ᒨᓯᓯ ᓯᕗᓪᓖᑦ 44
44
ᐃᒥᐅᑎᐅᑉ ᐊᓯᐅᔨᔭᐅᓂᖓ
1ᑕᕝᕙ ᑎᓕᓯᕗᖅ ᐃᒡᓗᒥᓂ ᐱᔨᒥᓂᒃ, “ᐊᖑᑏᑦ ᐃᒃᐱᐊᕐᔪᖁᑎᖏᑦ ᓂᕿᒃᓴᓂᒃ ᑕᑕᑎᕐᓯᐅᒃ, ᓇᒃᓴᕐᓯᔪᓐᓇᕐᓂᓕᒫᖏᑦ ᒪᓕᒡᓗᒋᑦ, ᐊᖑᑎᓪᓗ ᑮᓇᐅᔭᖏᑦ ᐃᒃᐱᐊᕐᔪᖁᑎᖏᑕ ᐹᖓᓄᑦ ᐴᕐᓗᒋᑦ, 2ᐃᒥᐅᑎᒐᓗ ᓯᐅᓪᕕᕆ, ᓄᑲᕐᓯᕐᐹᑉ ᐃᒃᐱᐊᕐᔪᖁᑎᖓᑕ ᐹᖓᓄᐊᕐᑕᐅᓗᓂ, ᑮᓇᐅᔧᓪᓗ ᐊᑭᓕᐅᑎᒃᓴᕆᓯᒪᔭᖏᑦ ᓂᐊᖂᔭᒃᓴᒧᑦ ᐴᖃᓯᐅᑎᓗᒋᑦ.” ᑖᓐᓇᓗ ᑍᒤᓕᐅᕐᐳᖅ ᔫᓯᐱᒧᑦ ᐅᖃᐅᑦᔭᐅᓂᕆᔭᕐᒥᑐᑦ. 3ᐅᓪᓛᒃᑯᑦ ᖃᐅᓕᑐᐊᕐᒪᑦ, ᐊᖑᑎᑦ ᐊᐅᓪᓚᖁᔭᐅᓕᕐᐳᑦ ᓯᐅᑎᖅᑯᕐᑐᔪᖁᑎᖏᑦ ᐃᓚᒋᓗᒋᑦ. 4ᐊᐅᓪᓚᕐᒪᑕᓗ ᓱᓕ ᐃᒡᓗᒐᓴᖕᓂᑦ ᐅᖓᓯᒃᓯᓚᐅᕐᑎᓐᓇᒋᑦ, ᔫᓯᐱ ᐱᔨᒥᓄᑦ ᐅᖃᕐᐳᖅ, “ᑐᐊᕕᕐᓗᑎᑦ, ᑖᒃᑯᐊ ᐊᖑᑏᑦ ᒪᓕᒃᓴᒃᑭᑦ; ᐊᖑᒍᕕᒋᑦ ᐅᖃᐅᑎᓂᐊᕐᐸᑎᑦ, ‘ᓱᖕᒪᑦ ᐱᐅᖏᑦᑐᒥᒃ ᐊᑭᓂᐊᕐᐱᓯ ᐱᑦᓯᐊᕐᕕᐅᑎᓪᓗᓯ? ᓱᖕᒪᑦ ᐃᒥᐅᑎᒐ ᓯᐅᓪᕕᕆ ᑎᒡᓕᓚᐅᕐᐱᓯᐅᒃ? 5ᑖᓐᓇ ᐊᖓᔪᖅᑳᒪ ᐃᒥᕈᑎᒋᖃᑦᑕᕐᒪᒍ, ᓇᓗᓇᕐᑐᓂᒡᓗ ᖃᐅᔨᓇᓱᐊᕈᑎᒋᓪᓗᒍ, ᑍᒤᓕᐅᕐᑎᓪᓗᓯ ᐱᐅᖏᑦᑐᓪᓚᕆᐊᓗᖕᒥᒃ ᐱᓇᓱᐊᕐᓯᒪᕗᓯ.’”
