Makətūbə̄ yā Jeremi 44
44
Najə̄ kə́ tām̄ yā Juda gə̄ ń ɓɔ̄ɔ̄n̄ rɔ̄də́ Ejiptə tə́ ní
1Kɔ́ɔ̄ɓē əndā najə̄ ta Jeremi tə́ kadə̄ ɔr̄ kə *Juda gə̄ malang ń aw̄ ndin̄ Ejiptə tə́ adə̄ i kem ɓē kə́ Migədol tə́ ō, Tapanes tə́ ō, Mempis tə́ ō, gō nang kə́ Patəros tə́ ō ní: 2Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel, əda ní n toó: Sḭḭ̄ á̰a̰ī yá̰á̰ kə́ to kum kaȳ aĺ gə̄ malang ń m̄-rāā kə Jerusalem ō, kə ɓē gə̄ kə́ Juda tə́ ō ní majə. Á̰a̰ī kadə̄ ngɔlaā ní nin̄ nujə sák sák kɔ̄ɔ́ ō, de gə̄ ndin̄ kemeé to̰ alé ō. 3Tɔdɔ̄ nin̄ rāān̄ yá̰á̰ kə́ majaĺ, róōn̄ *yá̰a̰ ndējə̄ gə̄ adə̄n̄ nə́ɓā kə́ rang gə̄ ń i ɓesə̄ gə̄ ní adə̄mə̄n̄neé wōn̄g. Ndɔ̄yə̄n̄ nə́ɓā gə̄ kə́ nin̄ gə̄gē sḭḭ̄ gə̄gē kaasí gə̄ gə̄gē ī-gerī gíŕdə́ alé. 4M-ə́la ngé kəla yāḿ gə̄ ń i *ngé koō ta gə̄ ní rɔ̄sí tə́ kanjə̄ kɔr ta tə́ kadə̄ ədan̄sí na: Ī-lōōī rāā yá̰á̰ kə́ majaĺ ngá̰ý gə̄ ń nelə̄m̄ aĺ ní. 5Nin̄ oōn̄ najə̄ yādə́ aĺ ō, nēlə̄n̄ mbīdə́ yā tūrəń hál kem ndul yādə́ aĺ ō, lōōn̄ gíŕ róō *yá̰a̰ ndējə̄ gə̄ tə́ yā kadə̄ nə́ɓā kə́ rang gə̄ aĺ ō. 6Adə̄ m-bə̄gā wōn̄g yāḿ, wōn̄g kə́ ngá̰ý yāḿ, kadə̄ nujə ɓē gə̄ kə́ *Juda ō, kə̄lá róbə gə̄ kə́ Jerusalem ō, tītə̄ hor kə́ o̰o̰ loo beé. Nin̄ télən̄ loo kə́ nujə sák sák kɔ̄ɔ́ gə̄ ō, loo kə́ yá̰a̰ gətóo tū tə́ gə̄ ō, yá̰á̰ ń rāā yá̰a̰ ngɔlaā ní n toó.
