ᒨᓯᓯ ᓯᕗᓪᓖᑦ 48
48
ᔧᑰᑉ ᓮᒻᒪᕐᑎᑦᓯᓂᖓ ᐃᕗᕅᒥᒥᒃ ᒫᓇᓯᒥᒡᓗ
1ᑕᒪᑐᒪ ᑭᖑᓂᖓᒍᑦ ᔫᓯᐱ ᐅᖃᐅᑦᔭᐅᕗᖅ, “ᑕᑯᒋᑦ, ᐊᑖᑍᑦ ᖃᓂᒪᓕᕐᐳᖅ”; ᑕᕝᕙ ᐃᕐᓃᖕᓂ ᒪᕐᕉᒃ ᐃᓚᒋᓪᓗᒋᒃ, ᒫᓇᓯ ᐃᕗᕅᒥᓗ ᐅᐸᒍᑎᕗᑦ. 2ᔧᑯᓗ ᐅᖃᐅᑦᔭᐅᕗᖅ, “ᑕᑯᒋᑦ ᐃᕐᓃᑦ ᔫᓯᐱ ᕾᓕᕐᐳᖅ ᐃᓕᖕᓄᑦ”; ᐃᓴᕆᐊᓕᓗ ᐊᒃᓱᕈᕐᓗᓂ ᒪᑭᓐᓇᓱᒃᑲᒥ ᐃᒃᓯᕙᓕᕐᐳᖅ ᐃᒡᓕᕐᒥ. 3#ᒨᓯᓯ ᓯᕗᓪᓖᑦ 28:13,14.ᔧᑰᓪᓗ ᔫᓯᐱ ᐅᖃᐅᑎᕚ, “ᒎᑎ ᐊᔪᒐᖃᖏᑦᑐᖅ ᐅᕙᓐᓄᑦ ᓴᖅᑭᓚᐅᕐᒪᑦ ᓄᓇᒥ ᓚᔾᒥ ᑬᓇᓂᐅᑉ ᓄᓇᖓᓂ ᓮᒻᒪᕐᑎᓚᐅᕐᐹᖓᓗ, 4ᐅᖃᐅᑎᓪᓗᖓᓗ, ‘ᑕᑯᒋᑦ, ᑭᖑᕚᒃᓴᖃᕐᑎᓐᓂᐊᕐᐸᒋᑦ ᐃᓄᒋᐊᒃᓯᕙᓪᓕᐊᑎᓪᓗᑎᓪᓗ, ᐃᓄᒐᓴᒃᔪᐊᓐᖑᕐᑎᑦᓱᒫᕐᐸᒃᑲ, ᓄᓇᓗ ᑕᒪᓐᓇ ᐃᓕᖕᓄᑦ ᓄᓇᑖᕆᔭᐅᑎᓐᓂᐊᕐᐸᕋ ᑭᖑᓂᕐᓂᓗ ᑭᖑᕚᕐᓄᑦ ᓄᓇᒋᔭᐅᔪᒫᕐᐳᖅ ᐃᓱᖃᖏᑦᑐᒧᑦ.’
