ᒨᓯᓯ ᐂᑉᐸᖏᑦ 10
10
ᐱᒡᓕᕐᑕᐅᔮᕐᑐᑦ
1ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᐰᕉᒧᐊᓚᐅᕆᑦ; ᑖᑦᓱᒪ ᐆᒻᒪᑎᖓ ᐱᔨᖏᑕᓗ ᐆᒻᒪᑎᖏᑦ ᓯᑎᔫᑎᓯᒪᒐᒃᑭᑦ, ᑖᒃᑯᑎᒎᓇᖅ ᓇᓗᓁᒃᑯᑕᕐᓂᒃ ᓴᖅᑭᑎᑦᓯᔪᓐᓇᖁᓪᓗᖓ, 2ᐊᒻᒪᑦᑕᐅᖅ ᐅᖃᐅᓯᖃᕈᓐᓇᖁᓪᓗᑎᑦ ᕿᑐᕐᖓᕐᓄᑦ ᕿᑐᕐᖓᕕᓪᓗ ᕿᑐᕐᖓᖏᓐᓄᑦ ᖃᓄᖅ ᐄᑦᔨᑉᑎᒥᐅᓂᒃ ᐱᓐᖑᐊᖃᑐᐃᓐᓇᕐᑑᔮᓚᐅᕐᓂᓐᓂᒃ ᖃᓄᕐᓗ ᓇᓗᓁᒃᑯᑕᕐᓂᒃ ᐱᓇᓱᐊᖃᑦᑕᓚᐅᕐᒪᖔᕐᒪ ᑖᒃᑯᑎᒎᓇᖅ; ᑕᒪᑦᓯ ᖃᐅᔨᖁᓪᓗᓯ ᐅᕙᖓ ᐊᑕᓂᐅᒐᒪ.”
3ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᐊᕐᐴᒃ, ᐅᖃᐅᑎᓪᓗᒍᓗ, “ᐊᑕᓂᖅ ᐃᒫᒃ ᐅᖃᕐᐳᖅ, ᐄᑉᕈᐃᑦ ᒎᑎᖓᑦ, ᖃᓄᖅ ᐊᑯᓂᐅᑎᒋᔪᖅ ᐅᕙᓐᓄᑦ ᓂᑲᓇᕐᓴᕐᑍᓕᓂᐊᕐᐲᑦ? ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᐅᕙᓐᓂᒃ ᑐᒃᓯᐊᕐᕕᖃᕈᓐᓇᖁᓪᓗᒋᑦ. 4ᐃᓄᖁᑎᒃᑲ ᐊᐅᓪᓚᖁᓂᐊᖏᒃᑯᕕᒋᑦ, ᑕᑯᒋᑦ ᖃᐅᒃᐸᑦ ᐱᒡᓕᕐᑕᐅᔮᕐᑐᓂᒃ ᓄᓇᑦᓯᓐᓄᑦ ᑎᑭᑎᑦᓯᓂᐊᕐᐳᖓ. 5ᑕᒪᓐᓇᓗ ᓄᓇᓕᒫᑦᓯᐊᖅ ᑕᑕᑕᐅᓯᒪᓂᐊᕐᐳᖅ ᑕᒪᒃᑯᓄᖓ, ᐊᒡᓛᑦ ᐅᓄᓗᐊᒧᑦ ᓄᓇ ᓴᖅᑭᔮᕈᓐᓃᕐᑎᑕᐅᓂᐊᕐᐳᖅ ᑕᒪᒃᑯᓄᖓ; ᓱᓇᑐᐃᓐᓇᑦᓯᐊᓂᒡᓗ ᓇᑕᖅᑯᕐᓇᕐᓄᑦ ᓱᕋᒃᑕᐅᓯᒪᖏᑦᑐᓕᒫᓂᒃ ᓂᕆᓂᐊᕐᐳᑦ, ᓇᐹᕐᑐᖁᑎᓕᒫᓯᓗ ᓄᓇᒥ ᐱᕈᕐᑐᑦ ᑕᒪᒃᑯᓄᖓ ᓂᕆᔭᐅᓂᐊᕐᐳᑦ. 