ᒨᓯᓯ ᓯᕗᓪᓖᑦ 45
45
ᔫᓯᐱᐅᑉ ᑭᓇᐅᓂᕐᒥᓂᒃ ᐅᖃᐅᑦᔨᓂᖓ ᐊᖓᔪᒥᓂᒃ
1 #
ᐋᐴᓯᑕᓖᑦ 7:13. ᑕᕝᕙ ᔫᓯᐱ ᐃᒻᒥᓂᒃ ᐱᓯᒪᔪᓐᓁᓪᓕᕗᖅ ᑕᕝᕙᓂ ᓇᔫᑎᔪᑦ ᑕᒪᕐᒥᒃ ᓵᖏᓐᓂ; ᐅᖃᕐᐳᖅ, “ᑕᕝᕙᓃᑦᑐᓕᒫᑦ ᐊᓂᓚᐅᕐᓕᑦ.” ᑕᕝᕙ ᔫᓯᐱ ᐊᑕᐅᓯᕐᒧᓪᓘᓐᓃᑦ ᓇᔪᕐᑕᐅᔪᓃᓚᐅᕐᐳᖅ ᐃᒻᒥᓂᒃ ᖃᐅᔨᔭᐅᑎᓕᕐᑎᓪᓗᒍ ᐊᖓᔪᒥᓄᑦ. 2ᓂᐱᖅᑯᕐᑐᓪᓗᓂᓗ ᕿᐊᓕᕐᐳᖅ, ᐄᑦᔨᑉᑎᒥᐅᓂᑦ ᐊᒡᓛᑦ ᑐᓵᔭᐅᓪᓗᓂ, ᐰᕉᑉ ᐃᒡᓗᒥᐅᖃᑎᖏᓐᓂᓪᓗ ᑐᓵᔭᐅᒋᓪᓗᓂ. 3ᔫᓯᐱᓗ ᐅᖃᓕᕐᐳᖅ ᐊᖓᔪᒥᓄᑦ, “ᔫᓯᐱᐅᕗᖓ; ᐊᑖᑕᒐ ᓱᓕ ᐃᓅᕚ?” ᐊᖓᔪᖏᑕᓕ ᑭᐅᔪᓐᓇᓐᖏᓛᑦ, ᖃᓂᓐᖎᓗᐊᕐᓂᑯᒥᖕᓄᑦ ᖁᐊᕐᓵᖓᓕᕋᒥᒃ. 4ᑕᕝᕙ ᔫᓯᐱᐅᑉ ᐊᖓᔪᓂ ᐅᖃᐅᑎᕔᑦ, “ᒪᐅᖓ ᖃᒡᓕᒋᐊᓚᐅᕆᑦᓯ.” ᑖᒃᑯᐊᓗ ᕾᖕᒪᑕ. ᐅᖃᕐᐳᖅ, “ᔫᓯᐱᐅᕗᖓ ᖃᑕᓐᖑᑎᓯ, ᑖᓐᓇᐅᕗᖓ ᓂᐅᕐᕈᑎᒋᓚᐅᕐᑕᓯ ᐄᑦᔨᑉᑎᒧᑦ. 5ᒫᓐᓇᓕ ᑲᑉᐱᐊᓱᒃᑍᓕᒋᑦᓯ, ᐃᓕᑦᓯᓐᓂᒡᓘᓐᓃᑦ ᓂᓐᖓᐅᑎᓂᐊᕋᓯ, ᑕᒪᐅᖓ ᐅᕙᓐᓂᒃ ᓂᐅᕐᕈᑎᖃᓚᐅᕐᓂᓯ ᐱᑦᔪᑎᒋᓗᒍ; ᒎᑎᐅᓪᓕ ᓯᕗᓂᑦᓯᓐᓂ ᑎᓕᓚᐅᕐᐹᖓ ᐃᓄᓕᒫᓂᒃ ᐱᐅᓕᓯᔪᒪᓪᓗᓂ. 