ᒨᓯᓯ ᐂᑉᐸᖏᑦ 9

ᐆᒪᔪᑦ ᑐᖁᕋᕐᑎᑕᐅᓂᖏᑦ

1ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᐰᕉᒧᐊᓕᕆᑦ ᐅᖃᐅᑎᓗᒍᓗ, ‘ᐊᑕᓂᖅ ᐅᑲᕐᐳᖅ ᐃᒫᒃ, ᐄᑉᕈᐃᑦ ᒎᑎᖓᑦ, ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᐱᔨᑦᓯᕈᓐᓇᖁᓪᓗᒋᑦ ᐅᕙᓐᓂᒃ. 2ᓱᓕ ᐊᐅᓪᓚᖁᔨᓂᐊᖏᒃᑯᕕᑦ, ᓄᖅᑲᖓᑎᑦᓯᓇᓱᐊᕐᓂᐊᕈᕕᓪᓗ ᑖᒃᑯᓂᖓ, 3ᑕᑯᒋᑦ ᐊᑕᓂᐅᑉ ᐊᒡᒐᖏᑕ ᐆᒪᔪᖁᑎᑎᑦ ᐋᓐᓂᐊᓇᕐᑐᒧᑦ ᐱᐅᖏᑦᑐᐊᓗᖕᒧᑦ ᑎᑭᑕᐅᑎᓐᓂᐊᕐᐰᑦ ᐃᒻᒧᒃᓯᐅᒐᖁᑎᑎᑦ ᐱᕈᕐᓰᕕᖕᒦᑦᑐᑦ, ᕿᒻᒥᕐᔪᐊᓪᓗ, ᓯᐅᑎᖅᑯᕐᑐᔪᓪᓗ, ᑳᒥᓖᓪᓗ, ᓰᐲᓪᓗ, ᒎᑦᓰᓪᓗ. 4ᑭᓯᐊᓂᓕ ᐊᑕᓂᖅ ᐊᑦᔨᒌᖏᑦᑐᓂᒃ ᐱᓇᓱᐊᕐᓂᐊᕐᐳᖅ ᐄᑦᔨᑉᑎᒥᐅᑦ ᐃᒻᒧᒃᓯᐅᒐᖁᑎᖏᓐᓄᑦ, ᐃᓴᕆᐊᓕᒥᐅᓪᓗ ᐃᒻᒧᒃᓯᐅᒐᖁᑎᖏᓐᓄᑦ, ᐃᓴᕆᐊᓕᒥᐅᑦ ᐆᒪᔪᖁᑎᓕᒫᑦᓯᐊᖏᑦ ᑐᖁᔪᖃᕐᓂᐊᖏᒻᒪᑕ. 5ᐊᑕᓂᕐᓗ ᐱᒋᐊᕐᕕᒃᓴᒥᒃ ᐋᖅᑭᒃᓯᓯᒪᕗᖅ, ᖃᐅᒃᐸᑦ ᐊᑕᓂᖅ ᑕᒪᑐᒥᖓ ᐱᒋᐊᕐᓂᐊᕐᐳᖅ ᑕᕝᕙᓂ ᓄᓇᒥ.’”

6ᖃᐅᑎᓪᓗᒍᓗ ᐊᑕᓂᖅ ᑕᒪᑐᒥᖓ ᐱᓇᓱᐊᓕᓚᐅᕐᐳᖅ; ᐄᑦᔨᑉᑎᒥᐅᓪᓗ ᐆᒪᔪᖁᑎᓕᒫᖏᑦ ᑐᖁᕋᕐᐳᑦ, ᐃᓴᕆᐊᓕᒥᐅᓪᓕ ᐆᒪᔪᖁᑎᖏᓐᓂᒃ ᐊᑕᓯᐅᕐᒥᒡᓘᓐᓃᑦ ᑐᖁᔪᖃᓚᐅᓐᖏᓚᖅ. 7ᐰᕉᓗ ᑕᑯᔭᕐᑐᖁᔨᕗᖅ ᐃᓴᕆᐊᓕᒥᐅᑦ ᐆᒪᔪᖁᑎᖏᓐᓂᒃ, ᑕᑯᒋᓪᓗ ᐃᓴᕆᐊᓕᒥᐅᑦ ᐆᒪᔪᖁᑎᖏᓐᓂᒃ ᐊᑕᐅᓯᕐᒥᒡᓘᓐᓃᑦ ᑐᖁᔪᖃᓚᐅᓐᖏᓚᖅ. ᑭᓯᐊᓂᓕ ᓱᓕ ᐰᕉᑉ ᐆᒻᒪᑎᖓ ᓯᑎᔫᓚᐅᕐᐳᖅ, ᐃᓄᐃᓪᓗ ᐊᐅᓪᓚᖁᓚᐅᓐᖏᓔᑦ.