6ᑕᒪᒃᑯᓄᖓᓗ ᐃᒡᓗᓯ ᑕᑕᑕᐅᓂᐊᕐᐳᑦ, ᐱᔨᕕᓪᓗ ᐃᒡᓗᓕᒫᖏᑦ ᑕᑕᑕᐅᓂᐊᕐᐳᑦ ᐄᑦᔨᑉᑎᒥᐅᓕᒫᓪᓗ; ᐊᑖᑕᒃᑯᓯ ᐊᑖᑕᑦᓯᐊᒃᑯᓯᓘᓐᓃᑦ ᑍᒫᒃ ᐅᓄᕐᑎᒋᔪᓂᒃ ᑕᑯᓚᐅᕐᓯᒪᓐᖏᓚᑦ, ᑍᒪᓐᖓᑦ ᐃᓅᓕᕐᓂᕐᒥᖕᓂᑦ ᐅᓪᓗᒥᒧᑦ ᑎᑭᓪᓗᒍ ᑍᒫᒃ ᖃᐅᔨᔪᖃᓚᐅᕐᓯᒪᓐᖏᓚᖅ.” ᒨᓯᓯᓗ ᐰᕉᒥᑦ ᑐᓄᒃᑲᒥ ᑕᕝᕙᓐᖓᑦ ᐊᓂᕗᖅ.
7ᑕᕝᕙ ᐰᕉᑉ ᐱᔨᖏᑦ ᐰᕉᒧᑦ ᐅᖃᕐᐳᑦ, “ᖃᓄᖅ ᐊᑯᓂᐅᑎᒋᔪᖅ ᑖᒃᑯᐊ ᐊᖑᑎᑦ ᐅᕙᑦᑎᓐᓂᒃ ᐸᒡᕕᓴᒃᑐᒃᓴᐅᕚᑦ? ᐅᑯᐊ ᐃᓄᐃᑦ ᐊᐅᓪᓚᕐᑎᓚᐅᒃᑭᑦ, ᐊᑕᓂᕐᒧᑦ ᒎᑎᒥᖕᓄᑦ ᑐᒃᓯᐊᕆᐊᕐᑐᕈᓐᓇᖁᓪᓗᒋᑦ; ᓱᓕ ᖃᐅᔨᓐᖏᓚᑏᑦ? ᐄᑦᔨᑉᑎᐅᑉ ᑭᓱᒃᓴᐅᔪᓐᓃᕐᑎᑕᐅᓂᖓᓂᒃ?”
8ᑍᒤᒻᒪᑦ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᑦ ᐅᑎᕐᑎᑕᐅᕘᒃ; ᑖᑦᓱᒪᓗ ᐅᖃᐅᑎᕚᒃ, “ᐊᐅᓪᓚᓕᕆᑦᓯ, ᐊᑕᓂᖅ ᒎᑎᓯ ᑐᒃᓯᐊᕐᕕᒋᔭᕐᑐᓕᕐᓯᐅᒃ; ᑭᓯᐊᓂᓕ ᑭᓇᒃᑯᑦ ᐊᐅᓪᓚᖃᑕᐅᔪᒃᓴᐅᕚᑦ?”
9ᒨᓯᓯᐅᑉ ᑭᐅᕚ, “ᑕᒪᑦᑕ ᐊᐅᓪᓚᕐᓂᐊᕐᐳᒍᑦ, ᕿᑐᕐᖓᕗᓪᓗ ᐃᓄᑐᖃᕗᓪᓗ ᐃᓚᒋᓗᒋᑦ; ᐊᐅᓪᓚᕐᓂᐊᕐᐳᒍ ᐃᕐᓂᕗᑦ ᐸᓂᕗᓪᓗ ᓰᐱᖁᑎᕗᓪᓗ ᐆᒪᔪᖁᑎᕗᓪᓗ ᐃᓚᒋᓗᒋᑦ, ᓇᓪᓕᐅᓐᓂᕐᓯᐅᕆᐊᖃᕐᓂᐊᕋᑦᑕ ᑕᒪᑦᑕ ᐊᑕᓂᖅ ᐅᐱᒋᓗᒍ.”
