ᐃᓗᐊᖅᓮᔩᑦ ᐊᒡᓚᖏᑦ 13
13
ᓵᒻᓲᓂᐅᑉ ᐃᕐᖕᓂᐊᖑᓂᖓ
1ᓱᓕ ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔪᐊᑦ ᐊᔪᖅᑐᓕᓚᐅᖅᐳᑦ ᐊᑕᓂᐅᑉ ᑕᒃᑯᐊᓂ, ᐊᑕᓂᐅᓪᓗ ᑐᓂᓚᐅᖅᐰᑦ ᐱᓕᔅᑍᓂᒥᐅᓄᑦ ᐊᕐᕌᒍᓄᑦ 40ᓄᑦ. 2ᐊᖑᑎᑕᖃᓚᐅᖅᐳᖅ ᔫᕋᒥᐅᑕᕐᖕᒥᒃ, ᑖᓐ ᑭᖑᕚᖓᓂᒃ, ᒪᓄᐊᒥᒃ ᐊᑎᓕᖕᒥᒃ ᓄᓕᐊᖓᓗ ᕿᑐᕐᖏᓱᐃᑦᑑᓚᐅᖅᐳᖅ. 3ᐊᑕᓂᐅᑉ ᐂᖏᓕᖓ ᐊᕐᖕᓇᒧᑦ ᓴᖅᑭᑉᐳᖅ ᐅᖃᐅᑎᓪᓗᒍᓗ, “ᒫᓐᓇ ᕿᑐᕐᖏᓱᐃᑦᑑᒐᓗᐊᖅᑐᑎᑦ ᕿᑐᕐᖓᖃᕋᑎᓪᓗ, ᓯᖎᓕᕐᖕᓂᐊᖅᐳᑎᓪᓕ ᐃᕐᖕᓂᖅᑖᖅᓗᑎᓪᓗ. 4ᒫᓐᓇᓕ, ᖃᐅᔨᓴᑦᓯᐊᕐᖕᓂᐊᖅᐳᑎᑦ ᐃᒥᖅᑍᓕᓗᑎᑦ ᕔᓂᒥᒃ ᓴᓐᖏᓂᖅᓴᒥᒡᓘᓐᓃᑦ, ᓂᕆᔪᒃᓴᐅᓐᖏᓚᑎᓪᓗ ᓴᓗᒤᑦᑐᓂᒃ. 5#ᒨᓯᓯ ᓯᑕᒪᖏᑦ 6:1-5.ᑕᑯᒋᑦ ᐃᕐᖕᓂᕐᖕᒥᒃ ᐃᕐᖕᓂᔪᒫᖅᐳᑎᑦ, ᑭᑦᔭᐅᑎᒧᓪᓘᓐᓃᑦ ᓂᐊᖁᐊ ᐊᒃᑐᖅᑕᐅᔪᒫᓐᖏᓚᖅ, ᓱᕈᓯᐅᓂᕐᖕᒥᓂᑦ ᓈᓴᕅᑎᐅᓛᕐᖕᒪᑦ ᒎᑎᒧᑦ ᐃᕐᖕᓂᐊᖑᓂᕐᖕᒥᓂᑦ ᐱᓗᓂ; ᑖᑦᓱᒪᓗ ᐃᓴᕆᐊᓕᒥᐅᑦ ᓴᐳᑎᔪᒫᖅᐰᑦ ᐱᓕᔅᑍᓂᒥᐅᓂᑦ.”
