ᐃᓗᐊᖅᓮᔩᑦ ᐊᒡᓚᖏᑦ 16

ᓵᒻᓲᓂᒃᑯᒃ ᑎᓔᓚᒃᑯᒃ

1ᓵᒻᓲᓂ ᒑᓴᒧᐊᖅᐳᖅ, ᑍᑲᓂᓗ ᑕᑯᓪᓗᓂ ᐊᕐᖕᓇᒥᒃ ᐊᑐᒐᕐᖕᒥᒃ, ᑖᓐᓇᓗ ᐅᐸᒃᓗᒍ ᐃᓐᓇᖓᖃᑎᒋᕚ. 2ᒑᓴᒥᐅᑦ ᐅᖃᐅᑎᔭᐅᓚᐅᖅᐳᑦ, “ᓵᒻᓲᓂ ᑕᒪᐅᖓ ᑎᑭᑉᐳᖅ!” ᓇᔪᖅᑕᖓ ᐅᖓᓗᕚᑦ ᐃᔨᖅᓯᒪᓪᓗᑎᒡᓗ ᐅᑕᖅᑭᓪᓗᒍ ᐅᓐᓄᐊᓕᒫᖅ ᐃᒡᓗᒐᓮᑦ ᐃᑎᖅᑕᕐᕕᖓᓂ. ᐅᓐᓄᐊᓕᒫᖅ ᓂᐱᖃᓚᐅᓐᖏᓚᑦ, ᐃᒫᒃ ᐅᖃᖃᑦᑕᐅᑎᓪᓗᑎᒃ, “ᐅᓪᓛᒃᑯᑦ ᖃᐅᒻᒪᓕᖅᐸᑦ, ᑐᖁᓐᓂᐊᖅᐸᕗᑦ.” 3ᓵᒻᓲᓂᓗ ᓇᓚᕗᖅ ᐅᓐᓄᐊᑉ ᕿᑎᕋᓕᕐᖕᓂᖓ ᑎᑭᓪᓗᒍ, ᒪᑭᓐᓇᒥᓗ ᐅᓐᓄᐊᒃᑯᑦ ᕿᑎᕋᓕᖅᑎᓪᓗᒍ, ᐃᒡᓗᖓᓮᑦ ᐃᑎᖅᑕᕐᕕᖓᑕ ᐅᒃᑯᐊᖓ ᑎᒍᕚ ᐊᕙᓗᖏᒡᓗ ᒪᕐᕉᒃ ᓄᓱᒡᓗᒋᑦ ᐲᖅᐰᑦ, ᐃᖅᓱᒡᓗᒋᓪᓗ ᖃᖅᑲᐅᑉ ᖄᖓᓄᐊᕈᑎᕔᑦ ᕼᐃᐸᕋᓐᒧᑦ ᓵᓐᖓᔪᒧᑦ.

4ᑕᒪᑐᒪ ᑭᖑᕐᖓᒍᑦ ᐅᖓᒋᔭᖃᓕᖅᐳᖅ ᐊᕐᖕᓇᒥᒃ ᓱᕆᒃ ᓇᖅᓴᖓᓂᒥᐅᑕᕐᖕᒥᒃ, ᐊᑎᓕᖕᒥᒃ ᑎᓔᓚᒥᒃ. 5ᐱᓕᔅᑍᓂᒥᐅᓪᓗ ᐊᖓᔪᖅᑳᖏᑦ ᑖᑦᓱᒧᖓ ᐅᐸᒍᑎᕗᑦ ᐅᖃᐅᑎᓪᓗᒍ, “ᓯᓔᕐᕆᓚᐅᕈᒃ ᖃᐅᔨᓇᓱᐊᖅᓗᑎᓪᓗ ᖃᓄᖅ ᓴᓐᖏᔪᐊᓘᓂᖓᓂᒃ, ᖃᓄᕐᓗ ᓵᓚᒋᔪᓐᓇᕐᖕᒪᖔᑦᑎᒍᑦ, ᐊᑦᓱᖏᕐᖕᓂᐊᕋᑦᑎᒍᑦ ᓵᓚᒋᓗᒍᓗ; ᑕᕝᕙ ᑐᓂᓂᐊᖅᐸᑦᑎᒋᑦ 1,100ᓂᒃ ᓯᐅᓪᕕᕆᓂᒃ.” 