ᑯᕆᓐᑎᐊᒥᐅᓄᑦ ᓯᕗᓪᓖᑦ 7

ᑲᑎᑎᑕᐅᓂᕐᒧᑦ ᐊᐱᕐᓲᑏᑦ

1ᑎᑎᕋᐅᓯᕆᓚᐅᕐᑕᓯ ᒥᒃᓵᓄᑦ ᑎᑎᕋᕈᑎᖃᕐᓂᐊᕐᐳᖓ.

ᐊᖑᑦ ᐊᕐᓇᒥᒃ ᓄᓕᐊᕐᓂᒃᑯᑦ ᐊᒃᑐᐃᖏᒃᑯᓂ ᐊᑲᐅᔪᒥᒃ ᐱᕗᖅ. 2ᓄᓕᐊᕈᒪᓂᑯᓪᓕ ᐱᔪᒥᓵᕐᑕᐅᓇᕐᑐᖃᕐᓂᖓᓄᑦ, ᐊᖑᑏᑦ ᓇᖕᒥᓂᖅ ᐊᑐᓂᑦ ᓄᓕᐊᖃᕐᑐᒃᓴᐅᕗᑦ; ᐊᕐᓁᓪᓗ ᓇᖕᒥᓂᖅ ᐊᑐᓂᑦ ᐅᐃᖃᕐᓗᑎᒃ. 3ᐊᖑᑎᐅᑉ ᐅᐃᒋᔭᐅᓂᕐᒥᓄᑦ ᐊᑐᕆᐊᖃᕐᑕᓂ ᓄᓕᐊᒥᓄᑦ ᐊᑐᑦᓯᐊᕐᓕᐅᒃ, ᐊᕐᓇᐅᓪᓗ ᓄᓕᐊᕆᔭᐅᓂᕐᒥᓄᑦ ᐊᑐᕆᐊᖃᕐᑕᓂ ᐅᐃᒥᓄᑦ ᐊᑐᑦᓯᐊᕐᓕᐅᒃ, ᐊᑐᓂᓪᓗ ᐱᔭᕆᐊᖃᕐᑕᒥᖕᓂᒃ ᓈᒻᒪᒃᓯᑎᖃᑦᑕᐅᑎᑦᓯᐊᕐᓗᑎᒃ. 4ᐅᐃᓕᒃ ᑎᒥᒥᓄᑦ ᐊᖓᔪᖅᑳᖑᖏᒻᒪᑦ, ᐅᐃᖓᓕ ᐊᖓᔪᖅᑳᖑᕗᖅ; ᑍᒫᒃᑕᐅᖅ ᓄᓕᐊᓕᒃ ᑎᒥᒥᓄᑦ ᐊᖓᔪᖅᑳᖑᖏᓐᓂᕗᖅ, ᓄᓕᐊᖓᓕ ᐊᖓᔪᖅᑳᖑᕗᖅ. 5ᑍᒤᒻᒪᑦ ᓄᓕᐊᕇᖑᔪᓯ ᐃᓕᑦᓯᓐᓄᑦ ᐱᑦᑍᓕᖃᑦᑕᐅᑎᓂᐊᕋᓯ ᑭᓯᐊᓂ ᐊᖏᖃᑎᒌᒃᑯᑦᓯ ᑍᒤᓕᐅᕈᒪᖏᓪᓗᓯ ᓯᕕᑭᑦᑐᒥᒃ, ᑐᒃᓯᐊᕐᓂᕐᒥᒃ ᐱᕕᒃᓴᖃᖔᕈᒪᓂᕐᒧᑦ; ᑭᖑᓂᖓᒍᓪᓕ ᐅᑎᖃᑦᑕᐅᑎᑦᓯᐊᕐᑐᒃᓴᐅᒋᕗᓯ, ᓵᑖᓇᓯᐅᑉ ᐆᒃᑐᕐᓗᐃᓂᖓᓂᑦ ᐃᓕᑦᓯᓐᓂᒃ ᓴᐳᑎᓯᒪᓂᐊᕋᑦᓯ ᐃᒃᓯᒎᕐᑍᓕᔪᓐᓇᖏᓐᓇᑦᓯ.