6ᑎᓕᔭᐅᔪᕐᓗ ᐊᓐᖑᑎᒐᒥ ᑖᒃᑯᓄᖓ, ᑕᒪᒃᑯᓂᖓ ᐅᖃᐅᓯᖃᓕᕐᐳᖅ. 7ᑖᒃᑯᐊᓗ ᐅᖃᕐᐳᑦ ᑖᑦᓱᒧᖓ, “ᓱᖕᒪᑦ ᐊᖓᔪᖅᑳᕗᑦ ᑍᒤᑦᑐᓂᒃ ᐅᖃᐅᓯᒃᓴᖃᕐᐹ? ᐅᑯᐊ ᐱᔨᑎᑦ ᑍᒤᓕᐅᕐᓂᐅᓴᖏᒻᒪᕆᒃᑐᑦ! 8ᑕᑯᒋᑦ, ᐃᒃᐱᐅᕐᔪᖁᑎᑦᑕ ᐹᖓᓂᑦ ᓇᓂᓚᐅᕐᑕᕗᑦ ᑮᓇᐅᔧᑦ ᑬᓇᓂᒥ ᓄᓇᑦᑎᓐᓂ ᐃᓕᖕᓄᑦ ᐅᑎᕐᑎᓚᐅᕐᐸᕗᑦ; ᖃᓄᕐᓕ ᑎᒡᓕᒃᑲᔭᕐᐱᑖ ᓯᐅᓪᕕᕆᒥᒃ ᒎᓗᒥᒡᓘᓐᓃᑦ ᐊᖓᔪᖅᑳᕕᑦ ᐃᒡᓗᖓᓂᑦ? 9ᓇᓪᓕᐊᓐᓂᑦ ᐱᔨᖕᓂᑦ ᓇᓂᓯᒐᔭᕈᕕᑦ, ᑖᓐᓇ ᑐᖁᑕᐅᔪᒃᓴᐅᕗᖅ, ᐅᕙᒍᓪᓗ ᑕᒪᑦᑕ ᐊᖓᔪᖅᑳᕐᓄᑦ ᓯᐊᓛᕐᑕᕆᔭᐅᓗᑕ.”
10ᑖᓐᓇ ᐅᖃᕐᐳᖅ, “ᐊᑍ ᑍᒤᓐᓂᐊᓕᕐᐳᖅ ᐅᖃᐅᓯᕆᔭᓯ ᒪᓕᒡᓗᒍ: ᑖᓐᓇ ᓇᓂᓯᕕᐅᔪᖅ ᐅᕙᓐᓄᑦ ᓯᐊᓛᕐᑕᕆᔭᐅᓂᐊᕐᐳᖅ, ᐃᓕᑦᓯᓕ ᐸᓯᔭᒃᓴᐅᓂᐊᓐᖏᓚᓯ.” 11ᑕᕝᕙ ᐊᖑᑏᑦ ᐊᑐᓂᑦ ᑐᐊᕕᕐᓗᑎᒃ ᐃᒃᐱᐊᕐᔪᖁᑎᓂ ᐊᖅᑲᕐᐰᑦ ᓄᓇᒧᑦ, ᐊᑐᓂᓗ ᐃᒃᐱᐊᕐᔪᖁᑎᑎᒃ ᒪᑐᐃᕐᑎᕐᐰᑦ. 12ᑖᑦᓱᒪᓗ ᕿᓂᕐᕕᒋᕔᑦ, ᐊᖓᔪᒃᓯᕐᐹᖓᓂᑦ ᐱᒋᐊᕐᓗᒋᑦ ᓄᑲᕐᓯᕐᐹᒧᑦ ᑎᑭᓪᓗᒍ; ᐃᒥᐅᑎᓗ ᓇᓂᔭᐅᕗᖅ ᐱᓐᔭᒥᓂᐅᑉ ᐃᒃᐱᐊᕐᔪᖁᑎᖓᓂᒃ. 13ᑕᕝᕙ ᐊᓐᓄᕌᑎᒃ ᐊᓕᒃᐰᑦ, ᐊᖑᑏᓪᓗ ᑕᒪᕐᒥᒃ ᓯᐅᑎᖅᑯᕐᑐᔪᖁᑎᒥᖕᓂᒃ ᓇᖕᒥᕐᑐᐃᒐᒥᒃ, ᐃᒡᓗᒐᓴᖕᓄᑦ ᐅᑎᕐᐳᑦ.
14ᔫᑕᓕ ᖃᑕᓐᖑᑎᖏᓪᓗ ᔫᓯᐱᐅᑉ ᐃᒡᓗᖓᓄᑦ ᑎᑭᐅᑎᕗᑦ, ᑕᕝᕙᓃᓚᐅᕐᒪᑦ ᓱᓕ; ᑖᒃᑯᐊᓗ ᑖᑦᓱᒪ ᓵᖓᓄᑦ ᐅᑯᕗᑦ ᓄᓇᒧᑦ ᐹᒻᒪᒃᓗᑎᒃ. 15ᔫᓯᐱᐅᑉ ᐅᖃᐅᑎᕔᑦ, “ᖃᓄᐃᒻᒪᑦ ᑍᒤᓕᐅᓚᐅᕐᐱᓰ? ᖃᐅᔨᒪᓐᖏᓚᓰ ᑖᓐᓇ ᐃᒥᐅᑎ ᓇᓗᓇᕐᑐᒥᒃ ᖃᐅᔨᓴᐅᑎᒋᔪᓐᓇᕋᒃᑯ?”
