Makətūbə̄ kə́ ta kəga dɔ yā Mban̄g gə̄ 20
20
Mban̄g kə́ Aram adə̄ ngé rɔ̄ɔ̄ gə̄ gírə̄n̄ gidə ɓē kə́ Samari
1Ben Hadad mban̄g kə́ Aram kán̄ ngé rɔ̄ɔ̄ yān gə̄ malang. Mban̄g gə̄ i kutə mətá gidə i jōó seneé ō, aw̄ kə sə́nda gə̄ ō, púsə rɔ̄ɔ̄ gə̄ ō. Ni-reē kə ngé rɔ̄ɔ̄ yān gə̄ ní gīrəń gidə ɓē kə́ Samari yā kənīnneé rɔ̄ɔ̄. 2Ni-əla de gə̄ kem ɓēé rɔ̄ Akab mban̄g kə́ *Israel tə́ 3kadə̄ ədan̄ Akab na Ben Hadad ɔr̄ najə̄ i beé:
Gində̄ arjā̰a̰ yāí gə̄ kə lɔ́r yāí gə̄ ō, nə̄yá̰í gə̄ kə ngání kə́ majə ngá̰ý gə̄ ō, i tām̄ yāḿ mā tə́.
4Anī mban̄g kə́ *Israel tə́ tél əla ədan na:
Tītə̄ ń ə́dań ní, kɔ́ɔ̄ḿ mban̄g, mā i tām̄ yāí tə́ ō, yá̰a̰ yāḿ malang i tām̄ yāí tə́ ō.
5Ngé kəla gə̄ télən̄ dɔ tə́ reēn̄ ɓáý to̰ kə kəla kə́ rang ədan̄ na:
Ben Hadad ɔr̄ najə̄ i beé, əda na: M-ə́la m-ə́daī kɔ̄ɔ́ ɓá, m-ə́da na kə ādə̄m̄ gində̄ arjā̰a̰ yāí ō, lɔ́r yāí ō, nə̄yá̰í gə̄ ō, ngání gə̄ ō. 6Adə̄ bírí ní kə mbang kə́ beē, m-ā m-ə́lá ngé kəla yāḿ gə̄ kadə̄ aw̄ ndúrə̄n̄ kem kújə yāí ō, kem kújə yā ngé kəla yāí gə̄ ō. Loo ń noō tə́ yá̰a̰ malang ń nel̄ kumií ní nin̄ a əndān̄ jīdə́ dɔ tə́ yā kun. 7Mban̄g kə́ *Israel tə́ əla gō *kum kɔɔ̄ gə̄ malang kə́ gō nang yān tə́ ba ədadə́ na:
Sḭḭ̄ kɔ́ gə̄ ī-gerī majə kadə̄ dəngam ń noō a sāā i rāā yá̰á̰ kə́ majaĺ seḿ. Dan ń əda na kə m-ādə̄n nə̄yá̰ḿ gə̄ ō, ngánə́ḿ gə̄ ō, gində̄ arjā̰a̰ yāḿ ō, lɔ́r yāḿ ō ní, m-ɔ̄gən alé.
8Anī *kum kɔɔ̄ gə̄ malang ō, Israel gə̄ malang ō, ədan̄ Akab na:
Ī-lōō koō najə̄ yān, ī-lōō ndigə̄ gon tə́.
9Akab əda ngé kəla gə̄ yā Ben Hadad na:
Ə́daī kɔ́ɔ̄ḿ mban̄g na nə́ngē tə́ m-ā m̄-rāā yá̰a̰ malang ń əla dəjem̄ kété ní. Banī nge kə́ gogə́ laā ń əla dəjem̄ ní m-ásə rāā alé.
