ᐃᓯᑭᐊᓕᐅᑉ ᐊᒡᓚᖏᑦ 4
4
ᐃᓯᑭᐊᓕᐅᑉ ᐆᒃᑐᕋᐅᑎᖃᕐᖕᓂᖓ ᔨᕉᓴᓕᒥᐅᑦ ᑎᒍᔭᐅᓂᒃᓴᖏᓐᓂᒃ
1“ᐃᓅᑉ ᐃᕐᖕᓂᖓ, ᖁᐊᖅᑎᑕᒐᕐᖕᒥᒃ ᐱᓗᑎᑦ, ᓵᖕᓄᐊᖅᓗᒍ ᑎᑎᕋᐅᔭᕐᕕᒋᒍᒃ ᐃᑎᖅᓴᓕᐅᖅᓗᒍ, ᔨᕉᓴᓕᐅᑉ ᐃᒡᓗᒐᓴᒡᔪᐊᓐᖑᐊᖏᓐᓂᒃ. 2ᐊᑭᕋᖏᓐᓄᑦ ᐊᕙᑕᖏᖅᑕᐅᓯᒪᓂᖓ ᓇᓗᓁᖅᓗᒍ, ᐃᑎᖅᓴᓕᐅᖅᓯᒪᔪᓂᒃ; ᓄᓇᓗ ᖃᓕᕇᒃᓯᓯᒪᓗᒍ; ᐃᑎᖅᑕᕐᕕᖕᓂᒡᓗ ᓯᖁᒥᑦᓯᓇᓲᑎᓂᒃ ᐊᕙᓗᕐᔪᐊᖓᑕ ᓯᓚᑎᓕᒫᖓ ᓈᓗᒍ. 3ᓵᑦᑑᔭᐅᒻᒥᒃ ᓴᕕᕋᔭᖕᒥᒃ ᐱᓗᑎᑦ ᐃᒡᓗᒐᓴᒡᔪᐊᓕᐊᓐᖑᐊᖅᐱᑦ ᐃᕝᕕᓪᓗ ᐊᑯᓐᓂᑦᓯᓐᓄᐊᖅᓗᒍ ᐊᕙᓗᕐᔪᐊᓐᖑᐊᖑᓂᐊᕐᖕᒪᑦ, ᐃᒡᓗᒐᓴᒡᔪᐊᑦ ᓵᓐᖓᓗᒋᑦ, ᐊᕙᓗᓯᓯᒪᔪᓂᒃ ᐃᕝᕕᑦ ᓵᓐᖓᓯᓐᖑᐊᖅᓗᑎᑦ. ᑕᒪᓐᓇ ᐃᓴᕆᐊᓕᐅᑉ ᑭᖑᕚᖏᓐᓄᑦ ᓇᓗᓁᖁᑕᐅᓂᐊᕐᖕᒪᑦ.
4“ᓴᐅᒥᖕᓄᑦ ᐃᓐᓇᖓᓗᑎᑦ, ᐃᓴᕆᐊᓕᐅᑉ ᑭᖑᕚᖏᑕ ᓱᒋᐊᖅᑕᐅᑦᔪᑎᒃᓴᖏᑦ ᐃᓕᖕᓄᑦ ᐃᓕᓂᐊᖅᐸᒃᑲ; ᐅᓪᓗᐃᑦ ᐅᓄᕐᖕᓂᖏᑦ ᓇᓪᓚᖓᓂᕆᔭᑎᑦ, ᑖᒃᑯᐊ ᐃᓴᕆᐊᓕᐅᑉ ᑭᖑᕚᖏᑦ ᓱᒋᐊᖅᑕᐅᓂᖏᑕ ᓯᕕᑐᓂᕆᓂᐊᖅᐰᑦ. 5ᐊᔪᖅᑐᓕᓂᖏᑕ ᓱᒋᐊᖅᑕᐅᑦᔪᑎᒃᓴᖏᓐᓂᒃ ᐅᓪᓗᓂᒃ 390ᓂᒃ ᑐᓂᓯᕕᒋᓂᐊᖅᐸᒋᑦ, ᐊᕐᕌᒍᐃᑦ ᓱᒋᐊᖅᑕᐅᓂᒃᓴᖏᑕ ᓯᕕᑐᓂᖏᑦ ᒪᓕᒡᓗᒋᑦ; ᑍᒫᒃ ᓯᕕᑐᑎᒋᔪᒥᒃ ᓱᒋᐊᖅᑕᐅᔪᒫᖅᐳᑎᑦ ᐃᓴᕆᐊᓕᐅᑉ ᑭᖑᕚᖏᑕ ᓱᒋᐊᖅᑕᐅᓂᒃᓴᖏᓐᓄᑦ. 6ᑍᒤᓕᖓᔭᕆᐊᖃᕐᖕᓃᑦ ᓈᒻᒪᒃᓯᒃᐸᑦ, ᑕᓕᖅᐱᖔᕐᖕᓄᑦ ᓵᓪᓗᑎᑦ ᔫᑕᐅᑉ ᑭᖑᕚᖏᑕ ᐊᔪᖅᑐᓕᓂᖏᑦ ᓱᒋᐊᖅᑕᐅᑦᔪᑎᒃᓴᕆᕙᑎᑦ ᐅᓪᓗᓂᒃ 40ᓂᒃ, ᐊᔪᖅᑐᓕᓂᖏᑕ ᓱᒋᐊᖅᑕᐅᑦᔪᑎᒃᓴᖏᑦ ᒪᓕᒡᓗᒋᑦ, ᐅᓪᓗᖅ ᐊᑕᐅᓯᖅ ᑐᕌᖓᓗᓂ ᐊᕐᕌᒍᒧᑦ ᐊᑕᐅᓯᕐᖕᒧᑦ.
