Gōsə̄ najə̄ gə̄ 4
4
Sāā kum kedə̄ kəngen ō ngɔ̄mən ō
1Ngán gə̄ ōōī kɔjə̄ yā bɔbə̄ ngōn̄ kógə̄ḿ. Yá̰á̰ ń i ger̄ kum yá̰á̰ ní ə̄ndāī rɔ̄sí ta tə́ kadə̄ ī-gerī majə. 2A̰á̰ā̰, i yá̰á̰ kə́ majə n m-ɔ́jə́sí ní, ī-lōōī mbātə́ yá̰á̰ ndóō yāḿ. 3Mā i ngōn̄ kə́ majə tām̄ yā bɔbə́ḿ tə́ kété ō, kó̰ó̰ḿ rāā tɔdɔ̄ḿ tītə̄ loo rāā tɔdɔ̄ ngōn̄ kə́ kal kógə̄ḿ beē beé ō. 4Bɔbə́ḿ ɔjəm̄ yá̰a̰ əda na: Ādə̄ kemií əhɔ najə̄ yāḿ, yá̰a̰ gə̄ ń m-ə́daī kadə̄ ī-rāā ní ī-ngɔ̄m̄, anī ā ī-ndi kə kumií. 5Ī-sāā kum kedə̄ ī-mang ō, ī-sāā ger̄ kum yá̰a̰ i mang ō. Najə̄ ń m-ɔ̄r̄ seí ní ī-lōō kadə̄ dɔí ndígə̄nal ō, ī-lōō tūr̄ gidií kɔ̄ɔ́ ta tə́ ō. 6Ə́ya̰ kum kedə̄ kɔ̄ɔ́ alé, anī ni a ngɔ̄mī. Ī-tárn, anī ni a ɔgə̄ kadə̄ yá̰á̰ kə́ majaĺ rāāī. 7Yá̰á̰ kə́ ta kəga dɔ yā kum kedə̄ ní i kadə̄ ī-sāā kum kedə̄ ī-mang ō, yá̰a̰ malang ń ə́ngé ní ī-mangəń ger̄ kum yá̰a̰ ō. 8Əhɔ kum kedə̄ kə̄ rɔ̄í tə́ ādə̄ ngan̄g anī ni a ɔsiī kə̄ dɔɔ́. Ré ə́hɔn kə̄ rɔ̄í tə́ ī-ɓirə̄n dagə anī, ni a ɔsə gonií. 9Ni a əla *jākā mbang kə́ to rɔ̄ dɔí tə́ ō, a əndā njaí kə yá̰á̰ súū rɔ̄ kə́ majə ngá̰ý ō.
Ī-lōō ndájə̄ háĺ ngé kem ndul gə̄
10Ngōnə̄ḿ, ōō, ī-taā najə̄ yāḿ anī ā ī-ndi kə kumií ɓāl̄ ngá̰ý. 11m̄-ndóōī loo rāā yá̰a̰ kə kum kedēé ō, m-ɔ́jiī loo rāā háĺ kə́ súmūú ō. 12Yá̰á̰ kə́ kadə̄ a ɔgī njə̄rā a gətóo ō, ré ā̰ȳ ngɔ̄də̄ anī, yá̰a̰ a əga njaí aĺ ō. 13Yá̰á̰ ń ndóōnī ní ī-lōō kəya̰ kɔ̄ɔ́, ī-ra dɔ tə́ ādə̄ ngan̄g. Ī-ngɔ̄m̄ yá̰á̰ ń ndóōnī ní, tɔdɔ̄ nge ń noō n a rāāī kadə̄ i-ndi kə kumií ní! 14Ī-lōō ndájə̄ háĺ ngé kem ndul gə̄ ō, ī-lōō kun róbə yā ngé rāā yá̰á̰ kə́ majaĺ gə̄ ō. 15Əyá̰ róbə yādə́ kɔ̄ɔ́, ī-lōō kun! Ī-gōn̄g, ī-teē loo kə́ rang tə́! 16Nin̄ a ɓīīn̄ alé, bátə́ kadə̄ ré rāān̄ yá̰á̰ kə́ majaĺ pá tá, ré nin̄ rāān̄ deē kógə̄ḿ adə̄ əsō aĺ anī, ɓīī a əhɔ ta kumdə́ alé. 17Nin̄ əsan̄ mápá kə́ rāān̄ i yá̰á̰ kə́ gōtə́ aĺ n əngen̄neé ní. Kasə *nduú ń a̰ȳn̄ ní, i kan̄ yá̰á̰ kə́ rāā kə dɔ́nɔ́.
18Hál de kə́ súmūú gə̄ to i tītə̄ loo kə́ unjə̄ kow kə́ ta gír loo tə́, kə́ unjə̄ kum kə̄ kété kété bátə́ dan kadaá. 19Banī háĺ ngé kem ndul gə̄ to i tītə̄ loo kə́ ndɔ̄ɔ́ kə́ ndul ndḭ́ ndḭ́ beē. Yá̰á̰ kə́ to kum róbó ń a rāā yā kəga njadə́ ní, nin̄ asən̄ ka̰ā̰ alé.
Əhɔ gō háĺ kə́ majə ādə̄ ngan̄g
20Ngōnə̄ḿ, ə̄ndā kumií gír najə̄ yāḿ tə́, ī-nēl̄ mbīí ōoń najə̄ kɔrə̄ḿ gə̄. 21Ī-lōō kadə̄ dɔí ndígə̄naldə́, ba ī-ngɔ̄m̄də́ ngarā̰ kemií tə́. 22Tɔdɔ̄ de gə̄ malang ń ndigən̄ najə̄ taḿ tə́ ní, nin̄ əngen̄ ta róbə ndi kə kumuú ō, lápə́ya kə́ tām̄ yā dā̰ rɔ̄də́ tə́ ō. 23Ə̄ndā may yá̰á̰ ń ī-gír kemií tə́ ní majə. A rāā seí tɔȳ gotə yá̰a̰ gə̄ malang tɔdɔ̄ a ī-ndi kə kumií i kə ta kulneé. 24Ī-lōō kəya̰ taí kadə̄ əda najə̄ kə́ sor̄ ō, ī-lōō haalo ō. 25Ādə̄ kumií ra ta yā deē gə̄ tə́ dɔɔ́ ō, ādə̄ kumií a̰a̰ loo súmūú noí tə́ ō. 26Ī-gír̄ dɔ róbə́ ń ā ī-rāā yā kun tə́ ní ō, ādə̄ róbə kunií gə̄ i dɔ nang kə́ ngan̄g majə tə́ ō. 27Ī-tɔ̄ɔ̄ ko̰ó̰ aĺ ō, geleé aĺ ō. Ɔ̄r̄ njaí kɔ̄ɔ́ kum majaĺ tə́.
Currently Selected:
Gōsə̄ najə̄ gə̄ 4: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
