ᕼᐆᓯᐊᑉ ᐊᒡᓚᖏᑦ 10

1ᐃᓴᕆᐊᓕ ᓯᐊᒻᒪᖓᑦᓯᐊᖅᑑᓪᓗᓂ ᕔᓂᓕᒃᓴᐅᕗᖅ; ᐱᕈᖅᑎᑦᓯᒐᒥ ᐃᒻᒥᓄᑐᐊᖅ ᐊᑐᖅᐳᖅ. ᐱᕈᖅᑐᖏᑦ ᐅᓄᖅᓯᕙᓪᓕᐊᖕᒪᑕ ᑐᓂᕐᕈᓯᕐᕕᓕᐅᖅᐸᓪᓕᐊᕗᖅ ᐅᓄᖅᑐᓂᒃ; ᓄᓇᖓᓗ ᐊᔪᖅᓴᕈᓐᓁᖅᐸᓪᓕᐊᖕᒪᑦ, ᓇᐸᔪᓂᒃ ᒎᑎᓐᖑᐊᓂᒃ ᐋᖅᑭᒃᓱᐃᕙᓪᓕᐊᕗᖅ. 2ᐆᒻᒪᑎᖏᑦ ᑕᒻᒪᖅᑎᑦᓯᕗᑦ; ᒫᓐᓇ ᐸᓯᔭᒃᓴᐅᓂᒃᑯᑦ ᐃᓅᓂᐊᓕᖅᐳᑦ. ᑐᓂᕐᕈᓯᕐᕕᖁᑎᖏᑦ ᐊᑕᓂᐅᑉ ᓯᖁᑦᑎᕐᖕᓂᐊᖅᐰᑦ, ᐅᔭᕅᓪᓗ ᓇᐸᔪᑦ ᒎᑎᓐᖑᐊᑦ ᐊᓯᕈᖅᓗᒋᑦ.

3ᑖᒃᑯᐊᓕ ᐅᖃᕐᖕᓂᐊᖅᐳᑦ: “ᐊᖓᔪᖅᑳᕐᔪᐊᖃᖏᓐᓇᑦᑕ, ᐊᑕᓂᕐᓗ ᓯᕘᕋᒋᓐᖏᓚᕗᑦ, ᐊᖓᔪᖅᑳᕐᔪᐊᖃᕈᑦᑕᓕ ᐅᕙᑦᑎᓐᓄᑦ ᖃᓄᐃᓕᐅᕋᔭᕐᖕᒪᑦ?” 4ᐅᖃᐅᓯᑐᐃᓐᓇᕐᖕᓄᑦ ᐅᖃᓪᓚᐅᖅᐳᑦ; ᐊᖏᖃᑎᒌᒍᑎᓕᐅᖅᓗᑎᒡᓗ ᐊᑐᖏᑦᑐᓂᒃ; ᑍᒤᒻᒪᑦ ᐃᖅᑲᖅᑐᖅᑕᐅᑦᔪᑎᒃᓴᖏᑦ ᓴᖅᑭᓐᓂᐊᖅᐳᑦ ᑐᖁᓐᓇᖅᑐᑐᑦ ᐱᕈᕐᖕᓂᖅᓗᒃᑐᑎᑐᑦ ᐱᕈᖅᓰᕕᖕᒥ ᓄᓇᓕᕆᐊᖑᓯᒪᔪᒥ.

