Gōsə̄ najə̄ gə̄ 3
3
Kum kedə̄ ō ɓōĺ ndíĺ Nə́ɓā ō
1Ngōnə̄ḿ, ī-lōō kadə̄ dɔí ndígə̄nal yá̰á̰ ń m̄-ndóōí ní ō, ādə̄ dan wurií ngɔ̄m̄ gō míndə́ḿ gə̄ ō. 2Yá̰a̰ gə̄ ń noō a ənīn̄ ndɔ̄í ta madə̄ tə́ ō, a ənīn̄ ɓālīí ta madə̄ tə́ ō, a adə̄nī kem sɔl̄ kə́ ngá̰ý ō. 3Ī-ra dɔ ndūí tə́ ngándáńg ō, ī-rāā yá̰á̰ kə́ rɔ̄kum ngándáńg ō, ə̄nīdə́ mədé tə́ kɔ́ɔ́í tə́ ō, ī-ndangdə́ dan wurií tə́ ō. 4Loo ń noō tə́ Nə́ɓā a táriī ō, de gə̄ a tárnī ō, míndə́sí a əsō gō naā tə́ ō. 5Ə̄nī kemií mámák ādə̄ Kɔ́ɔ̄ɓē, ba ī-lōō kəndā kemií dɔ ger̄ yá̰a̰ yāí īkɔ́ tə́. 6Tū yá̰a̰ rāāí gə̄ tə́ malang ní majə kadə̄ ī-gerə̄n, loo ń noō tə́ ni a ɔjiī loo rāā yá̰a̰. 7Ī-lōō ka̰a̰ rɔ̄í nge kum kedə̄ tə́, banī ī-ɓōĺ ndíĺ Kɔ́ɔ̄ɓē ō, ī-tūr̄ gidií kɔ̄ɔ́ ta yá̰á̰ kə́ majaĺ tə́ ō. 8Nge ń noō i dáwá kə́ tām̄ yāí tə́, a rāā kadə̄ rɔ̄í ń tōrī ní tél sɔl lɔm. 9Ī-kēgə̄ yá̰á̰ ń ə́ngé ní ī-ndējə̄ Kɔ́ɔ̄ɓē ō, ādə̄n kan̄ yá̰a̰ yāí kə́ ta kəga dɔ gə̄ ī-rɔȳnneé ō. 10Loo ń noō tə́ kōō a rosə kem mɔ̄ȳ yāí gə̄ ō, kasə *nduú a rosə kem yá̰á̰ mbə́rē kan̄ *kāgə̄ nduú yāí gə̄ kadə̄ a rə̄ɓā kə̄ ndágá ō. 11Ngōnə̄ḿ, ī-lōō mbātə́ kɔjə̄ yā Kɔ́ɔ̄ɓē ō, ndéy ń əndaī ɔjiīneé ní kɔjə̄ yā yá̰á̰ ní ō, ī-lōō kadə̄ kɔr rāāī ta najə̄ yān gə̄ tə́ ō. 12Tɔdɔ̄ Kɔ́ɔ̄ɓē i nge ndán̄g deē ń ni tárən ní, tītə̄ ń bɔbə̄ ngōn̄ a ndángəń ngōn̄ kó tár yān ní beē.
Kum kedə̄ ō rɔ̄nel̄ ō
13Rɔ̄nel̄ i kə deē ń kumən teē dɔ kum kedə̄ tə́ ní ō, kə deē ń i kə kur̄ dɔneé ní ō. 14Tɔdɔ̄ kəngen ni i só tə́ tɔȳ kənge nar ō, yá̰á̰ ń deē a ənge gírí ní majə tɔȳ lɔ́r ō. 15Gātə̄ kum kedə̄ i ngá̰ý tɔȳ gātə̄ məde kɔ̄l̄. Yá̰á̰ malang ń deē sāā ní nge kə́ kasə seneé gətóo. 16Ndi kə kumuú kə́ ndɔ̄ ngá̰ý i kem jīn kə́ ko̰ó̰ tə́, ba yá̰a̰ kənge ō, kɔsə gɔn ō i kem jīn kə́ geleé tə́. 17Róbə yān i róbə́ kə́ nel̄ ō, i róbə́ kə́ lɔm i tū tə́ ō. 18Tām̄ yā ngé gə̄ ń əhɔnən̄ sásáp tə́ ní ni i kāgə̄ kə́ deē əsan anī ā ī-ndi kə kumií ō, rɔ̄nel̄ i kə ngé gə̄ ń əhɔnən̄ sásáp ní ō. 19Kɔ́ɔ̄ɓē rāā dɔ nang i kə kum kedə̄ yānneé. Ni-rāā dɔ rā̰ adə̄ ra ngan̄g i kə ta kūl̄ kur̄ dɔneé. 20Man̄ kə́ gíŕ nángāá əɓa dɔɔ́ i kə ta kūl̄ yá̰a̰ ger̄ yānneé ō, kil̄ man̄ gə̄ rāān̄ man̄ adə̄ edə i kə ta kūl̄ yá̰a̰ ger̄ yānneé ō.
