ᐃᓗᐊᖅᓮᔩᑦ ᐊᒡᓚᖏᑦ 11
11
1ᔨᑉᑕ, ᐊᔪᖏᑦᑐᕐᔪᐊᖑᓪᓗᓂ ᐅᓇᑕᖅᑐᒃᓴᐅᓚᐅᖅᐳᖅ ᒋᓕᐊᑎᒥᐅᑕᖅ, ᐃᕐᖕᓂᕆᔭᐅᓚᐅᖅᐳᖅ ᐊᕐᖕᓇᒧ ᓄᓕᐊᒐᕐᖕᒧᑦ, ᐊᑖᑕᖃᖅᓗᓂ ᒋᓕᐊᑎᒥ. 2ᒋᓕᐊᑎ ᐃᕐᖕᓂᖅᑖᖅᑐᓚᐅᕆᕗᖅ ᓄᓕᐊᒥᓂᑦ; ᐃᕐᖕᓂᖏᓪᓗ ᐱᕈᕋᒥᒃ, ᔨᑉᑕ ᐊᐅᓪᓚᖅᑎᑉᐹᑦ ᐊᖏᕐᕋᒥᖕᓂᑦ; ᐅᖃᐅᑎᓪᓗᒍ, “ᑭᖑᕐᖑᑦᔨᓂᐊᓐᖏᓚᑎᑦ ᓱᓇᒥᒡᓘᓐᓃᑦ ᓯᕗᓕᑦᑕ ᐱᕕᓂᖏᓐᓂᑦ; ᐃᕐᖕᓂᕆᔭᐅᒐᕕᑦ ᐊᕐᖕᓇᒧᑦ ᐊᓯᐊᓄᑦ.” 3ᔨᑉᑕ ᕿᒫᓚᐅᖅᐳᖅ ᐃᓚᒥᓂᑦ ᓄᓇᑖᖅᓗᓂᓗ ᑑᑉᒥ. ᑍᑲᓂᓗ ᑲᑎᔭᐅᕗᖅ ᓈᒻᒪᖏᑦᑐᓂᒃ ᐱᐅᓯᖃᖅᑐᓂᑦ, ᓇᒧᑐᐃᓐᓇᕐᓗ ᐂᖃᑎᒋᓪᓗᒋᑦ ᑎᒡᓕᒐᖃᑎᒋᕙᒃᐰᑦ.
4ᑕᒪᑐᒪ ᑭᖑᓂᖓᒍᑦ ᐊᒧᓁᑎᒥᐅᑦ ᐅᓇᑕᕆᐊᓚᐅᖅᐳᑦ ᐃᓴᕆᐊᓕᒥᐅᓂᒃ. 5ᐊᒧᓁᑎᑦ ᐅᓇᑕᕆᐊᕐᖕᒪᑕ ᐃᓴᕆᐊᓕᒥᐅᓂᒃ, ᒋᓕᐊᑎᒥᐅᑦ ᐊᖓᔪᖅᑳᖏᑕ ᐂᕚᑦ ᔨᑉᑕ ᓄᓇᒥᑦ ᑑᑉᒥᑦ. 6ᔨᑉᑕᓗ ᐅᖃᐅᑎᓪᓗᒍ, “ᕾᓗᑎᑦ ᓯᕗᓕᓚᐅᖅᑎᒍᑦ, ᐅᓇᑕᕈᓐᓇᖁᓪᓗᑕ ᐊᒧᓁᑎᒥᐅᓂᒃ.”
7ᔨᑉᑕᓕ ᑭᐅᕗᖅ ᒋᓕᐊᑎᒥᐅᑦ ᐊᖓᔪᖅᑳᖏᓐᓄᑦ, “ᐅᕙᓐᓂᒃ ᐆᒥᓱᓚᐅᓐᖏᓚᓰ, ᐊᑖᑕᒪᓗ ᐃᒡᓗᖓᓂᑦ ᐊᐅᓪᓚᖅᑎᑦᓯᓚᐅᓐᖏᓚᓰ? ᓱᖕᒪᓪᓕ ᕾᓕᖅᐱᓯ ᐊᒃᓱᕈᓕᕋᑦᓯ?”
