ᐃᓗᐊᖅᓮᔩᑦ ᐊᒡᓚᖏᑦ 8
8
ᒥᑎᐊᓂᒥᐅᑦ ᑭᖑᓪᓕᖅᐹᒥᒃ ᓵᓚᐅᓂᖓᑦ
1ᐃᕗᕅᒥᐅᑦ ᐃᓄᖏᑦ ᐅᖃᖅᐳᑦ ᒋᑎᐅᓂᒧᑦ, “ᓱᖕᒪᑦ ᐅᕙᑦᑎᓐᓂᒃ ᐱᑦᓯᐊᕐᕕᖃᓚᐅᓐᖏᓚᑎᑦ, ᐅᕙᑦᑎᓐᓂᒃ ᕾᖁᔨᓚᐅᖏᓐᓇᕕᑦ ᐅᓇᑕᕆᐊᕐᖕᓂᐊᖅᑎᓪᓗᓯ ᒥᑎᐊᓂᒥᐅᓂᒃ?” ᓈᒻᒪᒃᓴᕋᑎᒃ ᑍᒫᒃ ᐃᓕᕋᓇᕐᕕᒋᓪᓗᒍ ᓂᓪᓕᐊᕕᒋᕚᑦ.
2ᐅᖃᐅᑎᕔᓪᓕ, “ᖃᓄᖅ ᐱᓂᐊᕐᖕᓂᕆᓚᐅᖅᑕᒃᑲ ᐊᑦᔨᓪᓗᐊᖃᖅᐹᑦ ᐱᓂᐊᕐᖕᓂᕆᓚᐅᖅᑕᑦᓯᓐᓂᒃ? ᐃᕗᕅᒥᒥᑦ ᑲᑎᖅᓱᐃᓂᖅᓗᑯᐃᑦ ᕔᓂᒃᓴᓂᒃ ᐱᐅᓂᖅᓴᐅᓐᖏᓛᑦ ᐊᐰᔨᕆᒥ ᕔᓂᓕᐊᕆᔭᐅᓯᒪᔪᓂᑦ? 3#ᐃᓐᖏᕈᑦ 83:11.ᒎᑎᐅᑉ ᓵᓚᖃᕐᖕᓂᕐᖕᒥᒃ ᑐᓂᕕᒋᓚᐅᖅᐹᓯ ᒥᑎᐊᓂᒥᐅᑦ ᐅᓇᑕᖅᑐᒃᓴᖁᑎᖏᑕ ᐊᖓᔪᖅᑳᖏᖕᓂᒃ ᒪᕐᕉᖕᓂᒃ, ᐅᕆᑉᒥᒃ ᔩᐱᒥᒡᓗ; ᓱᓇᒥᒡᓕ ᐱᓂᐊᓚᐅᖅᐳᖓ ᐱᓂᐊᕐᖕᓂᕆᓚᐅᖅᑕᑦᓯ ᐊᑦᔨᓪᓗᐊᖏᓐᓂᒃ?” ᑍᒫᒃ ᐅᖃᐅᑎᖕᒪᒋᑦ ᓂᓐᖓᐅᒪᓗᐊᕈᓐᓃᖅᐳᑦ.
4ᒋᑎᐅᓂ ᑎᑭᑎᓪᓗᒍ ᔪᐊᕐᑕᓂᒧᑦ ᐃᑳᖅᑎᓪᓗᒍᓗ ᐊᑭᐊᓄᑦ. ᐃᒻᒥᓂᒃ ᐊᖑᑎᓪᓗ 300ᐃᑦ ᐃᓚᒋᔭᖏᑦ ᑕᖃᓯᒪᓕᓚᐅᖅᐳᑦ, ᑳᓕᖅᓗᑎᒡᓗ. 5ᓱᑰᑎᒥᐅᓪᓗ, ᑕᕝᕙᓂ ᓄᓇᖃᖅᑐᑦ ᐅᖃᐅᑎᕔᑦ, “ᕿᓄᕗᖓ ᐃᓕᑦᓯᓐᓄᑦ ᐃᓄᖁᑎᒃᑲ ᒪᓕᒃᑐᑦ ᐅᕙᓐᓂᒃ ᓂᐊᖂᔭᒥᒃ ᑐᓂᓚᐅᖅᓯᐅᒃ ᓄᑮᓕᕐᖕᒪᑕ, ᒪᓕᒃᑲᑦᑕ ᔩᐸᒥᒃ ᔮᓪᒨᓇᒥᒡᓗ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᖕᓂᒃ.”
