ᑯᕆᓐᑎᐊᒥᐅᓄᑦ ᓯᕗᓪᓖᑦ 9

ᐋᐴᓯᑕᓕᐅᑉ ᐱᔪᓐᓇᕐᑕᖏᑦ ᐱᔭᕆᐊᖃᕐᑕᖏᓪᓗ

1ᕿᓚᕈᑦᔮᕐᑕᐅᓯᒪᓐᖏᓚᖔ? ᐋᐴᓯᑕᓕᐅᓐᖏᓚᖔ? ᐊᑕᓂᖅ ᔩᓱᓯ ᑕᑯᓚᐅᓐᖏᓚᕌ? ᐊᑕᓂᕐᒥ ᐱᓇᓱᐊᕐᓯᒪᓂᓐᓄᑦ ᐅᒃᐱᕐᑑᓐᖏᓚᓰ? 2ᐊᓯᑦᓯᓐᓄᑦ ᐋᐴᓯᑕᓕᐅᖏᒃᑲᓗᐊᕈᒪ, ᐃᓕᑦᓯᓐᓄᓪᓕ ᐋᐴᓯᑕᓕᐅᕗᖓ! ᐃᓕᑦᓯ ᓇᓗᓁᒃᑯᑕᕆᒐᑦᓯ ᐊᑕᓂᕐᒥ ᐋᐴᓯᑕᓕᐅᓂᓐᓂᒃ.

3ᑕᒪᑦᔭ ᑭᐅᑦᔪᑎᒐ ᐅᕙᓐᓂᒃ ᐃᖅᑲᕐᑐᐃᔪᓄᑦ. 4ᓂᕆᔭᕆᐊᖃᓐᖏᓚᒎᑦ ᐃᒥᕆᐊᖃᕐᓇᑕᓗ ᐱᓇᓱᐊᕐᓂᑦᑎᓐᓄᑦ? 5ᐅᒃᐱᕐᑐᒥᒃ ᓄᓕᐊᒡᒋᕐᓯᒪᔪᒃᓴᐅᓐᖏᓚᒎᑦ? ᓲᕐᓗ ᐋᐴᓯᑕᓖᑦ ᐱᕙᖕᒪᑕ ᐊᑕᓂᐅᓪᓗ ᐃᓅᖁᑎᖏᑦ ᓰᐸᓯᓗ. 6ᐅᕝᕙᓘ ᐸᕐᓇᐹᓯᓗ ᐅᕙᒍᒃ ᐃᓅᑦᔪᑎᒋᓂᐊᕐᑕᑦᑎᓐᓂᒃ ᐃᖅᑲᓁᔭᕐᑐᑑᔭᕆᐊᖃᕐᐱᓅᒃ? 7ᐅᓇᑕᕐᑐᒃᓴᓪᓘᓐᓃ ᐊᑐᕐᓂᐊᕐᑕᒥᓂᒃ ᓇᖕᒥᓂᖅ ᐊᑭᓖᓲᖑᕚ? ᓇᓪᓕᐊᑦ ᐱᕈᓰᕕᖁᑎᓕᒃ ᐅᐂᓂᒃᓴᓂᒃ ᑲᓐᖓᕐᓱᓚᐅᕐᑕᒥ ᐱᕈᕐᑐᖏᓐᓂᒃ ᓂᕆᕙᓐᖏᓛᖅ? ᓇᓪᓕᐊᓪᓗ ᐆᒪᔪᓂᒃ ᑲᒪᔨᐅᔪᖅ ᐆᒪᔪᖁᑎᒥ ᐃᒻᒧᖏᓐᓂᒃ ᐃᒻᒧᒃᑖᕐᕕᖃᕐᐸᓐᖏᓛᖅ?

