ᒨᓯᓯ ᓯᕗᓪᓖᑦ 46
46
ᔧᑰᑉ ᐃᓚᒋᔭᖏᑕᓗ ᐄᑦᔨᑉᑎᒧᐊᕐᓂᖓᑦ
1ᑕᕝᕙ ᐃᓴᕆᐊᓕ ᐊᐅᓪᓚᓕᕐᐳᖅ ᐱᖁᑎᓕᒫᓂ ᓇᒃᓴᕐᓗᒋᑦ, ᐱᐊᕐᓯᐸᒧᓪᓗ ᑎᑭᓐᓇᒥ, ᑕᕝᕙᓂᓗ ᑐᓂᕐᕈᓯᕐᐳᖅ ᐃᑯᐊᓚᑦᓯᓪᓗᓂ ᐊᑖᑕᖓᑕ ᐂᓴᑭᐅᑉ ᒎᑎᖓᓄᑦ. 2ᒎᑎᐅᓪᓗ ᐃᓴᕆᐊᓕ ᐅᖃᓪᓚᒡᕕᒋᕚ ᑕᑯᑎᑦᔪᑎᒃᑯᑦ ᐅᓐᓄᐊᖑᑎᓪᓗᒍ, ᐅᖃᕐᓗᓂ, “ᔧᑰ, ᔧᑰ!”
ᑖᓐᓇ ᑭᐅᕗᖅ, “ᐅᕙᓃᑉᐳᖓ.”
3ᑕᕝᕙ ᐅᖃᕐᐳᖅ, “ᒎᑎᐅᕗᖓ, ᐊᑖᑕᕕᑦ ᒎᑎᒋᕚᖓ; ᓯᕘᕋᓂᐊᕐᓇᒃ ᑕᐅᓄᖓ ᐄᑦᔨᑉᑎᒧᐊᕆᐊᒃᓴᖅ, ᑕᕝᕙᓂ ᐃᓅᖃᑎᒌᒡᔪᐊᓐᖑᕐᑎᓐᓂᐊᕋᒃᑭᑦ. 4ᐅᕙᖓ ᑕᐅᓄᖓ ᐄᑦᔨᑉᑎᒧᐊᖃᑎᒋᓂᐊᕐᐸᒋᑦ, ᐊᒻᒪ ᑕᒪᐅᖓ ᐅᑎᕐᑎᑦᓱᒫᕆᕙᒋᑦ; ᔫᓯᐱᐅᓪᓗ ᐊᒡᒐᖕᒥᓄᑦ ᐃᔩᒃᑭᒃ ᓯᑯᓐᖏᕐᑎᑦᓱᒫᕐᐹᒃ.”
5ᑕᕝᕙ ᔧᑯ ᐱᐊᕐᓯᐸᒥᑦ ᐊᐅᓪᓚᓯᕗᖅ; ᐃᓴᕆᐊᓕᐅᓪᓗ ᐃᕐᓂᖏᑕ ᐊᑖᑕᑎᒃ ᔧᑯ ᐃᑭᑎᑉᐹᑦ, ᕿᑐᕐᖓᑎᒡᓗ ᓄᓕᐊᑎᒡᓗ ᑕᒪᕐᒥᒃ, ᐰᕉᑉ ᓇᒃᓴᕐᑕᐅᑎᓚᐅᕐᑕᖏᓐᓂ ᑲᓕᒐᕐᓂ ᐊᒃᓴᓗᐊᓕᖕᓂ ᐃᑭᒪᕕᒃᓴᖏᓐᓂ. 6#ᐋᐴᓯᑕᓖᑦ 7:15.ᐃᒻᒧᒃᓯᐅᒐᖁᑎᑎᒡᓗ ᐱᖁᑎᓕᒫᑎᒡᓗ ᓇᒃᓴᓚᐅᕆᕔᑦ, ᑬᓇᓂᐅᑉ ᓄᓇᖓᓂ ᐱᑖᕆᓚᐅᕐᑕᑎᒃ, ᐄᑦᔨᑉᑎᒧᐊᕐᐳᑦ, ᔧᑯᓗ ᑭᖑᕚᓕᒪᓂᓗ ᑕᒪᕐᒥᒃ ᐃᓚᒋᓪᓗᒋᑦ. 7ᐃᕐᓂᖏᑦ, ᐃᕐᖑᑕᖏᓪᓗ ᐊᖑᑎᑦ ᐸᓂᖏᓪᓗ ᐃᕐᖑᑕᖏᓪᓗ ᐊᕐᓁᑦ; ᑭᖑᕚᓕᒫᓂ ᑕᒪᕐᒥᒃ ᐃᓚᒋᓪᓗᒋᑦ ᐄᑦᔨᑉᑎᒧᐊᓚᐅᕐᐳᖅ.
