐅᒃ 70 ᐊᖑᑏᑦ ᐅᔭᕋᐅᑉ ᐊᑕᐅᓯᐅᑉ ᖄᖓᓂ, ᐊᐱᒥᓕᒃ, ᐃᕐᖕᓂᕆᖕᒪᒍ ᐊᕐᖕᓇᒃᑯᑦ ᐱᔨᒃᑯᑦ, ᐊᖓᔪᖅᑳᕐᔪᐊᓐᖑᖅᑎᓐᓇᑦᓯᐅᒃ ᓯᑭᒻᒥ ᓄᓇᖃᖅᑐᓄᑦ, ᐅᐱᓐᓇᕋᓂ ᐃᓚᒋᒐᑦᓯᐅᒃ. 19ᓱᓕᑦᓯᐊᖅᓗᓯ, ᐅᐱᓐᓇᑦᓯᐊᖅᓗᓯᓗ ᐱᓂᐊᕐᖕᓂᑦᓯᒍᑦ ᔨᕈᐸᐅᓕᐅᑉ ᑭᖑᕚᖏᓪᓗ ᐱᓂᐊᕐᕕᒋᑦᓯᐊᓚᐅᕈᑦᓯᐅᒃ ᐅᓪᓗᒥ, ᖁᕕᐊᒋᑦᓯᐊᓕᖅᓯᐅᒃ ᐊᐱᒥᓕᒃ, ᖁᕕᐊᒋᔭᖃᑦᓯᐊᓕᖅᓕᓗ ᐃᓕᑦᓯᓐᓂᒃ. 20ᑍᒤᖏᑉᐸᓪᓕ, ᐃᑯᒪ ᐊᓂᓕᕐᓕ ᐊᐱᒥᓕᒃᒥᑦ ᐃᑯᐊᓪᓚᒡᓗᒋᓪᓗ ᓯᑭᒻᒥᐅᑦ ᐱᔅᒥᐅᓪᓗ. ᐃᑯᒪᓗ ᐊᓂᓕᕐᓕ ᓯᑭᒻᒥᑦ ᐱᔅᒥᓪᓗ ᐃᑯᐊᓪᓚᒡᓗᒍ ᐊᐱᒥᓕᒃ.” 21ᑕᕝᕙ ᔫᑕᒻ ᐅᓪᓚᒡᓗᓂ ᕿᒫᕗᖅ ᐂᓪᓗᓂᓗ ᐱᐊᕐᒧᑦ ᑕᕝᕙᓂ ᓄᓇᖃᓕᖅᓗᓂ, ᐊᖓᔪᒥᓂᒃ ᐊᐱᒥᓕᒃᒥᒃ ᑲᑉᐱᐊᓱᖕᓂᕐᖕᒧᑦ.
22ᐊᐱᒥᓕᒃ ᐊᐅᓚᑦᓯᓚᐅᖅᐳᖅ ᐃᓴᕆᐊᓕᒥᐅᓂᒃ ᐊᕐᕌᒍᓂᒃ ᐱᖓᓱᓂᒃ. 23ᒎᑎᓕ ᑎᓕᓯᓚᐅᖅᐳᖅ ᐊᓂᕐᖕᓂᖅᓗᖕᒥᒃ ᐊᐱᒥᓕᑭᐅᑉ ᓯᑭᒻᒥᐅᓪᓗ ᐊᑯᓐᓂᖓᓄᑦ; ᐃᓄᐃᑦ ᓯᑭᒻᒥᐅᑦ ᑐᖁᑦᓯᔪᒪᓂᕐᖕᒧᑦ ᐊᑭᕋᖅᑐᓕᖅᓗᑎᒃ ᐊᐱᒥᓕᒃᒥᒃ. 