6ᓱᑰᑎᒥᐅᓪᓕ ᓯᕗᓕᖅᑎᖏᑦ ᐅᖃᖅᐳᑦ, “ᔩᐸ ᔮᓪᒨᓇᓗ ᑎᒍᓯᒪᓕᕋᑦᓯᐅᒃ ᓱᖕᒪᓪᓕ ᓂᐊᖂᔭᓂᒃ ᑐᓂᓯᔭᕆᐊᖃᖅᐱᑖ ᐅᓇᑕᖅᑐᒃᓴᖁᑎᖕᓄᑦ?”
7ᑍᒤᒻᒪᑦ ᒋᑎᐅᓂᐅᑉ ᐅᖃᐅᑎᕔᑦ, “ᐊᑕᓂᐅᑉ ᐅᕙᑦᑎᓐᓄᑦ ᑐᓂᒃᐸᒋᒃ ᔩᐸ ᔮᓪᒨᓇᓗ, ᑎᒥᓯ ᑭᓪᓕᐊᔭᖅᑐᓛᖅᐸᕗᑦ ᑲᑭᓪᓚᐅᑎᓂᒃ ᐅᖅᐱᖕᓂᒡᓗ ᓯᐅᕋᕐᖕᒥᐅᑕᕐᖕᓂᒃ ᐊᑐᖅᓗᑕ!” 8ᑕᕝᕙᓐᖔᖅᓗᑎᒃ ᐱᓄᐃᓕᒧᑦ ᑎᑭᒃᑭᕗᑦ, ᑍᒫᑦᓮᓐᓇᖅ ᐊᐱᕆᒋᕔᑦ ᑕᕝᕙᓂ ᓄᓇᖃᖅᑐᑦ, ᐱᓄᐃᓕᒥᐅᓪᓕ ᑭᐅᓚᐅᕆᕗᑦ ᑍᒫᑦᓮᓐᓇᖅ ᓱᑰᑎᒥᐅᑦ ᑭᐅᑦᔪᓯᕆᓚᐅᖅᑕᖓᑎᑐᑦ. 9ᑍᒤᒻᒪᑦ ᐱᓄᐃᓕᒥᐅᑦ ᐅᖃᐅᑎᕔᑦ, “ᓵᓚᖃᖅᓗᖓ ᐅᑎᕈᒪ ᓇᐸᔪᕐᔪᐊᖁᑎᓯ ᐅᓇ ᓯᖁᒥᑦᓱᒫᖅᐸᕋ!”
10ᔩᐸᓗ ᔮᓪᒨᓇᓗ ᑳᑯᕆᒦᓚᐅᖅᐴᒃ ᐅᓇᑕᖅᑐᒃᓴᖁᑎᑎᒃ ᐃᓚᒋᓪᓗᒋᑦ. ᐅᓇᑕᖅᑐᒃᓴᖁᑎᖏᑦ 15,000ᐅᓪᓗᑎᒃ; ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᓯᒪᔪᑦ ᐅᓇᑕᖅᑐᒃᓮᑦ ᐊᒥᐊᒃᑯᖏᑦ; 120,000ᐃᑦ ᐅᓇᑕᖅᑐᒃᓴᖁᑎᖏᑦ ᐅᓇᑕᐅᑎᓖᑦ ᑐᖁᖓᓕᓚᐅᕐᖕᒪᑕ. 11ᒋᑎᐅᓂᓕ ᐊᖅᑯᑎᒃᑯᑦ ᐃᖏᕐᕋᓪᓗᓂ, ᓄᓁᑦ ᓅᐸᐅᓪᓗ ᔪᒡᐱᕼᐊᐅᓪᓗ ᓯᕿᓂᖓᑕ ᓂᐱᕕᐊᒍᑦ, ᐅᓇᑕᖅᑐᒃᓮᓪᓗ ᐅᓇᑕᖅᓗᒋᑦ. ᓂᕆᐅᓐᖏᓈᓚᐅᖅᐰᑦ. 12ᔩᐸᓗ ᔮᓪᒨᓇᓗ ᕿᒪᒃᓯᕗᒃ, ᒪᓕᒡᓗᒋᒡᓗ ᑎᒍᕚᒃ, ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᒃ ᑖᒃᑯᐊᒃ ᒪᕐᕉᒃ, ᐅᓇᑕᖅᑐᒃᓴᖁᑎᖏᓪᓗ ᐅᐃᒻᒪᒃᑎᑉᐰᑦ.