6ᑕᕝᕙ ᑎᓔᓚᐅᑉ ᓵᒻᓲᓂ ᐅᖃᐅᑎᕚ, “ᐅᖃᐅᑎᓚᐅᓐᖓ ᖃᓄᐊᓗᒃ ᓴᓐᖏᔫᑎᑕᐅᖕᒪᖔᖅᐱᑦ, ᖃᓄᕐᓗ ᕿᓚᒃᓱᖅᑕᐅᔪᓐᓇᕐᖕᒪᖔᖅᐱᑦ ᓵᓚᐅᓗᑎᑦ.” 7ᓵᒻᓲᓂᐅᓪᓗ ᐅᖃᐅᑎᕚ, “ᐊᑦᓱᖏᖅᑕᐅᒍᒪ ᐱᓯᒃᓰᑦ ᓄᖃᖅᑎᖏᓐᓄᑦ 7ᓄᑦ ᓄᑖᓄᑦ ᐸᓂᓚᐅᖏᑦᑐᓄᑦ, ᓴᓐᖐᑦᑑᓕᕐᖕᓂᐊᖅᐳᖓ ᐃᓄᑐᐃᓐᓇᑎᑐᑦ.” 8ᑕᕝᕙ ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑐᓂᓯᕗᑦ ᑖᑦᓱᒧᖓ ᐱᓯᒃᓯᐅᑉ ᓄᖃᖅᑎᖏᓐᓂᒃ 7ᓂᒃ, ᓄᑖᓂᒃ ᓱᓕ ᐸᓂᓚᐅᖏᑦᑐᓂᒃ, ᑖᑦᓱᒪᓗ ᐊᑦᓱᖏᖅᓱᖅᐹ ᑖᒃᑯᓄᖓ. 9ᐊᖑᑏᑦ ᐅᑕᖅᑭᓚᐅᖅᐳᑦ ᐊᕐᖕᓇᐅᑉ ᐃᒡᓗᕈᓯᖓᓂ. ᐊᕐᖕᓇᐅᓪᓗ ᐅᖃᐅᑎᕚ, “ᓵᒻᓲᓂ ᐱᓕᔅᑍᓂᒥᐅᑦ ᐅᐸᒃᐹᑎᑦ!” ᐱᑎᒃᓯᐅᑉ ᓄᖃᖅᑎᖏᑦ ᕿᒃᑐᕋᖅᐰᑦ ᐃᕙᓗᑎᑐᑦ ᐃᑯᒪᒧᑦ ᐊᒃᑐᖅᑕᐅᔪᑎᑐᑦ. ᓴᓐᖏᓂᖓᑕ ᓇᓗᓇᕐᖕᓂᖓ ᖃᐅᔨᔭᐅᓚᐅᓐᖏᓚᖅ. 10ᑎᓔᓚᐅᑉ ᐅᖃᐅᑎᕚ ᓵᒻᓲᓂ, “ᑕᑯᒋᑦ, ᒥᑕᐅᑎᒋᓚᐅᖅᐸᕐᖕᒪ ᓴᒡᓗᓚᐅᖅᐳᑎᑦ ᐅᕙᓐᓄᑦ; ᒫᓐᓇᓕ ᐅᖃᐅᑎᓚᐅᓐᖓ ᓱᓇᒧᑦ ᐊᑦᓱᖏᖅᑕᐅᔪᓐᓇᕐᖕᒪᖔᖅᐲᑦ.” 11ᐅᖃᐅᑎᕚ, “ᕿᓚᒃᓱᖅᑕᐅᒍᒪ ᐊᒃᓱᓈᓄᑦ ᐊᑐᓚᐅᖅᓯᒪᖏᑦᑐᓄᑦ, ᓴᓐᖐᓕᒐᔭᖅᐳᖓ, ᐃᓄᑐᐃᓐᓇᑎᑑᓕᖅᓗᖓ.” 12ᑍᒤᒻᒪᑦ ᑎᓔᓚ ᐊᑦᓱᓈᓂᒃ ᓄᑖᓂᒃ ᐱᓚᐅᖅᐳᖅ ᐊᑦᓱᖏᖅᓗᒍᓗ ᐅᖃᐅᑎᕚ, “ᓵᒻᓲᓂ, ᐱᓕᔅᑍᓂᒥᐅᑦ ᐅᐸᒃᐹᑎᑦ!” ᐊᖑᑏᑦ ᐅᑕᖅᑭᓚᐅᖅᐳᑦ ᐊᕐᖕᓇᐅᑉ ᐃᒡᓗᕈᓯᖓᓂ. ᐊᒃᓱᓈᓪᓕ ᑖᒃᑯᐊ ᑕᓕᕐᖕᒥᓂᑦ ᕿᒃᑐᕋᖅᐰᑦ ᐃᕙᓗᑎᑐᑦ. 