6ᑍᒫᒃ ᐱᖁᔨᓪᓚᕆᒡᓗᖓ ᐅᖃᓐᖏᓚᖓ, ᑍᒫᒡᓕ ᐱᔪᒪᒍᑦᓯ ᐱᕕᒃᓴᖃᕐᑎᑐᐃᓐᓇᕐᐸᑦᓯ. 7ᐱᖁᔨᖔᕋᓗᐊᕐᐳᖓᓕ ᐃᓘᓐᓇᑎᒃ ᐅᕙᑦᑐᑦ ᑍᒤᖁᓪᓗᒋᑦ; ᑭᓯᐊᓂᓕ ᒎᑎᐅᑉ ᑐᓂᕐᕈᓯᐊᖃᕐᑎᒻᒪᒋᑦ ᐊᑐᓂᑦ ᐊᑦᔨᐅᖏᑦᑐᒥᒃ, ᐃᓚᖓᑦ ᐊᑦᔨᒌᖏᑦᑐᓂᒃ ᑐᓂᕐᕈᓯᐊᖃᕐᐳᖅ ᐃᓚᖓᓪᓗ ᐊᓯᐊᓂᒃ ᑐᓂᕐᕈᓯᐊᖃᕆᓪᓗᓂ.

8ᒫᓐᓇᓕ ᐂᑉᐸᖃᖏᑦᑐᑦ ᐅᐃᒡᒐᕐᓃᓪᓗ ᐅᖃᐅᑎᕙᒃᑲ ᐃᓕᑦᓯᓐᓄᑦ ᐊᑲᐅᕗᖅ ᐃᓄᑑᖏᓐᓇᕈᑦᓯ ᐅᕙᑦᑐᑦ. 9ᐱᔪᒪᓂᑦᓯᓐᓂᒡᓕ ᓄᖅᑲᖓᑎᑦᓯᔪᓐᓇᖏᒃᑯᑦᓯ, ᐂᑉᐸᕐᑖᕐᑐᒃᓴᐅᕗᓯ, ᐂᑉᐸᖃᕐᓂᖅ ᐊᑲᐅᓂᕐᓴᐅᖕᒪᑦ ᐃᒃᓯᒎᕐᓂᕐᒧᑦ ᓵᓚᐅᓂᕐᒥᑦ.

10 # ᒫᑎᐅᓯ 5:32; 19:9; ᒫᑯᓯ 10:11,12; ᓘᑲᓯ 16:18. ᐂᑉᐸᖃᕐᑐᓄᓪᓕ ᐃᒫᒃ ᐱᖁᔨᕗᖓ, ᐅᕙᒐᐅᖏᑦᑐᖅ ᐊᑕᓂᕐᓕ ᐱᖁᔨᕗᖅ, ᐊᕐᓇᖅ ᐅᐃᒥᓂᒃ ᕿᒤᔪᒃᓴᐅᓐᖏᓚᖅ; 11ᕿᒤᒃᐸᓪᓕ, ᐂᑉᐸᕐᑖᕐᑐᒃᓴᐅᓐᖏᓚᖅ ᐅᕝᕙᓘᓐᓃᑦ ᐅᐃᒥᓄᑦ ᐋᖅᑭᐅᑎᑦᓯᐊᕐᓗᓂ ᐅᑎᖔᕐᓕ; ᐊᖑᑎᐅᓪᓗ ᓄᓕᐊᓂ ᐊᕕᑕᒃᓴᕆᓐᖏᓛ.