16ᔫᑕᓗ ᐅᖃᕐᐳᖅ, “ᖃᓄᕐᓕ ᐅᖃᕈᓐᓇᕐᐱᑖ ᐊᖓᔪᖅᑳᑦᑎᓐᓄᑦ? ᖃᓄᕐᓗ ᐅᖃᐅᓯᖃᕐᓂᐊᕐᐱᑖ? ᐅᕝᕙᓗ ᖃᓄᖅ ᐅᕙᑦᑎᓐᓂᒃ ᐸᓯᔭᒃᓴᐅᔪᓐᓃᕐᑎᑦᓱᓐᓇᕐᐱᑖ? ᒎᑎᐅᑉ ᐸᓯᔭᒃᓴᐅᓂᕐᒥᒃ ᐱᔨᑎᑦ ᓇᓂᓯᕕᒋᓯᒪᕔᑦ; ᑕᑯᒋᑦ, ᐊᖓᔪᖅᑳᒪ ᓯᐊᓛᕐᑖᕆᕚᑎᒍᑦ, ᑕᒪᑦᑕ ᐅᕙᒍᑦ ᑖᓐᓇᓗ ᐃᒥᐅᑎᖕᓂᒃ ᓇᓂᓯᕕᐅᓯᒪᔪᖅ.”
17ᑖᓐᓇᓕ ᐅᖃᕐᐳᖅ, “ᑕᒪᓐᓇ ᑍᒤᓕᐅᕐᓂᖅ ᐅᕙᓐᓂᑦ ᐅᖓᓯᒡᓕ! ᑖᓐᓇ ᑭᓯᐊᓂ ᐊᖑᑦ ᐃᒥᐅᑎᒥᒃ ᓇᓂᓯᕕᐅᔪᖅ ᐅᕙᓐᓄᑦ ᓯᐊᓛᕐᑕᕆᔭᐅᓂᐊᕐᐳᖅ; ᐃᓕᑦᓯᓕ ᐃᓱᒫᓗᖏᓪᓗᓯ ᐊᐅᓪᓚᓕᕆᑦᓯ ᐅᑎᕐᓗᓯ ᐊᑖᑕᑦᓯᓐᓄᑦ.”
ᔫᑕᐅᑉ ᓴᐳᑦᔨᓇᓱᐊᕐᓂᖓ ᐱᓐᔭᒥᓂᒥᒃ
18ᑕᕝᕙ ᔫᑕᐅᑉ ᐅᐸᒃᓗᒍ ᐅᖃᐅᑎᕚ, “ᐊᖓᔪᖅᑳᕋ, ᕿᓄᕕᒋᕙᒋᑦ ᐱᔩᑦ ᓈᓚᒡᓗᒍ ᐅᖃᕈᓐᓇᕐᑎᓚᐅᕈᒃ, ᐱᔩᓪᓗ ᓂᓐᖓᐅᑎᑦᑍᓕᓗᒍ; ᐰᕉᑐᑦ ᐃᓱᒪᓇᕋᕕᑦ. 19ᐊᖓᔪᖅᑳᒃ ᐱᔨᑎᑦ ᐊᐱᕆᓚᐅᕋᕕᒋᑦ, ᐅᖃᕐᓗᑎᑦ, ‘ᐊᑖᑕᖃᕐᐱᓰ, ᖃᑕᓐᖑᑎᖃᕐᐱᓯᓘ?’ 20ᐅᕙᒍᓪᓗ ᐊᖓᔪᖅᑳᑦᑎᓐᓄᑦ ᐅᖃᓚᐅᕐᐳᒍᑦ, ‘ᐊᑖᑕᖃᕐᐳᒍᑦ ᐃᑦᑑᓕᕐᑐᒥᒃ, ᓄᑲᖃᕐᓱᑕᓗ, ᐃᓄᑐᖃᐅᓕᕐᑎᓪᓗᒍ ᕿᑐᕐᖓᕐᑖᕆᓯᒪᔭᖓᓂᒃ; ᑖᑦᓱᒪᓗ ᐊᖓᔪᐊ ᑐᖁᖓᓕᕐᐳᖅ, ᑖᓐᓇᓗ ᑭᓯᒥ ᐊᒥᐊᒃᑯᑑᓕᕐᐳᖅ ᐊᓈᓇᖓᑕ ᐃᕐᓂᐊᕆᓯᒪᔭᖏᓐᓂᑦ; ᐊᑖᑕᖓᑕᓗ ᓇᒡᓕᒋᒻᒪᕆᒃᐹ.’ 