7Ngɔlaā ní Kɔ́ɔ̄ɓē Nə́ɓā kə́ tɔ́gən i ngá̰ý, Nə́ɓā yā *Israel, ɔr̄ najə̄ i tītə̄ ń toō beē: I tām̄ rí tə́ á sḭḭ̄ kɔ́ gə̄ ī-rāāī rɔ̄sí yá̰á̰ kə́ tōr̄ kum kə̄ kété kété, bátə́ adə̄ dəngam gə̄ ō, dəyá̰ gə̄ ō, ngáń kə́ dūú gə̄ ō, ngáń kásə̄ gə̄ ō, a oyn̄ yā təgā *Juda tə́ kanjə̄ kadə̄ gotə de gə̄ sḛ́ý ndin̄ kə kumdə́ ní. 8Tɔdɔ̄ sḭḭ̄ ī-rāāī ādə̄ wōn̄g rāām̄ sɔɔ̄ń kəla rāāsí gə̄. Ī-róōī *yá̰a̰ ndējə̄ gə̄ ādī nə́ɓā kə́ rang gə̄ kem ɓē kə́ Ejiptə ń ī-reē ī-ɓɔ̄ɔ̄ī rɔ̄sí kemeé tə́ ní, kadə̄ óyiīneé yā təgā kɔ̄ɔ́ ō, kadə̄ ī-téliīneé yá̰á̰ kə́ de gə̄ kídə̄n̄ ō, yá̰á̰ kə́ to rɔ̄sɔl̄ ō, dan nápar de gə̄ malang kə́ dɔ nang tə́ tə́. 9Dɔsí ndígə̄nal yá̰á̰ kə́ majaĺ gə̄ ń kó̰ó̰sí gə̄ ō, mban̄g kə́ *Juda tə́ gə̄ ō, nə̄yá̰də́ gə̄ ō, sḭḭ̄ kɔ́ gə̄ ō, nə̄yá̰sí gə̄ ō, ī-rāāī kem ɓē kə́ Juda tə́ ō, dɔ kə̄lá róbə gə̄ kə́ Jerusalem tə́ ní ō kɔ̄ɔ́ a? 10Ɓōólaā gə̄gē ní nin̄ ndə̄ngān̄ rɔ̄də́ alé, ɓōlə́n̄ ndílə́ḿ alé. Nin̄ unən̄ gō róbə yāḿ gə̄ aĺ ō, unən̄ gō *ndū najə̄ yāḿ gə̄ ń m̄-ndang m-ādə̄sí sḭḭ̄ ō, kaasí gə̄ ō ní aĺ ō.
11I tāmə̄n̄ toō tə́ n Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel, ɔr̄ najə̄ tītə̄ ń toō beé ní: M-ā m̄-tūr̄ rɔ̄ḿ kə̄ rɔ̄sí tə́ yā rāāsí yá̰á̰ kə́ majaĺ ō, yā tɔ̄l̄ de gə̄ malang kə́ Juda tə́ kɔ̄ɔ́ ō. 12M-ā m-ə̄ndā kumḿ gír *Juda gə̄ ń teēn̄ ta yo tə́ á əsōn̄ róbó yā kaw̄ ɓɔ̄ɔ̄ rɔ̄də́ Ejiptə tə́ ní kə gōó. Nin̄ malang a oyn̄, a tə́sōn̄ kem ɓē kə́ Ejiptə tə́. A oyn̄ yo kaskar ō, yo ɓō ō, a télən̄ yá̰á̰ kə́ to kum ko̰ ō, a ndə̄ngān̄də́ yo ō, a ndɔ̄lə́n̄də́ ō, a tájə̄n̄də́ ō. 13M-ā m-ə́nda de gə̄ malang ń ndin̄ kem ɓē kə́ Ejiptə tə́ ní tītə̄ ń m-ə́ndań ɓē kə́ Jerusalem kə kaskaraá ō, kə ɓōó ō, kə mo̰y ngāl̄bɔ̄gīí ō ní. 14De kə́ a ndi kə kumneé aláa de kə́ a teē ta yo tə́ dan gotə Juda gə̄ tə́ ō, ngé gə̄ ń reē ɓɔ̄ɔ̄n̄ rɔ̄də́ Ejiptə tə́ ō ní a gətóo. De kə́ a tél yā kaw̄ gogə́ kem ɓē kə́ Juda tə́ ń nin̄ gírə̄n̄ tél kaw̄ ndi ɓē kemeé ní a gətóo. Nin̄ a télən̄ yā kaw̄ kemeé alé, banī i ngé teē ta yo tə́ kə́rēý gə̄ tá ngóy.
