ᐃᓗᐊᖅᓮᔩᑦ ᐊᒡᓚᖏᑦ 14
14
ᓵᒻᓲᓂ ᐊᕐᖕᓇᕐᓗ ᑎᒻᓇᒥᐅᑕᖅ
1ᐅᓪᓗᐃᑦ ᐃᓚᖓᓐᓂ ᓵᒻᓲᓂ ᑕᐅᓄᖓ ᑎᒻᓇᓕᐊᖅᐳᖅ, ᑎᒻᓇᒥᓗ ᑕᑯᓪᓗᓂ ᐱᓕᔅᑍᓂᒥᐅᑦ ᐊᕐᖕᓇᖏᑕ ᐃᓚᖓᓐᓂᒃ. 2ᐊᖏᕐᕋᕋᒥᓗ ᐊᑖᑕᓂᓗ ᐊᓈᓇᓂᓗ ᐅᖃᐅᑎᕔᑦ, “ᐱᓕᔅᑍᓂᒥᐅᒥᒃ ᐊᕐᖕᓇᖅᑕᖃᖅᐳᖅ ᑎᒻᓇᒥ ᑕᑯᔭᓐᓂᒃ. ᐂᓚᐅᖅᓯᒃᑯᒃ ᓄᓕᐊᖅᑖᕆᓂᐊᕋᒃᑯ.”
3ᐊᑖᑕᖓᑕᓗ ᐊᓈᓇᖓᑕᓗ ᐊᐱᕆᕚ, “ᓇᓂᓯᓐᖏᓚᑏᑦ ᐊᕐᖕᓇᒥᒃ ᐃᓚᕕᑦ ᐸᓂᖏᓐᓂᑦ, ᐃᓅᖃᑎᑦᑎᓐᓂᒡᓘᓐᓃᑦ ᓇᓪᓕᐊᓐᓂᑦ? ᑍᒫᒃ ᑭᐱᓯᒪᖏᑦᑐᓂᑦ ᐱᓕᔅᑍᓂᒥᐅᑕᕐᖕᓂᑦ ᓄᓕᐊᓂᒋᐊᖃᖅᐲᑦ?”
ᓵᒻᓲᓂᐅᓪᓕ ᐊᑖᑕᓂ ᐅᖃᐅᑎᕚ, “ᑍᓐᓇ ᐊᕐᖕᓇᖅ ᐂᓚᐅᕈᒃ ᐱᐅᒋᒐᒃᑯ.”
4ᐊᑖᑕᖓᓕ ᐊᓈᓇᖓᓗ ᖃᐅᔨᒪᓚᐅᓐᖏᓚᒃ ᐊᑕᓂᕐᖕᒥᑦ ᑕᒪᓐᓇ ᐱᖕᒪᖔᑦ; ᑍᒤᑎᑦᓯᓚᐅᕐᖕᒪᑦ ᐱᕕᒃᓴᓕᐅᖅᓗᓂ ᐱᓕᔅᑍᓂᒥᐅᓂᒃ ᐊᑭᓂᐊᕈᑎᒃᓴᒧᑦ. ᑍᑦᓱᒪᓂ ᐱᓕᔅᑍᓂᒥᐅᑦ ᐊᐅᓚᑦᓯᓚᐅᕐᖕᒪᑕ ᐃᓴᕆᐊᓕᒥᐅᓂᒃ.
5ᓵᒻᓲᓂ ᑕᐅᓄᓐᖓᓚᐅᖅᐳᖅ ᑎᒻᓇᒧᑦ ᐊᑖᑕᓂᓗ ᐊᓈᓇᓂᓗ ᐱᖃᑎᒋᓪᓗᒋᒃ ᑍᑯᓐᖓᐅᓪᓗᑎᒃ ᐱᕈᖅᓰᕕᒃᑰᓚᐅᖅᐳᑦ ᑎᒻᓇᒥ, ᑐᓵᓕᖅᐳᕐᓗ ᐱᕈᕋᑖᒥᒃ ᓛᔭᒥᒃ ᓂᓪᓕᐊᔪᒥᒃ. 6ᑕᕝᕔᓐᓇᖅ ᐊᑕᓂᐅᑉ ᐊᓂᕐᖕᓂᖓᑕ ᐱᔪᓐᓇᕐᖕᓂᕐᔪᐊᖃᖅᓗᓂ ᑎᑭᑉᐹ, ᓛᔭᓗ ᐊᓕᒃᑐᖅᓗᒍ ᓲᕐᓗ ᒎᑦᓯᐅᑉ ᓄᕐᕋᖏᑦ ᐊᓕᒃᑐᖅᑕᐅᕙᖕᒪᑕ; ᓱᓇᒥᒃ ᑎᒍᒥᐊᓚᐅᓐᖏᓚᖅ, ᐊᑖᑕᓂᓕ ᐊᓈᓇᓂᓗ ᐱᓂᐊᕐᖕᓂᕐᖕᒥᓂᒃ ᐅᖃᐅᑎᓚᐅᓐᖏᓛᒃ.
