Makətūbə̄ yā Ojee 7
7
1Kum mbang ń m̄-sāā rāań kadə̄ *Israel ənge rɔ̄ ngáā ní ɓáa,
m-á̰á̰ yá̰á̰ kə́ gōtə́ aĺ gə̄ ń *Epəraim gə̄ rāān̄ ní ō,
m-á̰á̰ yá̰á̰ kə́ majaĺ ngá̰ý gə̄ ń de kə́ Samari gə̄ rāān̄ ní ō.
A̰á̰ā̰, nin̄ i de kə́ rɔ̄kum aĺ gə̄,
ngé ɓogə gə̄ a túdə̄n̄ kə̄ kem kújə gə̄ tə́ dɔ gúú tə́ ō,
ngé gān̄g róbə gə̄ a rāān̄ yá̰a̰ i kum róbə kɔsə gə̄ tə́ ō.
2Banī nin̄ gírə̄n̄ yá̰á̰ ń toō alé:
Yá̰á̰ kə́ majaĺ gə̄ malang ń nin̄ rāān̄ ní, əga kemḿ dɔ tə́.
Ngɔlaā ní, yá̰a̰ rāādə́ gə̄ gīr̄ gidədə́ əla ta naā tə́.
M-á̰á̰də́ ta kumḿ tə́ ngándáńg.
3Kə ta kūl̄ kem ndul yādə́,
nin̄ rāān̄ mban̄g adə̄ rɔ̄n nelə̄n ,
kə ta kūl̄ sor̄ yādə́,
nin̄ rāān̄ de kə́ bo gə̄ ādə̄ əren̄ kumdə́ ta yá̰á̰ tə́ alé.
4Nin̄ malang rāān̄ rāȳ.
Nin̄ ton̄ i tītə̄ púŕ kə́ təngā ngá̰ý,
kə́ nge kɔr̄ mápa əndā kumən gírí to̰ alé.
Ni-əla gír ka̰a̰ púŕ ní to̰ alé i dan ń ni ló̰yń ndujə̄ tə́ ní,
bátə́ kadə̄ ndujə̄ kə́ ló̰ȳ ní agə̄ń.
5Dan ń i ndɔ̄ yā mban̄g anī,
de kə́ bo yān gə̄ rāān̄ yá̰a̰ tītə̄ kə́ mo̰y rāādə́ beē,
nin̄ a̰ȳn̄ kasə *nduú adə̄ mān̄ dɔ majən.
Nin̄ rāān̄ de gə̄ mbóó tə́ ō,
mban̄g rāā tītə̄ yādə́ ō.
6Ngé gə̄ ń əndān̄ dɔ yá̰á̰ kə́ majaĺ danaá yā rāā ní,
təngān̄ tītə̄ púŕ mápa beé.
Ndɔ̄ɔ́ bátə́ yā kadə̄ loo tīiń ní,
wōn̄g yādə́ a ɓīī i mbée,
banī dəloí anī, ni ndól̄ ba o̰o̰ loo tītə̄ hor kə́ bo beé.
7Nin̄ malang ní, təngān̄ tītə̄ púŕ mápa beé ō,
nin̄ tɔ̄lə̄n̄ ngār yādə́ gə̄ ō.
Mban̄g yādə́ gə̄ malang tə́sōn̄ kɔ̄ɔ́ ō,
de kə́ sāā njaḿ mā gətóo ō.
8*Epəraim ə́la rɔ̄n dan gír de kə́ rang gə̄ tə́.
Ni to i tītə̄ makəla kə́ kɔbə̄ kə́ deē tūr̄ gidə alé.
9Tə̄rā gə̄ taān̄ tɔ́gən kɔ̄ɔ́, banī ni a̰ā̰ alé.
Dɔn ndaa kɔ̄ɔ́,
banī ni ger̄ gō alé.
10Ngán *Israel gə̄ ɔjən̄ rɔ̄də́,
banī kɔjə rɔ̄ yādə́ ní ɔjə i rāā yá̰a̰
kə gōó alé yādə́ kə̄ ndágá.
Israel tél reē rɔ̄ḿ mā
Kɔ́ɔ̄ɓē Nə́ɓā yān tə́ alé.
Yá̰a̰ malang ń rāān ní gə̄gē,
ni sāā njaḿ alé.
11*Epəraim to i tītə̄ déŕ kə́ mbóo beé.
Ni gír̄ yá̰a̰ alé.
Ni ɓāŕ Ejiptə ba gō tə́ anī,
ni aw̄ dɔ nang kə́ Asiri tə́.
12Dan ngeé ń noō tə́ ní,
mā m-ə̄nī réng yāḿ dɔ *Epəraim gə̄ tə́,
m̄-rāā adə̄ nin̄ tə́sōn̄ tītə̄ yel̄ gə̄ beé.
Dan ń m-ōō kōōdə́ loo kɔsə dɔdə́ naā tə́ tə́ anī,
m-ə́wádə́ kə gūmbūú.
13Yá̰á̰ kə́ to kum kaȳ aĺ kə́ ba̰ý beē
tām̄ yā *Epəraim gə̄ tə́!
Nin̄ a̰ȳn̄ rɔ̄ḿ tə́ kɔ̄ɔ́ aw̄n̄ sa̰y!
A nujən̄də́ kɔ̄ɔ́, tɔdɔ̄ nin̄ əsōn̄ wōn̄g taḿ tə́.
Nin̄ ɔrə̄n̄ najə̄ kə́ sor̄ gə̄ dɔḿ tə́.
Loo ń noō tə́ ní, m-ā m̄-rāā i ba̰ý n
m-ā m-ásəń gān̄g dɔdə́ ní?
14Dan ń nin̄ ɓāŕmə̄n̄ kadə̄ m̄-dḭḭ̄də́ anī,
i kə́ rɔ̄kum tə́ alé.
Banī nin̄ tṵ́ṵ̄n̄ dɔ tə̄rá yādə́ gə̄ tə́ ō,
tə́jān̄ rɔ̄də́ kə doó ō,
yā kəngeń gémē ō, kasə *nduú kə́ kijə ō.
I tītə̄ ń noō n yá̰á̰ ń mā m̄-ndigə ní nin̄ rāān̄ alé.
15Tá kété ní, mā m-ādə̄də́ tɔ́gə.
Banī nin̄ gírə̄n̄ i rāā yá̰á̰ kə́ majaĺ seḿ.
16Ré a tél a reēn̄ i kə̄ rɔ̄ deē kógə̄ḿ tə́ anī,
i kə̄ rɔ̄ḿ mā tə́ alé.
Nin̄ ton̄ i tītə̄ ga̰ gərā kə́ rugə beé.
Ngār yādə́ gə̄ a oyn̄ ta rɔ̄ tə́,
tɔdɔ̄ nin̄ ɔrə̄n̄ najə̄ kə́ majaĺ dɔḿ tə́.
Ba de gə̄ a mbóōn̄ sedə́ dɔ nang kə́ Ejiptə tə́.
Currently Selected:
Makətūbə̄ yā Ojee 7: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
