ᒨᓯᓯ ᐂᑉᐸᖏᑦ 8
8
ᓈᕌᔩᑦ (ᐱᒡᓕᕆᐊᑦ)
1ᐊᑕᓂᖅ ᑕᕝᕙ ᐅᖃᕐᐳᖅ ᒨᓯᓯᒧᑦ, “ᐰᕉ ᐅᐸᒡᓗᒍ ᐅᖃᐅᑎᔭᕐᑐᓚᐅᕈᒃ, ‘ᐊᑕᓂᖅ ᐃᒫᒃ ᐅᖃᕐᐳᖅ, ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᐅᕙᓐᓄᑦ ᑐᒃᓯᐊᕈᓐᓇᖁᓪᓗᒋᑦ. 2ᐊᐅᓪᓚᖁᔨᓂᐊᖏᒃᑯᕕᑦ ᑖᒃᑯᓂᖓ, ᑕᒪᓐᓇ ᓄᓇᒋᔧᑦ ᓱᒋᐊᕐᓂᐊᕐᐸᕋ ᓈᕌᔨᓄᑦ ᐅᓕᒃᑕᐅᑎᓪᓗᒍ. 3ᑕᒪᓐᓇᓗ ᑰᓕᒫᖅ ᓈᕌᔨᓄᑦ ᑕᑕᐅᓂᐊᕐᐳᖅ, ᐊᒡᓛᑦ ᐃᒡᓗᖕᓄᑦ ᓇᔪᕐᑕᕐᓄᑦ ᑎᑭᓪᓗᑎᒃ, ᐊᒡᓛᑦ ᐃᒡᓗᐊᕈᓰᑦ, ᓯᓂᒡᕖᓪᓗ, ᐊᖓᔪᖅᑳᖁᑎᕕᓪᓗ ᐃᒡᓗᖏᑦ ᐃᓄᖁᑎᕕᓪᓗ ᐊᖏᕐᕋᖏᑦ, ᐊᒡᓛᓪᓗ ᓂᕿᓕᐅᕐᕕᓯ ᓵᑦᑑᔭᐅᑎᓯᓗ ᑕᒪᕐᒥᒃ ᑕᑕᓐᓂᐊᕐᐳᑦ ᑕᒪᒃᑯᓂᖓ. 4ᑕᒪᒃᑯᐊᓗ ᒥᓯᖃᑦᑕᕐᓂᐊᕐᐳᑦ ᐃᓕᖕᓄᑦ ᐃᓄᖁᑎᖕᓄᓪᓗ ᐊᖓᔪᖅᑳᖁᑎᓕᒫᕐᓄᓪᓗ.’”
5ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᐂᕉᓂ ᐅᖃᐅᑎᓚᐅᕈᒃ ᐊᔭᐅᑉᐱᐊᒥᓂᒃ ᐃᓴᐅᑦᔨᖁᓗᒍ ᑰᑉ ᖁᓛᓄᑦ, ᑰᓕᐊᕆᔭᐅᓯᒪᔪᓪᓗ ᖁᓛᓄᑦ, ᑕᓯᕐᓄᓪᓗ, ᓈᕌᔩᑦ ᐄᑦᔨᑉᑎᐅᑉ ᓄᓇᖓᓄᑦ ᑎᑭᖁᓪᓗᒋᑦ!” 6ᑕᕝᕙ ᐂᕉᓂᐅᑉ ᑕᓕᓂ ᐃᓵᒃᐹ ᐄᑦᔨᑉᑎᐅᑉ ᐃᒪᖏᑕ ᖁᓛᓄᑦ; ᓈᕌᔩᓪᓗ ᓴᖅᑭᐊᓕᕐᐳᑦ ᐄᑦᔨᑉᑎᐅᑉ ᓄᓇᖓ ᐅᓕᒃᑕᐅᓪᓗᓂ ᑕᒪᒃᑯᓄᖓ. 7ᑭᓯᐊᓂᓕ ᐊᖓᒃᑯᐃᑦᑕᐅᖅ ᐊᖓᒃᑰᓂᕐᒥᖕᓄᑦ ᑍᒤᓕᐅᓚᐅᕆᕗᑦ, ᓴᖅᑭᑎᑦᓯᓪᓗᑎᒃ ᓈᕌᔨᓂᒃ ᐄᑦᔨᑉᑎᐅᑉ ᓄᓇᖓᓄᑦ.