21ᑕᕝᕙ ᐱᔨᖕᓄᑦ ᐅᖃᓚᐅᕐᐳᑎᑦ, ‘ᑖᓐᓇ ᑕᒪᐅᓐᖓᐅᑎᓚᐅᕐᓯᐅᒃ ᐅᕙᓐᓄᑦ, ᓇᖕᒥᓂᖅ ᑕᑯᓂᐊᕋᒃᑯ.’ 22ᑭᐅᓚᐅᕐᐳᒍᓪᓕ ᐃᓕᖕᓄᑦ ᐊᖓᔪᖅᑳᑦᑎᓐᓄᑦ, ‘ᑖᓐᓇ ᐃᓅᓱᒃᑐᖅ ᐊᑖᑕᒥᓂᑦ ᕿᒪᕉᑎᔪᓐᓇᓐᖏᓚᖅ, ᕿᒪᕉᑎᑐᐊᕐᐸᑦ ᐊᑖᑕᒥᓂᑦ, ᐊᑖᑕᖓ ᑐᖁᒐᔭᕐᒪᑦ.’ 23ᑕᕝᕙ ᐅᖃᓚᐅᕐᐳᑎᑦ ᐅᕙᑦᑎᓐᓄᑦ ᐱᔨᖕᓄᑦ, ‘ᓄᑲᕐᓯᕐᐹᓯ ᑕᒪᐅᓐᖓᖃᑎᒋᓂᐊᓐᖏᒍᑦᓯᐅᒃ, ᑮᓇᕋ ᑕᑯᓂᐊᕈᓐᓃᕐᐸᓯ.’
24“ᐅᑎᕋᑦᑕᓗ ᐊᑖᑕᑦᑎᓐᓄᑦ ᐱᔨᖕᓄᑦ ᑕᒪᒃᑯᓂᖓ ᐅᖃᐅᑎᓚᐅᕐᐸᕗᑦ ᐅᖃᐅᓯᕆᓚᐅᕐᑕᕐᓂᒃ. 25ᐊᑖᑕᕗᓪᓗ ᐅᖃᕐᒪᑦ, ‘ᐊᐅᓪᓚᓚᐅᕐᒥᒋᑦᓯ, ᓂᕿᒃᓴᑦᑎᓐᓂᒃ ᓂᐅᕕᕆᐊᕐᓗᓯ,’ 26ᐅᖃᓚᐅᕐᐳᒍᑦ, ‘ᐊᐅᓪᓚᕈᓐᓇᓐᖏᓚᒍᑦ ᑕᐅᓄᖓ. ᓄᑲᕗᑦ ᓄᑲᕐᓯᕐᐹ ᐃᓚᒋᓂᐊᓐᖏᑐᐊᕈᑦᑎᒍ, ᐃᓚᒋᓗᒍ ᑭᓯᐊᓂ ᐊᐅᓪᓚᕈᓐᓇᕐᐳᒍᑦ; ᑖᓐᓇ ᐊᖑᑦ ᑕᑯᔪᓐᓇᕐᓂᐊᓐᖏᓚᕗᑦ ᖃᑕᓐᖑᑎᕗᑦ ᓄᑲᕐᐹᕗᑦ ᐃᓚᒋᓂᐊᓐᖏᑐᐊᕈᑦᑎᒍ.’ 27ᑕᕝᕙ ᐱᔨᕕᑦ ᐊᑖᑕᒪ ᐅᖃᐅᑎᓚᐅᕐᐹᑎᒍᑦ, ‘ᖃᐅᔨᒪᕗᓯ ᓄᓕᐊᒪ ᐃᕐᓂᕐᑖᕐᑎᓚᐅᕐᒪᖓ ᒪᕐᕉᖕᓂᒃ; 28ᐂᑉᐸᖓᑕᓕ ᕿᒪᓚᐅᕐᐹᖓ, ᐅᖃᓚᐅᕐᐳᖓᓗ, ᓇᓗᓇᓐᖏᓚᖅ ᐊᓕᒃᑐᕐᑕᐅᓯᒪᖕᒪᑦ; ᑍᒪᓐᖓᓪᓗ ᑕᑯᓚᐅᕐᓯᒪᔪᓐᓃᕐᐸᕋ. 29ᑖᓐᓇᑦᑕᐅᖅ ᐅᕙᓐᓂᑦ ᐊᐅᓪᓚᕈᑎᓂᐊᕈᑦᓯᐅᒃ, ᖃᓄᐃᓐᓇᕐᑐᒧᑦ ᑎᑭᑕᐅᒃᐸᑦ, ᑕᕝᕙ ᓄᔭᒃᑲ ᖃᑯᕐᑕᐅᓕᕐᑐᑦ ᕿᒃᓵᕕᒃᔪᐊᕐᓂᕐᒧᑦ ᐃᓗᕕᕐᑕᐅᓕᕋᔭᕐᐳᖓ.’