ᐊᔪᐊᕐᓂᖅ

8ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, “ᐊᒡᒐᓯ ᑕᑕᓪᓗᒋᑦ ᑎᒍᓯᓕᕆᑦᓯ ᑭᐊᒃᓴᐅᑎᐅᑉ ᐊᕐᔭᓕᓂᖓᓂᒃ, ᒨᓯᓯᐅᓪᓗ ᖁᒻᒧᑦ ᐃᒋᓐᓂᐊᕐᐹ ᐰᕉᑉ ᓇᓛᓄᑦ ᓵᖓᓗᓂ. 9ᐄᑦᔨᑉᑎᐅᓪᓗ ᓄᓇᖓᓄᑦ ᑕᕝᕙ ᓯᐊᒻᒪᕐᑎᑕᐅᓂᐊᕐᐳᖅ ᐳᔪᕋᑐᐃᓐᓇᕐᑎᑐᑦ, ᓴᖅᑭᓕᕐᓗᑎᒡᓗ ᐊᔪᐊᖑᓗᑎᒃ ᐋᓐᓂᐊᕐᑎᑦᓯᓗᑎᒡᓗ ᐃᓄᖕᓂᑦ ᐆᒪᔪᓂᒡᓗ ᐄᑦᔨᑉᑎᐅᑉ ᓄᓇᓕᒫᖓᓂ.” 10#ᑕᑯᑎ 16:2.ᑕᕝᕙ ᑭᐊᒃᓴᐅᑎᒥᑦ ᐊᕐᔭᓕᓂᕐᓂᒃ ᑎᒍᓯᕘᒃ, ᐰᕉᒧᓪᓗ ᐅᐸᒍᑎᓪᓗᑎᒃ, ᒨᓯᓯᐅᓪᓗ ᖁᒻᒧᑦ ᐰᕉᑉ ᖁᓛᓄᑦ ᐃᒋᑉᐹ, ᐊᔪᐊᓐᖑᕐᓗᑎᒡᓗ ᐋᓐᓂᐊᓇᕐᓗᑎᒃ ᓴᖅᑭᓕᕐᐳᑦ ᐃᓄᖕᓂ ᐆᒪᔪᓂᓗ. 11ᐊᖓᒃᑯᐃᓪᓗ ᑕᕝᕙᓂ ᓇᖏᕈᓐᓁᓪᓕᓚᐅᕐᐳᑦ ᒨᓯᓯᐅᑉ ᓵᖓᓂ ᑕᒪᒃᑯᐊ ᐊᔪᐊᑦ ᐱᑦᔪᑎᒋᓪᓗᒋᑦ, ᑕᒪᒃᑯᐊ ᐊᔪᐊᑦ ᐊᖕᒪᕐᑎᓚᐅᕐᒪᑕ ᐊᖓᒃᑯᓂ ᐃᓄᓕᒫᓂᓗ ᐄᑦᔨᑉᑎᒥᐅᓂ. 12ᐊᑕᓂᐅᓪᓕ ᓱᓕ ᐰᕉᑉ ᐆᒻᒪᑎᖓ ᓯᑎᔫᑎᓚᐅᕐᐹ, ᑖᒃᑯᓂᖓᓗ ᓈᓚᓚᐅᓐᖏᓚᖅ; ᓲᕐᓗ ᐊᑕᓂᐅᑉ ᑍᒤᓐᓂᐊᕐᓂᕋᓚᐅᕐᒪᒍ ᒨᓯᓯᒧᑦ ᐅᖃᐅᓯᕆᓪᓗᓂᐅᒃ.

