ᐃᓗᐊᖅᓮᔩᑦ ᐊᒡᓚᖏᑦ 15
15
ᓵᒻᓲᓂᐅᑉ ᓵᓚᖃᕐᖕᓂᖓ ᐱᓕᔅᑍᓂᒥᐅᓂᒃ
1ᑕᒪᑐᒪ ᑭᖑᓂᑲᓪᓚᖓᒍᑦ, ᓂᐊᖂᔭᒃᓴᓂᒃ ᑲᑎᖅᓱᐃᕕᒃ ᓇᓪᓕᐅᑎᑎᓪᓗᒍ, ᓵᒻᓲᓂ ᐳᓛᕆᐊᓚᐅᖅᐳᖅ ᓄᓕᐊᒥᓄᑦ ᒎᑦᓯᐅᑉ ᓄᕐᕋᖓᓂᒃ ᓇᒃᓴᖅᓗᓂ. ᐅᖃᖅᓗᓂ, “ᓄᓕᐊᕋ ᑕᑯᔭᖅᑐᕋᒃᑯ ᐃᒡᓗᕈᓯᖓᓄᑦ.” ᐊᕐᖕᓇᐅᓪᓕ ᐊᑖᑕᖓᑕ ᐱᖁᓐᖏᓛ. 2ᐊᕐᖕᓇᐅᓪᓕ ᐊᑖᑕᖓᑕ ᐅᖃᐅᑎᕚ, “ᐆᒥᓱᓪᓚᑦᑖᕋᓱᒋᓕᓚᐅᖅᐸᒋᑦ ᑖᑦᓱᒥᖓ; ᑍᒤᒻᒪᑦ ᑐᓂᓚᐅᖅᐸᕋ ᐱᖃᑎᖕᓄᑦ. ᓄᑲᖔ ᐱᐅᓂᖅᓴᐅᓐᖏᓛᖅ? ᑖᓐᓇ ᐱᖔᓚᐅᕈᒃ.” 3ᓵᒻᓲᓂᐅᑉ ᐅᖃᐅᑎᕚ, “ᒫᓐᓇ ᐸᓯᔭᒃᓴᐅᓂᐊᓐᖏᓚᖓ ᐱᓕᔅᑍᓂᒥᐅᓄᑦ ᐱᕋᔭᒃᑲᓗᐊᕈᒃᑭᑦ!” 4ᑕᕝᕙᓐᖓᓪᓗ ᓵᒻᓲᓂ ᐊᐅᓪᓚᖅᐳᖅ ᓂᒐᖅᑎᑦᓯᓪᓗᓂᓗ 300ᓂᒃ ᑎᕆᒐᓂᐊᓂᒃ, ᑖᒃᑯᐊ ᓇᒃᓴᖅᐰᑦ ᑎᒍᓯᓪᓗᓂ ᕿᔪᖕᓂᒃ ᓇᓂᕈᐊᓂᒃ, ᑎᕆᒐᓂᐊᓪᓗ ᒪᕐᕉᓈᖅᑎᖅᓗᒋᑦ ᐸᒥᐅᖏᑦ ᕿᓚᒃᓱᖅᐰᑦ, ᐸᒥᐅᖓᑕᓗ ᐊᑯᓐᓂᖏᑎᒍᑦ ᕿᔪᐃᑦ ᕿᓚᒃᓱᖅᓗᒋᑦ. 5ᕿᔪᐃᓪᓗ ᐃᑭᑎᓐᓇᒥᒋᑦ ᑎᕆᒐᓂᐊᑦ ᐊᐅᓪᓚᖅᑎᑉᐰᑦ ᐱᓕᔅᑍᓂᒥᐅᑦ ᓂᐊᖂᔭᒃᓴᖁᑎᖏᓐᓄᑦ ᒪᑭᑕᔪᓄᑦ, ᓂᐊᖂᔭᒃᓮᓪᓗ ᑲᑎᖅᓱᖅᓯᒪᔪᑦ ᒪᑭᑕᔪᓪᓗ ᐃᑯᐊᓪᓚᒃᐳᑦ, ᓇᐹᖅᑐᐃᓪᓗ ᐅᖅᓱᒃᓴᓖᑦ ᐱᖃᓯᐅᑎᓪᓗᒋᑦ. 6ᐱᓕᔅᑍᓂᒥᐅᑦ ᐅᖃᓕᖅᐳᑦ, “ᑭᓇᐅᑉ ᒪᓐᓇ ᐱᓂᐊᕐᖕᓂᖔ?” ᑭᐅᔭᐅᕗᑦ, “ᓵᒻᓲᓂᐅᑉ, ᑎᒻᓁᑎᐅᑉ ᓂᖓᐅᖓᑕ, ᓄᓕᐊᖓ ᑐᓂᓚᐅᕐᖕᒪᒍ ᐱᖃᑎᖓᓄᑦ.” ᑍᒤᒻᒪᑦ ᐱᓕᔅᑍᓂᒥᐅᑦ ᑖᑦᓱᒧᖓ ᐂᕗᑦ ᐊᕐᖕᓇᕐᓗ ᐊᑖᑕᖓᓗ ᐃᑯᐊᓪᓚᒡᓗᒋᑦ. 7ᓵᒻᓲᓂᐅᑉ ᐅᖃᐅᑎᕔᑦ, “ᑍᒤᓕᐅᕈᑦᓯ, ᓴᖑᑎᓐᓂᐊᓐᖏᑕᓐᓂᒃ ᐊᖏᖅᐳᖓ ᐊᑭᒋᐊᓛᖅᐸᑦᓯ, ᑭᖑᓂᐊᒍᓪᓗ ᓄᖅᑲᓛᖅᐳᖓ.” 8ᑍᒤᒻᒪᑦ ᑐᖁᕋᖅᐰᑦ ᓂᑲᒍᓱᒐᓂ ᐅᓄᖅᑐᐊᓗᐃᑦ ᑐᖁᓪᓗᓂᒋᑦ, ᑭᖑᓂᐊᒍᑦ ᕾᕈᓱᖕᒧᐊᖅᐳᖅ ᐄᑖᒻᒦᑦᑐᒧᑦ ᕾᖅᑐᒧᑦ ᑕᕝᕙᓂᓗ ᐃᓂᖃᓕᖅᓗᓂ.
