ᒨᓯᓯ ᓯᕗᓪᓖᑦ 47
47
1ᑕᕝᕙ ᔫᓯᐱ ᐰᕉᒧᐊᕐᐳᖅ ᐅᖃᐅᑎᓪᓗᒍᓗ, “ᐊᑖᑕᒐ ᖃᑕᓐᖑᑎᒃᑲᓗ, ᐆᒪᔪᖁᑎᓕᒫᖏᓪᓗ ᑕᒪᕐᒥᒃ ᑲᑎᓐᖓᔪᑦ ᐅᓄᕐᑐᕐᔪᐊᓪᓗ ᐱᖁᑎᓕᒫᖏᓪᓗ ᓄᓇᒥᑦ ᑬᓇᓂᒥᑦ ᑎᑭᑉᐳᑦ; ᓄᓇᒦᓕᕐᐳᓪᓗ ᒎᓯᓂᒥ.” 2ᐊᖓᔪᒥᓗ ᐃᓚᖏᓐᓂᒃ ᑕᓪᓕᒪᓂᒃ ᐰᕉᒧᐊᖃᑎᖃᓚᐅᕐᐳᖅ. 3ᐰᕉᓪᓗ ᔫᓯᐱᐅᑉ ᐊᖓᔪᖏᑦ ᐅᖃᐅᑎᕔᑦ, “ᓱᓇᒥᒃ ᐱᓇᓱᐊᒐᖃᕐᐱᓰ?”
ᑖᒃᑯᐊ ᐰᕉᒧᑦ ᑭᐅᕗᑦ, “ᐃᓕᖕᓄᑦ ᐱᔨᐅᕗᒍᑦ ᓰᐱᓕᕆᔨᐅᓪᓗᑕ, ᓯᕗᓕᕗᑦ ᒪᓕᒡᓗᒋᑦ.” 4ᐰᕉᒧᓪᓗ ᐅᖃᒃᑲᓐᓂᕐᐳᑦ, “ᑕᒪᐅᓐᖓᕐᐳᒍᑦ ᐊᐅᓪᓛᕐᓗᑕ; ᐱᔨᕕᑦ ᐆᒪᔪᖁᑎᖏᑦ ᓂᕿᒃᓴᖃᕈᓐᓃᕐᒪᑕ, ᑳᖕᓇᕐᑐᕐᔪᐊᒧᑦ ᑎᑭᐅᒪᔭᐅᓗᐊᓕᕐᒪᑦ ᑬᓇᓂᐅᑉ ᓄᓇᖓ; ᒫᓐᓇᓕ ᐃᓕᖕᓄᑦ ᕿᓄᕗᒍᑦ, ᐱᔨᑎᑦ ᓄᓇᖃᕈᓐᓇᕐᑎᓚᐅᒃᑭᑦ ᓄᓇᒥ ᒎᓯᓂᒥ.” 5ᑕᕝᕙ ᐰᕉ ᔫᓯᐱᒧᑦ ᐅᖃᕐᐳᖅ, “ᐊᑖᑍᑦ ᐊᖓᔪᑎᓪᓗ ᐃᓕᖕᓄᑦ ᑎᑭᒻᒪᑕ. 6ᑕᕝᕙ ᐄᑦᔨᑉᑎᐅᑉ ᓄᓇᖓ ᐃᓕᖕᓄᑦ ᒪᓂᕗᖅ; ᐊᑖᑍᑦ ᐊᖓᔪᑎᓪᓗ ᓄᓇᑖᕐᑎᓚᐅᒃᑭᑦ ᓄᓇᐅᑉ ᐱᐅᓂᕐᐹᖓᓂ; ᓄᓇᒥ ᒎᓯᓂᒥ ᓄᓇᑖᕐᑎᓚᐅᒃᑭᑦ; ᖃᐅᔨᒪᔭᖃᕈᕕᓪᓗ ᑖᒃᑯᓇᓂ ᐱᔪᓐᓇᑦᓯᐊᕐᑐᓂᒃ, ᐆᒪᔪᖁᑎᓐᓄᑦ ᑲᒪᔨᐅᔪᓄᑦ ᐊᖓᔪᖅᑳᓐᖑᕐᑎᑦᓯᓂᐊᕐᐳᑎᑦ.”