7ᑕᐅᓄᖓᓗ ᐂᓚᐅᖅᐳᖅ ᐊᕐᖕᓇᒧᑦ ᐅᖃᖃᑎᒋᓪᓗᒍᓗ, ᑖᑦᓱᒪᓗ ᓵᒻᓲᓂ ᖁᕕᐊᓱᒃᑎᑉᐹ. 8ᑭᖑᓂᖓᒍᓪᓕ ᓵᒻᓲᓂ ᐅᑎᖅᐳᖅ ᐂᓕᖅᓗᒍ; ᑍᑯᖓᓗ ᐂᓕᖅᓗᓂ ᐊᖅᑯᑎᐅᑉ ᓯᓚᑖᓄᐊᖅᐳᖅ ᑕᑯᔭᖅᑐᖅᓗᓂ ᓛᔭᒥᒃ ᑐᖁᓚᐅᖅᑕᒥᓂᒃ, ᑕᑯᓪᓗᓂᓗ ᑲᑎᓐᖓᔪᓂᒃ ᐃᒍᑦᓴᕐᖕᓂᒃ ᓛᔭᐅᑉ ᑐᖁᖓᔫᑉ ᑎᒥᖓᑕ ᐃᓗᐊᓃᑦᑐᓂᒃ, ᕼᐊᓂᒥᒡᓗ. 9ᕼᐊᓂᒥᒡᓗ ᐊᒡᒐᖕᒥᓄᑦ ᖃᓗᓯᕗᖅ ᓂᕆᓕᖅᓗᒍᓗ ᐱᓱᒡᓗᓂ. ᐊᑖᑕᒥᓄᐊᕋᒥ ᐊᓈᓇᒥᓄᓪᓗ, ᐂᑦᑐᖅᐹᒃ ᓂᕆᓪᓗᑎᒡᓗ, ᐅᖃᐅᑎᓇᒋᒃ ᕼᐊᓂ ᓛᔭᐅᑉ ᑐᖁᖓᔫᑉ ᑎᒥᖓᓂᑦ ᐱᓚᐅᕐᖕᒪᖔᕐᖕᒥᐅᒃ.
10ᐊᑖᑕᖓᓗ ᐊᕐᖕᓇᐅᑉ ᐃᒡᓗᖓᓄᐊᓚᐅᖅᐳᖅ, ᓵᒻᓲᓂᓗ ᓂᕆᕕᒃᔪᐊᖅᑎᑦᓯᓚᐅᖅᐳᖅ ᑍᑲᓂ; ᑍᒫᒃ ᐅᕕᒃᑬᑦ ᐊᖑᑏᑦ ᐱᐅᓯᖃᓚᐅᕐᖕᒪᑕ. 11ᐃᓄᐃᓪᓗ ᑕᑯᒐᒥᑦᔪᒃ, ᑎᓕᓯᓚᐅᖅᐳᑦ ᐅᕕᒃᑲᓂᒃ ᐊᖑᑎᓂᒃ 30ᓂᒃ ᓇᔪᖅᑎᒋᓂᐊᖅᑕᖏᓐᓂᒃ. 12ᓵᒻᓲᓂᐅᑉ ᐅᖃᐅᑎᕔᑦ, “ᐅᖃᐅᑎᓚᐅᖅᓚᑦᓯ ᐅᖃᓐᖑᐊᕈᓯᕐᖕᒥᒃ; ᑐᑭᖓ ᖃᐅᔨᔪᓐᓇᕈᑦᓯᐅᒃ ᐅᖃᐅᑎᓗᖓ, ᑐᑭᖓ ᖃᐅᔨᒍᑦᓯᐅᒃ, ᓂᕆᕕᒃᔪᐊᕐᖕᓂᑦᑕ ᐅᓪᓗᐃᑦ ᐊᑯᓐᓂᖓᓂ, ᑐᓂᓂᐊᖅᐸᑦᓯ ᐃᓘᓐᓇᓯ ᖃᓪᓗᓈᖅᑕᑦᓯᐊᓂᒃ 30ᓂᒃ ᐊᓐᓄᕌᓂᒃ 30ᓂᒡᓗ ᐊᓐᓄᕌᓂᒃ ᓂᕆᕕᒃᔪᐊᖅᑐᖅᓯᐅᑎᓂᒃ. 