Gōsə̄ najə̄ gə̄ 5
5
Tāā kə́ dɔ dəyá̰ kə́ rāȳ tə́
1Ngōnə̄ḿ, ī-nēl̄ mbīí ōoń kum kedə̄ yāḿ ō, ōoń kum najə̄ yāḿ ō. 2Loo ń noō tə́ kɔjə̄ yāḿ gə̄ a rāān̄ majə seí ō, ā ɔ̄r̄ najə̄ loo de kə́ ger̄ gír najə̄ tə́ ō. 3A̰á̰ā̰, najə̄ kɔr̄ dəyá̰ kə́ rāȳ nel̄ tītə̄ yibə̄ tejə beé ō, tan sɔl̄ lum tītə̄ yibə̄ beé ō. 4Banī ta tɔ̄l̄ ta anī atə̄ kárárá ō, atə tītə̄ kaskar kə́ atə dām̄ jōó ō. 5Hálən a əla deē i ta yo tə́ ō, njan a aw̄ kə deé i súmūú kum kə̄ ɓádá ō. 6Ni un róbə́ kə́ aw̄ kə deé tū ndi kumuú tə́ alé. Ni ndóm̄ kanjə̄ kadə̄ ger̄ gō. 7I beé ní ngōnə̄ḿ ōō najə̄ yāḿ, ī-lōō mbātə́ kɔjə̄ yāḿ gə̄. 8Ī-ra sa̰y kadə̄ dəyá̰ kə́ beē tə́ ō, ī-lōō kaw̄ ta róbə́ kújə yān tə́ ō. 9Na sōgə́ ún hɔ̄r̄mɔ̄í ādə̄ de kə́ rang gə̄ ō, ə́la ndɔ̄í kem jī de kə́ kumən o̰o̰n aĺ tə́ ō. 10Na sōgə́ tə̄rā gə̄ ndānə̄n̄ kə ta kūl̄ tɔ́gí ō, kan̄ kəla yāí mān̄ kə̄ jī de kə́ rang kə́ ī-gerə̄n aĺ tə́ ō. 11Ta tɔ̄l̄ ta anī ā ī-nōō tītə̄ dā̰ dan ń rɔ̄í ō dā̰ rɔ̄í ō a ɔrən̄ tə́ ní. 12Loo ń noō tə́ ā əda na ké ī-rāā i ba̰ý n kɔjə̄ nelīneé aĺ ní wa, ké kemií rāā i ba̰ý n kídəń ndán̄g kə́ ndángə̄nī dɔ hálí tə́ ní wa, 13ké ōō najə̄ yā ngolií gə̄ aĺ i tām̄ rí tə́ wa, ké ī-nēl̄ mbīí ōoń najə̄ yā ngé ndóōí yá̰a̰ gə̄ aĺ i tām̄ rí tə́ wa, 14adə̄ na̰y i sḛ́ý anī yá̰á̰ kə́ to kum kaȳ aĺ kə́ ngá̰ý al̄ naā rāāī dan ngán *Israel gə̄ tə́ ō ngé kán̄ naā gə̄ tə́ ō!
Ī-tár dəyá̰ ń ī-taān kə balsááí ní
15Ā̰ȳ man̄ kə́ kem gár̄ yāí īkɔ́ tə́ ō, ā̰ȳ nge ń a teē kem bəlo man̄ yāí tə́ danaá bang ní ō. 16Ī-lōō kəya̰ man̄ yāí ń əɓa nang tə́ ní kadə̄ nōō ndágá, aláa kadə̄ ngán man̄ yāí gə̄ nōōn̄ kum róbə kɔsə gə̄ tə́, 17ādə̄ i tām̄ yāí īkɔ́ tə́ ngóy, banī ādə̄ tə̄rā gə̄ i dɔ tə́ seí alé. 18Ādə̄ tɔ́r̄ ta i dɔ man̄ yāí kə́ əɓa tə́ ō, ī-ger̄ nel̄ dəyá̰ ń ī-taān kə balsááí ní ō. 19Ni i tītə̄ mandə dul ō, kāl̄ kə́ to ro̰ ō. Ādə̄ mbaan gə̄ tɔ̄lə̄n̄ ngur kɔdə mbaa kə́ kemií tə́ kə kum mbang gə̄ malang. Ādə̄ ɓō tár yān rāāī ngándáńg. 20Ngōnə̄ḿ, ādə̄ ɓō dəyá̰ kə́ nge rāȳ rāāī i najə̄ rí tə́? Dəyá̰ ń i nə̄yá̰í aĺ ní ɔ́də mban i najə̄ rí tə́? 21A̰á̰ā̰, Kɔ́ɔ̄ɓē a̰a̰ hál de gə̄ kógə̄ḿ kógə̄ḿ malang ō, əndā ma̰ȳ gō róbə yādə́ gə̄ kógə̄ḿ kógə̄ḿ malang ō. 22Yá̰á̰ kə́ gōtə́ aĺ gə̄ ń nge kem ndul rāā ní tél əhɔn nəkɔ́ gūmbə̄ tə́ ō, kəlā majaĺ yān gə̄ a do̰ō̰n ō. 23Deē ń deē ndóōn loo ko̰o̰ ɓē dɔ rɔ̄n tə́ aĺ ní a tḭ̄ḭ̄ ta rɔ̄n, mbóo yān a əlan ta yo tə́.
Currently Selected:
Gōsə̄ najə̄ gə̄ 5: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