10ᐰᕉᑉ ᐅᖃᐅᑎᕔᑦ, “ᐊᑕᓂᐅᑉ ᓵᖓᓂ ᐅᖃᒻᒪᕆᒃᐳᖓ, ᐊᕐᓇᓂᒃ ᓱᕈᓯᕐᓂᒡᓗ ᐃᓚᖃᕐᓂᐊᕈᑦᓯ ᐊᐅᓪᓚᕐᑎᑦᓯᓂᐊᖏᒻᒪᕆᒃᐳᖓ! ᑍᒤᓐᓂᐊᕈᑦᓯ ᓇᓗᓇᖏᑦᓯᐊᕐᒪᑦ ᐱᐅᖏᑦᑐᒥᒃ ᐃᓱᒪᖃᕐᓗᓯ ᑭᓯᐊᓂ ᑍᒤᓐᓇᓱᐊᕋᔭᕐᑐᓯ. 11ᑍᒤᑦᔮᖏᒻᒪᕆᒃᐳᓯ! ᐊᖑᑏᑦ ᑭᓯᐊᓂ ᐃᓚᒋᓗᒋᑦ ᐊᐅᓪᓚᕈᓐᓇᕐᐳᓯ ᐊᑕᓂᕐᒧᑦ ᑐᒃᓯᐊᕆᐊᕐᑐᕐᓗᓯ, ᑕᒪᓐᓇ ᑕᕝᕙ ᐱᔪᒪᔭᓯ.” ᑍᒤᓕᔭᐅᒐᒥᒃ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒥᑦ ᐊᔭᐅᕐᑕᐅᓪᓗᑎᒃ ᐊᓂᑎᑕᐅᓕᕐᐴᒃ.
12ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᑕᓖᑦ ᐃᓵᓚᐅᕈᒃ ᐄᑦᔨᑉᑎᐅᑉ ᓄᓇᖓᑕ ᖁᓛᓄᑦ, ᐱᒡᓕᕐᑕᐅᔮᕐᑐᑦ ᐄᑦᔨᑉᑎᐅᑉ ᓄᓇᖓᓄᑦ ᑎᑭᖁᓪᓗᒋᑦ, ᓄᓇᒥ ᐱᕈᕐᑐᓕᒫᓂᒃ ᓂᕆᖁᓪᓗᒋᑦ ᓇᑕᖅᑯᕐᓇᕐᓄᑦ ᓱᕋᒃᑕᐅᓯᒪᖏᑦᑐᓂᒃ.” 13ᑕᕝᕙ ᒨᓯᓯᐅᑉ ᐊᔭᐅᑉᐱᐊᓂ ᐃᓴᐅᑎᕚ ᐄᑦᔨᑉᑎᐅᑉ ᖁᓛᓄᑦ, ᐊᑕᓂᕐᓗ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐊᓄᕌᓕᕐᑎᑦᓯᕗᖅ ᓄᓇᒧᑦ ᐅᓪᓗᓕᒫᖅ ᐅᓐᓄᐊᓕᒫᕐᓗ ᓈᓪᓗᒍ; ᐅᓪᓛᓐᖑᕐᑎᓪᓗᒍ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐊᓄᕌᕐᑑᑉ ᐱᒡᓕᕐᑕᐅᔮᕐᑐᑦ ᑎᑭᑎᑉᐰᑦ. 