Makətūbə̄ yā Ojee 9
9
Gír de gə̄ yā Nə́ɓā a tḭ̄ḭ̄n̄ ta yá̰a̰ malang kɔ̄ɔ́
1*Israel rāā rɔ̄nel̄ ngá̰ý
tītə̄ yā gotə gír de kə́ rang gə̄ alé.
Tɔdɔ̄ ḭ̄ Israel ə́yá̰ Nə́ɓā yāí
ba āw̄ sa̰y kɔ̄ɔ́ kə ta kūl̄ rāāí ájə́ba.
Nelī kadə̄ əndān̄ njaí najə̄n tə́
loo malang ń de gə̄ a əndan̄ gémē tū tə́ ní tə́.
2Banī gémē ń a əndan̄ loo kənda gémē tə́ ní ō,
yibə̄ ń a taān̄ ta loo mbérē yibə̄ tə́ ō ní,
i tām̄ yāí tə́ alé.
Kasə *nduú kə́ kijə ń ī-ndi ā ī-ngóō ní ā ə́nge alé.
3*Epəraim gə̄ a asən̄ ndi dɔ nang yā Kɔ́ɔ̄ɓē tə́ alé.
Nin̄ a télən̄ yā kaw̄ gogə́ dɔ nang kə́ Ejiptə tə́,
aĺ ɓáa a aw̄n̄ Asiri.
Nin̄ a əsan̄ yá̰á̰ kə́ yḛr loo ń noō tə́.
4Loo ń noō tə́ nin̄ a ɓōkə́n̄ kasə *nduú
nang tə́ yā ndējə̄ Kɔ́ɔ̄ɓē to̰ alé.
Yá̰á̰ gə̄ ń nin̄ tun̄ adə̄nən̄ ní, a nelə̄n alé.
Kə́ tām̄ yādə́ nin̄ tə́ ɓáa,
yá̰a̰ kəsa a tél a to i tītə̄
yá̰a̰ kəsa kə́ loo yo tə́ beē.
De gə̄ malang ń a əsan̄ ní
a télən̄ de kə́ yḛr gə̄.
Mápa yādə́ a ul̄də́, banī nin̄ a asən̄ kudə
kə mápá ní kem kújə yā Kɔ́ɔ̄ɓē tə́ alé.
ba a ɔtə̄ kem *kújə yā Kɔ́ɔ̄ɓē tə́ alé.
5Yá̰á̰ ń ā ī-rāāī ndɔ̄ kənge naā tə́,
adə̄ i ndɔ̄ rāā nāā yā Kɔ́ɔ̄ɓē tə́ ní, i rí?
6Dan ń ā ī-teēī kɔ̄ɔ́ kem ɓē yāsí kə́ nujə tə́ anī,
ɓē kə́ Ejiptə a əhɔsí kə̄ rɔ̄n tə́,
banī ɓē kə́ Mempis a tél i bəlo yosí.
Mu kə́ majaĺ gə̄ a ɔrən̄ rɔ̄ɔ̄ dɔ
yá̰a̰ yāsí gə̄ kə́ gātə̄də́ i ngá̰ý tə́,
túpə kōn̄ gə̄ a taān̄ loo kem kújə yāsí gə̄ tə́.
7Kum mbang ń Kɔ́ɔ̄ɓē a rɔ̄ɔ̄ńsí ní n toó.
A̰á̰ā̰, i kum mbang kə́ yā kadə̄
deē ɔjəń gíŕ yá̰a̰ rāān gə̄,
majə kadə̄ *Israel ger̄ nge ń noō.
Sḭḭ̄ ə́daī na *nge koō ta ń
toō dɔn na ndi gōtə́ alé,
ə́daī na nge kəda yá̰á̰ kə́ reē
dɔn tə́ toō na a ɔr̄ i najə̄ kə̄ noó.
I beé ɓá ní, ré dɔḿ ndi gōtə́ aĺ anī,
i najə̄ yá̰a̰ rāāsí kə́ majaĺ ngá̰ý gə̄ kə́ i ngá̰ý tə́,
i najə̄ kənī kə́ ə̄nīmī rɔ̄ɔ̄ kə ngangá ngá̰ý tə́.
8Deē ń a ndi kə kumneé já̰já̰ yā ngɔ̄m̄ *Epəraim ní,
i mā *nge koō ta.
Mā i naā tə́ kə Nə́ɓā yāḿ.
Tá loo malang ń m-ā m-āw̄ kə̄ tū tə́ ní,
de gə̄ əyān̄ gūmbə̄ noḿ tə́.
Nin̄ ənīmə̄n̄ rɔ̄ɔ̄ bátə́ kem kújə yā Nə́ɓā yāḿ tə́.
9Sḭḭ̄ ə̄sōī kum yá̰a̰ rāā kə́ majaĺ ngá̰ý tə́,
tītə̄ ń ə̄sōiń kum tə́ kété kem ɓē kə́ Gibea tə́ ní.