24ᑕᒪᓐᓇ ᑐᖁᕅᓂᖅ ᔨᕈᐸᐅᓕᐅᑉ ᐃᕐᖕᓂᖏᓐᓂᒃ 70ᓂᒃ ᐊᑭᓕᐅᑕᐅᖁᓪᓗᒍ ᐊᐅᖏᑕ ᑯᕕᔭᐅᓂᖏᓐᓄᑦ ᐸᓯᔭᒃᓴᐅᖁᓪᓗᒍ ᐊᐱᒥᓕᒃ ᑍᒃᑯᐊ ᖃᑕᓐᖑᑎᖓᑦ, ᑖᒃᑯᓂᖓ ᑐᖁᑦᓯᓚᐅᖅᑐᖅ, ᓯᑭᒻᒥᐅᓪᓗ ᐱᓂᐊᕐᖕᓂᖅᓗᖕᓂᖏᓐᓄᑦ, ᐃᑲᔪᓚᐅᕐᖕᒪᑕ ᖃᑕᓐᖑᑎᒥᓂᒃ ᑐᖁᕅᑎᓪᓗᒍ. 25ᓯᑭᒻᒥᐅᑦ ᐊᖑᑎᑦ ᑖᑦᓱᒥᖓ ᐅᐸᓗᐃᓐᓂᔪᒃᓴᓂᒃ ᐸᕐᖕᓇᓚᐅᖅᐳᑦ ᖃᖅᑲᐃᑦ ᖄᖏᓐᓂ, ᐊᖅᑯᓵᖅᑐᓪᓗ ᑖᒃᑯᓂᖓ ᑎᒡᓕᒡᕕᒋᕙᒃᓗᒋᑦ ᑕᒫᓂ ᐊᖅᑯᒻᒥ; ᐊᐱᒥᓕᑭᓗ ᐅᖃᐅᑦᔭᐅᓚᐅᖅᐳᖅ ᑕᒪᑐᒥᖓ.
26ᓱᓕ ᒐᐅᓪ ᐃᐱᑎᐅᑉ ᐃᕐᖕᓂᖓ ᓯᑭᒻᒧᑦ ᓄᒃᑎᓚᐅᖅᐳᖅ ᑭᖑᕚᖑᖃᑎᓂ ᐃᓚᒋᓪᓗᒋᑦ, ᓯᑭᒻᒥᐅᓪᓗ ᐃᓄᖏᑕ ᐅᒃᐱᕆᓕᖅᐹᑦ. 27ᑕᕝᕙᓐᖓᑦ ᐊᓂᕗᑦ ᐱᕈᖅᓰᕕᖕᓄᑦ, ᕔᓂᒃᓴᓂᒃ ᑲᑎᖅᓱᐃᓪᓗᑎᒃ ᕔᓂᒃᓴᓕᐅᕐᕕᖕᒥᖕᓂᑦ ᐃᑦᓰᔭᖅᓗᒋᓪᓗ, ᖁᕕᐊᓲᖃᑎᒌᒡᓗᑎᒃ. ᑐᒃᓯᐊᕐᕕᖕᒥᖕᓄᐊᖅᐳᓪᓗ ᒎᑎᓐᖑᐊᒥᖕᓄᑦ, ᑕᕝᕙᓂᓗ ᓂᕆᕗᑦ, ᐃᒥᖅᓗᑎᒡᓗ ᐃᔪᕿᑕᐅᑎᒋᕚᓪᓗ ᐊᐱᒥᓕᒃ. 28ᒐᐅᓪ ᐃᐱᑎᐅᑉ ᐃᕐᖕᓂᖓ ᐅᖃᖅᐳᖅ, “ᖃᓄᐃᑦᑑᕙ ᐊᐱᒥᓕᒃ, ᖃᓄᐃᑦᑑᕕᑕᓗ ᐊᖑᑕᐅᔪᒍᑦ ᓯᑭᒻᒥ? ᓱᖕᒪᑦ ᑭᒡᒐᖅᑐᕆᐊᖃᖅᐸᕗᑦ? ᔨᕈᐸᐅᓕᐅᑉ ᐃᕐᖕᓂᖓ ᔨᐳᓪᓗ ᐅᓇᑕᖅᑐᒃᓴᖁᑎᖏᑕ ᐊᖓᔪᖅᑳᖓ ᐱᔨᑦᓯᓚᐅᓐᖏᓚᖅ ᕼᐊᒧᕆᐅᑉ ᐃᓄᖏᓐᓂᒃ ᑖᓐᓇ ᓄᓇᑖᖅᑎᑦᓯᓚᐅᖅᑐᖅ ᓯᑭᒻᒥᒃ? ᐅᕙᒍᓪᓕ ᓱᖕᒪᑦ ᑭᒡᒐᖅᑐᕆᐊᖃᖅᐱᑖ ᑖᑦᓱᒥᖓ? 