12ᐊᓯᖏᓐᓄᓪᓕ ᐅᖃᕐᐳᖓ, ᐅᕙᓐᓂᑦ ᐱᔪᒥᒃ ᐊᑕᓂᕐᒥᐅᖏᑦᑐᖅ; ᐅᒃᐱᕐᑐᖅ ᐊᖑᑦ ᐅᒃᐱᖏᑦᑐᒥᒃ ᓄᓕᐊᖃᕈᓂ, ᑖᑦᓱᒪᓗ ᑲᑎᒪᔪᒪᒃᐸᒍ, ᐊᕕᑕᒃᓴᕆᓐᖏᓛ. 13ᐅᒃᐱᕐᑐᕐᑕᐅᖅ ᐊᕐᓇᖅ ᐅᒃᐱᖏᑦᑐᒥᒃ ᐅᐃᖃᕈᓂ, ᑖᑦᓱᒪᓗ ᑲᑎᒪᔪᒪᒃᐸᒍ, ᐊᕕᑕᒃᓴᕆᓐᖏᓛ. 14ᐅᒃᐱᖏᑦᑐᖅ ᐊᖑᑦ ᓄᓕᐊᒥᓂᒃ ᑲᑎᒪᒃᓯᓂᕐᒥᒍᑦ ᐃᑦᔪᕐᓁᑎᑕᐅᓕᕐᒪᑦ, ᐅᒃᐱᖏᑦᑐᕐᓗ ᐊᕐᓇᖅ ᐅᐃᒥᓂᒃ ᑲᑎᒪᒃᓯᓂᕐᒥᒍᑦ ᐃᑦᔪᕐᓁᑎᑕᐅᒋᕗᖅ. ᑍᒤᖏᑉᐸᑦ ᕿᑐᕐᖓᓯ ᓇᕐᕈᓇᕐᑑᓂᕋᕐᑕᐅᒐᔭᕐᐳᑦ, ᒫᓐᓇᓕ ᐃᑦᔪᕐᓁᑉᐳᑦ. 15ᐅᒃᐱᖏᑦᑐᕐᓕ ᐂᑉᐸᒥᓂᒃ ᐊᕕᑦᓯᔪᒪᒃᐸᑦ, ᐊᕕᑦᓯᓕ; ᐅᒃᐱᕐᑐᖅ ᐊᖑᑦ ᐊᕐᓇᕐᓘᓐᓃᑦ ᐂᑉᐸᕇᖕᓂᕐᒧᑦ ᑍᒤᑦᑐᒧᑦ ᕿᓚᒃᓱᕐᓯᒪᓐᖏᓚᖅ. ᒎᑎᐅᓪᓕ ᕾᖁᓯᒪᕚᑎᒍᑦ ᐃᓱᒫᓘᑎᖃᖁᓇᑕ. 16ᓄᓕᐊᕆᔭᐅᔪᑎᑦ ᖃᐅᔨᒪᕖᑦ ᐅᐃᑦ ᐱᐅᓕᔪᓐᓇᕐᒪᖔᕐᐱᐅᒃ? ᐅᕝᕙᓗ ᐅᐃᒋᔭᐅᔪᑎᑦ ᖃᐅᔨᒪᕖᑦ ᓄᓕᐊᑦ ᐱᐅᓕᔪᓐᓇᕐᒪᖔᕐᐱᐅᒃ?