Ngé kəla gə̄ aw̄ ədan̄ Ben Hadad najə̄ ń Akab tūr̄ əda ní. 10Ben Hadad əla əda na:
Ré bumbə́rú kə́ Samari asə kadə̄ de gə̄ malang ń dānə̄mə̄n̄ ní əngen̄ asə kem jīdə́ kógə̄ḿ kógə̄ḿ anī, ādə̄ nə́ɓā gə̄ rāāmə̄n̄ yá̰á̰ kə́ tōr̄ kə́ beē ba tél rāāmə̄n̄ nge kə́ beē. 11Mban̄g kə́ Israel tél əda na:
Ə́daī Ben Hadad ɓáý na, deē ń aw̄ ta rɔ̄ɔ̄ tə́ ní a ɔjə rɔ̄n tītə̄ yā deē ń aw̄ ta rɔ̄ɔ̄ tə́ ba tetə rɔ̄ɔ̄ kɔ̄ɔ́ á téĺ ní alé. 12Dan ń Ben Hadad oō najə̄ ń noō ní ndi a a̰ȳ i kasə kə mban̄g gēé gír kújə tandā tə́. Ni-əda ngé kəla yān gə̄ na kə aw̄ kə ənīn̄ rɔ̄ɔ̄. Adə̄ nin̄ aw̄ ran̄ dɔ rɔ̄də́ tə́ loo rɔ̄ɔ̄ yādə́ gə̄ tə́ yā rɔ̄ɔ̄ ɓē.
Mban̄g Akab tetə rɔ̄ɔ̄
13Anī *nge koō ta kógə̄ḿ ndɔ́tə̄ kə̄ rɔ̄ Akab mban̄g kə́ *Israel tə́ ba əda na:
Kɔ́ɔ̄ɓē əda na: Á̰á̰ kósə de kə́ ngá̰ý gə̄ ń noō a? M-ā m-ə́ládə́ kem jīí tə́ ɓōólaā. Loo ń noō tə́ ā ī-ger̄ kadə̄ mā i Kɔ́ɔ̄ɓē. Akab əda na:
14Ā ún i náā n ā ə́lańdə́ kem jīḿ tə́ ní?
Anī *nge koō ta ní əda na:
Najə̄ ń Kɔ́ɔ̄ɓē tūr̄ əda ní n toó: I kə ta kūl̄ balsáa gə̄ ń ngār gə̄ kə́ ngán ɓē kə́ ndágá gə̄ tə́ ɔyn̄də́ ní.
Akab dəje na ké i náā n a əla gír rɔ̄ɔ̄ ní wa. Anī *nge koō ta tél əda na: I ḭ̄.
15Balsáa gə̄ ń ngār gə̄ kə́ ngán ɓē kə́ ndágá gə̄ tə́ ɔyn̄də́ ní ran̄ kə ta naá ba Akab mān̄ a̰a̰də́. Nin̄ i deē ɓú jōó kə kutə̄ mətá gidə i jōó. Gō tə́ anī ni mān̄ a̰a̰ ngán *Israel gə̄ malang, adə̄ i de kə́ dəngam gə̄ dūbú sīrí. 16Nin̄ ənīn̄ rɔ̄ɔ̄ i dan kadaá, dan ń Ben Hadad nin̄ kə mban̄g kə́ kutə mətá gidə i jōó gə̄ ń ɓoon̄ rɔ̄də́ yān tə́ ní ndin̄ loo ka̰ȳ kasə tə́ gír kújə tandā gə̄ tə́ adə̄ kasə asədə́ nák ní. 17Balsáa gə̄ ń ngār gə̄ kə́ ngán ɓē kə́ ndágá gə̄ tə́ ɔyn̄də́ ní aw̄n̄ kété aw̄ ənīn̄ rɔ̄ɔ̄. Ben Hadad əla de gə̄ kadə̄ aw̄ a̰a̰n̄ yá̰a̰ gə̄ ń rāān̄ yá̰á̰ ní ba kə reē kə ədanən̄. Anī reē ədanən̄ na de kə́ dəngam gə̄ na teēn̄ kɔ̄ɔ́ kem ɓē kə́ Samari tə́. 18Anī ni-əda na:
Ré teēn̄ i yā reē dəjejí najə̄ lápə́ya anī, ə́hɔīdə́ kə kumdə́ ō, ré teēn̄ i yā reē rɔ̄jí anī, ə́hɔīdə́ kə kumdə́ ō!