13ᒋᑎᐅᓂᓕ ᔪᐊᓯᐅᑉ ᐃᕐᖕᓂᖓ ᐅᑎᓕᕋᒥ ᐅᓇᑕᕐᕕᖕᒥᖕᓂᑦ ᐊᖅᑲᖅᑎᓚᐅᖅᐳᖅ ᕼᐃᕆᔅ ᐊᖅᑯᑎᖓᒍᑦ, 14ᑎᒍᓯᓪᓗᓂᓗ ᐊᖑᒻᒥᒃ ᐅᕕᒃᑲᒥᒃ ᓱᑰᑎᒥᐅᑕᕐᖕᒥᒃ, ᐊᐱᖅᓱᓚᐅᖅᐹᓗ; ᑖᓐᓇᓗ ᑎᑎᕋᓚᐅᖅᐳᖅ ᐊᑎᕐᖕᓂᒃ 77ᓂᒃ ᓱᑰᑎᒥᐅᑦ ᓯᕗᓕᖅᑎᖏᓐᓂᒃ ᐊᖓᔪᖅᑳᖏᓐᓂᒡᓗ. 15ᒋᑎᐅᓂᓗ ᑎᑭᓐᓇᒥ ᓱᑰᑎᐅᑉ ᐃᓄᖏᑦ ᐅᖃᐅᑎᕔᑦ, “ᐅᑯᐊᒃ ᑕᕝᕙ ᔩᐸᓗ ᔮᓪᒨᓇᓗ, ᑖᒃᑯᐊᒃ ᐱᓪᓗᒋᒃ ᐅᐃᕕᓴᓚᐅᖅᑐᓯ ᐅᕙᓐᓂᒃ ᐅᖃᓚᐅᕋᑦᓯ, ‘ᑎᒍᓯᒪᓪᓗᓯᐅᒃ ᐱᓯᒪᓕᖅᐱᓯᒋᑦ ᔩᐸᓗ ᔮᓪᒨᓇᓗ, ᑍᒫᒃ ᓂᕆᑎᑦᓯᔭᕆᐊᖃᓕᖅᐱᑖ ᐅᓇᑕᖅᑐᒃᓴᖁᑎᖕᓂᒃ ᓄᑮᕈᑎᓕᖅᑐᓂᒃ?’” 16ᑕᕝᕙ ᑎᒍᓯᓚᐅᖅᐳᖅ ᑲᑭᓪᓚᐅᑎᓕᖕᓂᒃ ᐅᖅᐱᖕᓂᒡᓗ ᐃᓄᖃᖏᑦᑐᒥᑦ ᐱᔭᕕᓂᕐᖕᒥᓂᒃ ᐋᓐᓂᖅᑎᕆᑦᔪᑎᒋᓪᓗᒋᓪᓗ ᓱᑰᑎᒥᐅᑦ ᐊᖓᔪᖅᑳᖏᓐᓂᒃ. 17ᓇᐸᔪᕐᔪᐊᕐᓗ ᐱᓄᐃᓕᒦᑦᑐᖅ ᐅᕐᕈᑎᓚᐅᖅᐹ ᑐᖁᓪᓗᒋᓪᓗ ᐃᒡᓗᒐᓴᖕᓃᑦᑐᑦ.