ᒎᑎᐅᑉ ᕾᖁᓯᒪᒃᐸᓯ ᕾᖁᔭᐅᕕᒋᓯᒪᔭᑦᓯᓃᒋᑦᓯ

17ᐃᓄᓕᒫᑦ ᐊᑐᓂᑦ ᐊᑕᓂᐅᑉ ᑐᓂᓯᒪᔭᖓᓂᒃ ᐃᓅᓯᖃᕐᓕᑦ, ᒎᑎᒧᓪᓗ ᕾᖁᔭᐅᓯᒪᕕᖕᒥᓃᓪᓗᑎᒃ. ᑕᒪᑦᔭ ᐊᑐᕐᑕᐅᖁᔭᕋ ᐃᓚᒌᒃᑐᓂ ᑕᒤᓐᓂ. 18ᓇᓪᓕᐊᑦ ᕾᖁᔭᐅᓯᒪᕚ ᑭᐱᔭᐅᓯᒪᑎᓪᓗᒍ? ᑕᕝᕙ ᑭᐱᔭᐅᓯᒪᓂᖓᑕ ᕿᓕᕈᖓ ᐲᕋᓱᐊᕋᒃᓴᕆᓐᖏᓛ. ᑭᐱᔭᐅᓯᒪᖏᑦᑐᕐᓗ ᕾᖁᔭᐅᒍᓂ ᑭᐱᔭᐅᓇᓱᐊᕐᑐᒃᓴᐅᓐᖏᓚᖅ. 19ᑭᐱᔭᐅᓯᒪᓂᖅ ᐊᑐᓐᖏᓚᖅ ᑭᐱᔭᐅᓯᒪᖏᓐᓂᕐᓗ ᐊᑐᖏᓐᓂᕗᖅ, ᒎᑎᐅᓪᓕ ᐱᖁᔭᖏᓐᓂᒃ ᓈᓚᖕᓂᖅ ᐊᑐᕐᑐᑑᕗᖅ. 20ᐃᓄᒡᓕ ᕾᖁᔭᐅᓯᒪᕕᖕᒥᓂ ᑕᕝᕙᓃᖏᓐᓇᕐᑐᒃᓴᐅᕗᑦ. 21ᐃᓄᖕᒧᑦ ᓂᐅᕕᐊᖑᓗᑎᑦ ᓇᖕᒥᓂᕐᑖᕆᔭᐅᓗᑎᑦ ᕾᖁᔭᐅᒍᕕᑦ ᑕᒪᓐᓇ ᖃᓄᐃᓐᖏᓚᖅ. ᓂᐅᕕᕐᑕᐅᓯᒪᓂᕐᒥᓪᓕ ᕿᓚᕈᑦᔮᕈᓐᓇᕈᕕᑦ, ᐱᕕᒃᓴᖃᕐᓂᕆᔧᑦ ᐊᑐᑦᓯᐊᕋᓱᐊᕈᒃ. 22ᐃᓄᖕᒧᑦ ᓂᐅᕕᐊᖑᓯᒪᑎᓪᓗᒍ ᐊᑕᓂᕐᒧᑦ ᕾᖁᔭᐅᔪᖅ ᐊᑕᓂᐅᑉ ᐱᒋᔭᐅᔪᓐᓃᕐᑎᒻᒪᒍ. ᑍᒫᒃᑕᐅᖅ ᐃᓄᖕᒧᑦ ᓂᐅᕕᐊᖑᓯᒪᑎᓐᓇᒍ ᕾᖁᔭᐅᔪᖅ ᙭ᔅᑑᓯᐅᑉ ᓇᖕᒥᓂᕐᑖᕆᕚ.#7:22 ᐃᓄᖕᒧᑦ ᓂᐅᕕᐊᖑᓪᓗᓂ ᓇᖕᒥᓂᕆᔭᐅᓂᖅ, ᐃᓄᐃᑦ ᓂᐅᕕᕐᑕᐅᕙᓚᐅᕐᒪᑕ ᐱᔨᒋᔭᐅᓪᓗᑎᒃ ᐱᖁᑎᑐᑦ ᑍᒤᑎᑕᐅᓪᓗᑎᒃ ᐃᓱᒪᕐᓱᕐᕕᖃᕋᑎᒃ ᖃᓄᑐᐃᓐᓇᖅ 23ᐊᑭᑐᔪᒥᒃ ᓂᐅᕕᐊᖑᓯᒪᒐᑦᓯ; ᑍᒤᒻᒪᑦ ᐃᓄᖕᓄᑦ ᓇᖕᒥᓂᕐᑖᖑᓗᓯ ᐱᒋᔭᐅᓕᕐᓂᐊᕋᓯ. 24ᑍᒤᒻᒪᑦ ᐃᓚᒃᑲ, ᐃᓕᑦᓯ ᐊᑐᓂᑦ ᖃᓄᐃᑦᑑᑎᓪᓗᓯ ᕾᖁᔭᐅᓯᒪᓐᓂᕈᑦᓯ, ᒎᑎᒦᓪᓗᓯ ᕾᖁᔭᐅᑉᕕᒋᔭᑦᓯᓐᓃᖏᓐᓇᕆᑦᓯ.