8ᐅᑯᐊ ᑕᕝᕙ ᐃᓴᕆᐊᓕᐅᑉ ᑭᖑᕚᖏᑦ ᐄᑦᔨᑉᑎᒧᐊᓚᐅᕐᑐᑦ, ᔧᑯᓗ ᐃᕐᓂᖏᑕᓗ ᐊᑎᖏᑦ; ᕉᐱᓂ ᔧᑰᑉ ᐊᖓᔪᒃᓯᕐᐹᖁᑎᖓ, 9ᕉᐱᓂᐅᓪᓗ ᐃᕐᓂᖏᑦ: ᕼᐊᓅᒃ, ᐸᓪᓗ, ᕼᐃᔅᕋᓐ, ᑳᕐᒥᓗ. 10ᓯᒥᐅᓂᐅᓪᓗ ᐃᕐᓂᖏᑦ: ᔨᒧᐃᐅᓪ, ᔭᒥᓐ, ᐅᕼᐋᑦ, ᔭᑭᓐ, ᔪᕼᐊᕆ, ᓴᐅᓕᓗ, ᐊᕐᓇᐅᑉ ᑬᓇᓂᒥᐅᑉ ᐃᕐᓂᖓ. 11ᓕᕔᑉ ᐃᕐᓂᖏᑦ: ᒌᕐᓲᓐ, ᑯᕼᐋᑦ, ᒥᕋᕆᓗ. 12ᔫᑕᐅᑉ ᐃᕐᓂᖏᑦ: ᐃᕆ, ᐅᓇᓐ, ᓰᓚ, ᐱᕆᔅ, ᔨᕋᓗ (ᐃᕆᓕ ᐅᓇᓐᓗ ᑐᖁᓚᐅᕐᐴᒃ ᑬᓇᓂᐅᑉ ᓄᓇᖓᓂ); ᐱᕆᔨᐅᓪᓗ ᐃᕐᓂᖏᒃ ᕼᐃᔅᕋᓐ ᕼᐊᒧᓪᓗ. 13ᐃᓴᑳᕆᐅᑉ ᐃᕐᓂᖏᑦ: ᑑᓚ, ᐳᕙ, ᔭᓲᑉ ᓯᒻᕌᓐᓗ. 14ᓯᐳᓗᓂᐅᑉ ᐃᕐᓂᖏᑦ: ᓯᕆᑦ, ᐃᓛᓐ, ᔮᓕᐅᓕᓗ. 15(ᑖᒃᑯᐊ ᑕᕝᕙ ᓕᐊᑉ ᐃᕐᓂᕆᕔᑦ, ᔧᑯᒥᑦ ᐃᕐᓂᕐᑖᕆᓚᐅᕐᑕᖏᑦ ᓄᓇᒥ ᐸᑖᓐ-ᐊᕋᒥ, ᐸᓂᖃᕐᓗᓂᓗ ᑍᓇᒥᒃ; ᑕᒪᕐᒥᒃ ᐃᕐᓂᖏᑦ ᐸᓂᖏᓪᓗ ᑲᑎᓪᓗᒋᑦ 33ᖑᓚᐅᕐᐳᑦ).
16ᒑᑎᐅᑉ ᐃᕐᓂᖏᑦ: ᔨᐱᐊᓐ, ᕼᐊᒋ, ᓲᓂ, ᐃᔅᐸᓐ, ᐃᕆ, ᐊᕋᑎ, ᐊᕆᓕᓗ. 17ᐋᓱᕆᐅᑉ ᐃᕐᓂᖏᑦ: ᐃᒻᓇ, ᐃᔅᕙ, ᐃᔅᕕ, ᐱᕅᐊ, ᓇᔭᖓᓪᓗ ᓯᕋ. ᐱᕆᐊᓪᓗ ᐃᕐᓂᖏᑦ: ᕼᐃᐸᕐ, ᒪᓪᑬᐅᓪᓗ. 18(ᑖᒃᑯᐊ ᑕᕝᕙ ᔨᐅᓪᐸᐅᑉ ᐃᕐᓂᖏᑦ, ᓔᐸᓂᐅᑉ ᓕᐊᒧᑦ ᐸᓂᖕᒥᓄᑦ ᐂᑦᑐᑎᒋᓚᐅᕐᑕᖓᒍᑦ; ᑖᒃᑯᐊ ᔧᑰᑉ ᐃᕐᓂᕆᓚᕐᐰᑦ ᑲᑎᓪᓗᒋᑦ 16ᖑᓚᐅᕐᐳᑦ ᕿᑐᕐᖓᕇᑦ).