19De gə̄ ń teēn̄ kem ɓēé ní i balsáa gə̄ ń ngār gə̄ kə́ ngán ɓē gə̄ tə́ ɔyn̄də́ ní ō, ngé rɔ̄ɔ̄ gə̄ utə̄n̄ gōdə́ ō. 20Nin̄ tɔ̄lə̄n̄ deē kógə̄ḿ kógə̄ḿ kə dɔdə́ gēé. Aram gə̄ a̰ȳn̄ naā, banī *Israel gə̄ ngɔ̄də̄n̄də́. Ben Hadad, mban̄g kə́ Aram a̰ȳ i dɔ sə́nda kógə̄ḿ tə́ naā tə́ kə ngé kal̄ sə́ndá kə́rēý gēé. 21Mban̄g kə́ Israel teē tɔ̄l̄ sə́nda gə̄ malang ō, nujə púsə rɔ̄ɔ̄ gə̄ ō. Ni-tetə Aram gə̄ rɔ̄ɔ̄ tetə kə́ to ɓōĺ ngá̰ý. 22Anī *nge koō ta yā Nə́ɓā aw̄ rɔ̄ mban̄g kə́ Israel tə́ ba ədan na:
Ə́hɔ rɔ̄í tɔgə ba ī-gír̄ yá̰á̰ ń kadə̄ ī-rāā ní majə, tɔdɔ̄ mban̄g kə́ Aram a tél yā reē rɔ̄í kem ɓāl̄ kə́ gogə́ tə́.
Akab tetə rɔ̄ɔ̄ ɓáý to̰
23Ngé kəla yā mban̄g yā Aram gə̄ ədanən̄ na:
Ɓesə̄ yādə́ i ɓesə̄ dɔ mbal̄, i yá̰á̰ ń noō n tɔ́gə́də́ tɔȳń yājí ní. Ādə̄ jə-rɔ̄ɔ̄īdə́ kum ndágə̄ mbō tə́ anī kə́ rɔ̄kum tə́ j-a jə-ngangī yā tɔȳdə́. 24Ī-rāā yá̰á̰ ń toō: Ɔ̄r̄ mban̄g gə̄ kógə̄ḿ kógə̄ḿ kɔ̄ɔ́ loo yādə́ gə̄ tə́ ba ī-tə́ndā ngé ko̰o̰ ɓē gə̄ gotədə́ tə́. 25Īkɔ́ ɔ́ý áskar kə́ rang gə̄ ādə̄ nin̄ i ngá̰ý tītə̄ ngé gə̄ ń ī-tḭ̄ḭ̄ tadə́ kété ní ō, ɔ́ý sə́nda gə̄ ō, púsə rɔ̄ɔ̄ gə̄ ō, ādə̄ i ngá̰ý tītə̄ kə́ kété ō, ba ādə̄ jə-rɔ̄ɔ̄īdə́ kum ndágə mbō tə́. Loo ń noō tə́ tɔ́gə́jí a tɔȳ yādə́.
Mban̄g oō najə̄ yādə́ ba rāā tītə̄ ń noō. 26Adə̄ ɓāl̄ kə́ gogə́ tə́ anī, Aram gə̄ ran̄ kə ta naá adə̄ Ben Hadad mān̄ a̰a̰də́, ba aw̄ sedə́ Apek kadə̄ rɔ̄ɔ̄n̄ *Israel gə̄. 27Ngán Israel gə̄ ran̄ kə ta naá adə̄ Akab mān̄ a̰a̰də́ ō, adə̄n̄də́ yá̰a̰ kəsa ō, tá kadə̄ aw̄n̄ tə́nī ta Aram gə̄ tə́ ɓáý. Nin̄ ran̄ no Aram gə̄ tə́ tītə̄ ɓūtə̄ bə̄yā̰ kə́ sḛ́ý beé gə̄ gír loo jōó, banī Aram gə̄ i ngá̰ý, nin̄ taān̄ loo malang.