ᓵᒻᓲᓂᐅᑉ ᓵᓚᖃᕐᖕᓂᖓ ᐱᓕᔅᑍᓂᒥᐅᓂᒃ
9ᐱᓕᔅᑍᓂᒥᐅᓪᓗ ᐅᓇᑕᕆᐊᓚᐅᖅᐳᑦ ᑕᑉᐸᐅᖓ ᑕᖕᒫᖅᓗᑎᒡᓗ ᔫᑕᒥ, ᑲᑎᓪᓗᑎᒃ ᐅᓇᑕᕆᐊᖅᐳᑦ ᓕᕼᐃᒥᒃ. 10ᔫᑕᐅᓪᓗ ᐃᓄᖏᑦ ᐅᖃᖅᐳᑦ, “ᖃᓄᐃᒻᒪᑦ ᐅᕙᑦᑎᓐᓂᒃ ᐅᓇᑕᕆᐊᖅᐱᓰ?” ᑖᒃᑯᐊ ᐅᖃᖅᐳᑦ, “ᓵᒻᓲᓂ ᕿᓚᒃᓱᖅᓗᒍ ᑎᒍᔭᖅᑐᖅᐸᕗᑦ, ᐅᕙᑦᑎᓐᓄᑦ ᐱᓂᐊᕐᖕᓂᕆᓚᐅᑕᖓ ᒪᓕᒡᓗᒍ ᐱᓂᐊᕐᕕᒋᔪᒪᒐᑦᑎᒍ.” 11ᑕᕝᕙ ᔫᑕᐅᑉ ᐃᓄᖏᑦ 3,000ᓴᐃᑦ ᐃᑖᒻᒧᑦ ᕾᖅᑐᒧᑦ ᐂᕗᑦ, ᓵᒻᓲᓂᓗ ᐅᖃᐅᑎᓪᓗᒍ, “ᖃᐅᔨᒪᓐᖏᓚᑏᑦ ᐱᓕᔅᑍᓂᒥᐅᓄᑦ ᐊᐅᓚᑕᐅᒐᑦᑖ? ᖃᓄᐃᓕᐅᓚᐅᕐᖕᓃᑦ ᐅᕙᑦᑎᓐᓄᑦ ᑎᑭᒻᒪᑦ?” ᐅᖃᐅᑎᕔᑦ, “ᐅᕙᓐᓄᑦ ᐱᓂᐊᕐᖕᓂᕆᓚᐅᖅᑕᖏᑦ ᒪᓕᒡᓗᒋᑦ ᐱᓂᐊᕐᕕᒋᓚᐅᖅᐸᒃᑲ.” 12ᐅᖃᐅᑎᕚᑦ, “ᐃᓕᖕᓂᒃ ᕿᓚᒃᓱᐃᓗᑕ ᑎᒍᓯᔭᖅᑐᖅᐳᒍᑦ, ᑐᓂᓂᐊᕋᑦᑎᒋᑦ ᐱᓕᔅᑍᓂᒥᐅᓄᑦ.” ᓵᒻᓲᓂᐅᑉ ᐅᖃᐅᑎᕔᑦ, “ᐊᖏᕐᕕᒋᓯᓐᖓ ᐅᕙᓐᓂᒃ ᑐᖁᑦᓯᓂᐊᖏᓐᓂᕋᖅᓗᓯ.” 13ᐅᖃᐅᑎᕚᑦ, “ᑐᖁᓐᓂᐊᓐᖏᓚᑦᑎᒋᑦ ᕿᓚᒃᓱᑐᐃᓐᓇᕐᖕᓂᐊᖅᐸᑦᑎᒋᑦ ᑐᓂᓗᑎᓪᓗ ᑍᒃᑯᓄᖓ, ᐃᓕᖕᓂᒃ ᑐᖁᑦᓯᓂᐊᓐᖏᓚᒍᑦ.” ᑕᕝᕙ ᕿᓚᒃᓱᖅᐹᑦ ᐊᒃᓗᓈᓄᑦ ᓄᑖᓄᑦ ᐊᐅᓪᓚᕈᑎᓪᓗᒍᓗ ᑕᕝᕙᓐᖓᑦ. 