8ᑕᕝᕙ ᐰᕉᑉ ᒨᓯᓯᒃᑯᒃ ᐂᕉᓂᒃᑯᒃ ᕾᖁᕚᒃ, ᐅᖃᐅᑎᓪᓗᒋᒡᓗ, “ᐊᑕᓂᖅ ᑐᒃᓯᐊᕐᕕᒋᓚᐅᕐᓯᐅᒃ ᑕᒪᒃᑯᓂᖓ ᓈᕌᔨᓂᒃ ᐲᕐᓯᖁᓗᒍ ᐅᕙᓐᓂᑦ ᐃᓄᖁᑎᓐᓂᓪᓗ; ᑕᕝᕙ ᐃᓅᖃᑎᒌᒡᔪᐊᑦ ᐊᐅᓪᓚᖁᓂᐊᕐᐸᒃᑲ ᑐᓂᕐᕈᓯᕆᐊᕐᑐᖁᓪᓗᒋᑦ ᐊᑕᓂᕐᒧᑦ.” 9ᒨᓯᓯ ᐅᖃᕐᐳᖅ ᐰᕉᒧᑦ, “ᖁᕕᐊᓱᒡᓗᖓ ᑐᒃᓯᐅᑎᔪᒪᑦᓯᐊᕐᐸᒋᑦ, ᓇᓗᓁᕐᓯᕕᒋᑐᐊᕈᕕᖓ ᖃᖓᒃᑯᑦ ᑐᒃᓯᐅᑦᔨᖁᔨᖕᒪᖔᕐᐱᑦ, ᐃᓕᖕᓄᑦ ᐱᔨᒋᔭᕐᓄᓪᓗ ᐃᓄᖁᑎᖕᓄᓪᓗ, ᓈᕌᔩᑦ ᐃᓕᑦᓯᓐᓂᑦ ᐲᔭᕐᑕᐅᖁᓪᓗᒋᑦ, ᑕᒫᓃᑦᑐᖃᕈᓐᓃᖁᓪᓗᒍᓗ ᑰᖕᒥ ᑭᓯᐊᓂ ᐱᑕᓕᑑᓕᖁᓪᓗᒍ.”
10ᐰᕉᑉ ᑭᐅᕚ, “ᖃᐅᒃᐸᑦ ᑐᒃᓯᐅᑎᓛᓕᕐᐸᕐᒪ.”