8ᒋᓕᐊᑎᒥᐅᑦ ᐊᖓᔪᖅᑳᖏᑕ ᔨᑉᑕ ᐅᖃᐅᑎᕚᑦ, “ᑍᒫᒃ ᑕᕝᕙ ᐃᓕᖕᓄᐊᖅᐳᒍᑦ, ᒫᓐᓇ ᐃᓚᒋᓗᑕ ᐅᓇᑕᕆᐊᖃᑕᐅᖁᓪᓗᑎᑦ ᐊᒧᓁᑎᒥᐅᓂᒃ ᓯᕗᓕᖅᑎᐅᓕᖁᓪᓗᑎᓪᓗ ᒋᓕᐊᑎᒥ ᓄᓇᖃᖅᑐᓕᒫᓄᑦ.”
9ᔨᑉᑕ ᐅᖃᖅᐳᖅ ᒋᓕᐊᑎᒥᐅᑦ ᐊᖓᔪᖅᑳᖏᓐᓄᑦ, “ᐅᑎᖅᑎᓐᓂᐊᕈᑦᓯᓐᖓ ᐊᖏᕐᕋᓐᓄᑦ ᐅᓇᑕᕆᐊᖅᓗᖓᓗ ᐊᒧᓁᑎᒥᐅᓂᒃ ᐊᑕᓂᐅᓪᓗ ᓵᓚᖃᖅᑎᑉᐸᖓ, ᐊᐅᓚᑦᓯᔨᐅᓕᕐᖕᓂᐊᖅᐳᖓ ᐃᓕᑦᓯᓐᓄᑦ.”
10ᑕᕝᕙ ᒋᓕᐊᑎᒥᐅᑦ ᐊᖓᔪᖅᑳᖏᑦ ᐅᖃᖅᐳᑦ ᔨᑉᑕᒧᑦ, “ᐊᖏᖅᐳᒍᑦ, ᐊᑕᓂᖅ ᑕᑯᓐᓇᖅᑎᒋᕙᕗᑦ ᐊᑯᓐᓇᑦᑎᓐᓂ, ᓱᓕᓗᑕ ᓈᓚᖕᓂᐊᖅᐳᒍᑦ ᐃᓕᖕᓂᒃ.” 11ᑕᕝᕙ ᔨᑉᑕᐅᑉ ᐃᓚᒋᓕᖅᐰᑦ ᒋᓕᐊᑎᒥᐅᑦ ᐊᖓᔪᖅᑳᖏᑦ, ᐃᓄᖏᑦᑕᓗ ᐊᐅᓚᑦᓯᔨᓐᖑᖅᑎᑉᐹᑦ ᓯᕗᓕᖅᑎᒋᓕᖅᓗᒍᓗ; ᔨᑉᑕᐅᓪᓗ ᐊᖏᕈᑎᒋᔭᓂ ᓇᓗᓁᖅᐰᑦ ᐊᑕᓂᐅᑉ ᓵᖓᓂ ᒥᔅᐸᒥ.
12ᔨᑉᑕ ᑎᓕᓯᓚᐅᖅᐳᖅ ᐅᖃᕆᐊᖅᑐᖅᑐᓂᒃ ᐊᒧᓁᑎᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᐅᑎᓪᓗᒍ, “ᓱᓇᒥᒃ ᐊᑭᕋᖅᑑᑎᒃᓴᖃᖅᐲᑦ ᐅᕙᑦᑎᓐᓄᑦ? ᓱᖕᒪᓪᓗ ᓄᓇᑦᑎᓐᓄᐊᖅᐲᑦ ᐅᓇᑕᕆᐊᖅᑐᖅᓗᑏᑦ?”
13ᐊᖓᔪᖅᑳᕐᔪᐊᑉ ᐊᒧᓁᑎᒥᐅᑕᐅᑉ ᑭᐅᕔᑦ ᔨᑉᑕᐅᑉ ᐅᖃᕆᐊᖅᑐᖅᑎᖏᑦ, “ᐃᓴᕆᐊᓕᒥᐅᑦ ᐄᑦᔨᑉᑎᒥᓐᖔᖅᑎᓪᓗᒋᑦ ᐊᖅᓵᖅᓯᓚᐅᕐᖕᒪᑕ ᓄᓇᖁᑎᑦᑎᓐᓂᒃ ᐋᕐᓄᓂᐅᑉ ᑰᖓᓂᑦ ᔭᐴᑉ ᑰᖓᓄᑦ ᑎᑭᓪᓗᒍ ᔪᐊᕐᑕᓂᐅᓪᓗ ᑰᖓ ᑎᑭᓪᓗᒍ; ᒫᓐᓇᓕ ᐅᓇᑕᕐᖕᓂᒃᑰᖏᑦᑐᖅ ᐅᑎᖅᑎᓕᖅᓯᐅᒃ.”