18ᒋᑎᐅᓂᐅᑉ ᔩᐸᓗ ᔮᓪᒨᓇᓗ ᐊᐱᕆᕚᒃ, “ᑍᒃᑯᐊᓕ ᐊᖑᑎᑦ ᑐᖁᓚᐅᖅᑕᓯ ᑍᐸᕆᒥ ᖃᓄᐃᑦᑑᕙᑦ?” ᑭᐅᕘᒡᓗ, “ᐃᓕᒃᑐᑦ ᑕᐅᑦᑐᖃᓚᐅᖅᐳᑦ ᐃᓘᓐᓇᑎᒡᓗ ᐊᖓᔪᖅᑳᕐᔪᐊᑉ ᐃᕐᖕᓂᕆᔫᔮᓚᐅᖅᐰᑦ.”
19ᒋᑎᐅᓂᐅᑉ ᐅᖃᐅᑎᕔᑦ, “ᑍᒃᑯᐊ ᖃᑕᓐᖑᑎᒋᓚᐅᖅᐸᒃᑲ, ᐊᓈᓇᒪ ᓇᖕᒥᓂᖅ ᐃᕐᖕᓂᖏᑦ. ᐊᖏᕈᑎᖃᒻᒪᕆᒃᐳᖓ, ᐊᑕᓂᕐᖕᒧᑦ ᐆᒪᔪᒧᑦ, ᑐᖁᓚᐅᖏᒃᑯᑦᓯᐅᒃ, ᑐᖁᒃᑲᔭᓐᖏᓚᑦᓯᒃ.”
20ᔨᑎᕆᒧᑦ ᐅᖃᖅᐳᖅ ᐃᕐᖕᓂᕐᖕᒥᓄᑦ ᐊᖓᔪᒃᓕᖅᐹᒧᑦ, “ᐊᑏ ᑐᖁᓕᒃᑭᒃ!” ᔩᓴᕆᐅᓪᓕ ᓴᕕᒡᔪᐊᓂᒃ ᑎᒍᔪᒪᓚᐅᓐᖏᓚᖅ, ᑲᑉᐱᐊᓱᒃᑲᒥ ᓄᑲᑉᐱᐊᑐᐃᓐᓇᐅᒐᒥ ᓱᓕ.
21ᔩᐸᓗ ᔮᓪᒨᓇᓗ ᐅᖃᖅᐴᒃ ᒋᑎᐅᓂᒧᑦ, “ᐊᑏ, ᓇᖕᒥᓂᖅ ᑐᖁᓚᐅᖅᑎᒍᒃ. ᐊᖑᑦ ᐊᖑᑕᐅᖕᒪᑦ ᓴᓐᖏᔫᓪᓗᓂᓗ.” ᑍᒤᒻᒪᑦ ᒋᑎᐅᓂᐅᑉ ᑐᖁᑉᐹᒃ, ᑳᒥᓕᖁᑎᖏᑕᓗ ᖁᖓᓯᖏᑕ ᐱᐅᓴᐅᑎᖏᑦ ᐅᔭᒥᖏᑦ ᑎᒍᕔᑦ.
22ᑕᒪᑐᒪ ᑭᖑᓂᐊᒍᑦ, ᐃᓴᕆᐊᓕᒥᐅᑉ ᒋᑎᐅᓂᒧᑦ ᐅᖃᖅᐳᑦ, “ᐊᒐᔪᖅᑳᖑᓚᐅᕆᑦ ᐅᕙᑦᑎᓐᓄᑦ ᐃᕝᕕᑦ ᐃᕐᖕᓂᑎᓪᓗ ᐃᕐᖑᑕᑎᓪᓗ. ᐱᐅᓕᓚᐅᕋᑦᑎᒍᑦ ᒥᑎᐊᓂᒥᐅᑦ ᐱᔪᓐᓇᕐᖕᓂᖏᓐᓂᑦ.”
