Gōsə̄ najə̄ gə̄ 6
6
Ī-lōō kəndā rɔ̄í ta kə̄rā yā deē tə́
1Ngōnə̄ḿ, ré ādə̄ rɔ̄í kum gotə madí yā kəgā kə̄rā kə́ dɔn tə́ ō, ré ə̄nī ndūí yā gan̄g dɔ de kə́ tə̄rā o , 2ré īkɔ́ ə̄nī rɔ̄í kum réńg tə́ kə najə̄ kə́ taí tə́ ō, ré ə̄yā gūmbə̄ kə najə̄ kə́ taí tə́ kadə̄ əhɔī īkɔ́ ō anī, 3ngōnə̄ḿ ī-rāā yá̰á̰ ń toō ī-teēń kum tə́ kɔ̄ɔ́. Dan ń ə̄sō kem jī madí tə́ ɓá ní, āw̄ ə́ngen, ī-ra seneé kat kat, ī-njə́ɓān. 4Ɔ̄gə̄ kumií ɓīī ō, ɔ̄gə̄ dɔ kumií tún̄ ɓīī ō. 5Ɔ̄r̄ rɔ̄í kɔ̄ɔ́ kum gūmbə̄ tə́ tītə̄ jal̄, ɔ̄r̄ rɔ̄í kɔ̄ɔ́ kum tə́ tītə̄ yel̄ beé.
Ī-lōō yay
6Ḭ̄ de kə́ nge yay, āw̄ á̰a̰ loo rāā ń kó nar a rāā kəla ní. Ə̄ndā ma̰ȳ háĺən ba ún kum kedə̄ kógə̄ḿ tū tə́. 7Ni-ənge de kə kadə̄ kəndā kumən gírən tə́ aĺ ō, ənge pajā aĺ ō, kɔ́ɔ̄n aĺ ō. 8Banī ɓālāá anī ni kán̄ yá̰á̰ kəsa kə́ tām̄ yān tə́ kə̄ dɔ naā tə́, dan yā sāā kōō gə̄ tə́ anī ni ɔy yá̰a̰ kəsa kán̄ kə̄ dɔ naā tə́ tām̄ yān tə́. 9Ba ḭ̄ de kə́ nge yay, ā ī-to nang tə́ i bátə́ kum mbang kóndóńg? I rə́ngáý tə́ n a asiī ɓīī ní? 10Ī-gḛy ɓīī sḛ́ý ō, ī-gḛy tún̄ ɓīī sḛ́ý ō, ī-gḛy to nang tə́ ndájə̄ rɔ̄í sḛ́ý ō, ī-gḛy kán̄ jīí kem naā tə́ ō. 11Loo ń noō tə́ ndoō a əhɔī dɔ jīí tə́, tītə̄ de kə́ nge dáȳ dɔɔ́ ō, ndoō kə́ ngá̰ý al̄ naā a əhɔī dɔ jīí tə́ tītə̄ nge ɓogə ō.
Hál de kə́ nge gól̄ loo
12De kə́ nge njə̄rā kə najə̄ kə́ rɔ̄kum aĺ tan tə́ i de kə́ hálən nujə kɔ̄ɔ́, i de kə́ nge rāā yá̰a̰ majə alé! 13Ni a ɔr̄ najə̄ i kə kə̄lá kumneé, a ɓāŕ deē i kə njaneé, a kɔ̄rīyɔ̄ deē i kə ta ngōn̄ jīneé. 14Kemən majə alé, adə̄ kə kum mban̄g gə̄ malang ni ni a əndā i dɔ yá̰á̰ kə́ majaĺ gə̄ naā tə́ yā rāā, ni i nge rāā kadə̄ de gə̄ kɔ̄lə̄n̄ naā. 15I tām̄ najə̄ ń noō tə́ n ni a nujə sák sák gidə kógə̄ḿ beē ní. A tétə̄n̄ kə̄ngōn rárák i gidə kógə̄ḿ ō, yá̰á̰ kə́ yā rāań a gətóo ō.
Yá̰á̰ kə́ Kɔ́ɔ̄ɓē gḛy aĺ ngá̰ý al̄ naā
16-19Yá̰á̰ kə́ mehḛ́ gə̄ ń Kɔ́ɔ̄ɓē gḛy aĺ ngá̰ý al̄ naā ō, kə́ sīrí gə̄ ń gḛy ka̰a̰ ta kumən tə́ aĺ ō ní n toó:
I kum de kə́ nge ka̰a̰ loo kə kɔjə rɔ̄ɔ́ ō,
i ta ndo̰ nge kəda najə̄ kə́ sor̄ ō,
i jī nge ɓōkə́ mósə de kə́ najə̄ gətóo dɔn tə́ nang tə́ ō,
i dan wur de kə́ nge gír̄ rāā yá̰á̰ kə́ gōtə́ aĺ gə̄ ō,
i nja nge ka̰ȳ ngɔ̄də̄ kaw̄ rāā yá̰á̰ kə́ majaĺ tə́ ō,
i de kə́ kum yá̰á̰ tə́ kə́ rɔ̄kum aĺ kə́ nge kəda najə̄ kə́ sor̄ ō.
