Makətūbə̄ yā Jeremi 43

Əhɔn̄ Jeremi aw̄n̄ seneé Ejiptə tə́ dɔ gúú tə́

1Dan ń Jeremi əda gír de gə̄ malang yá̰a̰ gə̄ malang ń Kɔ́ɔ̄ɓē Nə́ɓā yādə́ ɔr̄ seneé ní, adə̄ i najə̄ gə̄ malang ń Kɔ́ɔ̄ɓē Nə́ɓā yādə́ mērən kədadə́ ní óy anī, 2Ajaria, ngōn̄ Hosaya ō, Yohanan, ngōn̄ Karea ō, kə ngé ndájə̄ najə̄ gə̄ malang ní, ədan̄ Jeremi na: Najə̄ ń ə́da noó i najə̄ kə́ rɔ̄kum alé, tɔdɔ̄ Kɔ́ɔ̄ɓē Nə́ɓā yājí əlaī kadə̄ ə́dájí na kə jə-lōō kaw̄ ɓɔ̄ɔ̄ rɔ̄jí tə́ Ejiptə tə́ alé. 3Ba na i Baruk, ngōn̄ Neriya n sə̄lān̄ dɔdə́ tə́ tām̄ ni ndigə kəladə́ kem jī Kalde gə̄ tə́ kadə̄ tɔlən̄də́ ō, kadə̄ əhɔn̄də́ aw̄n̄ sedə́ *Babilon ō.

4Yohanan ngōn̄ Karea ō, ngol ngé rɔ̄ɔ̄ gə̄ ō, gír de gə̄ malang ō, oōn̄ ndū Kɔ́ɔ̄ɓē ń mērə̄ńdə́ ndi kem ɓē kə́ *Juda tə́ ní alé. 5Yohanan, ngōn̄ Karea ō, ngol ngé rɔ̄ɔ̄ gə̄ malang ō, a̰a̰n̄ gō de gə̄ malang kə́ *Juda tə́ ń teēn̄ ta yo tə́ ō, ngé gə̄ ń tə̄ndā tḭ̄ḭ̄n̄də́ dan nápar de gə̄ ń ndi gīrə̄n̄ gidədə́ tə́ á tél reē ndin̄ gogə́ Juda tə́ ní ō majə. 6Dəngam gə̄ ō, dəyá̰ gə̄ ō, ngán gə̄ ō, ngán ngār kə́ dəyá̰ gə̄ ō, de gə̄ malang ń Nebujaradan, ngol ngé ngɔ̄m̄ dɔ mban̄g ɓɔ̄ɔ̄də́ kə Gedalia, ngōn̄ Ahikam kə́ ngōn̄ Sapan ní ō, Jeremi kə́ *nge koō ta ō, Baruk, ngōn̄ Neriya ō, 7mbātə́n̄ koō ndū Kɔ́ɔ̄ɓē ba aw̄n̄ Ejiptə tə́ adə̄ aw̄n̄ bátə́ ugə̄n̄ Tapanes.

Jeremi əda na a taān̄ ɓē kə́ Ejiptə

8Tā anī, Kɔ́ɔ̄ɓē ɔr̄ najə̄ kə Jeremi kem ɓē kə́ Tapanes tə́ ədan na: 9Ɔ́y mbal̄ kə́ bo gə̄ ba ī-dubə̄də́ ta kum de kə́ *Juda kə́rēý gə̄ tə́, ndágə loo kə́ to bɔr ń de gə̄ a tə́ngān̄ yá̰á̰ kə́ to tītə̄ kéngəlé kə́ yā lábə̄ dɔ kújə́ tə́ tū tə́ ní tə́, kum kə̄ ta róbə kújə yā mban̄g *Parao̰ tə́ kem ɓē kə́ Tapanes tə́.

10Gō tə́ anī ā ə́dádə́ na: Najə̄ ń Kɔ́ɔ̄ɓē kə́ bo kə́ tɔ́gən i ngá̰ý, Nə́ɓā yā *Israel, əda ní n toó: M-ā m-ə́la gō nge kəla yāḿ Nabukodonosor mban̄g kə́ Babilon tə́, m-ā m-ə̄ndā kōr̄ kāgə̄ mbang yān dɔ mbal̄ gə̄ ń ī-dubə̄ tə́ ní ō, ni a udə təndā mban̄g yān dɔ tə́ dɔɔ́ ō. 11Ni a reē ō, a ənda ɓē kə́ Ejiptə ō. Deē ń i tām̄ yā yo tə́ ní a oy. Deē ń i tām̄ yā kəhɔn kaw̄ seneé dɔ ɓē kə́ rang tə́ ní a aw̄n̄ seneé. Deē ń i tām̄ yā kadə̄ kaskar tɔ̄lən ní a oy yo kaskar. 12M-ā m-ə́la hor dɔ kújə yā nə́ɓā gə̄ kə́ Ejiptə tə́ ń i ɓesə̄ gə̄ ní tə́. Nabukodonosor a əla hor dɔ ɓesə̄ gə̄ ní tə́ ō, a ɔydə́ yā kaw̄ń ō, a ró̰ȳdə́ kɔ̄ɔ́ Ejiptə tə́ tītə̄ ń nge kul̄ yá̰a̰ a əhɔń ngə́sā tū kūbə̄ yān tə́ ní beé ō, a tél yā kaw̄ gogə́ kanjə̄ kadə̄ yá̰á̰ kógə̄ḿ rāān ō. 13Ni a tɔ̄ɔ̄ mbal̄ gə̄ kə́ Bet Semes kem ɓē kə́ Ejiptə tə́ ō, ni a əla hor dɔ kújə ɓesə̄ gə̄ kə́ Ejiptə tə́ ní ō.

Currently Selected:

Makətūbə̄ yā Jeremi 43: BS

Highlight

Copy