23ᒋᑎᐅᓂᐅᑉ ᑭᐅᕔᑦ, “ᐊᖓᔪᖅᑳᖑᔪᒪᓐᖏᓚᖓ ᐃᓕᑦᓯᓐᓄᑦ, ᐃᕐᖕᓂᒃᑲᓘᓐᓃᑦ ᐊᖓᔪᖅᑳᓐᖑᕐᖕᓂᐊᓐᖏᓚᑦ, ᐊᑕᓂᕐᓕ ᐊᖓᔪᖅᑳᖑᓂᐊᖅᐳᖅ ᐃᓕᑦᓯᓐᓄᑦ.” 24ᒋᑎᐅᓂᓗ ᐅᖃᒃᑲᓐᓂᖅᐳᖅ, “ᐱᔪᒪᔭᖃᖅᐳᖓ ᐊᑕᐅᓯᕐᖕᒥᒃ, ᐃᓘᓐᓇᓯ ᑐᓂᓯᕕᒋᓯᓐᖓ ᑐᖁᓚᐅᖅᑕᑦᓯ ᐱᖁᑎᕕᓂᖏᓐᓂᒃ ᑎᒍᓚᐅᖅᑕᑦᓯᓐᓂᒃ ᓯᐅᑎᒥᐅᑕᕐᖕᓂᒃ.” (ᒎᓗᓂᒃ ᓯᐅᑎᕈᑎᖃᖅᐸᓚᐅᕐᖕᒪᑕ ᐃᓯᒤᓕᐅᑉ ᑭᖑᕚᖏᑦ.)
25ᐃᓄᐃᑦ ᑭᐅᕚᑦ, “ᖁᕕᐊᓱᖕᓂᐊᖅᐳᒍᑦ ᑐᓂᓯᕕᒋᒍᑦᑎᒋᑦ.” ᐊᓐᓄᕌᒥᒃ ᐃᓕᓯᓪᓗᑎᒃ, ᐃᓘᓐᓇᑎᒡᓗ ᐃᓕᓯᕗᑦ ᓯᐅᑎᒥᐅᑕᕐᖕᓂᒃ ᑎᒍᓚᐅᖅᑕᒥᖕᓂᒃ. 26ᓯᐅᑎᒥᐅᑍᑦ ᒎᓗᐃᑦ ᐅᖁᒤᓐᓂᖃᓚᐅᖅᐳᑦ 1,700ᓂᒃ ᓴᑯᓪᔅᓂᒃ ᐅᖁᒤᓐᓂᖅᓯᐅᑏᑦ ᒪᓕᒡᓗᒋᑦ, ᐃᓚᒋᔭᐅᓇᑎᒃ ᖁᖓᓯᕐᖕᒧᑦ ᐱᐅᓴᐅᑏᑦ, ᐃᑦᑎᐅᔧᓪᓗ ᑕᐅᑦᑐᖏᑦ ᐊᓐᓄᕌᑦ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᖏᑕ ᐊᑐᓚᐅᖅᑕᖏᑦ, ᐅᕝᕙᓘᓐᓃᑦ ᑳᒥᓖᑦ ᖁᖓᓯᕈᑎᒋᓚᐅᖅᑕᖏᑦ. 27ᒋᑎᐅᓂ ᓴᓇᓚᐅᖅᐳᖅ ᐊᔪᕆᖅᑐᐃᔨᕐᔪᐊᑉ ᓴᒡᕕᖕᒥᐅᑕᖏᓐᓂᒃ ᒎᓗᓂᒃ ᐱᓚᐅᖅᑕᒥᓂᒃ; ᐊᖏᕐᕋᒥᓄᓪᓗ ᐃᓕᕚ ᐅᐸᕋᒥ. ᐃᓴᕆᐊᓕᒥᐅᑦ ᐃᓘᓐᓇᑎᒃ ᐊᓯᓐᓂᐊᓕᓚᐅᖅᐳᑦ ᒎᑎᒥᒃ, ᐃᓘᓐᓇᑎᒡᓗ ᐂᕗᑦ ᑐᒃᓯᐊᕆᐊᖅᑐᖅᓗᑎᒃ ᑖᑦᓱᒧᖓ. ᒋᑎᐅᓂᐅᑉ ᐃᓚᖏᑕᓗ ᐊᔪᓕᕈᑎᒋᓚᐅᖅᐹᑦ. 28ᒥᑎᐊᓂᒥᐅᑦ ᓵᓚᐅᕗᑦ ᐃᓴᕆᐊᓕᒥᐅᓄᑦ, ᓯᕘᕋᓇᕈᓃᓚᐅᖅᐳᑦ ᒪᑭᒃᑲᓐᓂᕈᓐᓃᖅᓗᑎᒡᓗ. ᓄᓇᒥᓗ ᐅᓇᑕᕐᖕᓂᖃᕈᓐᓃᓚᐅᖅᐳᑦ ᐊᕐᕌᒍᓂᒃ 40ᓂᒃ ᒋᑎᐅᓂᐅᑉ ᑐᖁᓂᖓ ᑎᑭᓪᓗᒍ.