13ᑎᓔᓚᐅᑉ ᓵᒻᓲᓂ ᐅᖃᐅᑎᕚ, “ᒫᓐᓇᒧᑦ ᒥᑕᐅᑎᒋᓚᐅᖅᐸᕐᖕᒪ ᓴᒡᓗᓚᐅᖅᐳᑎᓪᓗ ᐅᕙᓐᓄᑦ. ᐅᖃᐅᑎᓚᐅᓐᖓ ᓱᓇᒧᑦ ᐊᑦᓱᖏᖅᑕᐅᔪᓐᓇᖅᐲᑦ.” ᐅᖃᐅᑎᕚ, “ᓄᔭᒃᑲ 7ᓕᖅᑲᖓᔪᑦ ᓄᕕᖅᓴᕈᕕᒋᑦ ᓱᑲᓪᓗᒋᑦ ᓄᕕᖅᓴᐅᑎᐅᑉ ᓱᑲᑎᕈᑎᖓᓄᑦ ᓄᕕᖅᓴᕐᕕᖕᒧᑦ ᐊᑦᓱᖏᖅᓗᒋᑦ, ᓴᓐᖐᓕᒐᔭᖅᐳᖓ ᐃᓄᑐᐃᓐᓇᖅᑎᑑᓕᖅᓗᖓ.” 14ᐊᓱᐃᓛᒃ ᓄᕕᖅᓴᓚᐅᖅᐰᑦ ᓱᑲᓪᓗᒋᑦ ᓄᕕᖅᓴᐅᑎᐅᑉ ᓱᑲᑎᕈᑎᖓᓄᑦ ᓄᕕᖅᓴᕐᕕᖕᒧᑦ ᐊᑦᓱᖏᖅᓗᒋᑦ, ᐅᖃᐅᑎᓪᓗᒍᓗ, “ᓵᒻᓲᓂ ᐱᓕᔅᑍᓂᒥᐅᑦ ᑎᑭᑉᐹᑎᑦ!” ᑐᐸᒃᑲᒥᓗ ᒪᑭᑉᐳᖅ ᓄᔭᓂᓗ ᐲᖅᐰᑦ ᓄᕕᖅᓴᐅᑎᒥᑦ. 15ᐊᕐᖕᓇᐅᑉ ᐅᖃᐅᑎᕚ, “ᖃᓄᖅ ᐅᖃᕈᓐᓇᖅᐲᑦ, ‘ᓇᒡᓕᒋᕙᒋᑦ,’ ᐆᒻᒪᑏᑦ ᐅᕙᓐᓃᓐᖏᑎᓪᓗᒍ? ᒥᑕᐅᑎᒋᓚᐅᕋᕕᓐᖓ ᐱᖓᓱᐊᖅᑎᖅᓗᑎᑦ, ᐅᖃᐅᑎᓚᐅᖏᓐᓇᕕᓐᖓᓗ ᖃᓄᖅ ᓴᓐᖏᔪᐊᓘᖕᒪᖔᖅᐱᑦ.” 16ᒪᑐᒪ ᑭᖑᕐᖓᒍᑦ, ᐊᒃᓱᕈᖅᑎᓕᖅᐹ ᐅᖃᐅᓯᕐᖕᒥᓄᑦ ᖃᐅᑕᒫᑦ; ᐅᖃᖁᓪᓗᒍ, ᑕᕐᖕᓂᖓ ᕿᒃᓵᓕᖅᐳᖅ ᑐᖁᓕᖅᑐᑐᑦ, 17ᐅᖃᐅᑎᓕᖅᐹᓗ ᖃᐅᔨᒪᔭᒥᓂᒃ ᑕᒤᓐᓂᒃ, ᐅᖃᐅᑎᓪᓗᒍ, “ᓄᔭᒃᑲ ᑭᑦᔭᐅᑎᒧᑦ ᑭᐱᔭᐅᓚᐅᖅᓯᒪᓐᖏᓚᑦ ᐊᓈᓇᒪ ᐃᒡᓕᐊᖓᓂᑦ ᐊᓂᒐᒪ ᒎᑎᒧᑦ ᑐᓂᕐᕈᑕᐅᓯᒪᕗᖓ ᓈᓴᕅᖑᖁᓪᓗᖓ. ᓄᔭᒃᑲ ᑭᐱᔭᐅᒃᐸᑕ ᓴᓐᖏᓂᕋ ᐱᕐᖕᓂᐊᖅᐳᖅ, ᓴᓐᖐᑦᑑᓕᖅᓗᖓᓗ ᐃᓄᑐᐃᓐᓇᖅᑎᑐᑦ.” 