13ᖃᓄᕐᓕ ᑐᑭᖃᕐᖕᒪᖔᑦ ᐅᖃᐅᑎᔪᓐᓇᖏᒃᑯᑦᓯᓐᖓ, ᑕᕝᕙ ᐅᕙᓐᓄᑦ ᑐᓂᓯᔭᕆᐊᖃᕐᖕᓂᐊᖅᐳᓯ ᖃᓪᓗᓈᖅᑕᑦᓯᐊᓂᒃ 30ᓂᒃ ᐊᓐᓄᕌᓂᒡᓗ 30ᓂᒃ ᓂᕆᕕᒡᔪᐊᖅᑐᖅᓯᐅᑎᓂᒃ.”
ᑕᕝᕙ ᐅᖃᐅᑎᕚᑦ, “ᐅᖃᓐᖑᐊᕈᓯᕐᖕᒥᒃ ᐅᖃᐅᑎᓚᐅᖅᑎᒍᑦ, ᑐᓴᕐᖕᓂᐊᕋᑦᑎᒍ.”
14ᑕᕝᕙ ᐅᖃᐅᑎᕔᑦ,
“ᓂᕆᔨᒥᑦ ᓂᕆᔭᒃᓴᖅ ᓴᖅᑭᑉᐳᖅ;
ᓴᓐᖏᔪᒥᑦ ᓰᕐᖕᓇᖅᑐᖅ#14:14 ᓰᕐᖕᓇᖅᑐᖅ ᐅᕝᕙᓗ ᒪᒪᖅᑐᖅ ᓴᖅᑭᑉᐳᖅ.”
ᐅᓪᓗᐃᑦ ᐱᖓᓱᑦ ᓈᑎᓪᓗᒋᑦ ᓱᓕ ᐅᖃᓐᖑᐊᕈᓯᐅᑉ ᑐᑭᖓᓂᒃ ᖃᐅᔨᓚᐅᓐᖏᓚᑦ.
15ᐅᓪᓗᐃᑦ 7ᖓᓐᓂ ᐅᖃᓚᐅᖅᐳᑦ ᓵᒻᓲᓂᐅᑉ ᓄᓕᐊᖓᓄᑦ, “ᐅᐃᑦ ᓯᓔᕐᕆᓗᒍ ᐅᖃᐅᑎᓚᐅᕈᒃ ᐅᖃᖑᐊᕈᓯᐅᑉ ᑐᑭᖓᓂ. ᑍᒤᓕᐅᖏᒃᑯᕕᑦ, ᐊᑖᑕᕕᑦ ᐃᓪᓗᖓ ᐃᑯᐊᓪᓚᖕᓂᐊᖅᐸᕗᑦ ᐃᑯᐊᓪᓚᖃᑕᐅᓗᑎᑦ, ᕾᖁᔨᓚᐅᖅᐱᓰᒃ ᑎᒡᓕᒍᒪᓪᓗᓯᒃ ᐅᕙᑦᑎᓐᓂᑦ?”
16ᓵᒻᓲᓂᐅᑉ ᓄᓕᐊᖓ ᓵᖓᓂ ᕿᐊᓪᓗᓂ ᐅᖃᐅᑎᕚ, “ᐆᒥᒋᒐᕕᖓ ᓇᒡᓕᒋᓇᖓ; ᓄᓇᖅᑲᑎᒃᑲ ᐅᖃᓐᖑᐊᕈᓯᕐᖕᒥᒃ ᐅᖃᐅᑎᓚᐅᖅᐸᑎᑦ ᑐᑭᖓᓂᒡᓘᓐᓃᑦ ᐅᖃᐅᑎᓚᐅᖏᓐᓇᕕᖓ!”