ᓇᑕᖅᑯᕐᓁᑦ

13ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᖃᐅᒃᐸᑦ ᐅᓪᓛᕌᕐᔪᒃᑯᑦ ᒪᑭᓪᓗᑎᑦ ᐰᕉ ᐅᐸᓛᕐᐸᑦ, ᐅᖃᐅᑎᓗᒍᓗ; ᐊᑕᓂᖅ ᐄᑉᕈᐃᑦ ᒎᑎᖓᑦ ᐃᒫᒃ ᐅᖃᕐᐳᖅ, ‘ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ ᐅᕙᓐᓂᒃ ᑐᒃᓯᐊᕐᕕᖃᕈᓐᓇᖁᓪᓗᒋᑦ. 14ᑕᒪᑐᒪᓂᓕ ᓱᓕ ᐱᖁᔨᓂᐊᖏᒃᑯᕕᑦ ᑕᕝᕙ ᐱᔨᑎᑦ ᐃᓄᖁᑎᑎᓪᓗ ᓱᒋᐊᕐᑕᑐᐊᕆᓂᐊᕈᓐᓃᕐᐸᒃᑲ ᐃᕝᕕᓪᓕ ᓱᒋᐊᖃᓯᐅᑎᓂᐊᓕᕐᐸᒋᑦ, ᖃᐅᔨᓕᖁᓪᓗᑎᑦ ᐅᕙᑦᑐᑦ ᑍᒤᑦᑐᒥᒃ ᐱᑕᖃᖏᓐᓂᖓᓂᒃ ᓄᓇᕐᔪᐊᓕᒫᒥ. 15ᒫᓐᓇᒧᑦ ᑎᑭᓪᓗᒍ ᓱᒋᐊᕋᓱᐊᕋᔭᓚᐅᕈᒃᑭᑦ ᐃᓄᖁᑎᑎᓪᓗ ᐋᓐᓂᐊᓇᕐᑐᒧᑦ, ᑕᕝᕙ ᒫᓐᓇ ᑕᒫᓐᖓᑦ ᓄᓇᒥᑦ ᐲᕐᑕᐅᓯᒪᔪᑐᖃᐅᓕᕋᔭᕐᐳᑎᑦ; 16#ᕉᒪᒥᐅᓄᑦ 9:17.ᑭᓯᐊᓂᓕ ᑕᒪᓐᓇ ᐱᑦᔪᑎᒋᓪᓗᒍ ᐃᓅᑎᓚᕿᓯᒪᕙᒋᑦ, ᖃᐅᔨᖁᓪᓗᑎᑦ ᐱᔪᓐᓇᕐᓂᓐᓂᒃ ᓂᕐᑐᕐᓇᕐᓂᕋᓗ ᓄᓇᕐᔪᐊᓕᒫᒥ ᐅᖃᐅᓯᐅᓕᖁᓪᓗᒍ. 17ᑭᓯᐊᓂᓕ ᓱᓕ ᑐᓴᕈᓐᓇᓐᖏᓚᑎᑦ ᐃᓄᖁᑎᒃᑲᓗ ᓱᓇᐅᒋᓇᒋᑦ ᐊᐅᓪᓚᖁᓐᖏᓚᑎᑦ. 18ᑕᑯᒋᑦ, ᖃᐅᒃᐸᑦ ᒫᓐᓇᑐᑦ ᑍᒤᓪᓗᐊᓕᕐᑎᓪᓗᒍ ᓇᑕᖅᑯᕐᓇᕐᓂᒃ ᐊᖏᔫᑎᐊᓗᖕᓂᒃ ᑲᑕᒐᕐᑎᑦᓯᓂᐊᕐᐳᖓ, ᑕᒪᑐᒪᓗ ᓯᕗᓂᖓᒍᑦ ᑍᒤᑦᑐᖃᓚᐅᕐᓯᒪᓐᖏᓚᖅ ᑕᒫᓂ ᐄᑦᔨᑉᑎᒥ ᒫᓐᓇᒧᑦ ᑎᑭᓪᓗᒍ. 19ᑍᒤᒻᒪᑦ ᒫᓐᓇ ᑎᓕᓯᓕᕆᑦ, ᐆᒪᔪᑯᑎᓕᒫᑎᑦ ᐱᖁᑎᓕᒫᑎᓪᓗ ᐱᕈᕐᓰᕕᖕᒦᑦᑐᑦ ᐊᑦᑕᕐᓇᖏᑦᑐᒧᑦ ᐃᒡᓗᒧᐊᕐᑎᑕᒃᓴᕆᕙᑎᑦ; ᓇᑕᖅᑯᕐᓇᕐᓂᐊᕐᒪᑦ ᐃᓄᐃᓪᓗ ᐆᒪᔪᓪᓗ ᖃᓄᐃᑦᑐᑐᐃᓐᓁᑦ ᐱᕈᕐᓰᕕᖕᒦᑦᑐᑦ ᐊᑦᑕᕐᓇᖏᑦᑐᒧᐊᕈᑦᔭᐅᓐᖏᑐᐊᕐᐸᑕ, ᓇᑕᖅᑯᕐᓇᕐᓄᑦ ᑐᖁᑕᐅᓂᐊᕐᐳᑦ.’” 20ᑕᕝᕙ ᐊᑕᓂᐅᑉ ᐅᖃᐅᓯᕆᔭᖏᓐᓂᒃ ᓯᕘᕋᓕᕐᑐᑦ ᐰᕉᑉ ᐱᔨᖏᑕ ᐃᓚᖏᑦ ᐆᒪᔪᖁᑎᒥᖕᓂᒃ ᓯᐊᓛᒥᖕᓂᒡᓗ ᐃᒡᓗᒧᑦ ᕿᒫᑎᑦᓯᕗᑦ; 21ᐊᓯᖏᓪᓕ ᐊᑕᓂᐅᑉ ᐅᖃᐅᓯᕆᔭᖏᓐᓂᒃ ᐃᒃᐱᒍᓱᖏᑦᑐᑦ ᐆᒪᔪᖁᑎᒥᖕᓂᒃ ᓯᐊᓛᒥᖕᓂᒡᓗ ᐱᕈᕐᓰᕕᖕᒦᑐᐃᓐᓇᕐᑎᑦᓯᓚᐅᕐᐳᑦ.