6ᑳᖕᓇᕐᑐᕐᔪᐊᖃᓕᕐᒪᑦ ᐊᕐᕌᒍᖕᓂᒃ ᒪᕐᕉᖕᓂᒃ ᓄᓇᒥ; ᓱᓕᓕ ᐊᕐᕌᒍᓂᒃ ᑕᓪᓕᒪᓂᒃ ᐱᕈᕐᓰᕕᖕᒥ ᑲᓐᖓᕐᓱᐃᕕᒃᓴᐅᓂᐊᖏᒻᒪᑦ ᐱᕈᕐᑐᕕᓂᕐᓂᒡᓗ ᑲᑎᕐᓱᐃᕕᒃᓴᐅᓂᐊᕋᓂ. 7ᒎᑎᐅᓪᓕ ᓯᕗᓂᑦᓯᓐᓂ ᑕᒪᐅᖓ ᑎᓕᓚᐅᕐᐹᖓ ᓄᓇᒥ ᑕᒫᓂ ᐊᓐᓇᖁᓪᓗᓯ, ᐃᓅᔪᓐᓇᖁᓪᓗᓯᓗ ᐊᖏᔪᕐᔪᐊᒥᒡᓗ ᓴᐳᑎᔭᐅᖁᓪᓗᓯ. 8ᑕᕝᕙ ᐃᓕᑦᓯᓐᓂᐅᖏᑦᑐᖅ ᑕᒪᐅᖓ ᑎᓕᔭᐅᓚᐅᕐᐳᖓ, ᒎᑎᐅᓪᓕ; ᑖᑦᓱᒪᓗ ᐊᑖᑕᒋᔭᐅᑎᓕᓚᐅᕐᐹᖓ ᐰᕉᒧᑦ, ᐃᒡᓗᒥᓄᓪᓗ ᐊᖓᔪᖅᑳᓐᖑᕐᑎᓪᓗᓂᖓ ᐄᑦᔨᑉᑎᐅᓪᓗ ᓄᓇᓕᒫᖓᓄᑦ ᑕᒤᓐᓄᑦ ᐊᐅᓚᑦᓯᔨᓐᖑᕐᑎᓪᓗᓂᖓ.
9 #
ᐋᐴᓯᑕᓖᑦ 7:14. “ᐊᑍ ᑐᐊᕕᕐᓗᓯ ᐊᑖᑕᒐ ᐅᐸᓕᕐᓯᐅᒃ ᐅᖃᐅᑎᓗᒍᓗ, ‘ᔫᓯᐱ ᐃᕐᓃᑦ ᐅᖃᕐᐳᖅ, ᒎᑎᐅᑉ ᐊᖓᔪᖅᑳᓐᖑᕐᑎᓯᒪᕚᖓ ᐄᑦᔨᑉᑎᐅᑉ ᓄᓇᓕᒫᖓᓄᑦ ᑕᒤᓐᓄᑦ; ᑕᒪᐅᖓ ᐅᕙᓐᓄᑦ ᕾᓚᐅᕆᑦ, ᐊᑯᓂᓕᑦᑍᓕᓗᑎᑦ; 10ᓄᓇᒥ ᒎᓯᓂᒥ ᓄᓇᖃᕐᓂᐊᕐᐳᑎᑦ ᖃᓂᒋᔭᓐᓃᓐᓂᐊᕋᕕᑦ, ᕿᑐᕐᖓᑎᓪᓗ, ᐃᕐᖑᑕᑎᓪᓗ, ᓰᐱᖁᑎᑎᑦ, ᐆᒪᔪᖁᑎᑎᓪᓗ, ᐱᖁᑎᑎᓪᓗ ᑕᒪᕐᒥᒃ; 11ᑕᕝᕙᓂ ᓂᕿᒃᓴᖃᕐᑎᓐᓂᐊᕐᐸᒋᑦ, ᓱᓕ ᐊᕐᕌᒍᑦ ᑳᖕᓇᕐᑐᕐᔪᐊᖑᓂᐊᕐᑐᑦ ᑕᓪᓕᒪᐅᖕᒪᑕ; ᐃᕝᕕᑦ ᐃᒡᓗᒥᐅᖃᑎᑎᓪᓗ, ᓇᔪᕐᑎᓕᒫᑎᓪᓗ ᐊᔪᕐᓴᓕᖁᓇᓯ.’