ᐂᑉᐸᖃᖏᑦᑐᑦ ᐅᐃᒐᕐᓃᓪᓗ ᐊᐱᕐᓲᑕᐅᓂᖓᑦ

25ᐅᐃᖃᖏᑦᑐᓪᓕ ᐱᑦᔪᑎᒋᓪᓗᒋᑦ, ᐊᑕᓂᕐᒥᑦ ᐱᔪᒥᒃ ᐱᖁᔭᒥᒃ ᐅᖃᐅᓯᒃᓴᖃᓐᖏᓚᖓ ᑖᒃᑯᓄᖓ, ᑭᓯᐊᓂᓕ ᐃᓱᒪᒋᔭᓐᓂᒃ ᐅᖃᕐᐳᖓ ᐊᑕᓂᐅᑉ ᓂᑲᒍᓱᖕᓂᕐᒥᓄᑦ ᐅᒃᐱᕆᔭᒃᓴᐅᔪᓐᓇᕐᑎᒻᒪᖓ.

26ᒫᓐᓇᐅᔪᖅ ᐅᖁᒤᓐᓇᕐᓂᖓ ᐱᑦᔪᑎᒋᓪᓗᒍ, ᐃᓱᒪᕗᖓ ᐃᓄᒃ ᑍᒤᓕᖓᑐᐃᓐᓇᕈᓂ ᒫᓐᓇᒃᑯᑦ ᖃᓄᐃᓐᖏᓚᖅ. 27ᓄᓕᐊᖃᕈᕕᑦ ᐊᕕᓐᓇᓱᐊᕐᓂᐊᕐᓇᒍ. ᓄᓕᐊᖃᖏᒃᑯᕕᓪᓕ ᓄᓕᐊᒃᓴᕐᓯᐅᕐᓂᐊᕐᓇᒃ. 28ᐂᑉᐸᕐᑖᕈᕕᓪᓕ ᐊᔪᕐᑐᓕᓐᖏᓚᑎᑦ; ᐊᕐᓇᕐᓗ ᐅᐃᑖᕐᐸᑦ ᐊᔪᕐᑐᓕᓐᖏᓚᖅ. ᐂᑉᐸᕐᑖᕐᑐᓪᓕ ᐅᖁᒤᓐᓇᕐᑐᓄᑦ ᐅᓄᕐᑐᓄᑦ ᑎᑭᐅᑎᖃᑦᑕᕐᓂᐊᕐᐳᑦ, ᐃᓕᑦᓯᓕ ᑍᒤᖁᖏᒃᑲᓗᐊᕐᐸᑦᓯ.

29ᐃᓚᒃᑳ, ᐃᒫᒃ ᐅᖃᕋᓱᐊᕐᐳᖓ, ᐱᕕᒃᓴᕗᑦ ᓯᕕᑭᑦᑑᓕᕐᒪᑦ; ᒫᓐᓇᒥᑦ ᐱᒋᐊᕐᓗᒍ, ᐂᑉᐸᖃᕐᑐᑦ ᐂᑉᐸᖃᖏᑦᑐᑎᑐᑦ ᑍᒤᓕᕐᓕᑦ, 30ᕿᒃᓵᒃᑎᑕᐅᔪᓪᓗ ᕿᒃᓵᖏᑦᑐᑎᑐᑦ ᑍᒤᓕᕐᓕᑦ, ᖁᕕᐊᓱᒃᑐᓪᓗ ᖁᕕᐊᓱᖏᑦᑐᑎᑐᑦ ᑍᒤᓕᕐᓕᑦ, ᓂᐅᕕᕐᑐᓪᓗ ᓂᐅᕕᐊᒥᖕᓂᒃ ᐱᑖᖏᑦᑐᑎᑐᑦ ᑍᒤᓕᕐᓕᑦ, 31ᓯᓚᕐᔪᐊᕐᒥᐅᓪᓗ ᐱᒋᔭᖏᓐᓂᒃ ᐱᓇᓱᐊᕈᑎᖃᕐᑐᑦ ᑕᒪᒃᑯᓄᖓ ᐱᓇᓱᐊᖏᑦᑐᑎᑐᑦ ᑍᒤᓕᕐᓕᑦ. ᓯᓚᕐᔪᐊᑉ ᒫᓐᓇ ᐱᐅᓯᖓ ᐊᓂᒍᕐᐸᓪᓕᐊᓕᕐᒪᑦ.