14#ᑕᑯᑎ 9:2,3.ᐱᒡᓕᕐᑕᐅᔮᕐᑐᓪᓗ ᑎᑭᓐᓇᒥᒃ ᐄᑦᔨᑉᑎᐅᑉ ᓄᓇᓕᒫᖓᓄᑦ ᓯᐊᒻᒪᒃᐳᑦ, ᐄᑦᔨᑉᑎᐅᓪᓗ ᓄᓇᓕᒫᖓᓃᓕᕐᓗᑎᒃ, ᐅᓄᕐᑐᕐᔪᐊᖑᓚᐅᕐᐳᑦ ᑍᒫᒡᓗ ᓯᕗᓂᖓᒍᑦ ᐅᓄᕐᑎᒋᔪᖃᓚᐅᕐᓯᒪᓐᖏᓚᖅ, ᑭᖑᓂᖓᒍᓪᓗ ᑍᒫᒃ ᐅᓄᕐᑎᒋᔪᓂᒃ ᐱᑕᖃᓚᐅᕐᓯᒪᑦᔮᓇᓂ. 15ᓄᓇᓕᒫᑦᓯᐊᕐᓗ ᑕᑕᑕᐅᓯᒪᓕᓚᐅᕐᐳᖅ ᑕᒪᒃᑯᓄᖓ, ᓄᓇᓗ ᐊᒡᓛᑦ ᑕᒪᒃᑯᓄᖓ ᑖᕐᓯᑎᑕᐅᓚᐅᕐᐳᖅ, ᐱᕈᕐᑐᓕᒫᓂᒡᓗ ᓄᓇᒦᑦᑐᓂᒃ ᓂᕆᓕᕐᐳᑦ ᓇᐹᕐᑐᐃᓪᓗ ᐱᕈᕐᑐᖏᓐᓂᒃ ᓇᑕᖅᑯᕐᓇᕐᓄᑦ ᐊᒥᐊᒃᑯᒋᔭᐅᓚᐅᕐᑐᓂᒃ; ᑐᖑᔪᕐᑕᓂᒡᓗ ᓄᓇᒥ ᐊᒥᐊᒃᑯᑕᖃᕈᓐᓃᓚᐅᕐᐳᖅ, ᐊᒡᓛᓪᓗ ᓇᐹᕐᑐᑦ, ᐱᕈᕐᑐᓪᓗ ᐱᕈᕐᓰᕕᖕᒦᑦᑐᑦ, ᐄᑦᔨᑉᑎᐅᑉ ᓄᓇᓕᒫᖓᓃᓕᕐᓗᑎᒃ.
16ᑕᕝᕙ ᐰᕉᖅ ᒨᓯᓯᒥᒃ ᐂᕉᓂᒥᒡᓗ ᕾᖁᔨᕗᖅ ᑐᐊᕕᖁᓪᓗᒋᒃ, ᐅᖃᐅᑎᓪᓗᒋᒡᓗ, “ᐊᔪᕐᑐᓕᓯᒪᕗᖓ ᐊᑕᓂᕐᒧᑦ ᒎᑎᑦᓯᓐᓄᑦ, ᐃᓕᑦᓯᖕᓄᓪᓗ. 17ᑍᒤᒻᒪᑦ ᒫᓐᓇ, ᐊᔪᕐᑐᓕᓂᒃᑲ ᐃᓱᒪᒋᔪᓐᓁᕐᓯᐅᒃ, ᐊᒃᓱᕈᕐᓗᖓ ᕿᓄᕕᒋᕙᑦᓯᒃ ᐊᑕᐅᓯᐊᓪᓚᕆᒡᓗᖓ, ᐊᑕᓂᖅ ᒎᑎᓯ ᑐᒃᓯᐊᕐᕕᒋᓚᐅᕐᓯᐅᒃ ᑕᒪᑐᒥᖓᑦ ᑐᖁᓐᓇᕐᑐᒥᒃ ᐲᕐᓯᖁᓗᒍ ᐅᕙᓐᓂᑦ.” 