5ᓴᒥᐊᕆᐊᕐᖕᒥᐅᑦ ᓴᔪᒍᒫᖅᐳᑦ ᓄᕐᕋᓐᖑᐊᒥᒃ ᐱᑦᐂᕕᓐᒦᑦᑐᒥᒃ ᐅᒡᒍᐊᖅᓗᑎᒃ. ᐃᓄᖏᑦ ᕿᒃᓵᒍᑎᖃᕈᒫᖅᐳᑦ ᑖᑦᓱᒥᖓ, ᒎᑎᓐᖑᐊᒧᓪᓗ ᑐᓂᕐᕈᓯᖅᑎᑦᓯᔩᑦ ᕿᒃᓵᒍᑎᖃᕈᒫᖅᐳᑦ ᑖᑦᓱᒥᖓ, ᐱᓐᓇᕐᖕᓇᖅᑐᖁᑎᖓᑕ ᕿᒪᖕᒪᒋᑦ. 6ᒎᑎᓐᖑᐊᖅ ᐊᐅᓪᓚᕈᑦᔭᐅᔪᒫᖅᐳᖅ ᐊᓯᕆᐊᒧᑦ, ᐂᑦᑑᑎᒋᔭᐅᔪᑎᑐᑦ ᐊᖓᔪᖅᑳᕐᔪᐊᒧᑦ ᐊᔪᖏᑦᑐᕐᔪᐊᕐᖕᒧᑦ. ᐃᕗᕅᒥᓕ ᑲᓐᖑᓱᒃᑎᑕᐅᔪᒫᖅᐳᖅ, ᐃᓴᕆᐊᓕᓗ ᑲᓐᖑᓱᒃᑎᑕᐅᔪᒫᕆᕗᖅ ᒎᑎᓐᖑᐊᒥᓄᑦ. 7ᓴᒥᐊᕆᐊᑉ ᐊᖓᔪᖅᑳᕐᔪᐊᖓ ᐲᖅᑕᐅᔪᒫᖅᐳᖅ, ᕿᔪᒃᑐᑦ ᐅᓕᒻᒪᑯᑐᑦ ᐃᒫᓂ ᓴᕐᕙᐅᔪᑎᑐᑦ. 8#ᓘᑲᓯ 23:30; ᑕᑯᑎ 6:16.ᐂᕙᓐᒥᐅᑦ ᐱᒻᒪᕆᖁᑎᖏᑕ ᐃᓂᖏᑦ, ᐃᓴᕆᐊᓕᐅᓪᓗ ᐊᔪᕐᖕᓂᖏᑦ, ᐊᓯᕈᖅᑕᐅᔪᒫᖅᐳᑦ. ᐅᖅᐲᑦ ᑲᑭᓐᓇᖅᑐᓖᑦ ᐱᕈᕐᖕᓂᖅᓗᒃᑐᓪᓗ ᐱᕈᕈᒫᖅᐳᑦ ᑐᓂᕐᕈᓯᕐᕕᖏᓐᓂ; ᖃᖅᑲᓄᓪᓗ ᐅᖃᕈᒫᖅᐳᑦ, “ᐅᓕᒃᑎᒍᑦ!” ᐱᖑᕐᖕᓄᓪᓗ, “ᑲᑕᒡᕕᒋᑎᒍᑦ!”

ᐊᑕᓂᐅᑉ ᓇᓗᓁᖅᓯᓂᖓ ᐃᖅᑲᖅᑐᐃᓂᒃᓴᒥᓂᒃ ᐃᓴᕆᐊᓕᒥᒃ

9 # ᐃᓗᐊᖅᓮᔩᑦ 19:1-30. “ᐃᓴᕆᐊᓕ, ᐊᔪᖅᑐᓕᓯᒪᕗᑎᑦ ᒋᐱᐊᑉ ᐅᓪᓗᖏᓐᓂᑦ ᐱᒋᐊᖅᓗᑎᑦ, ᑕᕝᕙᓂᓗ ᑲᔪᓯᕗᑦ ᓱᓕ. ᐅᓇᑕᕐᖕᓂᒃᑯᑦ ᒋᐱᐊᒻ ᓵᓚᐅᓂᐊᓐᖏᓛᑦ? 10ᐱᒋᐊᕈᒪᓕᕈᒃᑭᑦ ᓱᒋᐊᕈᒫᖅᐸᒃᑲ; ᐃᓄᐃᓪᓗ ᑲᑎᔪᒫᖅᐳᑦ ᓵᓐᖓᔪᒪᓗᑎᒃ ᑖᒃᑯᓄᖓ ᓱᒋᐊᖅᑕᐅᓕᖅᐸᑕ ᒪᕐᕈᐃᖅᓲᑎᓪᓗᐊᒥᒃ ᐊᔪᖅᑐᓕᓂᖏᑦ ᐱᓪᓗᒋᑦ.