Tá kə́ nge ko̰ sīrí i noó ɓáý:
I nge rāā kadə̄ ngákó̰o̰ naā gə̄ kɔ̄lə̄n̄ naā ō.
Tāā kə́ dɔ sāā nə̄yá̰ deē tə́
20Ngōnə̄ḿ, yá̰a̰ gə̄ ń bɔbí ədaī kadə̄ ī-rāā ní ī-ra dɔ tə́ ō, ī-lōō mbātə́ kɔjə̄ yā kó̰ó̰í ō. 21Ī-ngɔ̄m̄də́ kemií tə́ kə dɔ ndɔ̄ gə̄, ə̄nīdə́ kɔ́ɔ́í tə́. 22Kə dɔ kawí gə̄ ō, kə dɔ télí gə̄ ō ní, nin̄ a ɔjənī ta róbə ō, a ngɔ̄mənī dɔ tə̄rā toí tə́ ō. Dan ń ī-ndól̄ dɔ ɓīī tə́ anī nin̄ a adə̄nī kɔjə̄. 23Tɔdɔ̄ yá̰á̰ kə́ kəda kadə̄ yā rāā ní, rāā rɔ̄n i hor lámbá kə́ unjə̄ loo tə́ ō, kɔjə̄ rāā rɔ̄n i loo kə́ unjə̄ kow tə́ ō, ndán̄g loo i yá̰á̰ kə́ a əhɔ əndājí gotoó dɔ róbə ndi kə kumuú tə́ ō. 24Nin̄ a ɔgə̄nī kəsō jī dəyá̰ kə́ nge rāā háĺ tə́ ō, a ɔgə̄nī kəndā mbīí gír ta nel̄ yā nə̄yá̰ deē tə́ ō. 25Ī-ndə̄ngā mandən kemií tə́ alé, ādə̄ dɔ kumən kə́ mɔlyɔ̄ gólī alé. 26Tɔdɔ̄ ré ī-sāā i dəyá̰ ájə́ba ɓáa, ā ādə̄n i yá̰a̰ kəsa yān kə́ tan tə́ ngóy, ba ré ī-sāā i nə̄yá̰ deē ɓáa ā ə́la i rɔ̄í ta yo tə́. 27Deē a un hor a ənī rɔ̄n tə́ kanjə̄ kadə̄ hor o̰o̰ kūbə̄ kə́ rɔ̄n tə́ a? 28Ké deē a njə̄rā dɔ yā̰l̄ hor tə́ kanjə̄ kadə̄ hor o̰o̰ njan a? 29De kə́ nge sāā nə̄yá̰ madə̄n to i tītə̄ ń noō: Nge kɔdə rɔ̄ nə̄yá̰ madə̄n a teē kum tə́ karī alé. 30Deē a kídə̄ nge ɓogə ń ɓogə yá̰a̰ tām̄ yā ɓō kemən tə́ ní alé. 31Ré teēn̄ dɔn tə́ anī ni a tél yā kadə̄ yá̰á̰ ní gogə́ kadə̄ tɔȳ dɔ nja sīrí, a adə̄ yá̰a̰ malang kə́ kem kújə yān tə́. 32De kə́ nge sāā nə̄yá̰ madə̄n i de kə́ kur̄ dɔn gətóo, ni-rāā adə̄ dəyá̰ ní tél i nge nujə seneé. 33Ni a ənge ndéy ō, a əlan̄ rɔ̄sɔl̄ dɔn tə́ ō, rɔ̄sɔl̄ yān i kə́ dum̄ kɔr̄ kɔ̄ɔ́ ō. 34Tɔdɔ̄ jang i yá̰á̰ kə́ a rāā ngaa dəyá̰ kə wōngōó ngá̰ý adə̄ ndɔ̄ dal ba̰ā̰ tə́ anī kumən a o̰o̰n alé. 35A usən dɔ yá̰a̰ gān̄g dɔ rɔ̄ kə́rēý tə́ alé. Ká ré adə̄n̄neé kadə̄ karī gə̄ ngá̰ý gə̄gē ni a ɔdə alé.
Currently Selected:
Gōsə̄ najə̄ gə̄ 6: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