32ᐃᓱᒪᔮᕈᑎᒃᓴᖃᖁᓐᖏᓚᑦᓯ. ᐊᖑᑦ ᓄᓕᐊᖃᖏᑦᑐᖅ ᐃᓱᒫᒋᔭᖃᖕᓂᕐᓴᐅᖕᒪᑦ ᐊᑕᓂᐅᑉ ᐱᖏᓐᓂᒃ, ᐊᑕᓂᕐᒥᒡᓗ ᖁᕕᐊᓱᒃᑎᑦᓯᔪᒪᓪᓗᓂ; 33ᐊᖑᓪᓕ ᓄᓕᐊᖃᕐᑐᖅ ᓯᓚᕐᔪᐊᑉ ᐱᖏᓐᓂᒃ ᐃᓱᒫᒋᔭᖃᕐᓂᕐᓴᐅᕗᖅ, ᓄᓕᐊᓂ ᖁᕕᐊᓱᒃᑎᑦᓱᒪᓪᓗᒍ, 34ᐃᓱᒪᒋᔭᒃᓴᖏᓪᓗ ᐊᕕᒃᓯᒪᕗᑦ. ᐊᕐᓇᕐᓕ ᐅᐃᖃᖏᑦᑐᖅ, ᓂᕕᐊᕐᓯᐊᕕᓂᕐᓘᓐᓃᑦ ᐊᑕᓂᐅᑉ ᐱᖏᓐᓂᒃ ᐃᓱᒫᒋᔭᖃᕐᓂᕐᓴᐅᕗᖅ, ᐃᑦᔪᕐᓁᑦᓱᒪᓪᓗᓂ ᑎᒥᒥᒍᑦ ᐊᓂᕐᓂᕐᒥᒍᓪᓗ; ᐊᕐᓇᕐᓕ ᐅᐃᓕᒃ ᓯᓚᕐᔪᐊᑉ ᐱᖏᓐᓂᒃ ᐃᓱᒫᒋᔭᖃᕐᓂᕐᓴᐅᕗᖅ, ᐅᐃᓂ ᖁᕕᐊᓱᖁᓪᓗᒍ.

35ᑍᒫᒃ ᐅᖃᕐᐳᖓ ᐃᑲᔪᕐᑕᐅᑦᔪᑎᒃᓴᑦᓯᓐᓄᑦ, ᐱᑦᑍᓕᑎᓐᓇᓱᐊᓐᖏᓚᑦᓯ, ᐱᓂᐊᕐᓂᓯᓕ ᐋᖅᑭᑦᓯᐊᕐᓯᒪᖁᓪᓗᒍ ᐊᑕᓂᕐᒧᓪᓗ ᑕᒤᓐᓂᒃ ᑐᓂᓯᒪᖁᓪᓗᓯ ᓱᓇᒧᑦ ᐊᒡᕕᐊᕐᑕᐅᖏᓪᓗᓯ.