12“ᐃᓕᑦᓯ ᓇᖕᒥᓂᖅ ᑕᑯᒐᑦᓯᓐᖓ, ᐱᓐᔭᒥᓂᐅᓪᓗ ᓄᑲᕐᒪ ᓇᖕᒥᓂᖅ ᑕᑯᓪᓗᓂᖓ, ᑕᕝᕙ ᐅᕙᖓ ᓇᖕᒥᓂᖅ ᖃᓂᓐᓄᖅ ᐅᖃᓪᓚᒃᐳᖓ ᐃᓕᑦᓯᓐᓄᑦ. 13ᐊᑖᑕᒐ ᐅᖃᐅᑎᔭᒃᓴᕆᕙᓯ ᑕᒫᓂ ᐄᑦᔨᑉᑎᒥ ᐊᖏᔪᒥᒃ ᐅᐱᒋᔭᐅᓂᓐᓂᒃ, ᑕᒤᓐᓂᒡᓗ ᑕᑯᓯᒪᔭᑦᓯᓐᓂᒃ; ᑐᐊᕕᕐᓗᓯ ᐊᑖᑕᒐ ᑕᒪᐅᓐᖓᐅᑎᓂᐊᓕᕐᐸᓯ.”
14ᑕᕝᕙ ᓄᑲᓂ ᐱᓐᔭᒥᓂ ᖁᖓᓯᖓᒍᑦ ᐃᕿᑉᐹ ᕿᐊᓕᕐᓗᓂᓗ; ᐱᓐᔭᒥᓂᑦᑕᐅᖅ ᕿᐊᒋᕗᖅ ᖁᖓᓯᕐᒥᒍᑦ ᐃᕿᒻᒥᐅᑎᓪᓗᑎᒃ. 15ᑕᕝᕙ ᐊᖓᔪᓕᒫᓂ ᑯᓂᒃᓗᒋᑦ ᕿᐊᖃᑎᒋᖃᑦᑕᓕᕐᐰᑦ; ᑭᖑᓂᖓᒍᓪᓗ ᐊᖓᔪᖏᑕ ᐅᖃᖃᑎᒋᓕᕐᐹᑦ.
16ᐰᕉᓪᓕ ᐃᒡᓗᖓᓂᑦ ᑐᓴᐅᒪᓕᕐᐳᑦ ᐅᖃᕐᑐᖃᕐᒪᑦ, “ᔫᓯᐱᐅᑉ ᐊᖓᔪᖏᑦ ᑎᑭᑉᐳᑦ,” ᑕᕝᕙ ᐰᕉᑉ ᐱᔨᓕᒫᖏᓪᓗ ᑕᒪᕐᒥᒃ ᖁᕕᐊᓲᑎᖃᓕᕐᐳᑦ ᑕᒪᑐᒥᖓ. 17ᐰᕉᓪᓗ ᔫᓯᐱ ᐅᖃᐅᑎᕚ, “ᐊᖓᔪᑎᑦ ᐅᖃᐅᑎᒃᑭᑦ, ‘ᐃᒤᓕᐅᕐᑐᒃᓴᐅᕗᓯ: ᐆᒪᔪᖁᑎᓯ ᓇᖕᒥᕐᑐᕐᓗᒋᑦ ᓄᓇᒧᑦ ᑬᓇᓂᒧᑦ ᐅᑎᓕᕆᑦᓯ; 18ᐊᑖᑕᓯ ᐃᒡᓗᒥᐅᖃᑎᓕᒫᓯᓗ, ᑕᒪᐅᖓ ᐅᕙᓐᓄᑦ ᕾᓕᕆᑦᓯ, ᑕᕝᕙ ᐄᑦᔨᑉᑎᐅᑉ ᓄᓇᖓᑕ ᐱᐅᓂᕐᐹᖓᓂ ᓄᓇᑖᕐᑎᓐᓂᐊᕐᐸᑦᓯ, ᓂᕆᖃᑦᑕᕐᓂᐊᕋᑦᓯ ᓄᓇᐅᑉ ᐱᕈᕐᑎᑕᕕᓂᖏᓐᓂᒃ ᐱᐅᔪᓂᒃ.’ 