7ᑕᕝᕙ ᔫᓯᐱᐅᑉ ᐊᑖᑕᓂ ᑕᕝᕗᓐᖓᐅᑎᒋᕚ, ᐰᕉᒧᓪᓗ ᑕᓯᐅᕐᓗᒍ, ᔧᑰᓪᓗ ᐰᕉ ᓮᒻᒪᕐᑎᑉᐹ. 8ᐰᕉᓗ ᔧᑯᒧᑦ ᐅᖃᕐᐳᖅ, “ᖃᑦᓯᓂᒃ ᐊᕐᕌᒍᖃᓕᕐᐲᑦ?”
9ᔧᑯᓗ ᐅᖃᕐᐳᖅ ᐰᕉᒧᑦ, “130ᓂᒃ ᐊᕐᕌᒍᖃᓕᕐᐳᖓ; ᐃᓅᓯᓐᓂ ᐱᐅᖏᑦᑐᓂᒃ ᐊᑐᕐᓯᒪᕗᖓ, ᓯᕗᓕᕐᒪᓗ ᐃᓅᓯᕆᓚᐅᕐᑕᖏᑕ ᓴᓂᐊᓂ ᐊᕐᕌᒍᒃᑲ ᖃᑦᓰᓐᓇᐅᓂᕐᓴᒻᒪᕆᐅᕗᑦ.” 10ᔧᑰᓪᓗ ᐰᕉ ᓮᒻᒪᕐᑎᓐᓇᒥᐅᒃ, ᑕᕝᕙᓐᖓᑦ ᐰᕉᑉ ᓇᔪᕐᑕᖓᓂᑦ ᐊᓂᕗᖅ. 11ᑕᕝᕙ ᔫᓯᐱᐅᑉ ᐊᑖᑕᓂ ᐊᖓᔪᓂᓗ, ᓄᓇᑖᕈᓐᓇᕐᑎᑉᐰᑦ ᐄᑦᔨᑉᑎᐅᑉ ᓄᓇᖓᓂ; ᓄᓇᐅᑉ ᐱᐅᓂᕐᐹᖓᓂ, ᓄᓇᒥ ᕌᒥᓯᓯᒥ, ᑍᒫᒃ ᐰᕉᑉ ᐱᖁᓚᐅᕐᒪᒍ. 12ᔫᓯᐱᐅᓪᓗ ᐊᑖᑕᓂ ᑲᒪᒋᓚᐅᕐᐹ, ᖃᑕᓐᖑᑎᓂᓗ ᐊᑖᑕᖓᑕᓗ ᐃᒡᓗᒥᐅᖃᑎᖏᑦ ᑕᒪᕐᒥᒃ ᓂᕿᒃᓴᖃᕐᑎᓪᓗᒋᑦ, ᑭᖑᕚᖏᑕ ᐅᓄᕐᓂᖏᑦ ᒪᓕᒡᓗᒋᑦ.
