ᑯᕆᓐᑎᐊᒥᐅᓄᑦ ᓯᕗᓪᓖᑦ 8
8
ᒎᑎᓐᖑᐊᓄᑦ ᓂᖀᑦ ᑐᓂᔭᐅᓯᒪᔪᑦ
1ᒫᓐᓇᓕ ᓂᖀᑦ ᑐᓂᕐᕈᑕᐅᓯᒪᔪᑦ ᒎᑎᓐᖑᐊᓄᑦ ᐱᑦᔪᑎᒋᓪᓗᒋᑦ.
ᖃᐅᔨᒪᕗᒍᑦ ᐅᖃᐅᓯᐅᕙᒃᑐᖅ ᓱᓕᖕᒪᑦ “ᐃᓘᓐᓇᑕ ᖃᐅᔨᒪᑎᑕᐅᓂᕐᒥᒃ ᐱᑎᑕᐅᓯᒪᕗᒍᑦ,” ᐅᓇ “ᖃᐅᔨᒪᑎᑕᐅᓂᖅ,” ᐱᐅᔪᕆᑎᑦᓯᕗᖅ, ᓇᒡᓕᖕᓂᕐᓕ ᐋᖅᑭᒃᓱᐃᕗᖅ. 2ᐃᓄᒡᓕ ᖃᐅᔨᒪᓇᓱᒋᔪᖅ ᖃᐅᔨᒪᔭᕆᐊᖃᓪᓚᕆᒃᑕᒥᓂᒃ ᓱᓕ ᖃᐅᔨᒪᓐᖏᓚᖅ. 3ᒎᑎᒥᒡᓕ ᐱᓐᓇᕆᔭᖃᕐᑐᖅ ᑖᓐᓇ ᒎᑎᐅᑉ ᖃᐅᔨᒪᕚ.
4ᑍᒤᒻᒪᑦ ᒎᑎᓐᖑᐊᓄᑦ ᑐᓂᕐᕈᑕᐅᔪᕕᓂᕐᓂᒃ ᓂᕿᒥᒃ ᓂᕆᖃᑦᑕᕐᓂᖅ ᐱᑦᔪᑎᒋᓪᓗᒍ; ᖃᐅᔨᒪᒐᑦᑕ ᒎᑎᓐᖑᐊᑦ ᓱᓇᐅᖏᑦᓯᐊᕐᒪᑕ ᓯᓚᕐᔪᐊᕐᒥ, ᒎᑎᑕᖃᖏᒻᒪᓪᓗ ᒎᑎᑑᔪᑉ ᐊᓯᐊᓂᒃ. 5ᒎᑎᐅᓂᕋᕐᑕᐅᔪᓂᒃ ᐱᑕᖃᕋᓗᐊᕐᑎᓪᓗᒍ, ᕿᓚᖕᒥᓘᓐᓃᑦ ᓄᓇᒥᓘᓐᓃᑦ ᒎᑎᒋᔭᐅᔪᑦ ᐅᓄᕐᒪᑕ; ᐊᑕᓂᕆᔭᐅᔪᓪᓗ ᐅᓄᕆᓪᓗᑎᒃ, 6ᐅᕙᑦᑎᓐᓄᓪᓕ ᒎᑎ ᐊᑕᐅᓯᐅᕗᖅ, ᐊᑖᑕ, ᑖᑦᓱᒪᓐᖓᑦ ᓱᓇᓕᒫᑦ ᐱᓯᒪᖕᒪᑕ, ᑖᑦᓱᒨᓇᓗ ᐃᓅᓪᓗᑕ; ᐊᑕᓂᕐᓗ ᐊᑕᐅᓯᐅᕗᖅ ᔩᓱᓯ ᙭ᔅᑑᓯ, ᑖᑦᓱᒨᓇ ᓱᓇᓕᒫᑦ ᐱᓐᖑᕐᑎᑕᐅᓯᒪᖕᒪᑕ ᑖᑦᓱᒨᓇᓗ ᐃᓅᓪᓗᑕ.