19ᐱᖁᔨᔪᒃᓴᐅᒋᕗᑎᑦ ᐃᒫᒃ, ‘ᐃᒤᓕᐅᕐᑐᒃᓴᐅᕗᓯ: ᐊᒃᓴᓗᐊᓕᖕᓂᒃ ᑲᓕᒐᕐᓂᒃ ᓇᒃᓴᕐᓂᐊᕐᐳᓯ ᑕᒫᓐᖓᑦ ᐄᑦᔨᑉᑎᐅᑉ ᓄᓇᖓᓂᑦ ᕿᑐᕐᖓᑦᓯᓐᓄᑦ ᓄᓕᐊᑦᓯᓐᓄᓪᓗ ᐃᓂᒃᓴᐅᓂᐊᕐᑐᓂᒃ, ᐊᑖᑕᓯᓗ ᓇᒃᓴᕐᓗᒍ, ᑕᒪᐅᖓ ᕾᔪᒃᓴᐅᕗᓯ. 20ᐱᖁᑎᓯ ᐊᓐᓂᕆᑦᑍᓕᓯᐅᒃ ᐃᓱᒪᒋᖏᒻᒪᕆᒡᓗᒋᑦ, ᐄᑦᔨᑉᑎᐅᑉ ᓄᓇᖓᓂ ᐱᐅᓂᕐᐹᖑᔪᑦ ᑕᒪᕐᒥᒃ ᐱᒋᓛᕋᑦᓯᐅᒃ.’”
21ᑕᕝᕙ ᐃᓴᕆᐊᓕᐅᑉ ᐃᕐᓂᖏᑦ ᑍᒤᓕᐅᓚᐅᕐᐳᑦ; ᔫᓯᐱᐅᓪᓗ ᑐᓂᓯᕕᒋᕔᑦ ᑲᓕᒐᕐᓂᒃ ᐊᒃᓴᓗᐊᓕᖕᓂᒃ, ᐰᕉᑉ ᐱᖁᔨᓯᒪᓂᖓ ᒪᓕᒡᓗᒍ, ᐃᖏᕐᕋᑎᓪᓗᒋᓪᓗ ᑕᖁᐊᒃᓴᖏᓐᓂᒃ ᑐᓂᓯᕕᒋᕔᑦ. 22ᐊᑐᓂᓪᓗ ᑕᒪᕐᒥᒃ ᐊᓐᓄᕌᒃᓴᖏᓐᓂᒃ ᑐᓂᓯᕕᒋᕔᑦ; ᐱᓐᔭᒥᓂᓕ ᑐᓂᓯᕕᒋᕚ ᓯᐅᓪᕕᕆᓂᒃ 300ᓂᒃ ᑮᓇᐅᔭᓂᒃ ᐊᓐᓄᕌᓂᒡᓗ ᑕᓪᓕᒤᕐᑐᕐᓗᒋᑦ ᐊᑎᔭᒃᓴᖏᓐᓂᒃ. 23ᐊᑖᑕᒥᓄᓪᓕ ᒪᑯᓂᖓ ᓇᒃᓯᐅᑦᔨᓚᐅᕐᐳᖅ: ᓯᐅᑎᖅᑯᕐᑐᔪᓂᒃ ᖁᓕᓂᒃ ᓇᖕᒪᒃᑐᓂᒃ ᐄᑦᔨᑉᑎᐅᑉ ᐱᖁᑎᖏᓐᓂᒃ ᐱᐅᔪᓂᒃ, ᓯᐅᑎᖅᑯᕐᑐᔪᓪᓗ ᐊᕐᓇᓪᓗᖏᓐᓂᒃ ᓂᐊᖂᔭᒃᓴᓂᒃ ᓇᖕᒪᒃᑐᓂᒃ ᖁᓕᓂᒃ, ᓂᐊᖂᔭᓂᒡᓗ, ᐊᑖᑕᖓᑕᓗ ᐃᖏᕐᕋᓕᕈᓂ ᑕᖁᐊᒃᓴᖏᓐᓂᒃ. 