ᑳᖕᓇᕐᑐᕐᔪᐊᖅ
13ᓄᓇᓕᒫᒥᓕ ᓇᓂᑐᐃᓐᓇᖅ ᓂᕿᒃᓴᖃᕈᓐᓃᕐᐳᖅ; ᑳᖕᓇᕐᑐᕐᔪᐊᖅ ᐊᖏᔪᒥᒃ ᐱᕙᓪᓕᐊᖕᒪᑦ, ᐄᑦᔨᑉᑎᐅᑉ ᓄᓇᖓ ᑬᓇᓂᐅᓪᓗ ᓄᓇᖓ ᑕᒪᖏᒃ ᓴᓐᖐᓕᕙᓪᓕᐊᓕᕐᐴᒃ ᑳᖕᓇᕐᑐᕐᔪᐊᖅ ᐱᑦᔪᑎᒋᓪᓗᒍ. 14ᔫᓯᐱᓗ ᑕᒤᓐᓂᒃ ᑮᓇᐅᔭᓂᒃ ᐄᑦᔨᑉᑎᒥᑦ ᑬᓇᓂᒥᓪᓗ ᓂᐅᕕᕈᑕᐅᔪᓕᒫᓂᒃ ᑕᒤᓐᓂᒃ ᑲᑎᕐᓱᐃᓚᐅᕐᐳᖅ, ᓂᐊᖂᔭᒃᓴᓄᑦ ᓂᐅᕕᐅᑕᐅᓯᒪᔪᓂᒃ; ᑖᒃᑯᐊᓗ ᔫᓯᐱᐅᑉ ᑮᓇᐅᔧᑦ ᐰᕉᑉ ᐃᒡᓗᖓᓄᐊᕈᑎᕔᑦ. 15ᐄᑦᔨᑉᑎᐅᓪᓕ ᓄᓇᖓᓂ ᑬᓇᓂᐅᓪᓗ ᓄᓇᖓᓂ ᑮᓇᐅᔧᕈᑎᓕᕋᒥᒃ, ᐄᑦᔨᑉᑎᒥᐅᑦ ᑕᒪᕐᒥᒃ ᔫᓯᐱᒧᐊᕐᐳᑦ ᐅᖃᕐᓗᑎᒡᓗ, “ᓂᕿᒃᓴᑦᑎᓐᓂᒃ ᑐᓂᓯᕕᒋᓚᐅᕐᑎᒍᑦ; ᓱᖕᒪᑦ ᓵᖕᓂ ᐱᕐᓕᕐᑐᒃᓴᐅᕕᑖ? ᑮᓇᐅᔧᕈᑎᒐᑦᑕ.”
16ᔫᓯᐱᐅᑉ ᑭᐅᕔᑦ, “ᐆᒪᔪᖁᑎᓯ ᑐᓂᕐᕈᑎᒋᓚᐅᕐᓯᒋᒃ, ᑕᕝᕙ ᓂᕿᒃᓴᑦᓯᓐᓂᒃ ᑐᓂᓂᐊᕐᐸᑦᓯ ᑕᐅᕐᓯᐅᑎᓗᒋᑦ ᐆᒪᔪᖁᑎᑦᓯᓐᓄᑦ, ᑮᓇᐅᔧᕈᑎᑐᐊᕈᑦᓯ.” 17ᑕᕝᕙ ᐃᒻᒧᒃᓯᐅᒐᖁᑎᒥᖕᓂᒃ ᔫᓯᐱᒧᐊᕈᑦᔨᕗᑦ; ᔫᓯᐱᐅᓪᓗ ᓂᕿᒃᓴᓂᒃ ᑐᓂᓯᕕᒋᕔᑦ ᑕᐅᕐᓯᐅᑎᓪᓗᒋᑦ ᕿᒻᒥᕐᔪᐊᓄᑦ, ᐆᒪᔪᖁᑎᓄᓪᓗ ᑲᑎᓐᖓᔪᓄᑦ, ᐅᓄᕐᑐᕐᔪᐊᖑᔪᓄᑦ, ᓯᐅᑎᖅᑯᕐᑐᔪᓄᓪᓗ. ᓂᕿᒃᓴᓄᓪᓗ ᑕᒪᒃᑯᐊ ᐆᒪᔪᖁᑎᖏᑦ ᑕᐅᕐᓯᐅᑎᓚᐅᕐᐰᑦ ᑕᒫᓂ ᐊᕐᕌᒍᒥ.