6ᑍᒤᒻᒪᑦ ᐊᕐᖕᓇᐅᑉ ᐅᐃᓂ ᐅᖃᐅᑎᔭᖅᑐᖅᐹ, ᐅᖃᖅᓗᓂᓗ, “ᐊᖑᑎᒥᒃ ᒎᑎᒥᑦ ᐱᔪᒥᒃ ᕾᔪᖃᓚᐅᖅᐳᖅ ᐅᕙᓐᓄᑦ, ᑕᐅᑦᑐᐊᓗ ᐂᖏᓕᑐᑦ ᒎᑎᒥᑦ ᐱᔪᑐᑦ ᑍᒤᓪᓗᓂ, ᑲᒪᓇᖅᑑᓪᓗᓂ; ᐊᐱᕆᓚᐅᓐᖏᓚᕋᓕ ᓇᑭᑦ ᐱᖕᒪᖔᑦ, ᐊᑎᕐᖕᒥᓂᒡᓗ ᐅᖃᐅᑎᓚᐅᓐᖏᓛᖓ. 7ᐅᖃᐅᑎᓚᐅᖅᐹᖓᓕ, ‘ᑕᑯᒋᑦ, ᓯᖎᓕᕈᒫᖅᐳᑎᑦ ᐃᕐᖕᓂᖅᑖᖅᓗᑎᓪᓗ, ᕔᓂᑐᖃᑦᑕᕐᖕᓂᐊᓐᖏᓚᑎᑦ ᓴᓐᖏᓂᖅᓴᒥᒡᓘᓐᓃᑦ, ᓂᕆᓂᐊᕐᖕᓇᒡᓗ ᓴᓗᒤᑦᑐᒥᒃ, ᑖᓐᓇ ᓱᕈᓯᖅ ᓈᓴᕅᑎᐅᓂᐊᕐᖕᒪᑦ ᒎᑎᒧᑦ ᐃᓅᓕᕐᖕᓂᕐᖕᒥᓂᑦ ᑐᖁᓂᖓᑕ ᐅᓪᓗᖅ ᑎᑭᓪᓗᒍ.’” 8ᑭᖑᓂᖓᒍᑦ ᒪᓄᐊ ᑐᒃᓯᐊᓚᐅᖅᐳᖅ ᐊᑕᓂᕐᖕᒧᑦ, ᐅᖃᖅᓗᓂ, “ᐊᑕᓃᖅ, ᐊᖑᑦ ᑍᓐᓇ ᒎᑎᒥᓐᖔᖅᑐᖅ ᑎᓕᓚᐅᖅᑍᑦ ᕾᑎᒃᑲᓐᓂᓚᐅᕈᒃ, ᐃᓕᓐᓂᐊᖅᑎᑦᓯᖁᓪᓗᒍ ᖃᓄᐃᓕᐅᖅᑐᒃᓴᐅᓂᑦᑎᓐᓂᒃ ᓱᕈᓯᕐᖕᒧᑦ ᐃᓅᓂᐊᖅᑐᒧᑦ.” 9ᒎᑎᐅᓪᓗ ᒪᓄᐊᑉ ᓂᐱᖓ ᓈᓚᓚᐅᖅᐹ, ᒎᑎᐅᓪᓗ ᐂᖏᓕᖓ ᐊᕐᖕᓇᒧᐊᓚᐅᕆᕗᖅ ᐃᒃᓯᕚᖅᑎᓪᓗᒍ ᐱᕈᖅᓰᕕᖕᒥ; ᒪᓄᐊᓕ ᐅᐃᓂ ᐱᖃᑎᒋᓚᐅᓐᖏᓛ. 10ᐊᕐᖕᓇᕐᓕ ᑐᐊᕕᖅᓗᓂ ᐅᓪᓚᒃᓯᓚᐅᖅᐳᖅ ᐅᐃᒥᓄᑦ ᐅᖃᕆᐊᖅᑐᖅᓗᓂ, ᐅᖃᐅᑎᓪᓗᒍᓗ, “ᑕᑯᒋᑦ ᐊᖑᑦ ᑍᓐᓇ ᕾᓚᐅᖅᑐᖅ ᑍᑦᓱᒪᓂ ᒫᓐᓇ ᓴᖅᑭᒃᑭᕗᖅ ᐅᕙᓐᓄᑦ!” 11ᐊᓱᐃᓛᒃ ᒪᓄᐊ ᓂᑯᕕᓪᓗᓂ ᓄᓕᐊᒥᓂᒃ ᒪᓕᒃᐳᖅ, ᐊᖑᒻᒧᐊᕋᒥᒡᓗ ᐅᖃᐅᑎᕚ, “ᑖᓐᓇᐅᕖᑦ ᐊᖑᑦ ᐅᖃᓚᐅᖅᑐᖅ ᐊᕐᖕᓇᒧᑦ ᐆᒧᖔ?” ᑖᓐᓇ ᐅᖃᖅᐳᖅ, “ᑖᓐᓇᐅᕗᖓ.” 