19ᕅᒋᓕᐅᑉ ᐃᕐᓂᖏᑦ, ᔧᑰᑉ ᓄᓕᐊᖓᑕ: ᐅᑯᐊᖑᕗᑦ ᔫᓯᐱ ᐱᓐᔭᒥᓂᓗ. 20#ᒨᓯᓯ ᓯᕗᓪᓖᑦ 41:50-52.ᔫᓯᐱᓗ ᐃᕐᓂᕐᑖᓚᐅᕐᐳᖅ ᐄᑦᔨᑉᑎᐅᑉ ᓄᓇᖓᓂ ᒫᓇᓯᒥᒃ ᐃᕗᕅᒥᒥᒡᓗ, ᐊᓯᓇᒃᑯᑦ, ᐸᑎᐱᐊᕋᐅᑉ ᑐᓂᕐᕈᓯᕐᑎᑦᓯᔨᐅᔫᑉ ᐆᓂᒥᐅᑕᐅᑉ ᐸᓂᖓᒍᑦ ᕿᑐᕐᖓᕐᑖᕆᓚᐅᕐᑕᖏᑦ. 21ᐱᓐᔭᒥᓂᐅᓪᓗ ᐃᕐᓂᖏᑦ: ᐲᓚ, ᐱᑲᕐ, ᐊᓯᐱᐅᓪ, ᒋᕋ, ᓈᒪᓐ, ᐃᕼᐃ, ᕉᓴ, ᒧᐱᒻ, ᕼᐅᐱᒻ, ᐋᕐᑎᓗ. 22(ᑖᒃᑯᐊᒃ ᕅᒋᓕᐅᑉ ᐃᕐᓂᖏᒃᑕ, ᔧᑯᒃᑯᑦ ᐃᕐᓂᕐᑖᕆᓚᐅᕐᑕᖏᑕ ᐃᓚᖏᑦ ᑲᑎᓪᓗᒋᑦ ᑕᒪᕐᒥᒃ 14ᖑᓚᐅᕐᐳᑦ).
23ᑖᓂᐅᑉ ᐃᕐᓂᖓ: ᕼᐅᓯᒻ. 24ᓈᑉᑕᓕᐅᑉ ᐃᕐᓂᖏᑦ: ᔭᔨᐅᓪ, ᒍᓂ, ᔨᔨᕆ, ᓯᓕᒥᓗ. 25(ᑖᒃᑯᐊ ᐱᓪᕼᐊᐅᑉ ᐃᕐᓂᕆᓚᐅᕐᐰᑦ ᓔᐸᓂᐅᑉ ᑐᓂᓚᐅᕐᑕᖓᑕ ᕅᒋᓕᒧᑦ ᐸᓂᖕᒥᓄᑦ, ᑖᒃᑯᐊᓗ ᐃᕐᓂᕐᑖᕆᓚᐅᕐᐰᑦ ᔧᑯᒥᑦ ᑲᑎᓪᓗᒋᑦ 7ᐅᓚᐅᕐᐳᑦ).
26ᑖᒃᑯᐊ ᑕᕝᕙ ᔧᑰᑉ ᐃᓚᖏᑦ ᐃᓚᒋᓚᐅᕐᑕᖏᑦ ᐄᑦᔨᑉᑎᒧᐊᕐᑎᓪᓗᒋᑦ, ᑖᒃᑯᐊ ᓇᖕᒥᓂᕆᓪᓗᒋᑦ ᑭᖑᕚᕆᓚᐅᕐᐰᑦ, ᔧᑰᑉ ᐅᑯᐊᖏᑦ ᐃᕐᓂᖏᑦᑕ ᓄᓕᐊᖏᑦ ᐃᓚᐅᑎᓐᓇᒋᑦ, ᑲᑎᓪᓗᒋᑦ ᑕᒪᕐᒥᒃ 66ᐅᓚᐅᕐᐳᑦ; 27#ᐋᐴᓯᑕᓖᑦ 7:14.ᔫᓯᐱᐅᓪᓕ ᐃᕐᓂᖏᒃ ᐄᑦᔨᑉᑎᒥ ᐃᕐᓂᕐᑖᕆᓚᐅᕐᑕᖏᒃ, ᒪᕐᕉᓚᐅᕐᐴᒃ; ᔧᑰᑉ ᐃᒡᓗᒥᐅᖃᑎᓕᒫᖏᑦ ᑕᒪᕐᒥᒃ ᑲᑎᓪᓗᒋᑦ ᐄᑦᔨᑉᑎᒧᐊᓚᐅᕐᑐᑦ 70ᐅᓚᐅᕐᐳᑦ.