29ᐊᐅᓚᑦᓯᒍᒪ ᐃᓄᖕᓂᒃ ᑖᒃᑯᓂᖓ! ᐲᖅᑎᒃᑲᔭᖅᐸᕋ ᐊᐱᒥᓕᒃ! ᐅᖃᐅᑎᒐᔭᖅᐸᕋ, ‘ᐅᓇᑕᖅᑐᒃᓴᖁᑎᑎᑦ ᐸᕐᖕᓇᒃᓗᒋᑦ, ᕾᓕᕆᑦ ᐅᓇᑕᕆᐊᖅᑐᖅᓗᑎᑦ!’” 30ᔨᐳᓪ ᐃᒡᓗᒐᓴᖕᓂᒃ ᐊᐅᓚᑦᓯᔪᖅ, ᑐᓴᕋᒥ ᒐᐅᓕᐅᑉ ᐃᐱᑎᐅᑉ ᐃᕐᖕᓂᖓᑕ ᐅᖃᐅᓯᖏᓐᓂᒃ ᓂᓐᖓᒃᐳᖅ. 31ᐅᖃᕆᐊᖅᑐᖅᑐᓂᒡᓗ ᑎᓕᓯᕗᖅ ᐊᐱᒥᓕᑭᒧᑦ ᐊᕈᒪ-ᒦᑎᓪᓗᒍ, ᐅᖃᖅᓗᓂ, “ᒐᐅᓪ ᐃᐱᑎᐅᑉ ᐃᕐᖕᓂᖓ ᐃᓚᖏᓪᓗ ᓯᑭᒻᒧᑦ ᑎᑭᓯᒪᖕᒪᑕ, ᐃᒡᓗᒐᓴᖕᓃᑦᑐᓪᓗ ᐃᓕᖕᓂᒃ ᐃᑎᖁᔨᖏᓪᓗᑎᒃ ᐊᑭᕋᖅᑐᓕᖅᑎᑉᐰᑦ. 32ᒫᓐᓇᓕ, ᐅᓐᓄᐊᒃᑯᑦ ᐅᓇᑕᖅᑐᒃᓴᖁᑎᑎᓪᓗ ᐃᓚᒋᔭᑎᑦ, ᐱᕈᖅᓰᕕᖕᓂ ᐃᔨᖅᓯᒪᓗᓯ ᐅᑕᖅᑭᔭᖅᑐᕆᑦᓯ. 33ᐅᓪᓛᖑᓕᖅᐸᑦ ᓯᕿᓂᖅ ᓄᐃᓕᖅᑎᓪᓗᒍ, ᐅᓪᓛᕈᖅᓗᓯ ᒪᑭᓪᓗᓯ ᐃᒡᓗᒐᓴᖕᒥᐅᑦ ᐅᐸᓗᐃᓗᒋᑦ ᐅᓇᑕᕆᐊᓛᖅᐸᓯ; ᒐᐅᓪ ᐅᓇᑕᖅᑐᒃᓴᖁᑎᖏᓪᓗ ᐊᓂᒃᐸᑕ ᐅᓇᑕᕆᐊᓕᖅᓗᑎᒃ ᐃᓕᑦᓯᓐᓂᒃ, ᐱᕕᒃᓴᕆᔪᓐᓇᖅᑕᑦᓯᓐᓄᑦ ᖃᓄᑐᐃᓐᓇᖅ ᐱᓂᐊᕐᕕᒋᓯᐅᒃ!”