22ᐊᑕᓂᖅ ᑕᕝᕙ ᒨᓯᓯᒧᑦ ᐅᖃᕐᐳᖅ, “ᑕᓖᑦ ᕿᓚᖕᒧᑦ ᐃᓵᓚᐅᕈᒃ, ᓇᑕᖅᑯᕐᓇᓕᖁᓪᓗᒍ ᐄᑦᔨᑉᑎᐅᑉ ᓄᓇᓕᒫᖓᓂ, ᐃᓄᖕᓄᑦ ᐆᒪᔪᓄᓪᓗ ᐱᕈᕐᓰᕕᖕᓄᓪᓗ.” 23ᑕᕝᕙ ᒨᓯᓯᐅᑉ ᐊᔭᐅᑉᐱᐊᖅ ᕿᓚᖕᒧᑦ ᐃᓴᐅᑎᕚ; ᐊᑕᓂᕐᓗ ᖃᐅᒻᒪᓪᓚᖕᒥᒃ ᓇᑕᖅᑯᕐᓇᓂᒡᓗ ᑎᑭᑎᑦᓯᕗᖅ, ᐃᑯᒤᓪᓗ ᓄᓇᒧᑦ ᑲᑕᒐᓕᕐᐳᑦ. ᐊᑕᓂᕐᓗ ᐄᑦᔨᑉᑎᐅᑉ ᓄᓇᖓᓄᑦ ᓇᑕᖅᑯᕐᓇᕐᓂᒃ ᑲᑕᒐᓕᕐᑎᑦᓯᕗᖅ; 24#ᑕᑯᑎ 8:7; 16:21.ᑕᕝᕙ ᓇᑕᖅᑯᕐᓇᓕᕐᐳᖅ, ᐃᑯᒪᓂᒃ ᐊᑯᓕᖃᕐᑐᑦ ᑲᑕᒐᓕᕐᐳᑦ ᓇᑕᖅᑯᕐᓁᑦ, ᓇᑕᖅᑯᕐᓁᓪᓗ ᐅᖁᒤᑦᑐᕐᔪᐊᖑᕗᑦ, ᑕᒪᑐᒪᓗ ᓯᕗᓂᖓᒍᑦ ᑍᒤᑦᑐᖃᓚᐅᕐᓯᒪᓐᖏᓚᖅ ᓄᓇᒥ ᐄᑦᔨᑉᑎᒥ ᑍᒪᓐᖓᑦ ᐃᓄᖃᓕᓚᐅᕐᓂᖓᓂᑦ. 25ᓇᑕᖅᑯᕐᓁᓪᓗ ᑲᑕᒡᕕᖃᕐᐳᑦ ᐱᕈᕐᓰᕕᖕᒦᑦᑐᓂᒃ ᐄᑦᔨᑉᑎᐅᑉ ᓄᓇᓕᒫᖓᓂ, ᐃᓄᖕᓄᑦ ᐆᒪᔪᓄᓪᓗ; ᐱᕈᕐᑐᓕᒫᓪᓗ ᓱᕋᒃᑎᕐᑕᐅᕗᑦ ᐱᕈᕐᓰᕕᖕᒦᑦᑐᑦ, ᓇᐹᕐᑐᓕᒫᓪᓗ ᓇᑲᑎᕐᑕᐅᓪᓗᑎᒃ ᐱᕈᕐᓰᕕᖕᒦᑦᑐᑦ. 26ᑭᓯᐊᓂᓕ ᓄᓇᖃᕐᑐᑦ ᒎᓯᓂᒥ ᐃᓴᕆᐊᓕᒥᐅᑦ ᐃᓄᖏᑦ, ᑖᒃᑯᐊ ᓇᑕᖅᑯᕐᓇᕐᕕᐅᓚᐅᓐᖏᓚᑦ.