5“ᒫᓐᓇᓗ ᐃᕐᓃᒃᑭᒃ ᒪᕐᕉᒃ, ᐄᑦᔨᑉᑎᐅᑉ ᓄᓇᖓᓂ ᐃᕐᓂᕐᑖᕆᓚᐅᕐᑖᒃᑭᑦ ᑕᒪᐅᓐᖓᓚᐅᕐᑎᓐᓇᖓ, ᓇᖕᒥᓂᕆᓕᕐᐹᒃᑲᒃ; ᐃᕗᕅᒥ ᒫᓇᓯᓗ ᓇᖕᒥᓂᕆᓂᐊᓕᕐᐹᒃᑲᒃ, ᕉᐱᓂᑐᑦ ᓯᒥᐅᓂᑐᓪᓗ. 6ᐃᕐᓂᕐᑖᕆᔪᒫᕐᑕᑎᓪᓕ ᑖᒃᑯᐊᒃ ᑭᖑᕐᖓᓂ ᓇᖕᒥᓂᕐᑖᕆᔪᒫᕐᐸᑎᑦ; ᑍᔭᐅᔪᒫᕐᐳᓪᓗ ᖃᑕᓐᖑᑎᖏᑎᑐᑦ ᑭᖑᕐᖑᑦᔨᔪᒃᓴᐅᖁᓪᓗᒋᑦ ᑖᒃᑯᖕᓇᓐᖓᑦ. 7#ᒨᓯᓯ ᓯᕗᓪᓖᑦ 35:16-19.ᓄᓇᒥᓪᓕ ᐸᑖᓐᒥᑦ ᑎᑭᓐᓇᒪ, ᕅᒋᓕ ᑐᖁᓚᐅᕐᐳᖅ ᓴᓂᐊᓂ ᓇᔫᑎᑎᓪᓗᖓ ᓄᓇᒥ ᑬᓇᓂᒥ, ᐃᖏᕐᕋᑎᓪᓗᑕ ᓄᓇ ᐃᐸᕋᑕ ᓱᓕ ᐅᖓᓯᒋᓪᓗᑎᒍ ᑍᑯᓐᖓᕐᐸᓪᓕᐊᓕᕐᓗᑕ; ᑕᕝᕙᓂᓗ ᐃᓗᕕᓚᐅᕐᐸᕋ ᐃᐸᕋᑕᓕᐊᕆᐊᒥ ᐊᖅᑯᒻᒥ (ᑕᕝᕙ ᐱᑦᓕᐊᒥ).”
8ᐃᓴᕆᐊᓕᐅᓪᓕ ᔫᓯᐱᐅᑉ ᐃᕐᓂᖏᒃ ᑕᑯᒐᒥᒋᒃ, ᐅᖃᕐᐳᖅ, “ᐅᑯᐊᒃ ᑭᓇᒃᑯᒃ?”
9ᔫᓯᐱ ᐅᖃᕐᐳᖅ ᐊᑖᑕᒥᓄᑦ, “ᐅᑯᐊᒃ ᐃᕐᓃᒃᑲᒃ, ᒎᑎᐅᑉ ᑐᓂᓚᐅᕐᑕᖏᒃ ᑕᒫᓃᑎᓪᓗᖓ.”
ᑖᓐᓇᓗ ᐅᖃᕐᐳᖅ, “ᕾᑎᓚᐅᒃᑭᒃ ᐅᕙᓐᓄᑦ, ᓮᒻᒪᕐᑎᓐᓂᐊᕋᒃᑭᒃ.” 10ᐃᓴᕆᐊᓕᐅᓪᓕ ᐃᔨᖏᒃ ᑕᒃᐲᓕᓚᐅᕐᒪᑎᒃ ᐃᓄᑐᖃᐅᓂᕐᒧᑦ, ᑕᑯᑦᓯᐊᕈᓐᓁᓪᓕᕗᖅ. ᑕᕝᕙ ᔫᓯᐱᐅᑉ ᑖᑦᓱᒧᖓᕐᑎᑉᐰᒃ; ᑖᑦᓱᒪᓗ ᑯᓂᒃᓗᒋᒃ ᐃᕿᑉᐰᒃ. 11ᐃᓴᕆᐊᓕᓗ ᔫᓯᐱᒧᑦ ᐅᖃᕐᐳᖅ, “ᐃᓕᖕᓂᒃ ᑕᑯᓂᐊᕋᓱᒋᔪᓐᓃᓚᐅᕐᐳᖓ; ᑕᑯᒋᓪᓕ ᒎᑎᐅᑉ ᕿᑐᕐᖓᕐᓂᒃ ᐊᒡᓛᑦ ᑕᑯᑎᑉᐹᖓ.” 12ᑕᕝᕙ ᔫᓯᐱᐅᑉ ᔧᑰᑉ ᓵᖓᓂᑦ ᐲᕐᑎᓪᓗᓂᒋᒃ, ᐅᑯᓪᓗᓂ ᐹᒻᒪᒃᐳᖅ ᓇᑎᕐᒧᑦ ᑖᑦᓱᒪ ᓵᖓᓂ.