7ᑕᒪᕐᒥᒡᓕ ᑕᒪᑐᒥᖓ ᖃᐅᔨᒪᔪᐃᓐᓇᐅᓐᖏᓚᑦ. ᐃᓚᖏᑦ ᓱᓕ ᒎᑎᓐᖑᐊᖃᓕᒪᖕᒪᑕ ᓂᕿᒥᒡᓗ ᑍᒤᑦᑐᓄᑦ ᑐᓂᕐᕈᑕᐅᓇᓱᒋᔭᒥᖕᓂᒃ ᓂᕆᕙᖕᒪᑕ, ᐃᓱᒪᖏᓪᓗ ᓴᓐᖐᑦᑑᖕᒪᑕ, ᓇᕐᕈᓇᕐᑎᑕᐅᓇᓱᒋᕗᑦ. 8ᓂᕿᒧᓪᓕ ᒎᑎᒧᑦ ᖃᒡᓕᕚᓪᓕᕐᑎᑕᐅᓐᖏᓚᒍᑦ; ᐊᓯᐅᔨᕚᓪᓕᕐᓂᐊᓐᖏᓚᒍᓪᓗ ᓂᕆᖏᒃᑲᓗᐊᕈᑦᑕ, ᐱᐅᓯᕚᓪᓕᑦᔮᓇᑕᓗ ᓂᕆᒐᓗᐊᕈᑦᑕ.
9ᐃᒃᐱᒍᓱᑦᓯᐊᕆᑦᓯᓕ, ᑕᒪᓐᓇ ᕿᓚᒃᓱᕐᑕᐅᓯᒪᖏᓐᓂᖅ ᐱᓂᐊᕐᓂᒃᑯᑦ ᐊᒡᕕᐊᕈᑕᐅᓕᖁᓇᒍ ᐅᒃᐱᕐᓂᕐᒥ ᓴᓐᖐᑦᑐᓄᑦ. 10ᐃᓱᒪᒥᒍᑦ ᓴᓐᖐᓐᓂᕐᓴᐅᑉ ᑕᑯᒍᓂᑎᑦ ᖃᐅᔨᑎᑕᐅᓯᒪᓂᕋᕐᑕᐅᔪᑎᑦ ᓂᕆᑎᓪᓗᑎᑦ ᒎᑎᓐᖑᐊᖃᕐᕕᖕᒥ ᑐᒃᓯᐊᕐᕕᖕᒥ, ᑲᔪᖏᕐᓴᕐᑕᐅᒐᔭᓐᖏᓛᖅ? ᒎᑎᓐᖑᐊᓄᑦ ᑐᓂᕐᕈᑎᕕᓂᕐᓂᒃ ᓂᕆᖁᓪᓗᒍ? 11ᑍᒤᒻᒪᑦ ᐅᒃᐱᕐᑑᖃᑏᑦ ᓴᓐᖐᑦᑐᖅ, ᙭ᔅᑑᓯᐅᑉ ᑐᖁᑦᔪᑎᒋᓚᐅᕐᑕᖓ, ᐊᓯᕈᕐᑕᐅᓕᕐᐳᖅ ᖃᐅᔨᑎᑕᐅᓯᒪᓂᕐᓄᑦ. 12ᑍᒫᒃ ᐅᒃᐱᕐᑑᖃᑎᖕᓄᑦ ᐊᔪᕐᑐᓕᒍᕕᑦ ᐃᓱᒪᒥᒍᑦ ᓴᓐᖐᓐᓂᖓ ᐋᓐᓂᕐᑕᐅᑎᒃᑲᕕᐅᒃ, ᑕᕝᕙ ᙭ᔅᑑᓯᒧᑦ ᐊᔪᕐᑐᓕᕗᑎᑦ. 13ᑍᒤᒻᒪᑦ, ᓂᕆᔭᓐᓄᑦ ᐅᒃᐱᕐᑑᖃᑎᒐ ᐊᔪᕐᑐᓕᑎᑕᐅᒃᐸᑦ, ᓂᕿᒥᒃ ᑕᕝᕙ ᓂᕆᒃᑲᓐᓂᕐᓂᐊᓐᖏᓚᖓ, ᖃᑕᓐᖑᑎᒐ ᑲᑕᒃᑎᑕᐅᖁᓇᒍ ᐊᔪᕐᓂᕐᒧᑦ.
Currently Selected:
ᑯᕆᓐᑎᐊᒥᐅᓄᑦ ᓯᕗᓪᓖᑦ 8: EAIB
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.