8ᐃᓄᑐᐃᓐᓁᑦ ᐃᓕᖅᑯᓯᖓᑦ ᐊᑐᕐᓗᒍ ᑍᒫᒃ ᐅᖃᕐᐳᖔ? ᐱᖁᔧᑦᑕᐅᖅ ᑍᒫᒃ ᐅᖃᓐᖏᓛᑦ? 9#ᒨᓯᓯ ᑕᓪᓕᒪᖏᑦ 25:4; 1 ᑎᒧᑎ 5:18.ᒨᓯᓯᐅᑉ ᐱᖁᔭᖏᓐᓂ ᑎᑎᕋᕐᓯᒪᖕᒪᑦ, “ᐃᒻᒧᒃᓯᐅᒐᕐᒥᒃ ᐃᑦᔭᕈᓯᕐᓯᓂᐊᕐᓇᒃ ᓂᐊᖂᔭᒃᓴᓂᒃ ᑐᓪᓕᕋᕐᑎᑕᐅᔪᒥᒃ.” ᒎᑎ ᐃᒧᒃᓯᐅᒊᓐᓇᕐᓂᒃ ᐃᓱᒪᖃᕐᐹ? 10ᑍᒫᒃ ᐅᖃᓐᖏᓛᖅ ᐅᕙᒍᑦ ᐱᓪᓗᑕ? ᑍᒫᒃ ᑎᑎᕋᕐᓯᒪᕗᖅ ᐱᑦᔪᑎᒋᓪᓗᑕ, ᓄᓇᒥᒃ ᐱᕈᕐᓰᕕᖕᒥᒃ ᒪᒃᐱᕐᑎᕆᔪᖅ, ᐱᕈᕐᑐᓂᒡᓗ ᑲᑎᕐᓱᐃᔪᖅ, ᐱᕈᕐᑐᑦ ᐃᓚᖏᓐᓂᒃ ᐱᑎᑕᐅᓛᕋᓱᒋᓗᓂ ᐃᖅᑲᓁᔭᕐᑐᒃᓴᐅᖕᒪᑦ. 11#ᕉᒪᒥᐅᓄᑦ 15:27.ᐅᒃᐱᕐᓂᕐᒥ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᓯᒪᒍᑦᑕ ᐃᓕᑦᓯᓐᓄᑦ, ᐊᖏᓗᐊᕋᔭᕐᐹ? ᑎᒥᐅᑉ ᐊᑐᒐᒃᓴᖏᓐᓂᒃ ᐃᓕᑦᓯᓐᓂᑦ ᑲᑎᕐᓱᐃᒍᑦᑕ? 12ᐊᓯᕗᑦ ᐃᓕᑦᓯᓐᓂᑦ ᐃᑲᔪᕐᑕᐅᔪᓐᓇᕐᐸᑕ, ᐅᕙᒍᓪᓕ ᐃᑲᔪᕐᑕᐅᔭᕆᐊᖃᕐᓂᕐᓴᐅᓐᖏᓚᒎᑦ?

ᑍᒤᓕᐅᕋᓱᐊᕐᐸᖏᑦᑐᒍᑦ, ᐅᖁᒤᓐᓇᕐᑐᒦᑉᐸᒃᑲᓗᐊᕐᓗᑕ ᐊᒡᕕᐊᕈᑕᐅᔪᒪᓇᑕ ᙭ᔅᑑᓯᐅᑉ ᐅᖃᐅᓯᖏᓐᓄᑦ ᑐᓴᕈᒥᓇᕐᑐᓄᑦ. 13#ᒨᓯᓯ ᑕᓪᓕᒪᖏᑦ 18:1.ᖃᐅᔨᒪᓐᖏᓚᓰ? ᑐᒃᓯᐊᕐᕕᒡᔪᐊᕐᒥ ᐃᖅᑲᓁᔭᕐᑐᑦ ᑐᒃᓯᐊᕐᕕᒡᔪᐊᕐᒥᑦ ᓂᕆᕙᖕᒪᑕ, ᑐᓂᕐᕈᓯᕐᕕᖕᒥᓗ ᐱᓇᓱᐊᕐᑐᑦ ᑐᓂᕐᕈᑎᕕᓃᑦ ᐃᓚᖏᓐᓂᒃ ᐱᖃᑕᐅᕙᖕᒪᑕ. 14#ᒫᑎᐅᓯ 10:10; ᓘᑲᓯ 10:7.ᑍᒫᑦᓮᓐᓇᕐᑕᐅᖅ, ᐊᑕᓂᖅ ᐱᖁᔨᓯᒪᕗᖅ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᔪᕆᕐᑐᐃᑦᔪᑎᖃᕐᑐᑦ ᐃᓅᑦᔪᑎᒃᓴᖏᓐᓂᒃ ᐊᑭᓕᕐᑕᐅᔪᒃᓴᐅᖕᒪᑕ ᐱᓇᓱᐊᕐᓂᕐᒥᖕᓄᑦ.

