Makətūbə̄ yā Ojee 8
8
Nge rāā yá̰á̰ kə́ majaĺ a ndíbə̄ horən
1Ī-kɔ̄ríī tōw̄ gajə batə̄ yāsí gə̄ ī-tāāiń de gə̄.
Yá̰á̰ kə́ to kum kaȳ aĺ a reē kə̄ dɔ ɓē yā Kɔ́ɔ̄ɓē tə́
tītə̄ kə̄rō kə́ a jə̄ngā beé.
Kɔ́ɔ̄ɓē əda na:
Nin̄-ɓōlə́n̄ gidə *madə̄ naā yāḿ aĺ ō,
ran̄ dɔ yá̰á̰ ń m̄-ndóōdə́ ní tə́ aĺ ō.
mbātə́n̄ yá̰a̰ gə̄ ń m-ɔ́jə́də́ ní ō.
2Nin̄ əgan̄ kɔŕ kə̄ dɔḿ tə́ ədan̄ na:
Nə́ɓā yājí, jḭḭ *Israel gə̄ jə-gerī!
3Banī nin̄ mbātə́n̄ yá̰á̰ kə́ majə kɔ̄ɔ́ ō,
madə̄ ba̰ā̰də́ gə̄ a ngɔ̄də̄n̄də́ ō.
4Nin̄ əndān̄ mban̄g gə̄,
banī i kanjə̄ koō yāḿ mā ō,
gə̄rān̄ de kə́ bo gə̄,
banī i kanjə̄ kədam̄ mā ō.
Nin̄ ɔyn̄ gində̄ arjā̰a̰ yādə́ gə̄ ō, lɔ́r yādə́ gə̄ ō,
nōn̄ horoó rāān̄ ɓesə̄ gə̄ tə́.
Nge ń noō i ta róbə́ kə́ majə
kə́ yā tḭ̄ḭń ta yá̰a̰ malang kɔ̄ɔ́!
5I beé ní, sḭḭ̄ de kə́ Samari gə̄,
ī-mbātíī ngōn̄ man̄g lɔ́r yāsí kɔ̄ɔ́!
Ī-rāāmī adə̄ wōn̄g rāām̄.
Sḭḭ̄ ásiī ndi kanjə̄ rāā yá̰á̰ kə́ gōtə́ aĺ alé.
Nge ń noō a to i bátə́ ta kə́ rá?
6Ngōn̄ man̄g yāsí ḭḭ i *Israel,
i kɔdə̄ kógə̄ḿ n rāān.
Ngōn̄ man̄g ní i Nə́ɓā alé!
A̰á̰ā̰, ngōn̄ man̄g kə́ Samari
a əsō yā tétə̄ rárák kɔ̄ɔ́.
7Dan ń sḭḭ̄ ī-rāāī yá̰á̰ kə́ majaĺ ní, ā ī-ndíbī horən.
Gémē kə́ ɔr̄ dɔn aĺ a teē ndujə̄ alé.
Ba ré teē ndujə̄ anī, tə̄rā gə̄ a əsan̄ kɔ̄ɔ́.
8Urən̄ *Israel kɔ̄ɔ́.
Ngɔlaā ní, ni-ndi dan nápar de gə̄ tə́
i tītə̄ yá̰á̰ kógə̄ḿ kə́ gātə̄n gətóo beé.
9*Epəraim aw̄ dɔ nang kə̄ Asiri tə́,
ni to i tītə̄ kərō kə́ bembeé
kə́ a rāā yá̰a̰ i kə kérneé beē.
Tá ni-adə̄ yá̰á̰ gíŕ ngé sāān
gə̄ tə́ yā kəngeńdə́.
10Ni-adə̄ nápar de gə̄ yá̰a̰ karī.
Ba ngɔlaā ní, m-ā m̄-ɓoodə́ naā tə́ ō,
sḛ́ý laā anī nin̄ a a̰a̰n̄ tápə̄ gír mban̄g
kə́ tɔ́gən tɔȳ yā mban̄g gə̄ tə́ ō.
11Epəraim rāā *loo tun̄ yá̰a̰ gə̄
gír i ngá̰ý yā kɔrə̄ń mān̄ dɔ ndū Nə́ɓā yān,
banī ni mān̄ dɔ ndū Nə́ɓā i kə ta kūl̄
*loo tun̄ yá̰a̰ gə̄ ngeé ń toō.
12M-ásə ndang yá̰á̰ kə́
yā rāā gə̄ dūbūú tām̄ yān tə́,
banī tām̄ yān tə́ ɓáa a ton̄
i tītə̄ yá̰á̰ kə́ mbā beé.
13Nin̄ ndə̄jə̄mə̄n̄ yá̰á̰ kə́ tun̄ gə̄,
i tɔdɔ̄ nin̄ gḛyn̄ kəsa dā̰.
Banī mā Kɔ́ɔ̄ɓē m̄-ndigə *yá̰a̰ tun̄ yādə́ gə̄ alé.
Ngɔlaā ní, a əga kemḿ dɔ
yá̰a̰ rāādə́ gə̄ kə́ gōtə́ aĺ gə̄ tə́,
m-ā m̄-rāādə́ yá̰á̰ kə́ tōr̄
najə̄ mān̄ ń nin̄ mānə̄n̄ dɔ ndūḿ gə̄ ní tə́.
I gáŕ kadə̄ nin̄ a télən̄ yā kaw̄
gogə́ dɔ nang kə́ Ejiptə tə́.
14*Israel rāā kújə́ kə́ majə
ngá̰ý gə̄ tām̄ yān tə́,
banī dɔn ndígə̄naləḿ mā nge rāān kɔ̄kə́.
Juda ra yān noó rāā ɓē kə́ ngan̄g gə̄ ngá̰ý.
Banī m-ā m-ə́la hor dɔ ɓē yān gə̄ tə́,
kadə̄ a o̰o̰ kújə yān kə́ majə gə̄ kɔ̄ɔ́.
Currently Selected:
Makətūbə̄ yā Ojee 8: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