34ᐊᐱᒥᓕᒃ ᐅᓇᑕᖅᑐᒃᓴᖁᑎᓕᒫᖏᓪᓗ ᓇᔪᖅᑎᖏᑦ ᒪᑭᑉᐳᑦ ᐅᓐᓄᐊᒥ, ᐃᔨᖅᓗᑎᒡᓗ ᓯᑭᒻᒥᐅᑉ ᓯᓚᑖᓄᑦ ᓯᑕᒤᖑᓪᓗᑎᒃ. 35ᒐᐅᓕ ᐃᐱᑎᐅᑉ ᐃᕐᖕᓂᖓ ᐊᓂᖕᒪᑦ ᐃᒡᓗᒐᓮᑦ ᐃᑎᖅᑕᕐᕕᖓᓃᓕᖅᓗᓂ; ᐊᐱᒥᓕᑭᓗ ᐅᓇᑕᖅᑐᒃᓴᖁᑎᓂᓗ ᐃᓚᒋᔭᖏᑦ ᒪᑭᑉᐳᑦ ᐃᔨᖅᓯᒪᕝᕕᒋᔭᒥᖕᓂᑦ. 36ᒐᐅᓕᐅᓪᓕ ᐅᓇᑕᖅᑐᒃᓮᑦ ᑕᑯᒐᒥᒋᑦ, ᔨᐳᓪᒧᑦ ᐅᖃᖅᐳᖅ, “ᑕᑯᒃᑭᑦ, ᐃᓄᐃᑦ ᐊᖅᑲᖅᑎᖅᑐᑦ ᖃᖅᑬᑦ ᖄᖏᓐᓂᑦ!” ᔨᐴᓕᐅᑉ ᐅᖃᐅᑎᕚ, “ᖃᖅᑬᑦ ᖄᖏᑕ ᑕᕐᕋᖏᓐᓂᒃ ᑕᑯᓐᓇᖅᑐᑎᑦ ᐃᓅᔮᖅᑐᓂᒃ.”
37ᒐᐅᓕ ᐅᖃᒃᑲᓐᓂᖅᐳᖅ, “ᑕᑯᒋᑦ, ᐃᓄᐃᑦ ᐅᑯᐊ ᐊᖅᑲᖅᑎᖅᑐᑦ ᓄᓇᑦᑕ ᐊᑯᓐᓂᖓᓂᑦ ᐱᔪᑦ, ᐊᓯᖏᓪᓗ ᕾᔪᑦ ᐊᖅᑯᑎᒃᑯᑦ ᓇᐹᖅᑐᑦ ᐆᒃᒥᒃ ᐊᑎᓕᐅᑉ ᓯᕗᓂᒃᓴᒥᒃ ᓇᓚᐅᑦᑍᕕᐅᑉ ᓇᓛᓂᑦ!”