11“ᐃᕗᕅᒥᓕ ᐱᔭᕆᐅᖅᓴᔭᐅᓯᒪᕗᖅ ᐃᒻᒧᒃᓯᐅᒐᖅᑐᑦ, ᖁᕕᐊᒋᔭᖃᖅᑐᑐᑦ ᑐᓪᓕᕋᕐᖕᓂᕐᖕᒥᒃ ᓂᐊᖂᔭᒃᓴᒥᒃ, ᖁᖓᓯᑦᓯᐊᖓ ᖁᖓᓯᕈᓯᓚᐅᖅᐸᕋ ᐅᓂᐊᕈᑎᒃᓴᖓᓂᒃ; ᐃᕗᕅᒥ ᐅᓂᐊᖅᑎᓐᓂᐊᖅᐸᕋ, ᔫᑕᓗ ᐱᕈᖅᓰᕕᒃᓴᓂᒃ ᐃᑎᖅᓴᓕᐅᕆᔪᒫᖅᐳᖅ, ᔧᑰᓪᓗ ᓄᓇ ᐊᑐᐃᓐᓇᕈᖅᑎᑦᓱᒫᖅᐹ. 12#ᔨᕆᒤᐊ 4:3.ᑲᓐᖓᖅᓱᐃᒋᑦᓯ ᓇᖕᒥᓂᑦᓯᓐᓄᑦ ᐃᓱᐊᕐᖕᓂᕐᖕᒥᒃ, ᑲᑎᖅᓱᐃᓗᓯᓗ ᓇᒡᓕᖕᓂᐅᑉ ᓱᖁᓯᔪᐃᑦᑑᑉ ᐱᕈᖅᑎᑕᖏᓐᓂᒃ; ᓄᓇᓯᓗ ᓱᕐᕋᒃᓯᒪᖏᑦᑐᖅ ᐃᑎᖅᓴᓕᐅᖅᓯᐅᒃ, ᐊᑕᓂᕐᖕᒥᒃ ᕿᓂᕐᖕᓂᖅ ᓇᓪᓕᐅᑎᕗᖅ, ᑖᓐᓇ ᕾᒍᓂ ᑯᕝᕕᓯᖁᓪᓗᒍ ᐱᐅᓕᔭᐅᓂᕐᖕᒥᒃ. 13ᐃᑎᖅᓴᓕᐅᕆᓚᐅᖅᐳᓯ ᐱᕈᖅᓰᕕᒃᓴᓂᒃ ᐱᐅᖏᑦᑐᓂᒃ, ᑲᑎᖅᓱᐃᓪᓗᓯᓗ ᓈᒻᒪᖏᑦᑐᓕᓂᕐᖕᒥᒃ, ᓂᕆᓚᐅᕋᑦᓯ ᓴᒡᓗᓂᒃᑯᑦ ᐱᕈᖅᑐᓂᒃ. ᑕᑎᖃᓚᐅᕋᑦᓯ ᓇᖕᒥᓂᖅ ᐱᔪᓐᓇᖅᑐᖁᑎᑦᓯᓐᓂᒃ ᐅᓄᖅᑐᕐᔪᐊᓂᒡᓗ ᐅᓇᑕᕐᖕᓂᕐᖕᒧᑦ ᐱᔪᓐᓇᖅᑐᐊᓗᖕᓂᒃ. 14ᑍᒤᒻᒪᑦ ᐅᓇᑕᕐᖕᓂᕐᖕᒥᒃ ᓴᖅᑭᑦᑐᖃᕈᒫᖅᐳᖅ ᐃᓅᖃᑎᑦᓯᓐᓂ, ᓴᐴᓗᑕᓕᖁᑎᓕᒫᓯᓗ ᐊᓯᕈᖅᑕᐅᔪᒫᖅᐳᑦ, ᓵᓪᒪᓂᐅᑉ ᐅᓇᑕᖅᑎᓪᓗᒋᑦ ᐊᓯᕈᐃᓚᐅᖅᓯᒪᓂᖓᑐᑦ ᐱᑦ-ᐊᕐᐱᐅᓪᒥᒃ; ᐊᓈᓇᐅᔪᑦ ᒪᓂᖅᑲᒦᑦᑐᑦ ᑐᖁᑕᐅᓚᐅᖅᐳᑦ ᕿᑐᕐᖓᑎᒃ ᐃᓚᒋᓪᓗᒋᑦ. 15ᑍᒤᑦᓱᒫᕆᕗᓯᑦᑕᐅᖅ, ᐱᑎᓕᒥᐅᖑᔪᓯ, ᐱᐅᖏᑦᑐᓕᓂᕐᔪᐊᑎᑦ ᐱᓪᓗᒋᑦ. ᐊᓄᕆᕐᔪᐊᕐᖕᒧᑦ ᐃᓴᕆᐊᓕᐅᑉ ᐊᖓᔪᖅᑳᕐᔪᐊᖓ ᐊᓯᕈᖅᑕᐅᒻᒪᕆᒍᒫᖅᐳᖅ.”

Currently Selected:

ᕼᐆᓯᐊᑉ ᐊᒡᓚᖏᑦ 10: EAIB

Highlight

Copy