7“ᔨᕉᓴᓕᐅᑉ ᐊᑭᕋᖏᓐᓄᑦ ᐊᕙᓗᔭᐅᓯᒪᓂᖓ ᓵᓐᖓᓗᒍ, ᑕᓖᑦ ᐅᕕᓃᓐᓇᕈᖅᓗᒍ; ᓇᓪᓕᐅᑎᓛᖅᑐᓂᒃ ᐃᒡᓗᒐᓮᑦ ᐅᖃᓪᓚᒡᕕᒋᒃᑭᑦ. 8ᑕᑯᒋᓪᓗ, ᕿᓚᒃᓱᕐᖕᓂᐊᖅᐸᒋᑦ ᓇᓪᓕᐊᓐᓄᑐᐃᓐᓇᖅ ᓵᖃᑦᑕᖁᓇᒃ, ᐊᕙᓗᔭᐅᓯᒪᓂᖅᐱᑦ ᐅᓪᓗᖏᑦ ᐊᓂᒍᓚᐅᖏᓐᓂᖏᓐᓂ.
9“ᓂᐊᖂᔭᒃᓴᒥᒃ ᓯᑎᔪᓂᒡᓗ ᓂᐊᖂᔭᒃᓴᓂᒃ, ᐲᓐᓂᓯᓂᒃ, ᐱᕈᖅᑐᕕᓂᕐᖕᓂᒃ, ᐃᕕᐅᔭᓂᒡᓗ ᓂᐊᖂᔭᒃᓴᓂᒃ, ᐱᕈᖅᓯᐊᒃᓴᓂᒃ, ᑲᑎᓪᓗᒋᑦ ᓂᐊᖂᔭᓕᐊᕆᒃᑭᑦ, ᑍᒤᑦᑐᒥᒃ ᑕᕝᕙ ᓂᕆᖃᑦᑕᕆᐊᖃᕈᒫᖅᐳᑎᑦ ᓴᐅᒥᖔᕐᖕᓄᑦ ᐃᓂᓪᓚᖓᓂᓕᒫᕐᖕᓂ ᐅᓪᓗᓂᒃ 390ᓂᒃ. 10ᑏᑑᑎᑎᑐᑦ ᐊᖏᑎᒋᔪᒥᒃ ᖃᐅᑕᒫᑦ ᓂᕆᖃᑦᑕᕆᐊᖃᕈᒫᖅᐳᑎᑦ ᑖᓐᓇᓗ ᓂᕆᔭᑐᐊᕆᕙᒡᓗᒍ ᐅᓪᓗᖅ ᐊᑕᐅᓯᐊᖅᓗᒍ. 11ᐅᓪᓗᓕᒫᖅ ᐃᒥᖃᑦᑕᕆᐊᖃᕐᖕᓂᐊᖅᐳᑎᑦ ᑏᑑᑏᖕᓂᒃ ᒪᕐᕈᓪᓗᐊᑐᑦ ᐊᖏᑎᒋᔪᒥᒃ. 12ᓂᐊᖂᔭᓕᐅᓕᕈᕕᑦ ᐃᑯᐊᓚᑦᓯᔪᒃᓴᐅᕗᑎᑦ ᐃᓄᐃᑦ ᐊᓇᖏᓐᓂᒃ ᕿᔪᖃᖅᓗᑎᑦ, ᐆᑦᑎᔭᑎᓪᓗ ᐃᓄᐃᑦ ᑕᑯᓐᓇᖅᑎᓪᓗᒋᑦ ᓂᕆᓗᒋᑦ.”