14ᔨᑉᑕᐅᓪᓗ ᐅᑎᖅᑎᓚᐅᖅᐰᑦ ᐅᖃᕆᐊᖅᑐᖅᑎᑕᓂ ᐊᒧᓁᑎᑦ ᐊᖓᔪᖅᑳᕐᔪᐊᖓᓄᑦ. 15ᐃᒫᒃ ᐅᖃᐅᑎᓪᓗᒋᑦ, “ᐃᒫᒃ ᔨᑉᑕ ᐅᖃᖅᐳᖅ; ᐃᓴᕆᐊᓕᒥᐅᑦ ᐊᖅᓵᖅᓯᓚᐅᓐᖏᓚᑦ ᒧᐊᐱᐅᑉ ᓄᓇᖓᓂᒃ ᐅᕝᕙᓘᓐᓃᑦ ᐊᒧᓁᑎᑦ ᓄᓇᖓᓂᒃ. 16ᐄᑦᔨᑉᑎᒥᓪᓕ ᑎᑭᓐᓇᒥᒃ, ᐃᓴᕆᐊᓕᒥᐅᑦ ᐃᖏᕐᕋᓚᐅᖅᐳᑦ ᐃᓄᖃᖏᑦᑐᒃᑯᑦ ᐃᒪᕐᔪᐊᕐᖕᒧᑦ ᐊᐅᐸᓗᒃᑕᒧᑦ ᑎᑭᓪᓗᑎᒡᓗ ᑲᑎᓯᒧᑦ. 17#ᒨᓯᓯ ᓯᑕᒪᖏᑦ 20:14-21.ᐃᓴᕆᐊᓕᒥᐅᑦ ᑍᑦᓱᒪᓂ ᐅᖃᕆᐊᖅᑐᖅᑐᓂᒃ ᑎᓕᓯᓚᐅᖅᐳᑦ ᐄᑐᒥᐅᑉ ᐊᖓᔪᖅᑳᕐᔪᐊᖓᓄᑦ, ᐅᖃᖅᓗᑎᒃ, ‘ᐃᓕᑦᓯᓐᓂᒃ ᖄᖏᕈᒪᒐᑦᑕ, ᕿᓄᔪᒍᑦ ᓄᓇᑦᓯᒎᕈᓐᓇᖅᑎᑕᐅᔪᒪᓪᓗᑕ.’ ᐄᑐᒥᐅᓪᓕ ᐊᖓᔪᖅᑳᕐᔪᐊᖓ ᓈᓚᒍᒪᓚᐅᓐᖏᓚᖅ, ᑍᒫᒃ ᓱᓕ ᑎᓕᓯᓚᐅᕆᕗᑦ ᒧᐊᐱᒥᐅᑦ ᐊᖓᔪᖅᑳᕐᔪᐊᖓᓄᑦ, ᑖᓐᓇᑦᑕᐅᖅ ᐊᖏᓚᐅᖏᓐᓂᕗᖅ. ᑍᒤᒻᒪᑦ ᐃᓴᕆᐊᓕᒥᐅᑦ ᑲᑎᓯᒦᑐᐃᓐᓇᓚᐅᖅᐳᑦ. 18#ᒨᓯᓯ ᓯᑕᒪᖏᑦ 21:4.ᐃᓄᖃᖏᑦᑐᒃᑯᓪᓕ ᐃᖏᕐᕋᓚᐅᖅᐳᑦ, ᓂᒍᖅᓗᑎᒃ ᐄᑐᒥᐅᑉ ᓄᓇᖓᓂᒃ ᒧᐊᐱᐅᓪᓗ ᓄᓇᖓᓂᒃ, ᒧᐊᐱᐅᑉ ᓯᕿᓐᓂᓕᕐᕕᐊᑕ ᓇᓛᓄᑦ ᑎᑭᓪᓗᑎᒃ, ᐋᕐᓄᓂᐅᑉ ᑰᖓᑕ ᐊᑭᐊᓂ ᑕᖕᒫᓚᐅᖅᐳᑦ. ᒧᐊᐱᒥᐅᑦ ᓄᓇᖁᑎᖓ ᐃᑎᕐᕕᒋᓚᐅᓐᖏᓛᑦ, ᐋᕐᓄᓂᐅᑉ ᑰᖓ ᐃᑳᓚᐅᓐᖏᓛᑦ ᒧᐊᐱᒥᐅᑦ ᓄᓇᖁᑎᖓᑕ ᑭᒡᓕᒋᓚᐅᕐᖕᒪᒍ. 