13ᔫᓯᐱᐅᓪᓗ ᐃᕐᓃᖕᓂ ᐅᐸᒍᑎᑎᑉᐹᒃ, ᐃᕗᕅᒥ ᐃᓴᕆᐊᓕᐅᑉ ᓴᐅᒥᖓᓄᐊᕐᑎᑉᐹ, ᒫᓇᓯᓕ ᑕᓕᕐᐱᖓᓄᐊᕐᑎᓪᓗᒍ ᖃᓂᒋᔭᖓᓄᐊᕐᑎᑉᐹᒃ ᑖᑦᓱᒧᖓ. 14ᐃᓴᕆᐊᓕᐅᓪᓕ ᑕᓖᖕᓂ ᐃᓴᒡᓗᒋᒃ ᑕᓕᕐᐱᖕᒥᓄᑦ ᓄᑲᕐᓯᐅᑉ ᐃᕗᕅᒥᐅᑉ ᓂᐊᖁᖓ ᐸᑎᒻᒥᓕᕐᐹ, ᓴᐅᒥᖕᒥᓄᓪᓗ ᐊᖓᔪᒃᓯᐅᑉ ᒫᓇᓯᐅᑉ ᓂᐊᖁᐊ ᐸᑎᒻᒥᓕᕐᓗᒍ, ᑕᓖᖕᓂ ᑭᐳᒃᑎᓪᓗᒋᒃ. 15ᔫᓯᐱᓗ ᓮᒻᒪᕐᑎᑉᐹ, ᐅᖃᕐᓗᓂ,
“ᒎᑎᐅᑉ ᐊᑖᑕᒪ ᐂᑉᕋᕼᐋᒻ ᐂᓴᑭᐅᓪᓗ ᒪᓕᓚᐅᕐᑕᖓᑕ,
ᑖᓐᓇ ᒎᑎ ᐰᕐᓯᔨᒋᓚᐅᕋᒃᑯ ᐃᓅᓯᓕᒫᓐᓂ ᐅᓪᓗᒥᒧᑦ ᑎᑭᓪᓗᒍ,
16ᐂᖏᓕᐅᓪᓗ ᓴᐳᑦᔨᔨᒋᓯᒪᔭᒪ ᐱᐅᖏᑦᑐᓂᑦ ᑕᒤᓐᓂᑦ,
ᐅᑯᐊᒃ ᐃᓅᓱᒃᑑᒃ ᓮᒻᒪᕐᑎᓪᓕᒋᒃ! ᑖᒃᑯᓇᓂᓗ ᐊᑎᕋ ᑲᔪᓯᑎᑕᐅᓕ,
ᓯᕗᓕᕐᒪᓗ ᐂᑉᕋᕼᐋᒻ ᐂᓴᑭᐅᓪᓗ ᐊᑎᖏᒃ;
ᐅᓄᕐᓯᕙᓪᓕᐊᑎᒃᑭᑦ ᐃᓄᒐᓴᒡᔪᐊᓐᖑᓕᖁᓪᓗᒋᑦ ᑕᒫᓂ ᓄᓇᒥ.”
17ᔫᓯᐱᓕ ᑕᑯᒐᒥ ᐊᑖᑕᖓᑕ ᑕᓕᕐᐱᖕᒥᓄᑦ ᐃᕗᕅᒥᐅᑉ ᓂᐊᖁᖓ ᐸᑎᒻᒥᖕᒪᒍ, ᐃᓱᐊᕐᓴᓐᖏᓚᖅ; ᐊᑖᑕᖓᑕᓗ ᑕᓕᕐᐱᐊ ᑎᒍᓪᓗᓂᐅᒃ, ᐃᕗᕅᒥᐅᑉ ᓂᐊᖁᖓᓂᑦ ᐲᕐᑎᑉᐹ ᐃᓕᖔᕐᓗᒍᓗ ᒫᓇᓯᐅᑉ ᓂᐊᖁᐊᓄᑦ. 18ᔫᓯᐱᐅᓪᓗ ᐊᑖᑕᓂ ᐅᖃᐅᑎᕚ, “ᐊᑖᑖᒃ ᑍᒫᖑᖏᒻᒪᑦ; ᐅᓇ ᐊᖓᔪᒃᓯᐅᖔᕐᐳᖅ; ᑕᓕᕐᐱᖕᓄᑦ ᐸᑎᒻᒥᖔᓚᐅᕈᒃ.”