30“ᑍᒤᒻᒪᑦ, ᑕᕝᕙ ᐊᑖᑕᓐᓄᑦ ᐱᔨᖕᓄᑦ ᑎᑭᒐᔭᕈᒪ, ᑖᓐᓇᓗ ᐃᓅᓱᒃᑐᖁᑎᕗᑦ ᓇᒃᓴᕐᓇᒍ, ᑕᕝᕙ ᐊᑖᑕᑦᑕ ᐃᓅᓯᖓ ᕿᓚᒃᓯᒪᓪᓚᕆᐳᖅ ᑖᑦᓱᒧᖓ ᐃᓅᓱᒃᑑᑉ ᐃᓅᓯᖓᓄᑦ, 31ᑕᑯᒍᓂ ᐃᓅᓱᑦᑑᑉ ᐃᓚᒋᔭᐅᖏᓐᓂᖓᓂᒃ ᐅᕙᑦᑎᓐᓄᑦ, ᑕᕝᕙ ᑐᖁᓂᐊᕐᐳᖅ; ᐅᕙᒍᓪᓗ ᐃᓕᖕᓄᑦ ᐱᔨᐅᔪᒍᑦ ᐊᑖᑕᑦᑕ ᐱᔨᒋᔭᕐᐱᑦ ᓄᔭᖏᑦ ᖃᑯᕐᑕᐅᓕᕐᑐᑦ ᐃᓅᓯᖓᓂᒃ ᕿᒃᓵᕕᒃᔪᐊᕐᓂᕐᒧᑦ ᐅᒋᐊᕐᓯᓂᐊᕐᐳᒍᑦ ᐃᓗᕕᕐᑕᐅᑎᓪᓗᑎᒍᓗ. 32ᐅᕙᖓ ᐃᓕᖕᓄᑦ ᐱᔨᐅᔪᖓ ᓱᓕᓂᕐᒧᑦ ᓇᓗᓁᒃᑯᑕᐅᕗᖓ ᑖᑦᓱᒪ ᐃᓅᓱᒃᑑᑉ ᐃᓅᓯᖓᓄᑦ ᐊᖏᖃᑎᖃᓚᐅᕐᐳᖓ ᐊᑖᑕᓐᓄᑦ, ᐅᖃᕐᓗᖓ, ‘ᑖᓐᓇ ᐃᓕᖕᓄᑦ ᐅᑎᕐᑎᖏᒃᑯᒃᑯ, ᑕᕝᕙ ᓵᑕᒃᓴᐅᓗᖓ ᐸᓯᔭᒃᓴᐅᓂᐊᕐᐳᖓ ᐊᑖᑕᒪ ᓵᖓᓂ ᐃᓅᓯᓕᒫᕋ ᓈᓗᒍ.’ 33ᒫᓐᓇ ᑍᒤᒻᒪᑦ, ᕿᓄᕕᒋᕙᒋᑦ ᐱᔩᑦ ᑕᕝᕙᓃᑎᖔᓚᐅᕈᒃ ᑖᑦᓱᒪ ᐃᓅᓱᒃᑑᑉ ᐃᓂᖓᓂ ᓯᐊᓛᕐᑕᕆᔭᐅᖔᕐᓗᖓ ᐊᖓᔪᖅᑳᓐᓄᑦ; ᑖᓐᓇᓕ ᐃᓅᓱᒃᑐᖅ ᖃᑕᓐᖑᑎᒥᓄᑦ ᐊᐅᓪᓚᖃᑕᐅᖔᕐᑎᓪᓗᒍ. 34ᖃᓄᕐᓕ ᐊᑖᑕᓐᓄᑦ ᐅᑎᕈᓐᓇᕋᔭᕐᐳᖔ ᐃᓅᓱᒃᑐᖅ ᓇᒃᓴᖏᓪᓗᒍ? ᓯᕘᕋᕗᖓ ᑕᑯᔭᕆᐊᒃᓴᖅ ᐱᐅᖏᑦᑐᒥᒃ ᐊᑖᑕᒐ ᑎᑭᑕᐅᑎᓪᓗᒍ.”
Currently Selected:
ᒨᓯᓯ ᓯᕗᓪᓖᑦ 44: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