38ᑕᕝᕙ ᔨᐳᓕᐅᑉ ᐅᖃᐅᑎᕚ, “ᐅᖃᐅᓯᕐᔪᐊᕌᓗᒡᑎᓪᓕ ᓇᐅᒃ? ᐅᖃᓚᐅᕋᕕᑦ, ‘ᐊᐱᒥᓕᒃ ᓱᓇᐅᖕᒪᑦ, ᓱᖕᒪᓪᓗ ᑭᒡᒐᖅᑐᕆᐊᖃᖅᐱᑎᒎ.’ ᑖᒃᑯᐊᖑᓐᖏᓛᑦ ᐃᓄᐃᑦ ᒥᑕᐅᑎᒋᓚᐅᖅᑕᑎᑦ. ᒫᓐᓇ ᐂᓕᕆ ᐅᓇᑕᖃᑎᒋᔭᖅᑐᖅᓗᒋᑦ.” 39ᑕᕝᕙ ᒐᐅᓪ ᐊᓂᕗᖅ ᐅᓇᑕᖅᑐᒃᓴᖁᑎᓂ ᓯᑭᒻᒥᐅᑦ ᓯᕗᓕᖅᓗᒋᑦ, ᐅᓇᑕᕆᐊᓕᖅᓗᑎᒃ ᐊᐱᒥᓕᒃᒥᒃ. 40ᑕᕝᕙ ᐊᐱᒥᓕᑭᐅᑉ ᒪᓕᒃᓴᖅᐰᑦ, ᑖᑦᓱᒥᖓᓗ ᕿᒪᒃᓯᓪᓗᑎᒃ; ᐅᓄᖅᑐᑦ ᐃᑭᓕᖅᑕᐅᕗᑦ, ᐃᒡᓗᒐᓮᑦ ᐃᑎᖅᑕᕐᕕᖓ ᑎᑭᓪᓗᒍ ᐊᒡᓛᑦ. 41ᐊᐱᒥᓕᒃ ᓄᓇᖃᓚᐅᖅᐳᖅ ᐊᕈᒪ-ᒥ; ᔨᐳᓕᐅᓪᓗ ᒐᐅᓪ ᐃᓚᖏᓪᓗ ᐊᐅᓪᓚᖅᑎᓚᐅᖅᐰᑦ ᐃᒡᓗᒐᓴᖕᓂᑦ, ᓯᑭᒻᒥᓗ ᑕᕝᕙᓂ ᓄᓇᖃᕈᓐᓁᖅᑎᓪᓗᒋᑦ.
42ᖃᐅᑎᓪᓗᒍ ᐅᓇᑕᖅᑐᒃᓮᑦ ᐂᒋᕗᑦ ᐱᕈᖅᓰᕕᖕᓄᑦ, ᐊᐱᒥᓕᒃ ᑕᒪᑐᒥᖓ ᑐᓴᖅᑎᑕᐅᒋᓪᓗᓂ, 43ᐅᓇᑕᖅᑐᒃᓴᖁᑎᓂ ᐊᒡᒍᖅᐰᑦ ᐱᖓᓲᓕᓪᓗᒋᑦ, ᐃᔨᖅᓯᒪᓪᓗᑎᒃ ᐅᑕᖅᑭᖁᓪᓗᒋᑦ ᐱᕈᖅᓰᕕᖕᓂ; ᐃᓄᐃᓪᓗ ᑕᑯᒐᒥᒋᑦ ᐃᒡᓗᒐᓴᖕᓂᑦ ᐊᓂᔪᑦ, ᐃᔨᖅᓯᒪᕝᕕᖕᒥᖕᓂᑦ ᒪᑭᑉᐳᑦ ᑐᖁᓪᓗᒋᓪᓗ. 44ᐊᐱᒥᓕᒃ ᐅᓇᑕᖅᑐᒃᓴᖁᑎᖏᓪᓗ ᑐᐊᕕᖅᓗᑎᒃ ᐅᐸᒃᑐᓕᖅᐳᑦ ᐃᒡᓗᒐᓮᑦ ᐃᑎᖅᑕᕐᕕᖓᓄ ᐂᓪᓗᑎᒃ, ᐃᓚᖏᑦᑕ ᐊᓯᖏᑦ ᒪᕐᕈᐃᑦ ᐅᓇᑕᕆᐊᖅᐳᑦ ᐱᕈᖅᓰᕕᖕᒦᑦᑐᓂᒃ ᑐᖁᑍᓐᓇᕆᓪᓗᒋᑦ. 45ᐊᐱᒥᓕᒃᑯᑦ ᐅᓇᑕᖅᐳᑦ ᐅᓪᓗᓕᒫᖅ ᐃᒡᓗᒐᓴᒡᔪᐊᕐᖕᒥᐅᓂᒃ, ᐃᒡᓗᒐᓮᑦ ᓵᓚᒋᓪᓗᒋᑦ, ᓄᓇᖃᖅᑐᑦ ᑐᖁᑉᐰᑦ; ᐃᒡᓗᒐᓮᓪᓗ ᓯᖁᑦᑎᖅᓗᒋᑦ, ᓄᓇᓗ ᑕᕆᐅᕐᖕᒥᒃ ᑲᓐᖓᖅᑎᕐᕕᒋᓪᓗᒍ.