14ᓕᕼᐃᒧᐊᕋᒥᒃ ᐱᓕᔅᑍᓂᒥᐅᑦ ᐅᐸᒃᐹᑦ ᕾᒐᓛᖅᓗᑎᒃ; ᑕᕝᕙ ᐊᑕᓂᐅᑉ ᐊᓂᕐᖕᓂᖓᑕ ᐱᔪᓐᓇᕐᖕᓂᕐᔪᐊᖃᖅᓗᓂ ᑎᑭᑉᐹ, ᐊᒃᓗᓈᓪᓗ ᑕᓕᖏᖕᓂ ᕿᓚᒃᓱᖅᓯᒪᔪᑦ ᐃᕕᒃᑎᑐᑦ ᐃᑯᐊᓪᓚᒃᑕᐅᔪᑐᑦ ᑍᒤᓕᖅᐳᑦ, ᕿᓚᕈᑎᖏᑦ ᐊᐅᒃᓗᑎᒃ ᑕᓕᖏᖕᓂ. 15ᓇᓂᓯᕗᖅ ᓯᐅᑎᖅᑯᖅᑐᔫᑉ ᐊᒡᓕᕈᐊᓂᒃ ᓄᑖᕕᓂᕐᖕᒥᒃ, ᑎᒍᕚᓗ ᑐᖁᑦᓯᓪᓗᓂ ᑖᑦᓱᒧᖓ ᐊᖑᑎᓂᒃ 1,000ᓂᒃ. 16ᓵᒻᓲᓂ ᐅᖃᖅᐳᖅ, “ᓯᐅᑎᖅᑯᖅᑐᔫᑉ ᐊᒡᓕᕈᐊᓄᑦ ᖃᓕᕇᑦ ᖃᓕᕇᓕᖅᐳᑦ, ᓯᐅᑎᖅᑯᖅᑐᔫᑉ ᐊᒡᓕᕈᐊᓄᑦ ᑐᖁᑦᓯᕗᖓ ᐊᖑᑎᓂᒃ 1,000ᓂᒃ!” 17ᐅᖃᕇᕋᒥᓗ, ᐊᒡᓕᕈᖅ ᐃᒋᑉᐹ, ᓄᓇᓗ ᑍᔭᐅᓕᖅᐳᖅ ᕌᒪᑎ-ᓕᕼᐃᒥᒃ. 18ᓵᒻᓲᓂᓕ ᐃᒥᕈᖕᓂᕐᖕᒧᑦ ᖀᓕᖅᐳᖅ, ᐊᑕᓂᕐᖕᒧᓪᓗ ᐅᖃᖅᐳᖅ, “ᐊᖏᔪᒥᒃ ᓵᓚᖃᖅᑎᓚᐅᖅᐸᕐᖕᒪ, ᒫᓐᓇᓕ ᑐᖁᓂᐊᓕᖅᐳᖓ ᐃᒥᕈᖕᓂᕐᖕᒧᑦ, ᑐᖁᔪᒃᓴᐅᕗᖔ ᑭᐱᔭᐅᓯᒪᖏᑦᑐᑦ ᐊᒡᒐᖏᓐᓅᑦ?” 19ᒎᑎ ᓄᓇᒥᒃ ᐃᑎᖅᓴᒥᒃ ᖁᐱᓯᕗᖅ ᓖᕼᐃᒥ, ᑕᕝᕙᓐᖓᓪᓗ ᐃᒥᖅ ᑯᕕᓕᖅᐳᖅ, ᐃᒥᕋᒥᓗ ᓄᑭᖃᑦᓯᐊᓕᖅᐳᖅ, ᖃᓄᐃᑦᑐᓐᓃᖅᓗᓂᓗ. ᑖᓐᓇᓗ ᐊᑦᓯᖅᐹ ᐃᓐ-ᕼᐊᑯᐊᕆᒥᒃ, ᓕᕼᐃᒦᑦᑐᖅ ᓱᓕ ᐅᓪᓗᒥᒧᑦ. 20ᓵᒻᓲᓂ ᓯᕗᓕᖅᑎᐅᓚᐅᖅᐳᖅ ᐊᕐᕌᒍᓂᒃ 20ᓂᒃ ᐱᓕᔅᑍᓂᒥᐅᑦ ᐅᓪᓗᖏᓐᓂ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 15: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