28Deē yā Nə́ɓā aw̄ rɔ̄ mban̄g kə́ Israel tə́ ɔr̄ najə̄ seneé əda na:
Kɔ́ɔ̄ɓē əda na Aram gə̄ ədan̄ na mā i ɓesə̄ dɔ mbal̄ ba na mā i ɓesə̄ kə́ kum ndágə mbō tə́ alé, adə̄ tām̄ najə̄ ń noō tə́ ní m-ā m-ə́la kósə de kə́ ngá̰ý gə̄ ń toō kem jīí tə́. Loo ń noō tə́ ā ī-gerī kadə̄ mā i Kɔ́ɔ̄ɓē.
29Nin̄ ndin̄ kumdə́ sɔɔ̄ ta naā bátə́ ndɔ̄ sīrí. Kə ndɔ̄ kə́ ngé ko̰ sīrí anī udən̄ rɔ̄ɔ̄ naā tə́ pítə́ rɔ̄ɔ̄n̄ naā. Ngán Israel gə̄ tɔ́lə̄n̄ Aram gə̄ kə́ ngé njə̄rā kə njadə́ gə̄ dūbú ɓú kem ndɔ̄ kə́ kógə̄ḿ beē tə́. 30Ngé gə̄ ń teēn̄ ta yo tə́ ní a̰ȳ aw̄n̄ kem ɓē kə́ Apek tə́. Banī ndogə̄ mbal̄ ń əndān̄ gīrə̄neé gidə ɓē ní tetə dɔdə́ tə́. Nin̄ i deē dūbú kutə̄ jōó gidə i sīrí.
Akab əya̰ mban̄g yā Aram gə̄ adə̄ ndi kə kumneé
Ben Hadad a̰ȳ aw̄ udə kem ɓēé ba ɓɔ̄ɔ̄ rɔ̄n gə́lé kújə́ kógə̄ḿ tə́. 31Ngé kəla yān gə̄ ədanən̄ na:
J-oō kadə̄ mban̄g kə́ *Israel tə́ gə̄ na i mban̄g gə̄ kə́ kumdə́ o̰o̰də́ ngá̰ý. Ní ādə̄ jə-tə́lāī kūbə̄ kəhɔ ndoō gə̄ rɔ̄jí tə́ ō, j-əgaī jījí dɔjí tə́ ba jə-do̰ō̰ī kə kəlaá ō, ba jə-teē j-aw̄ j-ɔjiī no mban̄g kə́ Israel. Na majanī a əya̰ī kadə̄ ā ī-ndi kə kumií. 32Nin̄ tə́lan̄ *kūbə̄ sákə̄ gə̄ rɔ̄də́ tə́ ō, əgan̄ jīdə́ dɔdə́ tə́ do̰ō̰n̄ kə kəlaá ō, ba aw̄n̄ rɔ̄ mban̄g kə́ Israel tə́ ədanən̄ na:
Ɓəlo yāí Ben Hadad əda na n-dəjeī kadə̄ kə ájən. Akab əda na:
Ndi noó kə kumneé ɓáý a? Ni i ngōkó̰ó̰ḿ.
33De gə̄ ń Ben Hadad əladə́ ní a̰a̰n̄ kadə̄ najə̄ ní a majə tām̄ yā Ben Hadad tə́ adə̄ ədan̄ na:
Ben Hadad i ngōkó̰ó̰í!
Akab əda na: Āw̄ ī-reēī seneé.
Ben Hadad teē aw̄ rɔ̄ Akab tə́. Ba Akab adə̄ al̄ kem púsə yān nəkɔ́ tə́. 34Ben Hadad əda Akab na:
Ɓē gə̄ ń bɔbə́ḿ taā jī bɔbí tə́ ní, m-ā m̄-téləń yā kadī gogə́. Ba ī-rāā loo gātə̄ yāí gə̄ kem ɓē kə́ Damas tə́, tītə̄ ń bɔbə́ḿ rāań yān gə̄ kem ɓē kə́ Samari tə́ ní. Akab əda na:
Ba mā m-ā m-ə́hɔ madə̄ naā seí gō tə́ anī m-ā m-ə́ya̰ī kadə̄ āw̄.