ᒨᓯᓯ ᐅᖃᕐᐳᖅ, “ᑍᒤᓐᓂᐊᓕᕐᐳᖅ ᐅᖃᐅᓯᕆᔭᕐᑐᑦ, ᖃᐅᔨᖁᓪᓗᑎᑦ ᒎᑎᑕᖃᖏᓐᓂᖓᓂᒃ ᐊᑕᓂᕆᔭᑦᑕ ᒎᑎᐅᑉ ᐊᓯᐊᓂᒃ. 11ᓈᕌᔩᑦ ᐃᓕᖕᓂᑦ ᐃᒡᓗᑦᓯᓐᓂᓪᓗ ᐱᔨᒋᔭᕐᓂᓪᓗ ᐃᓄᖁᑎᖕᓂᓪᓗ ᐲᔭᕐᑕᐅᓂᐊᕐᐳᑦ; ᑰᖕᒥ ᑭᓯᐊᓂ ᐱᑕᓕᑑᓕᕐᓗᓂ.” 12ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒥᑦ ᐊᓂᕘᒃ; ᒨᓯᓯᐅᓪᓗ ᐊᑕᓂᖅ ᑐᒃᓯᐊᕐᕕᒋᕚ ᓈᕌᔩᑦ ᐱᑦᔪᑎᒋᓪᓗᒋᑦ ᐲᕐᑕᐅᖁᓪᓗᒋᑦ, ᑍᒫᒃ ᐰᕉᒥᒃ ᐊᖏᖃᑎᖃᓚᐅᕋᒥ. 13ᐊᑕᓂᕐᓗ ᑍᒫᒃ ᐱᓇᓱᐊᕐᐳᖅ, ᒨᓯᓯᐅᑉ ᑐᒃᓯᐊᕈᑎᒋᔭᖓᑐᑦ; ᓈᕌᔩᓪᓗ ᐃᒡᓗᓃᑦᑐᑦ ᓄᓇᒦᑦᑐᓪᓗ ᐱᕈᕐᓰᕕᖕᓃᑦᑐᓕᒫᓪᓗ ᑐᖁᕗᑦ. 14ᐄᑦᔨᑉᑎᒥᐅᓪᓗ ᑕᒪᒃᑯᐊ ᑲᑎᑉᐰᑦ ᐳᕐᑐᓯᑎᓪᓗᒋᓪᓗ, ᓄᓇᓗ ᑎᐱᓗᓕᓚᐅᕐᐳᖅ ᑕᒪᒃᑯᓄᖓ. 15ᐰᕉᓕ ᖃᐅᔨᓕᕋᒥ ᓈᕌᔩᑦ ᑐᖁᓂᖏᓐᓂᒃ, ᐆᒻᒪᑎᓂ ᓯᑎᔫᑎᓕᓚᐅᕆᕚ, ᑖᒃᑯᓂᖓᓗ ᓈᓚᒍᓐᓃᕆᓪᓗᓂ; ᓲᕐᓗ ᐊᑕᓂᐅᑉ ᐅᖃᐅᓯᕆᓚᐅᕐᒪᒍ ᑍᒤᓐᓂᐊᕐᓂᕋᕐᓗᓂᐅᒃ.
ᒥᓗᒋᐊᑦ
16ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᐂᕉᓂ ᐅᖃᐅᑎᓚᐅᕈᒃ, ‘ᐊᔭᐅᑉᐱᐊᑦ ᐃᓴᐅᑎᓚᐅᕈᒃ ᓄᓇᓗ ᐊᓇᐅᓗᒍ ᑕᒪᑐᒧᖓ, ᐄᑦᔨᑉᑎᓕᒫᑉ ᓄᓇᖓᑕ ᐳᔪᕋᖏᑦ ᒥᓗᒋᐊᓐᖑᖁᓪᓗᒋᑦ.’” {ᑯᒪᓐᖑᖁᓪᓗᒋᑦ.