ᒋᑎᐅᓂᐅᑉ ᑐᖁᓂᖓ
29ᔨᕈᐸᐅᓪ ᔪᐊᓯᐅᑉ ᐃᕐᖕᓂᖓ ᐅᑎᓚᐅᖅᐳᖅ ᓇᖕᒥᓂᖅ ᐊᖏᕐᕋᒥᓄᑦ ᑍᑲᓃᓕᖅᓗᓂᓗ. 30ᓇᖕᒥᓂᕐᖕᒥᓂᒃ ᒋᑎᐅᓂ ᐃᕐᖕᓂᖃᓚᐅᖅᐳᖅ 70ᓂᒃ, ᐅᓄᖅᑐᓂᒃ ᓄᓕᐊᖃᓚᐅᕋᒥ. 31ᓄᓕᐊᖃᒃᑲᓐᓂᓚᐅᕆᕗᖅ ᓯᑭᒻᒥ ᓄᓇᖃᖅᑐᒥᒃ, ᑖᓐᓇᓗ ᐃᕐᖕᓂᖅᑖᕐᕕᒋᓚᐅᖅᐹ ᐊᑎᖃᖅᑎᓪᓗᒍᓗ ᐊᐱᒥᓕᑭᒥᒃ. 32ᒋᑎᐅᓂ ᔪᐊᓯᐅᑉ ᐃᕐᖕᓂᖓ ᑐᖁᓚᐅᖅᐳᖅ ᐃᓄᑐᖃᒻᒪᕆᐅᓕᖅᓗᓂ. ᐃᓗᕕᖅᑕᐅᓪᓗᓂᓗ ᐊᑖᑕᖓᑕ ᔪᐊᓯᐅᑉ ᐊᐰᔭᕆᑎᐅᑉ ᑭᖑᕚᖓᑕ ᐃᓗᕕᖓᓂ, ᐅᐸᕋᒥ.
33ᒋᑎᐅᓂᐅᓪᓗ ᑐᖁᓂᖓᑕ ᑭᖑᓂᐊᒍᑦ ᐃᓴᕆᐊᓕᐅᑉ ᑭᖑᕚᖏᑦ ᐊᓯᓐᓂᐊᓕᕇᓚᐅᕆᕗᑦ ᒎᑎᒥᒃ, ᑐᒃᓯᐊᖅᐸᓕᖅᓗᑎᒃ ᐰᓕᒧᑦ, ᓴᓇᓚᐅᖅᐳᑦ ᐰᓕ-ᐱᕆᑎᒥᒃ ᒎᑎᑖᕆᓪᓗᒍᓗ. 34ᐃᖅᑲᐅᒪᔪᓐᓃᓚᐅᖅᐳᓪᓗ ᐊᑕᓂᕐᖕᒥᒃ ᒎᑎᒥᖕᓂᒃ, ᓴᐳᑦᔨᔨᒋᕙᓚᐅᖅᑕᒥᖕᓂᒃ ᐊᑭᕋᒥᖕᓂᑦ ᖃᖓᑐᐃᓐᓇᓕᒫᖅ. 35ᔨᕈᐸᐅᓕᐅᓪᓗ ᐱᑦᓯᐊᕐᕕᒋᓚᐅᓐᖏᓔᑦ ᒋᑎᐅᓂᐅᑉ ᐃᓚᖏᑦ, ᐱᐅᔪᑦ ᐱᓂᐊᕐᖕᓂᕆᓚᐅᖅᑕᖏᑦ ᐃᓴᕆᐊᓕᒥᐅᓄᑦ ᐱᓪᓗᒋᑦ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 8: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