15ᑍᒫᒡᓕ ᐱᓇᓱᐊᕐᓯᒪᓐᖏᓚᖓ, ᐱᑎᑕᐅᔪᒪᓂᕐᒧᓪᓗ ᑕᒪᑐᒥᖓ ᑎᑎᕋᓐᖏᓚᖓ, ᑐᖁᔪᒪᖔᕋᔭᕐᐳᖓᓕ ᓂᕐᑑᑎᑦᔪᑎᒃᓴᕋ ᓇᓪᓕᐊᓐᓄᑦ ᓱᓇᐅᔪᓐᓃᕐᑎᑕᐅᖁᖏᓐᓇᒃᑯ. 16ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐊᔪᕆᕐᑐᐃᖃᑦᑕᕐᓂᕋ, ᐅᕙᓐᓂᒃ ᓂᕐᑐᕈᑎᒋᔪᒪᖏᓐᓇᒃᑯ, ᐊᔪᕆᕐᑐᐃᔭᕐᑐᖁᔭᐅᓯᒪᒐᒪ ᑲᑉᐱᐊᓇᕐᑐᐊᓘᒐᔭᕐᐳᖅ ᐅᕙᓐᓄᑦ ᐊᔪᕆᕐᑐᐃᖏᒃᑯᒪ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ! 17ᐅᕙᖓ ᓇᖕᒥᓂᖅ ᐱᔪᒪᓂᓐᓄᑦ ᐊᔪᕆᕐᑐᐃᒍᒪ ᐊᑭᓕᕐᑕᐅᔪᒃᓴᐅᕗᖓ; ᐱᔪᒪᓂᓐᓄᓪᓕ ᑍᒤᓕᐅᖏᒃᑯᒪ ᐱᖁᔭᐅᓂᕋ ᐊᑐᑐᐃᓐᓇᕐᐸᕋ. 18ᓱᓇᒥᒡᓕ ᑍᒪ ᐊᑭᓕᕐᑕᐅᔪᒃᓴᐅᕗᖔ? ᐃᒫ ᑭᓯᐊᓂ: ᐊᔪᕆᕐᑐᐃᓂᒃᑯᑦ ᐅᖃᐅᓰᑦ ᑐᓴᕈᒥᓇᕐᑐᑦ ᐊᑭᖃᖏᑦᑐᒥᒃ ᐱᓇᓱᐊᕈᑎᒋᔪᒪᕙᒃᑲ, ᐱᔭᕆᐊᖃᕐᑕᕋᓗᐊᒃᑲᓗ ᑎᒥᒃᑯ ᐱᖏᓪᓗᒋᑦ ᐊᔪᕆᕐᑐᐃᖃᑦᑕᕐᓂᓐᓄᑦ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ.

19ᐃᓄᖕᒧᑦ ᑭᓇᒧᓪᓘᓐᓃᑦ ᓂᐅᕕᐊᕆᔭᐅᓯᒪᓗᖓ ᐱᒋᔭᐅᓐᖏᓚᖓ, ᐅᕙᓐᓂᒡᓕ ᑕᒤᓐᓄᑦ ᐱᒋᔭᐅᑎᑉᐳᖓ, ᐃᓄᐃᑦ ᐅᓄᕐᓂᕐᓮᑦ ᐱᐅᓕᔭᐅᖁᓪᓗᒋᑦ. 20ᔫᑎᓃᑎᓪᓗᖓ ᔫᑎᑎᑐᑦ ᐃᓕᖅᑯᓯᖃᕐᐸᒃᐳᖓ, ᔫᑎᑦ ᐱᐅᓕᔭᐅᖁᓪᓗᒋᑦ. ᐱᖁᔭᖃᕐᑐᓃᑎᓪᓗᖓ ᐱᖁᔭᖃᕐᑐᑎᑐᑦ ᐃᓕᖅᑯᓯᖃᕐᐳᖓ, ᐅᕙᖓᓕ ᓇᖕᒥᓂᖅ ᔫᑎᑦ ᐱᖁᔭᖏᓐᓂᒃ ᒪᓕᒃᑎᐅᖏᒃᑲᓗᐊᕐᓗᖓ, ᐱᖁᔭᓂᒃ ᒪᓕᒃᑎᐅᔪᑦ ᐱᐅᓕᔭᐅᖁᓪᓗᒋᑦ. 21ᐱᖁᔭᖃᖏᑦᑐᓂᓕ ᐱᖁᔭᖃᖏᑦᑐᑎᑐᑦ ᐃᓕᖅᑯᓯᖃᕐᐳᖓ, ᒎᑎᐅᑉ ᐱᖁᔭᖏᓐᓂᒃ ᓈᓚᖏᑦᑑᖏᒃᑲᓗᐊᕐᓗᖓ, ᙭ᔅᑑᓯᐅᓪᓕ ᐱᖁᔭᖏᓐᓂᒃ ᐱᖃᕐᐳᖓ, ᐱᖁᔭᖃᖏᑦᑐᑦ ᐱᐅᓕᔭᐅᖁᓪᓗᒋᑦ. 22ᓴᓐᖐᑦᑐᓂ ᓴᓐᖐᑦᑐᑎᑐᑦ ᑍᒤᑉᐳᖓ, ᓴᓐᖐᑦᑐᑦ ᐱᐅᓕᔭᐅᖁᓪᓗᒋᑦ. ᐃᓄᐃᑦ ᐃᓕᖅᑯᓯᖏᓐᓄᑦ ᑕᒤᓐᓄᑦ ᐃᓅᖃᑕᐅᔪᓐᓇᕋᓱᐊᕐᐳᖓ, ᐊᔪᕐᓇᖏᑉᐸᑦ ᐃᓚᖏᑦ ᐱᐅᓕᔭᐅᔪᓐᓇᕐᓯᖁᓪᓗᒋᑦ ᐱᓇᓱᐊᕐᓂᒃᑯᑦ.