27ᑕᕝᕙ ᐰᕉ ᑎᓕᓯᓕᕐᐳᖅ ᒨᓯᓯᒃᑯᒃ ᐂᕉᓂᒃᑯᒃ ᕾᖁᔭᐅᖁᓪᓗᒋᒃ, ᐅᖃᐅᑎᓪᓗᒋᒡᓗ, “ᒫᓐᓇ ᖃᐅᔨᕗᖓ ᐊᔪᕐᑐᓕᓯᒪᒐᒪ; ᐊᑕᓂᕐᓕ ᓈᒻᒪᓈᕐᐳᖅ, ᐅᕙᖓᓕ ᐃᓄᖁᑎᒃᑲᓗ ᑕᒻᒪᕐᓯᒪᕗᒍᑦ. 28ᐊᑕᓂᕐᒧᑦ ᑐᒃᓯᐊᓚᐅᕆᑦᓯᒃ; ᑕᒪᓐᓇ ᓇᑕᖅᑯᕐᓇᕐᑐᖅ ᖃᐅᒻᒪᓪᓚᒡᓗ ᓄᖅᑲᖁᓕᕐᓗᒍ; ᑕᕝᕙ ᐊᐅᓪᓚᖁᓂᐊᓕᕐᐸᑦᓯ, ᑕᒫᓂ ᓄᓇᖃᑦᔮᔪᓐᓃᕐᐳᓯ.”