} 17ᑕᕝᕙ ᐂᕉᓂᐅᑉ ᐊᔭᐅᑉᐱᐊᓂ ᐃᓴᐅᑎᕚ, ᓄᓇᐅᓪᓗ ᐳᔪᕋᖓᑦ ᐊᓇᐅᕚ ᑕᒪᑐᒧᖓ, ᓄᓇᐅᓪᓗ ᐳᔪᐊᓪᓕᓂᑯᓕᒫᖏᑦ ᒥᓗᒋᐊᓐᖑᕐᐳᑦ {ᑯᒪᓐᖑᕐᐳᑦ} ᐃᓄᐃᓪᓗ ᐆᒪᔪᓪᓗ ᑕᒪᒃᑯᓄᖓ ᑎᑭᑕᐅᓕᕐᐳᑦ; ᓄᓇᐅᓪᓗ ᐳᔪᐊᓪᓕᓂᖁᓕᒫᑦᓯᐊᖏᑦ ᐄᑦᔨᑉᑎᒥ ᒥᓗᒋᐊᓐᖑᕐᐳᑦ. {ᑯᒪᓐᖑᕐᐳᑦ.} 18ᐊᖓᒃᑯᐃᓪᓗ ᐊᖓᒃᑰᓂᕐᒥᒍᑦ ᑍᒤᓕᐅᕋᓱᐊᓚᐅᕋᓗᐊᕐᐳᑦ ᑭᓯᐊᓂᓕ ᐱᔪᓐᓇᓐᖏᓚᑦ, ᑍᒤᒻᒪᑦ ᒥᓗᒋᐊᖃᓕᓚᐅᕐᐳᖅ ᑕᒤᓐᓂ ᐃᓄᖕᓂ ᐆᒪᔪᓂᓗ. 19#ᓘᑲᓯ 11:20.ᐊᖓᒃᑯᐃᓪᓗ ᐰᕉᒧᑦ ᐅᖃᕐᐳᑦ, “ᑕᒪᓐᓇ ᒎᑎᐅᑉ ᐱᔪᓐᓇᕐᓂᖓᑕ ᐱᓇᓱᐊᕐᓂᕆᕚ!” ᑭᓯᐊᓂᓕ ᐰᕉᑉ ᐆᒻᒪᑎᖓ ᓱᓕ ᓯᑎᔫᓚᐅᕐᐳᖅ, ᑖᒃᑯᓂᖓᓗ ᓈᓚᒍᓐᓇᕋᓂ, ᓲᕐᓗ ᐊᑕᓂᐅᑉ ᑍᒤᓐᓂᐊᕐᓂᕋᓚᐅᕐᒪᒍ.
ᐊᓇᓐᖐᑦ
20ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᖃᐅᒃᐸᑦ ᐅᓪᓛᒻᒪᕆᒃᑯᑦ ᒪᑭᓪᓗᑎᑦ ᐰᕉᒥᒃ ᐅᑕᖅᑭᔭᕐᑐᕐᓂᐊᕐᐳᑎᑦ, ᑰᖕᒧᑦ ᐃᒫᓄᕆᐊᕐᑐᓕᕐᐸᑦ, ᐅᖃᐅᑎᓗᒍᓗ, ‘ᐊᑕᓂᖅ ᐃᒫᒃ ᐅᖃᕐᐳᖅ, ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᐅᕙᓐᓄᑦ ᑐᒃᓯᐊᕈᓐᓇᖁᓪᓗᒋᑦ. 21ᐃᓄᖁᑎᒃᑲ ᐊᐅᓪᓚᖁᓂᐊᖏᒃᑯᕕᒋᑦ, ᑕᕝᕙ ᐅᓄᕐᑐᕐᔪᐊᓂᒃ ᐊᓇᓐᖏᕐᓂᒃ ᑎᑭᑎᑦᓯᓂᐊᕐᐳᖓ ᐃᓕᖕᓄᑦ ᐱᔨᒋᔭᕐᓄᓪᓗ ᐃᓄᖁᑎᖕᓄᓪᓗ, ᐃᒡᓗᓯᓗ ᐄᑦᔨᑉᑎᒥᐅᓕᒫᓪᓗ ᐃᒡᓗᖏᑦ ᑕᑕᐅᓂᐊᕐᐳᑦ ᐊᓇᓐᖏᕐᓄᑦ, ᓄᓇᓗ ᓇᔪᕐᑕᖓ ᐅᓕᒃᑕᐅᓂᐊᕆᕗᖅ ᑕᒪᒃᑯᓄᖓ. 