19#ᒨᓯᓯ ᓯᑕᒪᖏᑦ 21:21-24.ᑍᒪᓗ ᐃᓴᕆᐊᓕᒥᐅᑦ ᐅᖃᕆᐊᖅᑐᖅᑐᓂᒃ ᑎᓕᓯᓚᐅᖅᐳᑦ ᐊᖓᔪᖅᑳᕐᔪᐊᕐᖕᒧᑦ ᓮᕼᐆᓂᒧᑦ ᐊᒧᕅᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᕼᐃᓴᐸᓂᒥ ᓄᓇᖃᖅᑐᒧᑦ, ᐅᖃᐅᑎᓪᓗᒍᓗ, ‘ᓄᓇᑦᓯᒍᑦ ᐊᖅᑯᓵᕈᓐᓇᖅᑎᓚᐅᖅᑎᒍᑦ ᓄᓇᒃᓴᑦᑎᓐᓄᓐᖓᐅᑎᓪᓗᑕ.’ 20ᓮᕼᐆᓂᐅᓪᓕ ᐃᓴᕆᐊᓕᒥᐅᑦ ᐅᒃᐱᕆᓚᐅᓐᖏᓔᑦ ᓄᓇᖁᑎᒥᒍᑦ ᐊᖅᑯᓵᖁᓇᒋᑦ; ᐅᓇᑕᖅᑐᒃᓴᖁᑎᓕᒪᓂᓕ ᑲᑎᓚᐅᖅᐰᑦ, ᑕᖕᒫᖅᓗᑎᒡᓗ ᔧᕼᐋᓯᒧᑦ, ᐅᓇᑕᕆᐊᖅᓗᑎᒡᓗ ᐃᓴᕆᐊᓕᒥᐅᓂᒃ. 21ᐊᑕᓂᐅᓪᓕ, ᐃᓴᕆᐊᓕᐅᑦ ᒎᑎᖓᑕ ᓵᓚᖃᖅᑎᓚᐅᖅᐰᑦ ᓮᕼᐆᓂᒥᒃ ᐅᓇᑕᖅᑐᒃᓴᖏᓐᓂᒡᓗ; ᑖᒃᑯᓂᖓᓗ ᓵᓚᖃᓚᐅᖅᐳᑦ. ᑍᒤᒻᒪᑦ ᐃᓴᕆᐊᓕᒥᐅᑦ ᓄᓇᑖᕆᓚᐅᖅᐹᑦ ᐋᒧᕅᑎᒥᐅᑦ ᓄᓇᖁᑎᓕᒫᖓᑦ. ᐊᒧᕅᑎᑦ ᓄᓇᖃᕐᕕᒋᓚᐅᖅᑕᖓᑦ. 22ᓄᓇᖁᑎᑖᕆᓚᐅᖅᐹᓪᓗ ᐊᒧᕅᑎᒥᐅᑦ ᓄᓇᖁᑎᖓ ᐋᕐᓄᓂᒥᑦ ᐱᒋᐊᖅᓗᒍ ᔭᐴᒃ ᑎᑭᓪᓗᒍ, ᐃᓄᖃᖏᑦᑐᒥᓪᓗ ᐱᒋᐊᖅᓗᒍ ᔪᐊᕐᑕᓂᐅᑦ ᑰᖓ ᑎᑭᓪᓗᒍ. 