46ᐃᓄᓕᒫᓪᓕ ᓯᑭᒻᒥᐅᑦ ᓇᐸᔪᕐᔪᐊᒦᑦᑐᑦ ᑕᒪᑐᒥᖓ ᑐᓴᕋᒥᒃ, ᕿᒫᕕᖕᒧᑦ ᐃᑎᖅᐳᑦ ᑐᒃᓯᐊᕐᕕᖕᒦᑦᑐᒧᑦ ᐰᓕᒧᑦ ᒎᑎᓐᖑᐊᖃᕐᕕᖕᒧᑦ. 47ᐊᐱᒥᓕᒃ ᐅᖃᐅᑦᔭᐅᕗᖅ ᐃᓄᐃᑦ ᓯᑭᒻᒥᐅᑉ ᓇᐸᔪᕐᔪᐊᖓᓃᑦᑐᒧᑦ ᕿᒫᓯᒪᓕᕐᖕᓂᖏᓐᓂᒃ. 48ᑕᕝᕙ ᐊᐱᒥᓕᒃ ᒪᔪᕋᖅᐳᖅ ᖃᖅᑲᐅᑉ ᔭᓪᒧᓐᒧᑦ, ᐅᓇᑕᖅᑐᒃᓴᖁᑎᓂ ᓇᔪᖅᑎᒋᔭᓂ ᐃᓚᒋᓪᓗᒋᑦ; ᐊᐱᒥᓕᒃᓗ ᐅᓕᒪᐅᒻᒥᒃ ᑎᒍᓯᓪᓗᓂ ᓇᐹᖅᑑᑉ ᐊᕙᓚᖓᔪᖏᓐᓂᒃ ᓇᑲᑦᓯᕗᖅ, ᑎᒍᓪᓗᒋᑦ ᐃᖅᓱᓕᖅᐰᑦ. ᐅᓇᑕᖅᑐᒃᓴᖁᑎᓂ ᐃᓚᒋᔭᓂ ᐅᖃᐅᑎᕔᑦ, “ᐅᕙᓐᓂᒃ ᑕᑯᓐᓇᕋᑦᓯ, ᑍᒫᑦᓮᓐᓇᖅ ᑐᐊᕕᖅᓗᓯ ᐱᒋᑦᓯ.” 49ᐃᓄᓕᒫᓪᓗ ᓇᑲᑦᓯᕗᑦ ᓇᐹᖅᑐᑦ ᐊᕙᓚᖓᔪᖏᓐᓂᑦ; ᐊᐱᒥᓕᑭᒥᒡᓗ ᒪᓕᒡᓗᑎᒃ, ᑲᑎᑉᐰᓪᓗ ᕿᔪᐃᑦ ᕿᒫᓯᒪᕕᒋᔭᖓᓐᓄᑦ. ᐃᑯᐊᓪᓚᒃᐹᓪᓗ, ᐃᓄᐃᑦ ᓯᑭᒻᒥ ᐳᖅᑐᔪᒦᑎᓪᓗᒋᑦ, ᐃᓄᓕᒫᖏᓪᓗ ᑕᕝᕙᓃᑦᑐᑦ ᑐᖁᕗᑦ; ᐃᒪᖄ 1,000 ᐊᖑᑎᑦ ᐊᕐᖕᓁᓪᓗ.