18ᑕᒪᓐᓇ ᐊᕐᕌᒍᖅ ᓈᖕᒪᑦ, ᐊᕐᕌᒍᑉ ᐂᑉᐸᖓᓂ ᐅᐸᓚᐅᕆᕚᑦ ᐅᖃᐅᑎᓪᓗᒍᓗ, “ᐊᖓᔪᖅᑳᑦᑎᓐᓄᑦ ᐃᔨᕋᕐᑐᕈᒪᖏᓐᓇᑦᑕ ᑮᓇᐅᔭᓕᒫᕗᑦ ᓄᖑᒻᒪᑕ; ᐆᒪᔪᖁᑎᓕᒫᕗᓪᓗ ᑐᓂᓯᒪᓕᕋᑦᑎᒍ ᐊᖓᔪᖅᑳᑦᑎᓐᓄᑦ; ᐊᑭᓕᐅᑎᒃᓴᖃᕈᓐᓃᕐᐳᒍᑦ ᐊᖓᔪᖅᑳᑦᑎᓐᓄᑦ ᑎᒥᑦᑎᓐᓂᒃ ᐱᕈᕐᓰᕕᖁᑎᑦᑎᓐᓂᒡᓗ ᑭᓯᐊᓂ. 19ᖃᓄᐃᒻᒪᑦ ᑕᑯᓐᓇᕐᑎᓪᓗᑎᑦ ᓵᖕᓂ ᐱᕐᓕᕐᑐᒃᓴᐅᕕᑖ, ᑕᒪᑦᑕ ᐅᕙᒍᑦ ᓄᓇᕗᓪᓗ? ᓂᐅᕕᐊᕆᓚᐅᕐᑎᒍᑦ ᓄᓇᕗᓪᓗ ᓂᕿᒃᓴᖃᖁᓪᓗᑕ, ᑕᒪᑦᑕ ᐅᕙᒍᑦ ᓄᓇᕗᓪᓗ ᓯᐊᓛᖑᓗᑕ ᐱᔨᑖᕆᔭᐅᓂᐊᕋᑦᑕ ᐰᕉᒧᑦ; ᑲᓐᖓᕐᓲᑎᒃᓴᓂᒃ ᑐᓂᓯᕕᒋᓚᐅᕐᑎᒍᑦ ᐃᓅᖁᓪᓗᑕ ᐱᕐᓕᖁᓇᑕᓗ, ᐱᕈᕐᓰᕕᖁᑎᕗᓪᓗ ᐱᕈᕐᕕᐅᔪᓐᓁᓪᓕᖁᓇᒋᑦ.”
20ᑕᕝᕙ ᔫᓯᐱᐅᑉ ᐄᑦᔨᑉᑎᐅᑉ ᓄᓇᖓ ᑕᒪᕐᒥᒃ ᓂᐅᕕᐊᕆᓚᐅᕐᐹ ᐰᕉᒧᑦ; ᐄᑦᔨᑉᑎᒥᐅᑦ ᑕᒪᕐᒥᒃ ᐱᕈᕐᓰᕕᖁᑎᑎᒃ ᓂᐅᕐᕈᑎᒋᓚᕐᐰᑦ, ᑳᖕᓇᕐᑐᕐᔪᐊᒧᑦ ᑎᑭᐅᒪᔭᐅᒻᒪᕆᓕᕋᒥᒃ. ᐰᕉᓪᓗ ᓄᓇ ᑕᒪᕐᒥᒃ ᐱᑖᕆᓚᐅᕐᐹ; 21ᐃᓄᐃᓪᓗ ᔫᓯᐱᐅᑉ ᓯᐊᓛᓐᖑᕐᑎᓚᐅᕐᐰᑦ ᐄᑦᔨᑉᑎᐅᑉ ᓄᓇᖓᑕ ᑭᒡᓕᖓᓂᑦ ᐃᓱᐊᓄᑦ ᑎᑭᓪᓗᒋᑦ. 