23ᐅᖃᐅᓰᑦ ᑐᓴᕈᒥᓇᕐᑐᑦ ᐱᑦᔪᑎᒋᓪᓗᒋᑦ ᑍᒫᒃ ᐱᕗᖓ, ᓮᒻᒪᕐᑎᑕᐅᓇᕐᓂᖏᓐᓂᒃ ᐱᖃᑕᐅᔪᒪᓪᓗᖓ. 24ᖃᐅᔨᒪᕕᓰ ᐅᓪᓚᖕᓂᒃᑯᑦ ᓵᓚᒌᖃᑦᑕᐅᑎᓇᓱᐊᕐᑐᓂ ᐃᓚᐅᔪᑦ ᑕᒪᕐᒥᒃ ᐱᓇᓱᐊᕐᒪᑕ, ᐊᑕᐅᓯᐅᓪᓕ ᓵᓚᒃᓴᕐᓂᖅ ᐱᕚ? ᑍᒤᒻᒪᑦ ᐅᓪᓚᒋᑦᓯ ᓵᓚᖃᐅᑎᒃᓴᖅ ᐱᓇᓱᐊᕐᓗᒍ. 25ᓵᓚᒌᖃᑦᑕᐅᑎᓇᓱᐊᕐᑐᓂ ᐃᓚᐅᕙᒃᑐᑦ ᐃᒻᒥᖕᓂᒃ ᐊᒃᓱᕈᕐᑎᓪᓗᑎᒃ ᐃᕾᓕᓴᕋᓱᐊᕐᐸᖕᒪᑕ; ᓂᐊᖂᓯᕐᑕᐅᓂᕐᒥᒃ ᓄᖑᓐᓂᐊᕐᑐᒥᒃ ᐱᔪᒪᓪᓗᑎᒃ, ᐅᕙᒍᓪᓕ ᓂᐊᖂᓯᕐᑕᐅᓂᖅ ᓄᖑᓐᓂᐊᖏᑦᑐᖅ ᐱᓇᓱᐊᕐᐸᕗᑦ. 26ᑍᒤᒻᒪᑦ ᑕᒪᐅᖎᓐᓇᖅ ᐅᓪᓚᑐᐃᓐᓇᓐᖏᓚᖓ; ᑎᒡᓘᑎᔪᑎᑐᓪᓗ ᑍᒤᒃᑭᕗᖓ, ᑕᒪᐅᖎᓐᓇᖅ ᑎᒡᓗᒋᐊᖃᑦᑕᓐᖏᓚᖓ. 27ᑎᒥᒐᓕ ᐅᖁᒤᒃᓴᕐᑎᓪᓗᒍ, ᐅᕙᓐᓄᑦ ᓯᐊᓛᖑᑎᑉᐸᕋ ᐊᓯᓐᓂᒃ ᐊᔪᕆᑦᑐᐃᓚᐅᕐᑎᓪᓗᖓ, ᓵᓚᒃᓴᐅᑎᒃᓴᒥᒃ ᐱᔪᓐᓁᓪᓕᑎᑕᐅᔪᒪᓇᖓ.

Currently Selected:

ᑯᕆᓐᑎᐊᒥᐅᓄᑦ ᓯᕗᓪᓖᑦ 9: EAIB

Highlight

Copy