A əga kem Nə́ɓā dɔ yá̰a̰ rāāsí gə̄
kə́ majaĺ ngá̰ý tə́,
ni a rāā yá̰á̰ kógə̄ḿ sesí
najə̄ mān̄ kə́ ī-mānī dɔ ndūn tə́ tə́.
Jī Kɔ́ɔ̄ɓē ur̄ wak
10Kɔ́ɔ̄ɓē əda na:
Kété ní *Israel gə̄ nelə̄n̄ taḿ
tītə̄ kan̄ nduú kə́ kem dəla loo tə́ beé.
m̄-teē dɔ kaasí gə̄ tə́ i kə rɔ̄nelēé
tītə̄ ń deē a teēń dɔ kan̄ kótə̄ kə́ ta kəga dɔ tə́
dɔ kāgə̄ kótə̄ tə́ ní beē.
Banī dan nəkɔ́ ń nin̄ reē ɔtə̄n̄ Bet Peor anī,
unən̄ rɔ̄də́ adə̄n̄ ɓesə̄ *Baal rɔ̄sɔl̄ i kə́ njɔ́ḿ gə̄ tə́.
Adə̄ nin̄ télən̄ i de gə̄ kə́ nelə̄m̄ sedə́ aĺ ngá̰ý,
tītə̄ ń nel̄məń aĺ ngá̰ý kə ɓesə̄ ń nin̄ tárnən̄ ní beē.
11Ngɔlaā ní kɔjə rɔ̄ yā Epəraim gə̄
a ḭḭ bɔ̄gə̄ yā kaw̄ kɔ̄ɔ́ tītə̄ yel̄
kə́ ḭḭ bɔ̄gə̄ aw̄ kɔ̄ɔ́ beē:
Ngán gə̄ a gətóon̄ ō,
dəyá̰ kə́ ngé ndān̄ ngán gə̄ a gətóon̄ ō,
deē a ojə deē ndul to̰ aĺ ō!
12Ká ré nin̄ a ngɔ̄mə̄n̄ ngán gə̄ gə̄gē anī,
m-ā m̄-taādə́ jīdə́ tə́ kɔ̄ɔ́
yā kadə̄ deē kógə̄ḿ na̰yń alé.
A̰á̰ā̰, kə́ rɔ̄kum tə́ ní,
i yá̰á̰ kə́ to kum kaȳ aĺ kə́ ba̰ý beē
tām̄ yā *Epəraim gə̄ tə́
dan ń m-ā-ə́yá̰də́ ba m-ā m-āw̄ sa̰y kɔ̄ɔ́ ní!
13Tītə̄ ń m-á̰a̰ń ní, *Epəraim rāā ngánən gə̄
i dā̰ gə̄ ń deē a tɔ̄l̄də́ bembeé loo ndo̰o̰ tə́ ní tə́.
Ni əya̰də́ adə̄ a tínə̄n̄ ta nge ndo̰o̰.
14A̰á̰ā̰, Kɔ́ɔ̄ɓē, majə kadə̄ yā rāā yá̰á̰ kógə̄ḿ,
banī yá̰á̰ kə́ yā rāā ní i rí?
Ī-rāā nə̄yá̰də́ gə̄ ādə̄ télən̄ dəyá̰ kə́ kujə gə̄ ngóy,
ī-rāādə́ ādə̄ asən̄ kadə̄ ngōn̄ mba alé!
15Kɔ́ɔ̄ɓē əda ɓáý to̰ na:
Kem ndul yādə́ ɔjə rɔ̄n kə̄ ndágá malang
i loo kə́ yā ɓōĺ gidən ń rīn na i Gilgal ní tə́.
Əla gír kadə̄ a nelə̄m̄ sedə́ aĺ i loo ń noō tə́.
M-ā m̄-tə̄ɓādə́ kɔ̄ɔ́ kem kújə yāḿ tə́,
a nelə̄m̄ sedə́ to̰ alé,
i najə̄ yá̰a̰ rāādə́ kə́ majaĺ tə́.
Ngār yādə́ gə̄ malang mbātə́n̄ najə̄ yāḿ.
16Əndan̄ *Epəraim ndéy jī ngá̰ý.
Ngəran gə̄ tutən̄ kɔ̄ɔ́,
ni a an̄ to̰ alé.
Ká ré dəyá̰ gə̄ aw̄n̄ kə ngán gə̄ ɓáý gə̄gē anī,
ngán kemdə́ gə̄ ń gātə̄də́ i ngá̰ý ní,
m-ā m̄-rāā kadə̄ oyn̄ kɔ̄ɔ́.
17Nə́ɓā yāḿ a mbātə́ Epəraim gə̄,
tɔdɔ̄ nin̄ oōn̄ najə̄ yān alé.
Nin̄ a aw̄n̄ kə̄ loo gə̄ tə́ malang
dan nápar de gə̄ tə́.
Currently Selected:
Makətūbə̄ yā Ojee 9: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