13ᐊᑕᓂᖅ ᐅᖃᖅᐳᖅ, “ᑍᒫᒃᑕᐅᖅ ᑕᕝᕙ ᐃᓴᕆᐊᓕᒥᐅᑦ ᓂᕆᔭᕆᐊᖃᖃᑦᑕᕈᒫᖅᐳᑦ ᐱᖁᔭᑎᒍᑦ ᓴᓗᒪᖏᑦᑐᒥᒃ ᐃᓅᖃᑎᒌᒡᔪᐊᓄᑦ ᐊᐅᓪᓚᕈᑦᔭᐅᑎᒃᑯᒃᑭᑦ.”
14ᑕᕝᕙ ᑭᐅᕙᕋ, “ᐊᑕᓃᖅ ᒎᑏ! ᑕᑯᒋᑦ, ᓇᖕᒥᓂᖅ ᓇᕐᕈᓇᖅᓯᑎᓚᐅᖅᓯᒪᓐᖏᓚᖓ; ᓄᑕᕋᐅᓂᓐᓂᑦ ᐅᓪᓗᒥᒧᑦ ᑎᑭᓪᓗᒍ ᐆᒪᔪᕕᓂᕐᖕᒥᒃ ᐃᒻᒥᓃᓐᓇᖅ ᑐᖁᔪᕕᓂᕐᖕᒥᒃ ᓂᕆᓚᐅᖅᓯᒪᓐᖏᓚᖓ ᐆᒪᔪᓄᓪᓗ ᑐᖁᑕᕕᓂᕐᖕᒥᒃ, ᓂᕿᒥᒡᓗ ᒪᒪᖏᑦᑐᒥᒃ ᐅᖁᒻᒦᓚᐅᖅᓯᒪᓇᖓ.”
15ᑕᕝᕙ ᐅᖃᐅᑎᕚᖓ, “ᑕᑯᒋᑦ, ᐃᒻᒧᒃᓯᐅᒐᐅᑉ ᐊᓇᖏᓐᓂᒃ ᐃᑯᐊᓪᓚᖅᑯᑎᖃᖃᑦᑕᖁᓕᖅᐸᒋᑦ, ᐃᓅᑉ ᐊᓇᖏᓐᓂᐅᖏᑦᑐᖅ, ᓂᐊᖂᔭᓕᐅᓕᕈᕕᑦ.”
16ᐅᖃᐅᑎᒃᑲᓐᓂᖅᐹᖓᓗ, “ᐃᓅᑉ ᐃᕐᖕᓂᖓ, ᑕᑯᒋᑦ ᔨᕉᓴᓕᒥᐅᑦ ᓂᐊᖂᔭᒃᓴᖅᑖᕐᕕᒋᕙᒃᑕᖏᑦ ᓄᖅᑲᖅᑎᓐᓂᐊᖅᐸᒃᑲ; ᓂᕆᖃᑦᑕᓕᕈᒫᖅᐳᑦ ᐆᒃᑑᑎᒧᑦ ᐆᒃᑐᖅᑕᐅᓯᒪᔪᒥᒃ ᑲᑉᐱᐊᓱᒡᓗᑎᒃ; ᐃᒥᖃᑦᑕᕈᒫᖅᐳᓪᓗ ᐆᒃᑐᕋᐅᑦ ᒪᓕᒡᓗᒍ ᐃᓱᒪᔮᖅᓗᑎᒃ. 17ᑍᒤᓕᐅᕐᕕᒋᔪᒫᖅᐸᒃᑲ ᓂᕿᒃᓮᕈᑎᓗᑎᒃ ᐃᒥᒃᓮᕈᑎᓗᑎᒡᓗ, ᐃᓱᒪᔮᖅᓗᑎᒃ ᐃᒻᒥᖕᓄᑦ ᑕᑯᓴᖃᑦᑕᐅᑎᔪᒫᖅᐳᑦ, ᐊᔪᖅᓴᕐᖕᓂᕐᖕᒧᑦ ᓄᖑᑉᐸᓪᓕᐊᓕᕈᒫᖅᐳᑦ ᐊᔪᖅᑐᓕᓯᒪᓂᕐᖕᒥᖕᓄᑦ ᓱᒋᐊᖅᑕᐅᓕᕈᑎᒃ.”
Currently Selected:
ᐃᓯᑭᐊᓕᐅᑉ ᐊᒡᓚᖏᑦ 4: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