18ᑎᓔᓚ ᖃᐅᔨᒐᒥ ᓱᓕᓂᖓᓂᒃ, ᕾᖁᔨᕗᖅ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓂᒃ, ᐅᖃᐅᑎᓪᓗᒋᓪᓗ, “ᕾᓂᐊᖅᐳᓯ ᐊᑕᐅᓯᐊᒃᑲᓐᓂᖅᓗᓯ, ᓱᓕᔪᒥᒃ ᐅᖃᐅᑎᖕᒪᖓ.” ᐊᓱᐃᓛᒃ ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᐂᕗᑦ ᑖᑦᓱᒧᖓ ᐊᑭᓕᖅᓗᒍᓗ ᑮᓇᐅᔭᓂᒃ. 19ᓯᓂᓕᖅᑎᑉᐹᓗ ᓰᖅᑯᒥᓂ; ᕾᖁᔨᓪᓗᓂᓗ ᐊᖑᒻᒥᒃ, ᑖᑦᓱᒪᓗ ᓄᔭᖏᑦ 7ᐃᓕᓪᓗᒋᑦ ᑭᑦᔭᖅᐰᑦ ᓂᐊᖁᐊᓂᑦ. ᐸᒡᕕᓴᓕᖅᐹᓗ ᐊᕐᖕᓇᐅᑉ, ᓴᓐᖏᓂᖓᑕᓗ ᕿᒪᒃᐹ. 20ᐊᕐᖕᓇᐅᑉ ᐅᖃᐅᑎᕚ, “ᐱᓕᔅᑍᓂᒥᐅᑦ ᑎᑭᑉᐹᑎᑦ, ᓵᒻᓲᓂ!” ᓯᓂᖕᓂᕐᖕᒥᓂᑦ ᒪᑭᓐᓇᒥ ᐅᖃᖅᐳᖅ, “ᑍᒤᑉᐸᓚᐅᕋᒪ ᑍᒤᓐᓂᐊᕆᕗᖓ, ᐊᑦᓱᖏᐅᑎᑦ ᓱᕋᖕᓂᐊᖅᐸᒃᑲ!” ᑭᓯᐊᓂᓕ ᖃᐅᔨᒪᓚᐅᓐᖏᓚᖅ ᐊᑕᓂᐅᑉ ᕿᒪᖕᒪᒍ. 21ᐱᓕᔅᑍᓂᒥᐅᑦ ᑎᒍᕚᑦ, ᐃᔨᖏᒡᓗ ᖃᖅᓗᒋᒃ, ᐂᑎᑉᐹᓗ ᒑᓴᒧᑦ, ᕿᓚᒃᓱᖅᓗᒍᓗ ᑲᓐᓄᔭᓄᑦ ᐊᖅᓵᖅᑑᔭᓄᑦ; ᓯᖃᓪᓕᑎᑦᓯᕕᖕᒥᓗ ᑎᒍᔭᐅᓯᒪᕕᖕᒥ ᓯᖃᓪᓕᑎᑦᓯᔨᐅᑎᑕᐅᓕᖅᐳᖅ. 22ᓂᐊᖁᖓᓂᓕ ᓄᔭᖏᑦ ᐱᕈᓕᕆᕗᑦ ᓴᓕᔭᐅᓚᐅᖅᑐᑦ.