22ᑭᓯᐊᓂᓕ ᓄᓇ ᒎᓯᓂ ᑕᒪᒃᑯᓄᖓ ᑎᑭᑕᐅᑎᓐᓂᐊᓐᖏᓚᕋ, ᑕᕝᕙᓂ ᐃᓄᖁᑎᖃᕋᒪ, ᑖᒃᑯᐊ ᐊᓇᓐᖏᕐᓄᑦ ᑎᑭᑕᐅᑎᓐᓂᐊᓐᖏᓚᒃᑲ, ᑍᒤᓕᐅᕐᓂᐊᕐᐳᖓ ᖃᐅᔨᖁᓪᓗᑎᑦ ᐅᕙᖓ ᐊᑕᓂᐅᒐᒪ ᑕᒫᓂ ᓄᓇᒥ ᐱᓇᓱᐊᕐᑐᖅ. 23ᐊᕕᒃᓯᒪᑎᑦᓯᓂᐊᕐᐳᖓᓗ ᐃᓄᖁᑎᓐᓂᒃ ᐃᓄᖁᑎᑦᓯᓐᓂᑦ, ᑕᒪᓐᓇᓗ ᖃᐅᒃᐸᑦ ᓇᓗᓁᒃᑯᑕᖅ ᐱᒋᐊᕐᑎᓐᓂᐊᕐᐸᕋ.’” 24ᑍᒫᒡᓗ ᑕᕝᕙ ᐊᑕᓂᖅ ᐱᓇᓱᐊᓚᐅᕐᐳᖅ, ᐊᓇᓐᖐᓪᓗ ᐅᓄᕐᑐᐊᓗᐃᑦ ᐸᕕᒃᓴᕐᑐᕐᔪᐊᑦ ᑎᑭᓕᕐᐳᑦ ᐰᕉᑉ ᐃᒡᓗᖓᓄᑦ ᐱᔨᖏᑕᓗ ᐃᒡᓗᖏᓐᓄᑦ, ᐄᑦᔨᑉᑎᐅᓪᓗ ᓄᓇᓕᒫᖓ ᓈᓯᒪᓕᓚᐅᕐᐳᖅ ᑕᒪᒃᑯᓄᖓ ᓄᓇᓗ ᓱᕋᒃᑕᐅᓪᓗᓂ ᑕᒪᒃᑯᓄᖓ ᐊᓇᓐᖏᕐᓄᑦ ᐸᕕᓴᒃᑐᕐᔪᐊᓄᑦ.
25ᑕᕝᕙ ᐰᕉ ᕾᖁᔨᓕᕐᐳᖅ ᒨᓯᓯᒥᒃ ᐂᕉᓂᒥᒡᓗ, ᐅᖃᐅᑎᓗᒋᒡᓗ, “ᐊᐅᓪᓚᕐᓗᓯ ᒎᑎᑦᓯᓐᓄᑦ ᑐᓂᕐᕈᓯᕆᐊᕐᑐᓕᕆᑦᓯ ᑕᒫᓂ ᓄᓇᒥ.”
26ᒨᓯᓯᓕ ᐅᖃᕐᐳᖅ, “ᑕᒪᓐᓇ ᐊᑲᐅᑦᔮᓐᖏᓚᖅ ᑍᒤᓕᐅᕐᓂᐊᕈᑦᑕ; ᐄᑦᔨᑉᑎᒥᐅᑦ ᑕᒪᑐᒧᖓ ᐱᓇᓱᐊᕐᑕᑦᑎᓐᓄᑦ ᐊᑲᐅᓐᖏᓕᐅᕐᑎᑕᐅᒐᔭᕐᒪᑕ ᑐᓂᕐᕈᓯᓕᕈᑦᑕ ᐊᑕᓂᕐᒧᑦ ᒎᑎᑦᑎᓐᓄᑦ ᐆᒪᔪᓂᒃ ᑐᓂᕐᕈᓯᕋᔭᕋᑦᑕ. ᑕᒪᒃᑯᓂᖓᓗ ᐆᒪᔪᓂᒃ ᐄᑦᔨᑉᑎᒥᐅᑦ ᐊᓐᓂᕆᔭᖏᓐᓂᒃ ᑕᑯᓐᓇᕐᑎᓪᓗᒋᑦ ᑐᓂᕐᕈᓯᕈᑎᖃᓕᕈᑦᑕ, ᑖᒃᑯᓄᖓ ᒥᓪᓗᕐᑕᐅᒐᔭᓐᖏᓚᒎᑦ? 27ᐅᓪᓗᓂᒃ ᐱᖓᓱᓂᒃ ᐃᖏᕐᕋᔪᒃᓴᐅᕗᒍᑦ ᐃᓄᖃᖏᑦᑐᒧᑦ ᑐᓂᕐᕈᓯᕆᐊᕐᑐᕐᓗᑕ ᐊᑕᓂᕐᒧᑦ ᒎᑎᑦᑎᓐᓄᑦ, ᑍᒫᒃ ᐱᖁᓪᓗᑕ ᐅᖃᐅᑎᓯᒪᖕᒪᑎᒍᑦ.”