36ᓇᓪᓕᐊᓪᓗ ᓄᓕᐊᒃᓴᒥᓄᑦ ᓈᒻᒪᖏᑦᔪᑎᒃᓴᖃᕋᓱᒋᒍᓂ ᐊᖏᖃᑎᒌᒍᑎᒋᓯᒪᔭᖏᑕ ᐅᓪᓗᖏᓐᓄᑦ,#7:36 ᓄᓕᐊᒃᓴᒥᓄᑦ ᐃᓚᖏᓐᓂ ᒍᕇᑭᑎᑐᑦ ᐃᓱᒪᒋᔭᐅᔪᖅ ᐸᓂᖕᒥᓂᖅ ᐅᖃᐅᓯᖃᕐᑑᔮᕐᓂᖓ ᓇᓪᓕᐊᓐᓄᑐᐃᓐᓇᕉᖅ ᑐᑭᖃᕈᓐᓇᕐᒪᑦ ᐊᕐᕌᒍᖏᓪᓗ ᓈᒻᒪᓕᕐᐸᑕ, ᑲᑎᔭᕆᐊᖃᕋᓱᒋᒍᑎᒡᓗ ᐃᓱᒪᒥᖕᓂᒃ ᐱᔪᒃᓴᐅᕘᒃ, ᓄᓕᐊᕐᑖᕇᒡᓗᑎᒃ ᐊᔪᕐᑐᓕᓐᖏᓚᒃ. 37ᓇᓪᓕᐊᑦᑕᓗ ᐃᓱᒪᓂ ᐋᖅᑭᒃᓯᒪᒍᓂᐅᒃ, ᐱᔪᒪᓂᕐᔪᐊᒥᓄᑦ ᓵᓚᐅᓯᒪᖏᓪᓗᓂ ᐱᔪᒪᓂᓂ ᓄᖅᑲᕐᑎᓯᒪᔪᓐᓇᕈᓂᐅᒃ, ᓄᓕᐊᒃᓴᓂ ᑲᑎᔪᒪᖏᓪᓗᒍ ᑐᑭᑖᕐᓯᒪᒍᓂ ᑖᓐᓇ ᓈᒻᒪᒃᑐᒥᒃ ᐱᒋᕗᖅ. 38ᓄᓕᐊᒃᓴᒥᓂᒃ ᓄᓕᐊᓂᒃᑐᖅ ᓈᒻᒪᒃᑐᒥᒃ ᐱᕗᖅ, ᓄᓕᐊᒃᓴᒥᓂᒡᓕ ᓄᓕᐊᓂᖏᑦᑐᖅ ᓈᒻᒪᖕᓂᕐᓴᒥᒃ ᐱᕗᖅ.#7:38 ᕚᓯᖏᑦ 36ᒥᑦ-38ᒧᑦ ᐅᖃᕐᓯᒪᔪᖅ ᓄᓕᐊᒃᓴᒥᓂᒃ ᑐᑭᖃᕈᓐᓇᕐᒥᔪᖅ ᐸᓂᖕᒥᓂᒃ

39ᐊᕐᓇᖅ ᐅᐃᓕᒃ ᐅᐃᒥᓄᑦ ᕿᓚᒃᓱᕐᓯᒪᕗᖅ ᐃᓅᓂᖓᓂ. ᐅᐃᖓᓕ ᑐᖁᒃᐸᑦ, ᓇᓪᓕᐊᓐᓂᑐᐃᓐᓇᖅ ᐅᐃᑖᕆᔪᒪᔭᒥᓂᒃ ᐅᐃᑖᕈᓐᓇᕐᓯᕗᖅ, ᑭᓯᐊᓂᓕ ᐊᑕᓂᕐᒥᐅᑕᐅᔪᒃᓴᐅᕗᖅ. 40ᐃᓱᒪᒋᕙᕋᓕ, ᖁᕕᐊᓱᖕᓂᕐᓴᐅᒐᔭᕐᐳᖅ ᐅᐃᑖᖏᒃᑯᓂ ᑍᒫᒡᓗ ᐃᓱᒪᖃᕐᑎᓪᓗᖓ ᒎᑎᐅᑉ ᐊᓂᕐᓂᖓᓂᒃ ᐱᖃᕋᓱᒋᕗᖓ.

Currently Selected:

ᑯᕆᓐᑎᐊᒥᐅᓄᑦ ᓯᕗᓪᓖᑦ 7: EAIB

Highlight

Copy