22ᑐᓂᕐᕈᓯᕐᑎᑦᓯᔩᑦ ᓄᓇᖁᑎᖏᑦ ᐊᒥᐊᒃᑯᑐᐊᖑᓚᐅᕐᐳᑦ ᓂᐅᕕᐊᕆᓚᐅᖏᒻᒪᒋᑦ; ᑐᓂᕐᕈᓯᕐᑎᑦᓯᔩᑦ ᓂᕿᒃᓴᖃᕐᑎᑕᐅᖁᓪᓗᒋᑦ ᐰᕉᒧᑦ ᐋᖅᑭᒃᑕᐅᓯᒪᓚᐅᕐᒪᑕ, ᐃᓅᑦᔪᑎᒃᓴᖃᕈᓐᓇᓚᐅᕐᐳᑦ ᐰᕉᑉ ᑐᓂᕐᕈᑎᒋᔭᖏᓐᓄᑦ; ᑍᒤᒻᒪᑦ ᓄᓇᖁᑎᒥᖕᓂᒃ ᓂᐅᕕᐅᑎᖃᕆᐊᖃᓚᐅᓐᖏᓚᑦ. 23ᑕᕝᕙ ᔫᓯᐱ ᐃᓄᖕᓄᑦ ᐅᖃᕐᐳᖅ, “ᑕᑯᒋᑦ ᐅᓪᓗᒥ ᐃᓕᑦᓯᓐᓂᒃ ᓄᓇᖁᑎᑦᓯᓐᓂᒡᓗ ᓂᐅᕕᕐᓯᒪᓕᕐᐳᖓ ᐰᕉᒧᑦ. ᑕᕝᕙ ᑲᓐᖓᕐᓲᑎᒃᓴᓯ ᐃᓕᑦᓯᓐᓄᑦ ᑐᓂᕙᒃᑲ, ᓄᓇᒧᑦ ᑲᓐᖓᕐᓲᑎᒋᓂᐊᕋᑦᓯᐅᒃ. 24ᑲᑎᕐᓱᐃᕕᒃᓴᖅ ᓇᓪᓕᐅᑎᒃᐸᑦ ᐱᕈᕐᑎᑕᓯ ᐊᕕᒡᓗᒋᑦ ᑕᓪᓕᒪᖏᑦ ᑐᓂᔭᒃᓴᕆᕙᓯ ᐰᕉᒧᑦ, ᐊᕕᒃᑕᑦᓯ ᓯᑕᒪᖏᑦ ᓇᖕᒥᓂᕐᑖᕆᔭᒃᓴᕆᕙᓯ, ᐱᕈᕐᓰᕕᖕᒧᑦ ᑲᓐᖓᕐᓲᑎᐅᖁᓪᓗᒋᑦ ᐃᓕᑦᓯᓐᓄᓪᓗ ᐃᒡᓗᒥᐅᖃᑎᑦᓯᓐᓄᓪᓗ ᓂᕿᒃᓴᐅᖁᓪᓗᒋᑦ, ᕿᑐᕐᖓᑦᓯᓐᓄᓪᓗ ᑕᒤᓐᓄᑦ.”
25ᑖᒃᑯᐊ ᐅᖃᕐᐳᑦ, “ᐃᓅᓯᑦᑎᓐᓂᒃ ᐱᐅᓕᒃᓯᓯᒪᓕᕐᐳᑎᑦ; ᐊᖓᔪᖅᑳᒃ ᐃᓕᖕᓂᒃ ᖁᕕᐊᓱᒃᑎᑦᓯᖁᓪᓗᑕ ᐰᕉᒧᑦ ᓯᐊᓛᕆᔭᐅᓂᐊᓕᕐᐳᒍᑦ ᐱᔨᒋᔭᐅᓗᑕ.” 26ᑕᕝᕙ ᔫᓯᐱ ᐱᖁᔭᓕᐅᓚᐅᕐᐳᖅ ᐄᑦᔨᑉᑎᒥᐅᑦ ᓄᓇᖁᑎᖏᑦ ᐱᓪᓗᒋᑦ, ᑕᒪᓐᓇᓗ ᓱᓕ ᐅᓪᓗᒥᒧᑦ ᐊᑐᕐᑕᐅᕗᖅ, ᓄᓇᐅᑉ ᐱᕈᕐᑎᑕᖏᑕ ᐊᕕᒡᓗᒋᑦ ᑕᓪᓕᒪᖏᑦ ᐰᕉᒧᑦ ᐱᒋᔭᐅᖁᓪᓗᒋᑦ; ᑭᓯᐊᓂ ᑐᓂᕐᕈᓯᕐᑎᑦᓯᔩᑦ ᓄᓇᖁᑎᖏᑦ ᐰᕉᒧᑦ ᐱᑖᕆᔭᐅᓚᐅᓐᖏᓚᑦ.