Yá̰a̰ gə̄ ń ndējə̄n̄ Mban̄g kə́ dəyá̰ kə́ dɔ rā̰ tə́ ní
15De kə́ dəngam gə̄ ń gerə̄n̄ kadə̄ nə̄yá̰də́ gə̄ róōn̄ *yá̰a̰ ndējə̄ gə̄ adə̄n̄ nə́ɓā kə́ rang gə̄ ō, dəyá̰ gə̄ ń nin̄ i kum kán̄ naā kə́ bo tə́ ō, de gə̄ malang ń ndin̄ Patəros tə́ kem ɓē kə́ Ejiptə tə́ ō ní ədan̄ Jeremi na: 16Ɔ̄r̄ najə̄ sejí i kə rī Kɔ́ɔ̄ɓēé ɓá tā ba j-a j-oō najə̄ yāí alé. 17J-a jə-rāā yá̰a̰ malang ń j-ənī ndūjí yā rāā ní, adə̄ i róō *yá̰a̰ ndējə̄ gə̄ yā kadə̄ Mban̄g kə́ dəyá̰ kə́ dɔ rā̰ tə́ ō, i tə́te kasə nang tə́ kadə̄n ō, tītə̄ ń jḭḭ kɔ́ gə̄ ō, kaají gə̄ ō, mban̄g yājí gə̄ ō, de kə́ bo yājí gə̄ ō jə-rāań kem ɓē gə̄ kə́ *Juda tə́ ō, dɔ kə̄lá róbə gə̄ kə́ Jerusalem tə́ ō, j-əsań yá̰a̰ adə̄ ndān̄ kemjí ō, jə-ndi majə kanjə̄ kadə̄ yá̰á̰ kə́ to kum kaȳ aĺ rāājí ō. 18Ba jóo nəkɔ́ ń toō ń jə-lōō gír róō yá̰a̰ ndejə̄ gə̄ tə́ yā kadə̄ Mban̄g kə́ dəyá̰ kə́ dɔ rā̰ tə́ ō, jə-lōō gíŕ tə́te kasə tə́ nang tə́ kadə̄n ō, jə-nal̄ yá̰a̰ malang ō, j-oy yo kaskar ō, yo ɓō ō.
19Dəyá̰ gə̄ ədan̄ ɓáý to̰ na: Dan ń jə-róō yá̰á̰ ndējə̄ gə̄ j-adə̄ Mban̄g kə́ dəyá̰ kə́ dɔ rā̰ tə́ ō, jə-tə́te kasə nang tə́ j-adə̄n ō ní, ré ngaají gə̄ ndigən̄ gōjí tə́ aĺ anī, j-asə rāā makəla kə́ ɔsə kum gotən yā kadən̄ ō, j-asə tə́te kasə nang tə́ yā kadən ō a?
20Anī, Jeremi əda dəngam gə̄ ō, dəyá̰ gə̄ ō, de gə̄ malang ń tél ədanən̄ najə̄ tītə̄ ń noō ní ō na: 21Yá̰a̰ ndējə̄ gə̄ ń sḭḭ̄ ō, kaasí gə̄ ō, mban̄g yāsí gə̄ ō, de kə́ bo yāsí gə̄ ō, gír de gə̄ kə́ kem ɓēé ō, ī-róōī kem ɓē gə̄ kə́ *Juda tə́ ō, dɔ kə̄lá róbə gə̄ kə́ Jerusalem tə́ ō ní, Kɔ́ɔ̄ɓē ger̄ gō aĺ a? Əga kemən dɔ tə́ aĺ a? 22Kɔ́ɔ̄ɓē asə tə́gā tan dɔ kəla rāāsí kə́ kə kem nduluú gə̄ tə́ ō, dɔ yá̰á̰ kə́ majaĺ ngá̰ý gə̄ ń ī-rāāī tə́ ní ō. Adə̄ ɓē yāsí tél loo kə́ nujə sák sák kɔ̄ɔ́ ō, ndágə loo kə́ to kum ko̰ ō, yá̰á̰ kə́ ndɔ̄ĺ ō, ɓē kə́ de gə̄ gətóon̄ kemeé ō, yá̰á̰ ń rāā yá̰a̰ ngɔlaā ní n toó. 23I tɔdɔ̄ sḭḭ̄ ī-róōī *yá̰a̰ ndējə̄ gə̄ ādī ɓesə̄ gə̄ ō, ī-rāāī majaĺ kə Kɔ́ɔ̄ɓē ō. Tɔdɔ̄ najə̄ ń ni-ɔr̄ sesí ní, sḭḭ̄ ōōī aĺ ō, úniī gō yá̰á̰ ndóō yān gə̄ aĺ ō, yá̰á̰ ń ni ədasí kadə̄ ī-rāāī ní, sḭḭ̄ ī-rāāī aĺ ō, yá̰á̰ ń ni-ra sesí ta rāā ní, sḭḭ̄ ī-rāāī aĺ ō. I tām̄ ń toō tə́ n yá̰á̰ kə́ to kum kaȳ aĺ ń toō rāańsí ní, yá̰á̰ ń rāā yá̰a̰ ngɔlaā ní n toó.