ᑕᕝᕙ ᐅᖃᐅᑎᕚ, “ᑕᑯᒋᑦ, ᐊᑖᑕᒐᓘᓐᓃ ᐊᓈᓇᒐᓘᓐᓃᑦ ᐅᖃᐅᑎᓚᐅᓐᖏᓚᒃᑲ, ᓱᖕᒪᓪᓕ ᐅᖃᐅᑎᔭᕆᐊᖃᖅᐸᒌᑦ?” 17ᕿᐊᑦᔪᑎᒋᓚᐅᖅᐹᓕ ᐅᓪᓗᓂᒃ 7ᓂᒃ ᓂᕆᕕᒃᔪᐊᕐᖕᓇᐅᑎᓪᓗᒍ. ᐅᓪᓗᐃᓪᓕ 7ᖓᓂ ᐅᖃᐅᑎᓚᐅᖅᐹ ᐅᖃᓐᖑᐊᕈᓯᐅᑉ ᑐᑭᖓᓂᒃ, ᐊᒃᓱᕉᑎᓚᐅᕐᖕᒪᒍ ᑍᒪᓐᖓᑦ, ᐊᕐᖕᓇᐅᑉ ᓄᓇᖃᑎᓂ ᐅᖃᐅᑎᓚᐅᖅᐰᑦ. 18ᐊᖑᑎᓪᓗ ᐃᒡᓗᒐᓴᒡᔪᐊᕐᖕᒥᐅᑦ ᐅᖃᐅᑎᓚᐅᖅᐹᑦ ᐅᓪᓗᐃᑦ 7ᖓᓂ, ᓯᕿᓂᖅ ᓂᐱᓚᐅᖅᑎᓐᓇᒍ ᓱᓕ,
“ᓱᓈ ᓯᕐᖕᓇᕐᖕᓂᖅᓴᐅᕙ ᕼᐊᓂᒥᑦ?
ᓱᓇᓘ ᓴᓐᖏᓂᖅᓴᐅᕙ ᓛᔭᒥᑦ?”
ᓵᒻᓲᓂᐅᑉ ᐅᖃᐅᑎᕔᑦ,
“ᐃᒧᒃᓯᐅᒐᖁᑎᓐᓂᒃ ᑲᒪᓚᐅᖏᒃᑯᑦᓯ,
ᖃᐅᔨᒪᒐᔭᓐᖏᓚᓯ ᐅᖃᓐᖑᐊᕈᓯᕐᖕᒪ ᑐᑭᖓᓂᒃ.”
19ᑕᕝᕔᓐᓇᖅ ᐊᑕᓂᐅᑉ ᐊᓂᕐᖕᓂᖓᑕ ᐱᔪᓐᓇᖅᑐᕐᔪᐊᖑᓪᓗᓂ ᑎᑭᑉᐹ, ᑕᐅᓄᖓᓗ ᐂᕗᖅ ᐊᓯᑭᓗᓂᒧᑦ, ᑕᕝᕙᓂᓗ ᐊᖑᑎᓂᒃ 30ᓂᒃ ᐃᒡᓗᒐᓴᒡᔪᐊᕐᖕᒥᐅᓂᒃ ᑐᖁᑦᓯᓪᓗᓂ, ᐊᓐᓄᕅᔭᖅᐰᑦ, ᐊᓐᓄᕌᓪᓗ ᑐᓂᓪᓗᒋᑦ ᐊᖑᑎᓄᑦ ᐅᖃᓐᖑᐊᕈᓯᐅᑉ ᑐᑭᖓᓂᒃ ᓇᓚᐅᑦᓯᓚᐅᖅᑐᓄᑦ. ᐊᒃᓱᐊᓗᒃ ᓂᓐᖓᐅᒪᓪᓗᓂ ᐊᑖᑕᒥ ᐃᒡᓗᖓᓄᑦ ᐅᑎᖅᐳᖅ. 20ᓵᒻᓲᓂᐅᓪᓗ ᓄᓕᐊᖓ ᑐᓂᔭᐅᕗᖅ ᐊᖑᒻᒧᑦ ᐃᓚᒋᓚᐅᖅᑕᖓᓄᑦ ᑲᑎᑎᑕᐅᓪᓗᓂ ᓵᒻᓲᓂᐅᑉ ᐊᖑᑎᖁᑎᒋᓚᐅᖅᑕᖓᓄᑦ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 14: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