ᔧᑰᑉ ᑭᖑᓪᓕᕐᐹᒥᒃ ᑐᐱᕐᓲᒻᒫᓂᖓ
27ᑕᕝᕙ ᐃᓴᕆᐊᓕ ᓄᓇᖃᓚᐅᕐᐳᖅ ᐄᑦᔨᑉᑎᐅᑉ ᓄᓇᖓᓂ, ᓄᓇᒥ ᒎᓯᓂᒥ; ᑖᓐᓇᓗ ᓄᓇᒋᔭᖓᑦ ᐊᖏᒡᓕᕙᓪᓕᐊᓚᐅᕐᐳᖅ, ᐊᔪᕐᓴᖏᑦᑐᕐᔪᐊᖑᓕᕐᓗᑎᒃ ᐃᓄᒋᐊᒃᓯᕙᓪᓕᐊᓪᓗᑎᒡᓗ ᓱᒃᑲᔪᒥᒃ. 28ᔧᑯᓗ ᐄᑦᔨᑉᑎᐅᑉ ᓄᓇᖓᓃᓚᐅᕐᐳᖅ ᐊᕐᕌᒍᓂᒃ 17ᓂᒃ; ᔧᑰᓪᓗ ᐊᕐᕌᒍᖏᑦ ᑕᒪᕐᒥᒃ 147ᐅᓕᓚᐅᕐᐳᑦ. 29#ᒨᓯᓯ ᓯᕗᓪᓖᑦ 49:29-32; 50:6.ᐃᓴᕆᐊᓕᐅᓪᓕ ᐃᓅᓯᖓᑦ ᐃᓱᓕᓕᕐᒪᑦ, ᐃᕐᓂᓂ ᔫᓯᐱ ᕾᖁᓪᓗᒍ ᐅᖃᐅᑎᕚ, “ᐃᓕᖕᓄᑦ ᖁᕕᐊᒋᔭᐅᒍᒪ, ᐊᒡᒐᑎᑦ ᖁᒃᑐᕋᕐᒪ#47:29 ᐊᒡᒐᓂᒃ ᖁᒃᑐᕋᐅᑉ ᐊᑯᓐᓂᖓᓄᐊᕐᓯᓗᓂ ᐊᖏᒻᒪᕆᖕᓂᖅ ᑕᒪᓐᓇ ᐊᓯᑦᔨᕐᑕᐅᔪᓐᓇᖏᒻᒪᕆᒃᑐᖅ ᐊᑖᓄᐊᓚᐅᒃᑭᑦ, ᐅᖃᕕᒡᓗᑎᓪᓗ ᑲᔪᓯᑦᓯᐊᕐᓗᑎᑦ ᓱᓕᓂᐊᕐᓂᕋᕐᓗᑎᑦ ᐅᕙᓐᓄᑦ. ᐄᑦᔨᑉᑎᒥ ᐃᓗᕕᕐᓂᐊᕐᓇᖓ, 30ᓯᕗᓕᓐᓂᓕ ᐃᓗᕕᕐᓯᒪᖃᑕᐅᔪᒪᕗᖓ; ᐄᑦᔨᑉᑎᒥᑦ ᐊᐅᓪᓚᕈᑎᓗᖓ ᑍᒃᑯᐊ ᐃᓗᕕᕐᑕᐅᕕᒋᓯᒪᔭᖏᓐᓂ ᐃᓗᕕᕐᑕᐅᔪᒃᓴᐅᕗᖓ.”
ᔫᓯᐱᐅᑉ ᑭᐅᕚ, “ᐅᖃᐅᓯᕆᔭᑎᑦ ᐊᑐᕐᓂᐊᕐᐸᒃᑲ.”
31ᔧᑯᓗ ᐅᖃᕐᐳᖅ, “ᐊᖏᒻᒪᕆᒡᕕᒋᓕᓐᖓ”; ᑕᕝᕙ ᔫᓯᐱ ᐊᖏᒻᒪᕆᒃᐳᖅ ᑖᑦᓱᒧᖓ. ᐃᓴᕆᐊᓕᐅᓪᓗ ᓂᐊᖁᓂ ᐅᑯᕚ ᓇᓪᓚᖓᕕᖕᒥᓂ.
Currently Selected:
ᒨᓯᓯ ᓯᕗᓪᓖᑦ 47: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