18ᑕᕝᕙᓐᖓᓪᓗ ᐰᕉᒥᑦ ᐊᓂᒐᒥ, ᐊᑕᓂᖅ ᑐᒃᓯᐊᕐᕕᒋᕚ. 19ᐊᑕᓂᕐᓗ ᓯᕿᓂᐅᑉ ᓂᐱᕕᐊᑕ ᓇᓛᓂᑦ ᐊᓄᕆᒥ ᓴᓐᖏᔪᒥᒃ ᑎᑭᑎᑦᓯᕗᖅ, ᑕᒪᑐᒧᖓᓗ ᑕᒪᒃᑯᐊ ᐱᒡᓕᕐᑕᐅᔮᕐᑐᑦ ᑎᒃᑕᐅᓕᕐᐳᑦ ᐃᒪᕐᒧᑦ ᐊᐅᐸᓗᒃᑕᒧᑦ; ᐊᑕᐅᓯᕐᒥᒡᓘᓐᓃᑦ ᐱᒡᓕᕐᑕᐅᔮᕐᑐᒥᒃ ᐄᑦᔨᑉᑎᐅᑉ ᓄᓇᖓᓂ ᐊᒥᐊᒃᑯᑕᖃᕈᓐᓃᕐᓗᓂ. 20ᐊᑕᓂᐅᓪᓕ ᐰᕉᑉ ᐆᒻᒪᑎᖓ ᓱᓕ ᓯᑎᔫᑎᓚᐅᕐᐹ, ᐃᓴᕆᐊᓕᒥᐅᓪᓗ ᐃᓄᖏᑦ ᐊᐅᓪᓚᖁᓚᐅᓐᖏᓔᑦ.
ᑖᕐᑐᕐᔪᐊᖅ
21ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᑕᓖᑦ ᐃᓵᓚᐅᕈᒃ ᕿᓚᖕᒧᑦ ᐄᑦᔨᑉᑎᒧᑦ ᑖᕐᑐᕐᔪᐊᖅ ᑎᑭᖁᓪᓗᒍ, ᐃᓄᖏᓐᓄᓪᓗ ᑖᕐᑐᕐᔪᐊᑉ ᑖᕐᑑᓂᖓ ᐃᒃᐱᒋᔭᐅᔪᓐᓇᖁᓪᓗᒍ.” 22#ᐃᓐᖏᕈᑦ 105:28; ᑕᑯᑎ 16:10.ᑕᕝᕙ ᒨᓯᓯᐅᑉ ᑕᓕᓂ ᐃᓵᒃᐹ ᕿᓚᖕᒧᑦ, ᑕᕝᕙ ᑖᕐᑐᕐᔪᐊᖅ ᑭᓪᓚᖃᖏᑦᑐᑎᑐᑦ ᑍᒤᑦᑐᖅ ᑎᑭᐅᑎᕗᖅ ᐄᑦᔨᑉᑎᓕᒫᒧᑦ ᑖᕐᑑᓕᕐᓗᓂᓗ ᐅᓪᓗᓂᒃ ᐱᖓᓱᓂᒃ. 23ᓇᓪᓕᐊᓐᓂᒡᓘᓐᓃᑦ ᐃᒻᒥᖕᓄᑦ ᑕᑯᖃᑦᑕᐅᑎᔪᓐᓇᕐᑐᖃᓚᐅᓐᖏᓚᖅ, ᐃᒡᓗᒥᖕᓂᓪᓗ ᐊᓂᔪᖃᓚᐅᕋᓂ ᐅᓪᓗᓂᒃ ᐱᖓᓱᓂᒃ; ᐃᓴᕆᐊᓕᒥᐅᓪᓕ ᓇᔪᕐᑕᖓᑦ ᖃᐅᒪᑦᓯᐊᓚᐅᕐᐳᖅ.