28ᑕᕝᕙ ᐰᕉ ᐅᖃᕐᐳᖅ, “ᐊᐅᓪᓚᖁᓂᐊᓕᕐᐸᑦᓯ, ᑐᓂᕐᕈᓯᕆᐊᕐᑐᕈᓐᓇᖁᓪᓗᓯ ᐊᑕᓂᕐᒧᑦ ᒎᑎᑦᓯᓐᓄᑦ ᐃᓄᖃᖏᑦᑐᒥ, ᑭᓯᐊᓂᓕ ᐅᖓᓯᓗᐊᕐᑐᒧᐊᕐᑐᒃᓴᐅᓐᖏᓚᓯ, ᑐᒃᓯᐅᑎᔭᒃᓴᕆᕙᑦᓯᓐᖓᓗ.”
29ᒨᓯᓯᐅᓪᓕ ᑭᐅᕚ, “ᑕᑯᒋᑦ ᑕᕝᕙᓐᖓᑦ ᐊᓂᓕᕈᒪ ᑐᒃᓯᐅᑎᓂᐊᕐᐸᒋᑦ ᐊᑕᓂᕐᒧᑦ ᖃᐅᒃᐸᑦ ᑕᒪᒃᑯᓄᖓ ᐊᓇᓐᖏᕐᓄᑦ ᕿᒪᒃᑕᐅᖁᓪᓗᓯ ᐱᔨᑎᓪᓗ ᐃᓄᖁᑎᑎᓪᓗ, ᑭᓯᐊᓂᓕ ᓴᒡᓗᔪᒃᓴᐅᓐᖏᓚᑎᑦ ᑕᒪᑐᒪᓂ, ᐃᓄᖕᓂᒃ ᑐᓂᕐᕈᓯᕆᐊᕐᑐᖁᔨᔪᓐᓃᕐᓗᑎᑦ ᐊᑕᓂᕐᒧᑦ ᑍᒤᑦᑐᒃᓴᐅᓐᖏᓚᑎᑦ.”
30ᒨᓯᓯᓗ ᐰᕉᒥᑦ ᐊᓂᒐᒥ ᐊᑕᓂᕐᒧᑦ ᑐᒃᓯᐊᓕᕐᐳᖅ, 31ᐊᑕᓂᕐᓗ ᐱᓇᓱᐊᓕᕐᐳᖅ ᒨᓯᓯᐅᑉ ᑐᒃᓯᐊᕈᑎᒋᔭᖓ ᒪᓕᒡᓗᒍ, ᐊᓇᓐᖐᓪᓗ ᑕᒪᕐᒥᒃ ᐰᕉᒥᑦ, ᐱᔨᖏᓐᓂᓪᓗ, ᐃᓄᖁᑎᖏᓐᓂᓪᓗ, ᕿᒪᕉᑎᓚᐅᕐᐳᑦ ᐊᒥᐊᒃᑯᖃᖏᑦᓯᐊᕐᓗᑎᒃ. 32ᑭᓯᐊᓂᓕ ᐰᕉᑉ ᐆᒻᒪᑎᓂ ᓯᑎᔫᑎᓕᓚᐅᕆᕚ, ᐃᓄᖕᓂᒡᓗ ᐊᐅᓪᓚᖁᔨᔪᓐᓃᓚᐅᕆᕗᖅ.
Currently Selected:
ᒨᓯᓯ ᐂᑉᐸᖏᑦ 8: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