Akab əhɔ madə̄ naā seneé ba əya̰n adə̄ aw̄.
Nge koō ta kógə̄ḿ teē kə gír majaĺ yā Akab dɔɔ́
35Kum mbang ngeé ń noō tə́ ní, deē kógə̄ḿ kə́ dan ɓūtə̄ yā *ngé koō ta gə̄ tə́ əda madə̄n kə gō ndū Kɔ́ɔ̄ɓēé na:
m̄-rāāī ɓɔ́, ādə̄m̄ do!
Banī madə̄n mbātə́ kadə̄n do. 36Anī *nge koō ta ní əda madə̄n ní na:
Dan ń ōō ta Kɔ́ɔ̄ɓē aĺ ɓá ní, ɔ́tə rɔ̄ḿ tə́ laā anī ɓɔl kógə̄ḿ a əhɔī.
Madə̄ *nge koō ta ní ɔtə rɔ̄n tə́ aw̄, anī ɓɔl kógə̄ḿ əngen róbó əhɔn. 37Nge koō ta ní ənge de kə́ rang anī ədan na:
m̄-rāāī ɓɔ́, ādə̄m̄ do!
Deē ní adə̄n do. 38Anī *nge koō ta ní seĺ kūbə̄ dɔn tə́ adə̄ utə̄ ta kumən kadə deē gerə̄n alé, ba aw̄ ra róbó a ngóō mban̄g. 39Dan ń mban̄g a mān̄ anī, un ndūn kə̄ dɔɔ́ ədanəń na: Kɔ́ɔ̄ ɓē gə̄, mā nge kəla yāí m̄-teē m-āw̄ ta rɔ̄ɔ̄ tə́ anī, de kə́rēý ɔtə ta rɔ̄ɔ̄ tə́ reē kə deē kógə̄ḿ adə̄m̄ ba əda na kə m̄-ngɔ̄m̄ deē ní. Ré na m-ə́ya̰ deē ní adə̄ aw̄ anī, yá̰á̰ ń rāā kɔ́ɔ̄ ní na a rāām̄ ō, aláa na m-ā m-ādə̄ sə́lē arjā̰a̰ dūbú mətá tām̄ yā deē ní tə́ ō. 40Ba dan ń m̄-rā m-ā m̄-rāā kəla dām̄ kə́rēý tə́ anī, dəngáý ní a̰ȳ aw̄ kɔ̄ɔ́.
Anī mban̄g kə́ *Israel tə́ tél ədan na:
Majə, i īkɔ́ n ī-gān̄g sarya dɔ rɔ̄í tə́ ní.
41Kə ta jī tə́ beē *nge koō ta ní ɔr̄ kūbə̄ kə́ ta kumən tə́ kɔ̄ɔ́ adə̄ mban̄g kə́ Israel a̰a̰ gerə̄n kadə̄ ni i deē kógə̄ḿ kə́ dan *ngé koō ta gə̄#20.41 Ngé koō ta gə̄ ń a ndin̄ i kə ɓūtə̄də́ gēé ní, majanī aw̄n̄ kə tə́rá kógə̄ḿ nodə́ tə́, aláa dəsān̄ dɔdə́ kɔ̄ɔ́. tə́. 42Nge koō ta ní əda mban̄g na:
Kɔ́ɔ̄ɓē əda na: Dan ń ə́ya̰ deē ń m-ə́da na kə ī-tɔ̄lə̄n kɔ̄ɔ́ ní ādə̄ teē jīí tə́ a̰ȳ aw̄ ní yá̰á̰ ń kadə̄ rāān ní a rāāī ō, yá̰á̰ ń kadə̄ rāā deē yān gə̄ ní a rāā deē yāí gə̄ ō.
43Mban̄g kə́ *Israel tə́ ur̄ wak ō, wōn̄g rāān ō. Ni-tél dɔ tə́ aw̄ gogə́ ɓēé Samari.
Currently Selected:
Makətūbə̄ kə́ ta kəga dɔ yā Mban̄g gə̄ 20: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