29ᒨᓯᓯᐅᑉ ᐅᖃᐅᑎᕚ, “ᑕᕝᕙᓐᖓᑦ ᐃᒡᓗᒐᓴᖕᓂᑦ ᕿᒪᕉᑎᑐᐊᕈᒪ ᑕᓕᕋ ᐃᓵᖕᓂᐊᕐᐸᕋ ᐊᑕᓂᕐᒧᑦ; ᑕᕝᕙ ᖃᐅᒻᒪᓪᓚᒃ ᓄᖅᑲᕐᓂᐊᕐᐳᖅ, ᓇᑕᖅᑯᕐᓇᕈᓐᓃᕐᓗᓂᓗ, ᖃᐅᔨᓕᖁᓪᓗᑎᑦ ᓄᓇ ᐊᑕᓂᐅᑉ ᐱᖁᑎᒋᖕᒪᒍ. 30ᖃᐅᔨᒪᕗᖓᓕ ᐃᕝᕕᑦ ᐱᔨᑎᓪᓗ, ᓱᓕ ᐊᑕᓂᖅ ᒎᑎ ᓈᓚᖏᓐᓇᑦᓯᐅᒃ.”

31ᐱᕈᕐᑐᓪᓕ ᐊᓐᓄᕌᒃᓴᓕᐊᕆᔭᐅᓲᑦ ᓂᐊᖂᔭᒃᓮᓪᓗ ᓱᕋᒃᑎᕐᑕᐅᕗᑦ, ᓂᐊᖂᔭᒃᓮᑦ ᓇᑲᑎᕐᑕᐅᑐᐃᓐᓇᕆᐊᖃᓕᓚᐅᕐᒪᑕ, ᐱᕈᕐᑐᓪᓗ ᐊᓐᓄᕌᒃᓴᓕᐊᕆᔭᐅᓲᑦ ᐱᕈᕐᐸᓪᓕᐊᓇᓱᐊᓕᕐᑎᓪᓗᒋᑦ. 32ᓂᐊᖂᔭᒃᓴᓐᖑᕐᐸᓪᓕᐊᔪᓪᓕ ᓱᕋᒃᑕᐅᓚᐅᓐᖏᓚᑦ, ᐱᕈᕐᐸᓪᓕᐊᓕᓵᕋᒥᒃ ᐱᔭᕇᕐᕕᒃᓴᖓᑦ ᓱᓕ ᓇᓪᓕᐅᑎᓯᒪᓚᐅᖏᒻᒪᑦ.

33ᑕᕝᕙ ᒨᓯᓯ ᐰᕉᒥᑦ ᕿᒪᕉᑎᒐᒥ ᐃᒡᓗᒐᓮᑦ ᓯᓚᑖᓄᐊᕐᐳᖅ, ᑕᓕᓂᓗ ᐃᓴᒃᐹ ᑐᒃᓯᐊᕐᓗᓂ ᐊᑕᓂᕐᒧᑦ; ᑕᕝᕙ ᖃᐅᒻᒪᓪᓚᒃ ᓄᖅᑲᕐᐳᖅ ᓇᑕᖅᑯᕐᓇᕈᓐᓃᓗᓂᓗ, ᓯᓚᓗᒍᓐᓃᕐᐳᕐᓗ ᓄᓇᒧᑦ. 34ᐰᕉᓕ ᑕᑯᒐᒥ ᓯᓚᓗᒍᓐᓃᕐᓗᓂ ᓇᑕᖅᑯᕐᓇᕈᓐᓃᕐᒪᑦ ᖃᐅᒻᒪᓪᓛᔪᓐᓃᕐᓗᓂᓗ, ᑕᕝᕙ ᐊᔪᕐᑐᓕᓕᕆᕗᖅ, ᐆᒻᒪᑎᓂᓗ ᓯᑎᔫᑎᓕᕆᕚ ᐱᔨᒋᔭᓂ ᐃᓚᒋᓪᓗᒋᑦ. 35ᑕᕝᕙ ᐰᕉᑉ ᐆᒻᒪᑎᖓ ᓯᑎᔫᓕᓚᐅᕆᕗᖅ, ᐃᓴᕆᐊᓕᒥᐅᓪᓗ ᐃᓄᖏᑦ ᐊᐅᓪᓚᖁᔪᓐᓃᓚᐅᕆᕔᑦ; ᓲᕐᓗ ᐊᑕᓂᐅᑉ ᐅᖃᐅᓯᕆᓚᐅᕐᒪᒍ ᒨᓯᓯᒃᑯᑦ.

Currently Selected:

ᒨᓯᓯ ᐂᑉᐸᖏᑦ 9: EAIB

Highlight

Copy