23ᑍᒤᒻᒪᑦ ᐊᑕᓂᐅᑉ, ᐃᓴᕆᐊᓕᒥᐅᑦ ᒎᑎᖓᑦᑕ, ᓯᖏᓚᐅᖅᐰᑦ ᐊᒧᕅᑎᒥᐅᑦ ᐃᓄᖁᑎᓂ ᐃᓴᕆᐊᓕᒥᐅᑦ ᓵᖓᓐᓂ; ᑖᒃᑯᓂᖓ ᓵᓚᖃᕈᒪᓕᖅᐱᓰ? 24ᓄᓇᖁᑎᑖᕆᔪᒪᓐᖏᓚᓯᐅᒃ ᑭᒨᓯᐅᑉ ᒎᑎᓐᖑᐊᑦᓯ ᓄᓇ ᑐᓃᓚᐅᖅᑕᖓ ᐃᓕᑦᓯᓐᓄᑦ? ᐅᕙᒍᓪᓕ ᐱᓯᒤᓐᓇᕐᖕᓂᐊᕆᕙᕗᑦ ᐊᑕᓂᐅᑉ, ᒎᑎᑦᑕ ᐊᖅᓵᖅᓯᑦᔪᑎᒋᓚᐅᖅᑕᖓ ᐅᕙᑦᑎᓐᓄᑦ ᑐᓂᓪᓗᒍ. 25#ᒨᓯᓯ ᓯᑕᒪᖏᑦ 22:1-6.ᐱᔪᓐᓇᕐᖕᓂᖅᓴᐅᕕᓰ ᐰᓚᒃᒥᑦ, ᔨᐴᕆᐅᑉ ᐃᕐᖕᓂᖓᓂᑦ, ᒧᐊᐱᐅᑉ ᐊᖓᔪᖅᑳᕐᔪᐊᖓᓐᓂᑦ? ᐅᓇᖕᒥᓱᓚᐅᖅᓯᒪᕚ ᐃᓴᕆᐊᓕᒥᐅᓂᒃ, ᐅᕝᕙᓘᓐᓃᑦ ᐅᓇᑕᖃᑎᖃᓚᐅᖅᓯᒪᕚ ᑖᒃᑯᓂᖓ? 26ᐊᕐᕌᒍᓂᒃ 300ᓂᒃ ᐃᓴᕆᐊᓕᒥᐅᑦ ᓄᓇᖃᓕᕐᖕᒪᑕ ᕼᐃᓴᐸᓂᒥᒃ ᐊᕈᐃᕆᒥᓗ ᓄᓇᓕᖁᑎᖏᓐᓂᓗ, ᐃᒡᓗᒐᓴᓕᒫᓂᓗ ᐋᕐᓄᓂᐅᑉ ᑰᖓᑕ ᑭᒡᓕᖓᓃᑦᑐᓂᒃ, ᓱᖕᒪᓪᓕ ᐅᑎᖅᑎᑦᓯᓚᐅᖅᓯᒪᓐᖏᓚᓯ ᑍᒪᓐᖓᓂᑦ? 27ᑍᒤᒻᒪᑦ ᐊᔪᖅᑐᓕᓚᐅᓐᖏᓚᒍᑦ ᐃᓕᑦᓯᓐᓄᑦ, ᑕᒻᒪᖅᐳᑎᑦ ᐅᓇᑕᕋᓱᐊᕋᕕᑦ ᐅᕙᑦᑎᓐᓂᒃ. ᐊᑕᓂᖅ ᐃᖅᑲᖅᑐᐃᔨ ᑖᓐᓇ ᑐᑭᑖᕐᖕᓂᐊᖅᐳᖅ ᐅᓪᓗᒥ ᓇᓪᓕᐊᓐᓄᑦ ᐃᓴᕆᐊᓕᒥᐅᑦ ᐃᓄᖏᓐᓄᓪᓘᓐᓃᑦ ᐅᕝᕙᓘᓐᓃᑦ ᐊᒧᓁᑎᒥᐅᓄᑦ.” 28ᐊᒧᓁᑎᒥᐅᓪᓕ ᐊᖓᔪᖅᑳᕐᔪᐊᖓᑦ ᓈᓚᓚᐅᓐᖏᓚᖅ ᔨᑉᑕᐅᑉ ᑎᓕᓯᓪᓗᓂ ᐅᖃᐅᓯᖏᓐᓂᒃ.