Kɔ́ɔ̄ɓē ngɔ̄m̄ nge kum kedə̄
21Ngōnə̄ḿ, ī-ngɔ̄m̄ kum kedə̄ ō, kəndā ma̰ȳ yá̰a̰ ō, ī-lōō tūr̄ gidií kɔ̄ɔ́ tadə́ tə́. 22Nin̄ a rāān̄ kadə̄ ī-ndi kə kumií ndi kə́ rɔ̄kum tə́ ō, kadə̄ ī-ndi majə ō. 23Loo ń noō tə́ ā ī-njə̄rā dɔ róbə yāí tə́ kanjə̄ sōl̄ yá̰á̰ kógə̄ḿ ō, yá̰a̰ a əga njaí aĺ ō. 24Ré ā ī-to kə̄ nang tə́ anī, ā ī-ɓōĺ aĺ ō, ré ī-to nang tə́ oy anī, ā ī-ɓīī kadə̄ nel̄ taí ō. 25Ī-lōō sōl̄ yá̰á̰ kə́ to ɓōĺ ngá̰ý kə́ əhɔī dɔ jīí tə́, aláa ngé kem ndul gə̄ kə́ əɓan̄ dɔí tə́ bus. 26Tɔdɔ̄ kāgə̄ ndə̄nā rɔ̄ yāí i Kɔ́ɔ̄ɓē ō, ni i nge rāā kadə̄ njaí udə kum gūmbə̄ tə́ aĺ ō.
Ī-tár madí
27Deē ń yá̰a̰ tōr̄ rɔ̄n ní, ré ásə rāā majə seneé ɓáa ī-lōō mbātə́ rāā seneé. 28Yá̰á̰ ń madí dəjeī ní, ré to jīí tə́ anī ī-lōō kədan na kə aw̄ ba bírí tá kə tél kə reē, na bírí a na ā ādə̄n. 29Ī-lōō núm̄ rāā madí yá̰á̰ kə́ majaĺ dan ń ni-ənī kemən mámák ndiń rɔ̄í tə́ ní. 30Ī-lōō kɔ̄l̄ kə deé kanjə̄ kumən dan ń kɔ́ɔ̄ rāāī yá̰á̰ kə́ majaĺ aĺ ní. 31Ī-lōō kəndā nge rāā yá̰a̰ kə dɔ́nɔ́ nii ō, ī-lōō ndájə̄ háĺ yá̰a̰ rāān gə̄ ō. 32Tɔdɔ̄ deē ń hálən i kə́ nujə kɔ̄ɔ́ ní i de kə́ yḛr ta kum Kɔ́ɔ̄ɓē tə́, ba Kɔ́ɔ̄ɓē ɔjə de kə́ súmūú kemən tɔdɔ̄ ni-ənī kemən adə̄n mámák. 33Ndɔ̄ĺ yā Kɔ́ɔ̄ɓē i dɔ kújə yā nge kem ndul tə́, banī ni-rāā majə kə loo ndi de kə́ súmūú gēé. 34Ni lur ngé lur loo gə̄, banī rāā kem majə kə ngé sɔl̄ dɔdə́ gēé. 35Ngé kum kedə̄ gə̄ a əngen̄ i kɔsə gɔn, banī mbóo gə̄ a əngen̄ i rɔ̄sɔl̄.
Currently Selected:
Gōsə̄ najə̄ gə̄ 3: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