ᓵᒻᓲᓂᐅᑉ ᑐᖁᓂᖓ

23ᐱᓕᔅᑍᓂᒥᐅᑦ ᐊᖓᔪᖅᑳᖏᑦ ᑲᑎᓚᐅᖅᐳᑦ ᐱᕕᒡᔪᐊᒥᖕᓂᒃ ᑐᓂᕐᕈᓯᕆᐊᖅᑐᖅᓗᑎᒃ ᒎᑎᒥᖕᓄᑦ ᑍᒐᓂᒧᑦ, ᖁᕕᐊᓱᒋᐊᖅᑐᖅᓗᑎᒡᓗ ᐅᖃᓚᐅᕋᒥᒃ, “ᒎᑎᑦᑕ ᐊᑭᕋᕗᑦ ᓵᒻᓲᓂ ᑐᓂᓚᐅᖅᐹ ᐅᕙᑦᑎᓐᓄᑦ!” 24ᐃᓄᐃᓪᓗ ᑕᑯᒐᒥᑦᔪᒃ ᒎᑎᒥᖕᓂᒃ ᓂᖅᑐᐃᓕᖅᐳᑦ ᐅᖃᖅᓗᑎᒃ, “ᒎᑎᑦᑕ ᐊᑭᕋᕗᑦ ᑐᓂᓚᐅᖅᐰᑦ ᐅᕙᑦᑎᓐᓄᑦ, ᓄᓇᑦᑎᓐᓂᒃ ᐊᓯᕈᐃᓚᐅᖅᑐᖅ ᑐᖁᕅᓚᐅᖅᑐᕐᓗ ᐃᓅᖃᑎᑦᑎᓐᓂᒃ ᐅᓄᖅᑐᓂᒃ.” 25ᑍᒤᓚᐅᖅᐳᖅ ᐃᒥᕐᖕᓂᕐᖕᒧᑦ ᖁᕕᐊᓱᓕᕋᒥᒃ ᐅᖃᖅᐳᑦ, “ᓵᒻᓲᓂ ᕾᖁᔭᐅᓚᐅᕐᓕ, ᑕᑯᕋᓐᓈᖅᑎᓐᓂᐊᕐᖕᒪᑎᒍᑦ.” ᑕᕝᕙ ᓵᒻᓲᓂ ᐂᔭᐅᕗᖅ ᑎᒍᔭᐅᒪᕕᖕᒥᑦ, ᑕᑯᕋᓐᓈᖅᑎᑉᐰᓪᓗ. ᓇᖏᖅᑎᑕᐅᓪᓗᓂᓗ ᓱᑬᑦ ᓇᐸᔪᑦ ᐊᑯᕐᖓᓐᓂ; 26ᓵᒻᓲᓂᓗ ᓄᑲᑉᐱᐊᒧᑦ ᑕᓯᐅᖅᑎᒥᓄᑦ ᐅᖃᖅᐳᖅ, “ᐂᑎᓚᐅᓐᖓ ᐊᒃᑐᐃᑎᓪᓗᖓᓗ ᑐᒃᓯᐊᕐᕕᐅᑉ ᑐᓐᖓᕕᖏᑕ ᓇᐸᔪᖏᓐᓂᒃ, ᐄᒐᖓᕝᕕᒋᔪᒪᒐᒃᑭᑦ.” 27ᑐᒃᓯᐊᕐᕕᒡᓗ ᑕᑕᑉᐳᖅ ᐊᖑᑎᓂᒃ ᐊᕐᖕᓇᓂᒡᓗ. ᐱᓕᔅᑍᓂᒥᐅᓪᓗ ᐊᖓᔪᖅᑳᖏᓐᓂᒃ, ᐊᓯᖏᓪᓗ ᐊᖑᑏᑦ ᐊᕐᖕᓁᓪᓗ ᖄᖓᓃᑦᑐᑦ 3,000 ᓵᒻᓲᓂᒥᒃ ᑕᑯᓐᓇᖅᑐᑦ ᑕᑯᓐᓇᖅᑎᑦᓯᑎᓪᓗᒍ. 