29ᐊᑕᓂᐅᓪᓕ ᐊᓂᕐᖕᓂᖓᑕ ᑎᑭᑉᐹ ᔨᑉᑕ. ᐂᕗᕐᓗ ᒋᓕᐊᑎᒧᑦ ᒫᓇᓯᒧᓪᓗ ᑲᔪᓯᓪᓗᓂ ᒥᔅᐱᒧᑦ ᒋᓕᐊᑎᒦᑦᑐᒧᑦ ᑕᕝᕙᓐᖓᓪᓗ ᑲᔪᓯᓪᓗᓂᓗ ᐊᒧᓁᑎᓄᑦ. 30ᔨᑉᑕᓗ ᐊᖏᒻᒪᕆᒃᐳᖅ ᐊᑕᓂᕐᖕᒧᑦ: “ᓵᓚᖃᖅᑎᓐᓂᐊᕈᕕᖓ ᐊᒧᓁᑎᒥᐅᓂᒃ, 31ᑐᓂᕐᕈᓯᕐᖕᓂᐊᖅᐳᖓ ᐃᓄᖕᒥᒃ ᐃᒡᓗᓐᓂᑦ ᓯᕗᓪᓕᖅᐸᐅᓗᓂ ᐅᒃᑯᐊᑎᒍᑦ ᐊᓂᔪᒥᒃ, ᓂᐅᕝᕕᐅᕆᐊᖅᑐᒥᒃ ᐅᕙᓐᓂᒃ, ᐅᑎᕈᒪ ᓵᓚᖃᖅᓯᒪᓗᖓ ᐊᒧᓁᑎᓂᒃ. ᑍᓐᓇ ᐃᓄᒃ ᐊᑕᓂᐅᑉ ᐱᒋᓂᐊᖅᐹ, ᑐᓂᕐᕈᑎᒋᓂᐊᖅᐸᕋᓗ ᑖᑦᓱᒧᖓ ᐃᑯᐊᓚᑦᓯᓂᒃᑯᑦ.”
32ᔨᑉᑕᓗ ᐃᑳᓚᐅᖅᐳᖅ ᑰᒃᑯᑦ ᐅᓇᑕᕆᐊᖅᓗᓂ ᐊᒧᓁᑎᒥᐅᓂᒃ, ᐊᑕᓂᐅᓪᓗ ᓵᓚᖃᖅᑎᑉᐹ. 33ᐅᓇᑕᓯᒋᐊᓚᐅᖅᐰᑦ ᐊᕈᐃᕆᒥᑦ ᒥᓂᑎ ᓄᓇᐅᑉ ᐃᓚᖓᓄᑦ, ᐃᒡᓗᒐᓮᑦ 20, ᐊᐱᐅᓪ-ᑭᕋᒥᓐ ᑎᑭᓪᓗᒍ. ᑐᖁᕅᓂᕐᔪᐊᖃᖅᐳᖅ ᐊᒧᓁᑎᓪᓗ ᓵᓚᐅᕗᑦ ᐃᓴᕆᐊᓕᒥᐅᓄᑦ.
ᔨᑉᑕᐅᑉ ᐸᓂᖓ
34ᔨᑉᑕ ᐊᖏᕐᕋᒥᓄᑦ ᐅᑎᕋᒥ ᒥᔅᐸᒧᑦ; ᐸᓂᖓ ᐊᓂᓚᐅᖅᐳᖅ ᓂᐅᕝᕕᐅᕆᐊᖅᓗᓂ, ᑖᓂᓯᖅᓗᓂ ᐊᕕᓗᕋᐅᑎᒥᒡᓗ ᑎᒍᒥᐊᖅᓗᓂ. ᑖᓐᓇᓗ ᕿᑐᕐᖓᑐᐊᕆᓚᐅᖅᐹ. 35#ᒨᓯᓯ ᓯᑕᒪᖏᑦ 30:2.ᑕᑯᒐᒥᐅᒡᓗ ᐊᓐᓄᕌᓂ ᐊᓕᒃᐰᑦ ᕿᒃᓵᖕᓂᕐᖕᒧᑦ ᐅᖃᖅᓗᓂᓗ, “ᐸᓃᒃ, ᑲᑕᒃᑎᕐᔪᐊᖅᐸᕐᖕᒪ, ᐃᕝᕕᓪᓗ ᐱᓪᓗᑎᑦ ᐃᓱᒪᔮᕈᑎᖃᖅᐳᖓ; ᐊᖏᒻᒪᕆᒍᑎᖃᓚᐅᕋᒪ ᐊᑕᓂᕐᖕᒧᑦ, ᐊᖏᕈᑎᒐᓗ ᐅᑎᖅᑎᑦᓱᓐᓇᓐᖏᓚᕋ!”