24ᑕᕝᕙ ᐊᖓᔪᓂ ᐊᐅᓪᓚᕐᑎᓚᐅᕐᐰᑦ, ᐊᐅᓪᓚᓕᕐᒪᑕᓗ ᐅᖃᐅᑎᕔᑦ, “ᐊᖅᑯᑎᑦᓯᓐᓂ ᐂᕙᐅᑎᑦᑍᓕᒋᑦᓯ.”
25ᑕᕝᕙ ᐄᑦᔨᑉᑎᒥᑦ ᒪᔪᐊᓚᐅᕐᐳᑦ, ᑎᑭᓪᓗᑎᒡᓗ ᓄᓇᒧᑦ ᑬᓇᓂᒧᑦ ᐊᑖᑕᒥᖕᓄᑦ ᔧᑯᒧᑦ. 26ᐅᖃᐅᑎᕚᓪᓗ, “ᔫᓯᐱ ᓱᓕ ᐃᓅᕗᖅ, ᐊᖓᔪᖅᑳᖑᓕᕐᓗᓂᓗ ᐄᑦᔨᑉᑎᐅᑉ ᓄᓇᖓᓄᑦ ᑕᒤᓐᓄᑦ.” ᑖᑦᓱᒪᓕ ᐆᒻᒪᑎᖓ ᐊᐅᓚᑦᔭᒃᑕᐅᓐᖏᓚᖅ, ᐅᒃᐱᕆᖏᓐᓇᒥᒋᑦ.
27ᔫᓯᐱᐅᓪᓕ ᐅᖃᐅᓯᕕᓂᓕᒫᖏᓐᓂᒃ ᐅᖃᐅᑎᖕᒪᑦᔪᒃ, ᐅᖃᐅᓯᕆᓚᐅᕐᑕᖏᓐᓂᒃ ᑖᒃᑯᓄᖓ, ᐊᒃᓴᓗᐊᓖᓪᓗ ᑲᓕᒊᑦ ᑕᑯᒐᒥᒋᑦ ᔫᓯᐱᐅᑉ ᑐᔫᑎᒋᓚᐅᕐᑕᖏᑦ ᑖᑦᓱᒧᖓ ᐃᖏᕐᕋᓕᕈᓂ ᐊᑐᒐᒃᓴᕆᓛᕐᑕᖏᑦ, ᑕᕝᕙ ᐊᑖᑕᖓᑦᑕ ᔧᑰᑉ ᐊᓂᕐᓂᖓ ᐆᒻᒪᓕᕐᐳᖅ; 28ᐃᓴᕆᐊᓕᓗ ᐅᖃᕐᐳᖅ, “ᓈᒻᒪᒃᓯᕗᖓ; ᐃᕐᓂᕋ ᔫᓯᐱ ᓱᓕ ᐆᒪᕗᖅ; ᐊᐅᓪᓚᕐᓗᖓ ᑕᑯᔭᕐᑐᕐᓂᐊᕐᐸᕋ ᑐᖁᓚᐅᖅᑳᕐᓇᖓ.”
Currently Selected:
ᒨᓯᓯ ᓯᕗᓪᓖᑦ 45: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