50ᐊᐱᒥᓕᒃ ᐂᒋᕗᖅ ᑎᐱᔾᒧᑦ, ᐃᒡᓗᒐᓴᖏᓪᓗ ᓵᓚᒋᓪᓗᒋᑦ ᑎᒍᕔᑦ. 51ᑍᑲᓂᓗ ᓇᐸᔪᕐᔪᐊᖃᖅᐳᖅ ᐊᑦᑕᕐᖕᓇᖏᑦᑐᒥᒃ, ᑕᕝᕙᓃᑦᑐᓪᓗ ᐊᖑᑏᑦ ᐊᕐᖕᓁᓪᓗ ᐃᒡᓗᒐᓴᖕᓃᑦᑐᑦ ᑕᕝᕗᖓ ᕿᒫᕗᑦ, ᐅᒃᑯᐊᖓᓗ ᐊᑦᓱᖏᖅᓗᒍ; ᐊᐱᒥᓕᒃᑯᓪᓕ ᑕᕝᕗᓐᖓᕋᒥᒃ ᖃᖓᓄᐊᖅᐳᑦ. 52ᐊᐱᒥᓕᒃᓗ ᑕᕝᕗᓐᖓᖅᓗᓂ ᓇᐸᔪᐊᓗᖕᒧᑦ, ᐅᓇᑕᖃᑎᒋᕔᑦ, ᐹᖓᓄᐊᖅᐳᓪᓗ ᐃᑯᐊᓪᓚᒍᒪᓪᓗᒍ. 53#ᓴᒧᐃᓕ ᐂᑉᐸᖏᑦ 11:21.ᐊᕐᖕᓇᐅᓪᓕ ᓯᖃᓪᓕᓯᕕᐅᑉ ᖄᖓᓃᑦᑐᒧᑦ ᐅᔭᕋᖕᒧᑦ ᐊᐱᒥᓕᑭ ᒥᓗᖅᐹ ᓂᐊᖁᐊᒍᑦ, ᓂᐊᖁᖓᑕᓗ ᓴᐅᓂᖓ ᓯᖁᒻᒪᑖᖅᐹ. 54ᑐᐊᕕᖅᓗᓂ ᐃᓅᓱᒃᑐᖅ ᐅᓇᑕᐅᑎᖏᓐᓂᒃ ᐊᒡᔭᖅᓯᔪᖅ ᕾᖁᕚ, ᐅᖃᐅᑎᓪᓗᒍᓗ, “ᓴᕕᒡᔪᐊᑦ ᐊᒧᓗᒍ ᑐᖁᓚᐅᓐᖓ, ᐅᖃᐅᓯᐅᖃᑦᑕᕈᒪᖏᓐᓇᒪ ᐊᕐᖕᓇᒧᑦ ᑐᖁᑕᐅᓂᕋᖅᑕᐅᓗᖓ.” ᐊᓱᐃᓛᒃ ᐃᓅᓱᒃᑑᑉ ᑲᐱᕚ ᑐᖁᓪᓗᓂᓗ. 55ᐃᓴᕆᐊᓕᒥᐅᑦ ᑕᑯᒐᒥᒃ ᐊᐱᒥᓕᒃ ᑐᖁᖕᒪᑦ, ᐊᖏᕋᖅᑐᐃᓐᓇᐅᕗᑦ.
56ᑍᒤᒻᒪᑦ ᒎᑎᐅᑉ ᐊᑭᓂᐊᓚᐅᖅᐹ ᐊᐱᒥᓕᒃ ᐱᕋᔭᖕᓂᕆᓚᐅᖅᑕᖓᓄᑦ ᐊᑖᑕᒥᓄᑦ, ᑐᖁᑦᓯᓚᐅᕐᖕᒪᑦ ᖃᑕᓐᖑᑎᒥᓂᒃ 70ᓂᒃ. 57ᒎᑎᐅᑦᑕᐅᖅ ᓯᑭᒻᒥᐅᑦ ᐊᒃᓱᕈᕐᖕᓇᖅᑐᒃᑰᖅᑎᓚᐅᖅᐰᑦ ᐱᐅᖏᑦᑐᒥᒃ ᐱᓇᓱᐊᓚᐅᕐᖕᓂᖏᓐᓄᑦ ᔫᑕᒻ, ᔨᕈᐸᐅᓕᐅᑉ ᐃᕐᖕᓂᖓᑕ ᐅᖃᐅᓯᕆᓚᐅᖅᑕᖓᑐᑦ ᐅᖃᕐᖕᓂᖅᓗᕕᒋᓚᐅᕐᖕᒪᒋᑦ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 9: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