19ᐊᑖᑕᖓᓕ ᑍᒫᒃ ᐱᔪᒪᓐᖏᓚᖅ, ᐅᖃᕐᓗᓂᓗ, “ᖃᐅᔨᒪᕗᖓ ᐃᕐᓃᒃ, ᖃᐅᔨᒪᕗᖓ; ᑖᑦᓱᒪᓐᖓᑦᑕᐅᖅ ᐃᓄᒋᐊᒃᑐᕐᔪᐊᑦ ᐱᔪᒫᕐᒪᑕ, ᐃᓄᒐᓴᒡᔪᐊᓐᖑᕈᒫᕐᓗᑎᒡᓗ; ᑭᓯᐊᓂᓕ ᐅᓇ ᓄᑲᖓ ᑖᑦᓱᒪᓐᖓᑦ ᐃᓄᒋᐊᖕᓂᕐᓴᐅᔪᒫᕐᐳᖅ, ᑭᖑᕚᖏᓪᓗ ᐃᓅᖃᑎᒌᒡᔪᐊᓐᖑᕈᒫᕐᓗᑎᒃ.”
20 #
ᐄᑉᕈᐃᓄᑦ 11:21. ᑕᕝᕙ ᐅᓪᓗᒥ ᑕᕝᕙᓂ ᑖᒃᑯᐊᒃ ᓮᒻᒪᕐᑎᓚᐅᕐᐰᑦ, ᐅᖃᕐᓗᓂ, “ᐃᓕᑦᓯᑎᒍᑦ ᐃᓴᕆᐊᓕ ᓮᒻᒪᕐᑎᑕᐅᓂᕋᕐᑕᐅᔪᒫᕐᐳᖅ, ᐅᖃᕐᓗᑎᒃ, ‘ᒎᑎᐅᑉ ᐃᕗᕅᒥᑐᑦ ᒫᓇᓯᑐᓪᓗ ᑍᒤᑎᓪᓕᓯ’”; ᑍᒫᒃ ᑕᕝᕙ ᔧᑰᑉ ᐃᕗᕅᒥ ᓯᕗᓪᓕᐅᑎᓚᐅᕐᐹ ᒫᓇᓯᒥᑦ.
21ᑕᕝᕙ ᐃᓴᕆᐊᓕ ᐅᖃᕐᐳᖅ ᔫᓯᐱᒧᑦ, “ᑕᑯᒋᑦ ᑐᖁᔭᕆᐊᒃᓯᕗᖓ, ᒎᑎᐅᓪᓕ ᐃᓚᒋᓂᐊᕐᐹᑎᑦ, ᐅᑎᕐᑎᑦᓱᒫᕐᐹᑎᓪᓗ ᓯᕗᓕᕕᓂᕐᐱᑦ ᓄᓇᖓᓄᑦ. 22ᓱᓕᓗ ᑐᓂᓯᕕᒋᕙᒋᑦ ᐊᖓᔪᑎᑦ ᑐᓂᓯᕕᒋᓇᒋᑦ ᖃᖅᑲᐅᑉ ᐊᑭᓐᓇᖓ ᐃᓕᖕᓄᑦ ᑐᓂᕙᕋ, ᐱᑖᕆᓚᐅᕐᑕᕋ ᐊᕐᓵᕐᓯᑦᔪᑎᒋᓪᓗᒍ ᐊᒧᕅᑎᑦ ᑭᖑᕚᖏᓐᓂᑦ ᓴᕕᒡᔪᐊᓐᓄᑦ ᐱᑎᒃᓯᓐᓄᓪᓗ.”
Currently Selected:
ᒨᓯᓯ ᓯᕗᓪᓖᑦ 48: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