28ᓵᒻᓲᓂ ᓂᓪᓕᐊᕗᖅ ᐊᑕᓂᕐᖕᒧᑦ ᐅᖃᖅᓗᓂ, “ᐆ ᐊᑕᓃᖅ ᒎᑏ, ᐃᖅᑲᐅᒪᓚᐅᓐᖓ, ᑐᒃᓯᐊᖅᐳᖓ! ᓴᓐᖏᓂᖅᑖᖅᑎᓚᐅᓐᖓ, ᑐᒃᓯᐊᕐᕕᒋᕙᒋᑦ, ᓱᓕ ᐊᑕᐅᓯᐊᒃᑲᓐᓂᖅᓗᑎᑦ, ᐆ ᒎᑏ, ᐱᒋᐊᖅᓗᖓ ᐊᑕᐅᓯᐊᖅᓗᖓ ᐊᑭᔪᓐᓇᖁᓪᓗᖓ ᐱᓕᔅᑍᓂᒥᐅᓂᒃ ᐃᔩᒃᑲᒃ ᐱᓪᓗᒋᒃ!” 29ᓵᒻᓲᓂᐅᓪᓗ ᓱᑬᑦ ᓇᐸᔪᑦ ᐊᒃᑐᖅᐰᑦ ᑐᒃᓯᐊᕐᕕᐅᑉ ᑐᓐᖓᕕᖏᒃ, ᐊᒃᑐᐊᑦᓯᐊᖅᓗᒋᒡᓗ, ᐂᑉᐹ ᑕᓕᖅᐱᖕᒥᓄᑦ ᐂᑉᐹᓗ ᓴᐅᒥᖕᒥᓄᑦ. 30ᓵᒻᓲᓂᓗ ᐅᖃᖅᐳᖅ, “ᐱᓕᔅᑍᓂᒥᐅᑦ ᑐᖁᖃᑎᒋᓚᐅᖅᓚᒃᑲ!” ᐅᑯᓪᓗᓂᓗ ᐱᔪᓐᓇᕐᖕᓂᓕᒫᒥᓄᑦ, ᐊᔭᒃᐹᒃ, ᐃᒡᓗᓗ ᑲᑕᒃᐳᖅ ᐱᓕᔅᑍᓂᒥᐅᑦ ᐊᖓᔪᖅᑳᖏᓐᓄᑦ ᐃᓄᓕᒫᓄᓪᓗ ᑕᕝᕙᓃᑦᑐᓄᑦ. ᑐᖁᒥᓂ ᑐᖁᑦᓯᓂᖓ ᐅᓄᕐᖕᓂᖅᓴᐅᓚᐅᖅᐳᖅ ᐃᓅᓯᓕᒫᒥᓂ ᑐᖁᑦᓯᓂᕆᓚᐅᖅᑕᒥᓂᑦ. 31ᖃᑕᓐᖑᑎᖏᑕ ᐊᑖᑕᖓᑕᓗ ᐃᒡᓗᒥᐅᖃᑎᓕᒫᖏᓐᓂᑦ ᐂᔭᐅᕗᖅ, ᐃᓗᕕᖅᐹᓪᓗ ᔫᕋᐅᑉ ᐃᔅᑕᐅᓪᓗ ᐊᑯᓐᓂᖓᓄᑦ ᐊᑖᑕᖓᑕ ᒪᓄᐊᑉ ᐃᓗᕕᖓᓂ. ᐊᕐᕌᒍᓂᒃ 20ᓂᒃ ᐃᓴᕆᐊᓕᒥᐅᓄᑦ ᐊᖓᔪᖅᑳᖑᓚᐅᖅᐳᖅ.

Currently Selected:

ᐃᓗᐊᖅᓮᔩᑦ ᐊᒡᓚᖏᑦ 16: EAIB

Highlight

Copy