36ᐸᓂᖓᑕᓗ ᐅᖃᐅᑎᕚ, “ᐊᖏᒻᒪᕆᒍᑎᖃᓚᐅᕈᕕᑦ ᐊᑕᓂᕐᖕᒧᑦ, ᑲᔪᓯᓕᕆᑦ ᐊᖏᒻᒪᕆᒍᑎᒋᓚᐅᖅᑕᕐᖕᓂᒃ, ᐊᑕᓂᐅᑉ ᓵᓚᖃᖅᑎᓚᐅᕐᖕᒪᑎᑦ ᐊᑭᕋᕐᖕᓂᒃ, ᐊᒧᓁᑎᒥᐅᓂᒃ.” 37ᐊᑖᑕᓂᓕ ᐊᐱᕆᕚ, “ᐊᑕᐅᓯᕐᖕᒥᒡᓕ ᐱᓇᓱᐊᖁᕙᒋᑦ ᐅᕙᓐᓄᑦ. ᑲᒪᒋᓐᖏᓚᐅᑲᓐᖓ ᑕᖀᖕᓂᒃ ᒪᕐᕉᖕᓂᒃ, ᐃᓱᒤᓐᓇᕐᕆᓚᐅᑲᒍᒪᕗᖓ ᖃᖅᑲᓂ ᕿᒃᓴᐅᑎᒋᓗᒍᓗ ᐅᐃᒡᒐᓲᓗᖓ ᐱᖃᑎᒃᑲ ᐱᖃᑎᒋᓗᒋᑦ.” 38ᐊᑖᑕᖓᑕ ᐅᖃᐅᑎᕚ, “ᐊᐅᓪᓚᓕᕆᑦ.” ᐊᐅᓪᓚᖅᑎᑉᐹᓗ ᑕᖅᑮᖕᓂᒃ ᒪᕐᕉᖕᓂᒃ; ᐊᐅᓪᓚᖅᐳᕐᓗ, ᐱᖃᑎᓂ ᐱᖃᑎᒋᓪᓗᒋᑦ, ᕿᒃᓴᐅᑎᖃᕆᐊᖅᑐᖅᓗᑎᒃ ᖃᖅᑲᓂ ᑐᖁᓂᐊᕐᖕᓂᕐᖕᒥᓂᒃ ᐅᐃᖃᖏᓪᓗᓂ. 39ᑕᖅᑮᒃ ᒪᕐᕉᒃ ᐊᓂᒍᕐᖕᒪᑎᒃ ᐊᑖᑕᒥᓄᑦ ᐅᑎᓚᐅᖅᐳᖅ. ᐊᖏᕈᑎᒋᓚᐅᖅᑕᓂᓗ ᐊᑕᓂᕐᖕᒧᑦ ᒪᓕᒡᓗᒍ ᑲᔪᓯᕗᖅ, ᑖᓐᓇᓗ ᑐᖁᓚᐅᖅᐳᖅ ᐅᐃᒡᒐᓲᖏᓐᓇᖅᓗᓂ.
ᑕᒪᓐᓇ ᐱᐅᓯᐅᓕᓚᐅᖅᐳᖅ ᐃᓴᕆᐊᓕᒥᐅᓂᑦ. 40ᐃᓴᕆᐊᓕᒥᐅᑦ ᐸᓂᖏᑦ ᐊᕐᕌᒍᑕᒫᑦ ᕿᒃᓵᒍᑎᖃᕆᐊᖅᑐᖅᐸᓚᐅᖅᐳᑦ ᔨᑉᑕᐅᑉ ᐸᓂᖓ ᐱᓪᓗᒍ ᒋᓕᐊᑎᒥᐅᖅ ᐅᓪᓗᓂᒃ ᓯᑕᒪᓂᒃ ᐊᕐᕌᒍᑕᒫᑦ.
Currently Selected:
ᐃᓗᐊᖅᓮᔩᑦ ᐊᒡᓚᖏᑦ 11: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