24ᑕᕝᕙ ᐰᕉᑉ ᒨᓯᓯ ᕾᖁᕚ, ᐅᖃᐅᑎᓪᓗᒍᓗ, “ᐊᐅᓪᓚᓕᕆᑦᓯ ᐊᑕᓂᖅ ᑐᒃᓯᐊᕐᕕᒋᔭᕐᑐᕐᓗᒍ ᕿᑐᕐᖓᓯ ᐃᓚᒋᓗᒋᑦ, ᑭᓯᐊᓂᓕ ᐆᒪᔪᖁᑎᓯ ᐱᓐᖏᑕᑐᐊᕆᓗᒋᑦ.”
25ᒨᓯᓯᐅᓪᓕ ᑭᐅᕚ, “ᑭᓯᐊᓂᓕ ᐆᒪᔪᓂᒃ ᑐᓂᕐᕈᑎᒃᓴᑦᑎᓐᓂᒃ ᐃᑯᐊᓚᔭᒃᓴᓂᒡᓗ ᑐᓂᓯᔭᕆᐊᖃᕐᓂᐊᕐᐸᑦᑎᒍᑦ, ᑐᓂᕐᕈᓯᕈᓐᓇᖁᓪᓗᑕ ᐊᑕᓂᕐᒧᑦ ᒎᑎᑦᑎᓐᓄᑦ. 26ᐆᒪᔪᖁᑎᓕᒫᕗᓪᓕ ᐊᐅᓪᓚᖃᑎᒋᔭᒃᓴᕆᕙᕗᑦ; ᑭᓱᒥᒡᓘᓐᓃᑦ ᐊᒥᐊᒃᑯᖃᕐᑐᒃᓴᐅᓐᖏᓚᒍᑦ ᐆᒪᔪᑦ ᑯᑭᖏᓪᓘᓐᓃᑦ ᕿᒪᒃᑕᐅᔪᒃᓴᐅᓐᖏᓚᑦ, ᓇᒃᓴᕆᐊᖃᕋᑦᑎᒍ ᐊᑕᓂᕐᒥᒃ ᒎᑎᑦᑎᓐᓂᒃ ᑐᒃᓯᐊᕐᕕᖃᕈᓐᓇᖁᓪᓗᑕ, ᖃᐅᔨᒪᓇᑕᓗ ᓇᓪᓕᐊᓐᓂᒃ ᐊᑕᓂᕐᒧᑦ ᑐᓂᕐᕈᓯᕆᐊᖃᕐᓂᐊᕐᒪᖔᑦᑕ ᑍᑯᖓ ᑎᑭᓚᐅᖅᑳᕐᑎᓐᓇᑕ.”
27ᐊᑕᓂᐅᓪᓕ ᐰᕉᑉ ᐆᒻᒪᑎᖓ ᓯᑎᔫᑎᓚᐅᕐᐹ, ᑖᒃᑯᓂᖓᓗ ᐊᐅᓪᓚᖁᔨᓚᐅᓐᖏᓚᖅ. 28ᑕᕝᕙ ᐰᕉᑉ ᐅᖃᐅᑎᕚ, “ᑕᒫᓂᓐᖏᓚᐅᕆᑦ ᓇᔪᕐᑕᓐᓂ; ᐊᓂᓚᐅᕆᑦ, ᑕᑯᒃᑲᓐᓂᕈᒪᔪᓐᓃᕐᐸᒋᑦ; ᑕᑯᒃᑲᓐᓂᓕᑐᐊᕈᒃᑭᑦ ᐅᓪᓗᐃᑦ ᓇᓪᓕᐊᓐᓂ ᑕᕝᕙ ᑐᖁᔪᒃᓴᐅᕗᑎᑦ!”
29ᒨᓯᓯᓗ ᐅᖃᕐᐳᖅ, “ᑍᒫᒃ ᐅᖃᕋᕕᑦ! ᑕᕝᕙ ᑕᑯᒃᑲᓐᓂᑦᔮᔪᓐᓃᕐᐸᒋᑦ.”
Currently Selected:
ᒨᓯᓯ ᐂᑉᐸᖏᑦ 10: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