ᔧᑰᑉ ᐃᓚᒋᔭᖏᑕᓗ ᐄᑦᔨᑉᑎᒦᓐᓂᖓᑦ
28ᔫᑕᓗ ᑎᓕᕚ ᓯᕗᓂᕐᒥᓂ ᔫᓯᐱᒧᐊᖁᓪᓗᒍ, ᖃᐅᔨᑎᑕᐅᔪᒪᓪᓗᓂ ᒎᓯᓂᓕᐊᕆᐊᑉ ᐊᖅᑯᑎᖓᓂᒃ; ᑕᕝᕙ ᓄᓇᒧᑦ ᒎᓯᓂᒧᑦ ᑎᑭᓚᐅᕐᐳᑦ. 29ᑕᕝᕙ ᔫᓯᐱ ᐊᒃᓴᓗᐊᓕᖁᑎᒥᓄᑦ ᐸᕐᓇᒃᑲᒥ ᐊᑖᑕᓂ ᐃᓴᕆᐊᓕ ᐅᐸᓕᕐᐹ ᓄᓇᒧᑦ ᒎᓯᓂᒧᑦ; ᑕᕝᕗᖓ ᐸᕐᕆᐊᕈᒪᓪᓗᒍ, ᑲᑎᒐᒥᐅᒡᓗ ᖁᖓᓯᖓᒍᑦ ᐃᕿᑉᐹ, ᕿᐊᓕᕐᐴᒡᓗ ᐃᕿᒻᒥᐅᑎᓪᓗᑎᒃ ᐊᑯᓂ. 30ᐃᓴᕆᐊᓕᓗ ᐅᖃᕐᐳᖅ ᔫᓯᐱᒧᑦ, “ᒫᓐᓇ ᑐᖁᔪᓐᓇᕐᓯᕗᖓ, ᑮᓁᑦ ᑕᑯᒐᒃᑯ ᖃᐅᔨᓪᓗᖓᓗ ᓱᓕ ᐆᒪᒐᕕᑦ.”
31ᑕᕝᕙ ᔫᓯᐱ ᖃᑕᓐᖑᑎᒥᓄᑦ ᐊᑖᑕᖓᑕᓗ ᐃᒡᓗᒥᐅᖃᑎᖏᓐᓄᑦ ᐅᖃᕐᐳᖅ, “ᐰᕉᒧᐊᕐᓂᐊᕐᐳᖓ ᐅᖃᐅᑎᓗᒍᓗ, ‘ᖃᑕᓐᖑᑎᒃᑲ ᐊᑖᑕᒪᓗ ᐃᒡᓗᒥᐅᖃᑎᖏᑦ, ᓄᓇᒥ ᑬᓇᓂᒦᓚᐅᕐᑐᑦ ᐅᕙᓐᓄᑦ ᑎᑭᓯᒪᓕᕐᐳᑦ; 32ᑖᒃᑯᐊ ᐊᖑᑏᑦ ᓰᐱᓕᕆᔨᐅᕗᑦ, ᐃᒻᒧᒃᓯᐅᒐᓕᕆᔨᐅᓯᒪᓪᓗᑎᒡᓗ; ᐆᒪᔪᖁᑎᒥᓂᒡᓗ ᐅᓄᕐᑐᓂᒃ, ᐊᓯᖏᓐᓂᒡᓗ ᐆᒪᔪᖁᑎᒥᓂᒃ ᐅᓄᖏᓐᓂᕐᓴᓂᒃ ᑕᒤᓐᓂᒃ ᐱᖁᑎᓕᒫᒥᖕᓂᒃ ᓇᒃᓴᓚᐅᕐᐳᑦ.’ 33ᐰᕉᓪᓕ ᕾᖁᓕᕐᐸᓯ, ᐊᐱᕆᒃᐸᓯᓗ, ‘ᓱᓇᒥᒃ ᐱᓇᓱᐊᒐᖃᕐᐱᓰ?’ 34ᑭᐅᔪᒃᓴᐅᕗᓯ, ‘ᐱᔨᐅᕗᒍᑦ ᐃᓕᖕᓄᑦ ᐊᑯᓂᓂᑦ ᑍᒪᓐᖓᑦ ᐃᓅᓱᒃᑑᓂᑦᑎᓐᓂᑦ ᒫᓐᓇᒧᑦ ᑎᑭᓪᓗᒍ ᐃᒻᒧᒃᓯᐅᒐᓕᕆᔨᐅᕗᒍᑦ, ᑕᒪᑦᑕ ᓯᕗᓕᕆᓚᐅᕐᑕᕗᓪᓗ,’ ᑍᒫᒃ ᑕᕝᕙᓂ ᓄᓇᒥ ᒎᓯᓂᒥ ᓄᓇᖃᕐᑎᑕᐅᔪᓐᓇᖁᓪᓗᓯ; ᑕᒪᕐᒥᒃ ᓰᐱᓕᕆᔨᓕᒫᑦ ᓇᕐᕈᓇᕐᑑᖕᒪᑕ ᐄᑦᔨᑉᑎᒥᐅᓄᑦ.”
Currently Selected:
ᒨᓯᓯ ᓯᕗᓪᓖᑦ 46: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