12ᒪᓄᐊ ᐅᖃᓕᖅᐳᖅ, “ᒪᓐᓇ ᐅᖃᐅᓯᖅᑎᑦ ᓱᓕᓕᖅᓕᑦ! ᓄᑲᑉᐱᐊᑉ ᐃᓅᓯᖓ ᖃᓄᐃᑦᑑᔪᒫᖅᐹ, ᓱᓇᒥᒡᓗ ᐱᓇᓱᐊᒐᖃᕈᒫᖅᐹ?” 13ᐊᑕᓂᐅᓪᓗ ᐂᖏᓕᖓ ᐅᖃᖅᐳᖅ ᒪᓄᐊᒧᑦ, “ᐅᖃᐅᓯᕆᓚᐅᖅᑕᓕᒫᓐᓂᒃ ᑖᓐᓇ ᐊᕐᖕᓇᖅ ᐃᒃᐱᒍᓱᑦᓯᐊᕐᓕ. 14ᓂᕆᔪᒃᓴᐅᓐᖏᓚᖅ ᓇᐹᖅᑐᒥᑦ ᕔᓂᒃᓴᒥᑦ ᐱᔪᓂᒃ, ᐃᒥᖅᑐᒃᓴᐅᓇᓂᓗ ᕔᓂᒥᒃ ᓴᓐᖏᔪᒥᒃ, ᓂᕆᔪᒃᓴᐅᓐᖏᓚᕐᓗ ᓴᓗᒤᑦᑐᒥᒃ ᐱᖁᓯᒪᔭᓕᒫᓐᓂᒃ ᒪᓕᑦᓯᐊᖅᑐᒃᓴᐅᕗᖅ.”
15ᒪᓄᐊ ᐅᖃᖅᐳᖅ ᐊᑕᓂᐅᑉ ᐂᖏᓕᖓᓄᑦ, “ᐅᕙᑦᑎᓐᓂᒃ ᐅᑕᖅᑭᑬᓐᓇᕆᑦ, ᓂᕿᓕᐅᕐᖕᓂᐊᕋᑦᑕ ᒎᑦᓯᐅᑉ ᓄᕐᕋᖓᓂᒃ ᐃᓕᖕᓄᑦ.” 16ᐊᑕᓂᐅᑉ ᐂᖏᓕᖓ ᒪᓄᐊᒧᑦ ᐅᖃᖅᐳᖅ, “ᐅᑕᖅᑭᑎᒃᑲᓗᐊᕈᕕᖓ ᓂᕿᖕᓂᒃ ᓂᕆᓂᐊᓐᖏᓚᖓ. ᑐᓂᕐᕈᓯᕈᕕᓪᓕ ᐃᑯᐊᓪᓚᒋᐊᓕᖕᒥᒃ ᐊᑕᓂᕐᖕᒧᑦ ᑐᓂᕐᕈᓯᖅᑐᒃᓴᐅᕗᑎᑦ.” (ᒪᓄᐊ ᖃᐅᔨᒪᓚᐅᖏᒻᒪᑦ ᐊᑕᓂᕐᖕᒧᑦ ᐂᖏᓕᒋᔭᐅᓂᖓᓂᒃ.) 17ᒪᓄᐊ ᐅᖃᓕᖅᐳᖅ ᐊᑕᓂᐅᑉ ᐂᖏᓕᖓᓄᑦ, “ᑭᓇᐅᒐᕖᑦ? ᐅᖃᐅᓯᖅᑎᑦ ᓱᓕᓕᖅᐸᑕ ᐅᐱᒋᓛᕋᑦᑎᒋᑦ.” 18ᐊᑕᓂᐅᓪᓗ ᐂᖏᓕᖓᑕ ᐅᖃᐅᑎᕚ, “ᖃᓄᐃᒻᒪᑦ ᐊᑎᓐᓂᒃ ᐊᐱᖅᓱᖅᐲᑦ, ᑕᑯᔧᑦ ᐱᐅᔪᐊᓘᑎᓪᓗᒎ?” 19ᑍᒤᒻᒪᑦ ᒪᓄᐊ ᒎᑦᓯᐅᑉ ᓄᕐᕋᖓᓂᒃ ᓂᐊᖂᔭᒃᓴᒥᒡᓗ ᑐᓂᕐᕈᓯᓚᐅᖅᐳᖅ ᐊᑕᓂᕐᖕᒧᑦ ᐅᔭᕋᐅᑉ ᖄᖓᓂ, ᑲᒪᓇᖅᑐᓕᓚᐅᖅᐳᕐᓗ ᒪᓄᐊᒃᑯᑦ ᓄᓕᐊᕇᒃ ᑕᑯᓐᓇᖅᑎᓪᓗᒋᒃ. 