24Tā anī, Jeremi əda de gə̄ ń noō malang, dəyá̰ gē dəngam gē na kə oōn̄ najə̄ yā Kɔ́ɔ̄ɓē, nin̄ de kə́ Juda gə̄ ń ndin̄ Ejiptə tə́ ní. 25Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel, ɔr̄ najə̄ i tītə̄ ń toō beē: Sḭḭ̄ ō, nə̄yá̰sí gə̄ ō, ɔ̄rī najə̄ ré tasí a̰ȳ aĺ ɓáý anī ī-rāāī yá̰á̰ ń ə́daī ní kɔ̄ɔ́ ɓá. Sḭḭ̄ ə́daī na j-a jə-rāā yá̰á̰ ń j-ənī ndūjí yā rāā ní. J-a jə-róō *yá̰a̰ ndējə̄ gə̄ yā kadə̄ Mban̄g kə́ dəyá̰ kə́ dɔ rā̰ tə́ ō, j-a jə-tə́te kasə tə́ nang tə́ yā kadə̄n ō. Tā anī ī-rāāī yá̰a̰ gə̄ ń ə̄nīī ndūsí yā rāā ní ī-tɔ̄lī ta ō, ī-tə́teī kasə yāsí gə̄ nang tə́ ō. 26I beé ní, sḭḭ̄ *Juda gə̄ ń ī-ndiī Ejiptə ní ōōī najə̄ yā Kɔ́ɔ̄ɓē: m̄-túbə kə rīḿ kə́ boó kadə̄ najə̄ ń na Kɔ́ɔ̄ɓē ndi noó kə kumneé ní, Juda kógə̄ḿ kə ndi gō nang kə́ Ejiptə a əda tan tə́ to̰ aĺ i kə́ bátə́ gə̄ tə́. 27M-ə̄ndā kumḿ gíŕdə́ tə́ i yā rāādə́ yá̰á̰ kə́ majaĺ, banī i yá̰á̰ kə́ majə alé. Juda gə̄ ń ndin̄ kem ɓē kə́ Ejiptə tə́ ní a oyn̄ yo kaskar ō, yo ɓō ō, bátə́ kadə̄ təgān̄neé. 28De kə́ kutədə́ i ngá̰ý aĺ gə̄ kə́ teēn̄ ta yo kaskar tə́ a ḭḭn̄ Ejiptə yā tél kaw̄ gogə́ dɔ nang kə́ Juda tə́. Ɓá anī, ngé gə̄ malang ń ndin̄ kə kumdə́ Juda tə́ á reē ɓɔ̄ɔ̄n̄ rɔ̄də́ Ejiptə tə́ ní, a gerə̄n̄ ké najə̄ i yāḿ aké i yādə́ nin̄ wa. 29Kɔ́ɔ̄ɓē ɔr̄ najə̄ i tītə̄ ń toō beé: Yá̰á̰ ń a ɔjəsí kadə̄ m-ā m̄-rāā yá̰a̰ sesí loo ń toō tə́ ō, kadə̄ najə̄ ń m-ə́da dɔsí tə́ ní a rāā yá̰a̰, adə̄ yá̰á̰ kə́ to kum kaȳ aĺ a rāāsí ō ní n toó. 30M-ā m-ə́la *Parao̰ Hopəra, mban̄g kə́ Ejiptə kem jī madə̄ ba̰ā̰n gə̄ tə́, adə̄ i kem jī ngé gə̄ ń sāān̄ tɔ̄lən tə́ ní, tītə̄ ń m-ə́lań Sedekias, mban̄g kə́ *Juda, kem jī madə̄ ba̰ā̰n Nabukodonosor tə́, mban̄g kə́ *Babilon ń sāā tɔ̄lən ní.
Currently Selected:
Makətūbə̄ yā Jeremi 44: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