20ᐃᑯᒪ ᖁᒻᒧᐊᒃᑎᓪᓗᒍ ᕿᓚᖕᒧᑦ ᑐᓂᕐᕈᓯᕐᕕᖕᒥᑦ ᐊᑕᓂᐅᑉ ᐂᖏᓕᖓ ᐃᑯᒪᒧᑦ ᖁᒻᒧᐊᖃᑕᐅᕗᖅ ᑐᓂᕐᕈᓯᕐᕕᐅᑉ ᐃᑯᒪᖓᒍᑦ! ᒪᓄᐊᒃᑯᒃ ᓄᓕᐊᕇᒃ ᑕᒪᑐᒥᖓ ᑕᑯᒐᒥᒃ, ᐹᒻᒪᒃᐴᒃ ᑮᓇᑎᒃ ᒪᓂᖅᑲᒨᑦ ᐊᒃᑐᖅᑎᓪᓗᒋᒃ. 21ᐊᑕᓂᐅᓪᓗ ᐂᖏᓕᖓ ᓴᖅᑭᒃᑲᓐᓂᕈᓐᓃᕐᖕᒪᑦ ᒪᓄᐊᒃᑯᒃ ᓄᓕᐊᕇᒃ, ᖃᐅᔨᓕᖅᐴᒃ ᐊᑕᓂᐅᑉ ᐂᖏᓕᒋᖕᒪᒍ. 22ᒪᓄᐊᓗ ᓄᓕᐊᒥᓄᑦ ᐅᖃᖅᐳᖅ, “ᑐᖁᓂᐊᓕᖅᐳᒍᒃ, ᒎᑎᒥᒃ ᑕᑯᓚᐅᕋᓐᓄᒃ!” 23ᓄᓕᐊᖓᑕᓕ ᐅᖃᐅᑎᕚ, “ᐊᑕᓂᐅᑉ ᑐᖁᑦᓱᒪᒃᐸᑎᒍᒃ, ᐃᑯᒪᒧᑦ ᑐᓂᕐᕈᑎᑦ ᓂᐊᖂᔭᕐᓗ ᓈᒻᒪᒋᒐᔭᕐᖕᓂᓐᖏᓔᑦ ᑐᓂᕐᕈᑎᕗᒃ, ᐅᕝᕙᓘᓐᓃᑦ ᑕᑯᑎᒃᑲᔭᓚᐅᓐᖏᓛᑎᒍᒃ ᑕᒪᒃᑯᓂᖓ, ᐅᕝᕙᓘᓐᓃᑦ ᐅᖃᐅᑎᒐᔭᓚᐅᓐᖏᓛᑎᒍᒃ ᑕᒪᒃᑯᓂᖓ ᒫᓐᓇ.”
24ᐊᕐᖕᓇᕐᓗ ᐃᕐᖕᓂᑖᓚᐅᖅᐳᖅ ᐊᑦᓯᖅᓗᒍᓗ ᓵᒻᓲᓂᒥᒃ, ᓱᕈᓯᕐᓗ ᐱᕈᖅᐸᓪᓕᐊᓚᐅᖅᐳᖅ, ᐊᑕᓂᐅᓪᓗ ᓮᒻᒪᖅᑎᓚᐅᖅᐹ. 25ᐊᑕᓂᐅᓪᓗ ᐊᓂᕐᖕᓂᖓᑕ ᐱᓇᓱᐊᕐᕕᒋᕙᓪᓕᐊᓚᐅᖅᐹ ᒪᕼᐊᓂ ᑖᓐᒥ ᔫᕋᐅᓪᓗ ᐃᔅᑕᐅᓪᓗ ᐊᑯᓐᓂᖓᓂ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 13: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
