Makətūbə̄ kə́ ta kəga dɔ yā Mban̄g gə̄ 19

Eli a̰ȳ

1Mban̄g Akab ɔjə nə̄yá̰n Jesabel gotə yá̰a̰ malang ń *Eli rāā ní ō, ədan najə̄ tɔ̄l̄ ń Eli tɔ̄l̄ *ngé koō ta yā *Baal gə̄ malang kɔ̄ɔ́ kə kaskaraá ní ō. 2Anī Jesabel əla deē kadə̄ aw̄ əda Eli na:

Bírí kə mbang ké beē, ré m̄-tɔ̄lī tītə̄ ń ī-tɔ̄ləń *ngé koō ta gə̄ ní aĺ anī, ādə̄ nə́ɓā gə̄ rāāmə̄n̄ yá̰á̰ kə́ tōr̄ kə́ beé ba tél rāāmə̄n̄ nge kə́ beé!

3*Eli a̰a̰ beé anī a̰ȳ yā kajəń rɔ̄n. Ni-aw̄ ugə̄ Beer Seba kə́ gō nang kə́ *Juda tə́ anī əya̰ nge kəla yān noó. 4Nəkɔ́ njə̄rā ndɔ̄ kógə̄ḿ aw̄ń kem dəla loo tə́. Dan ń ugə̄ kem dəla loo tə́ anī, aw̄ ndi gír kāgə̄ jene kógə̄ḿ kə́ ra kə kérneé tə́. Ni ndə̄ngā yo əda na:

Ngɔlaā m-ásə to̰ alé. Kɔ́ɔ̄ɓē, ī-taām̄ kə̄ rɔ̄í tə́, tɔdɔ̄ m̄-majə m̄-tɔȳ kaaḿ gə̄ alé.

5Gō tə́ anī ni to ɓīī gír ngōn̄ kāgə̄ jene ní tə́. Banī *de kə́ dɔ rā̰ tə́ kógə̄ḿ reē ɔdən ba ədan na:

Ḭ́ḭ dɔɔ́ ə́sá yá̰a̰!

6Anī ni-a̰a̰ mápá kə́ laa ń a ɔbə̄n̄ i dɔ mbal̄ kə́ kənī horoó kadə̄ təngá tə́ ní to kadən tə́ ngɔr ō, jóo man̄ ō. Dan ń ni-əsa mápá ní oy ō, a̰ȳ man̄ ní oy ō anī, tél to nang tə́ gogə́. 7Banī *de kə́ dɔ rā̰ tə́ yā Kɔ́ɔ̄ɓē tél dɔ tə́ reē ɔdən ba ədan na:

Ḭ́ḭ dɔɔ́ ə́sá yá̰a̰, tɔdɔ̄ ré i bəra aĺ anī róbə a ngāl̄ ngá̰ý tām̄ yāí tə́.

8*Eli ḭ́ḭ dɔɔ́ əsa yá̰a̰ ō, a̰ȳ man̄ ō. Yá̰a̰ kəsa ní adə̄n tɔ́gə adə̄ njə̄rā ndɔ̄ kutə sɔ́ ō, kadə kutə sɔ́ ō, tá ugə̄ mbal̄ yā Nə́ɓā ń i mbal̄ *Horeb ní tə́.

Nə́ɓā adə̄ Eli tɔ́gə gogə́ rang

9*Eli ugə̄ mbal̄ *Horeb tə́ anī udə kem bəlo mbal̄ kógə̄ḿ tə́, to kemeé bátə́ loo tīī dɔn tə́. Kɔ́ɔ̄ɓē ɔr̄ najə̄ seneé dəjen na:

Eli, ī-reē laā i sāā rí tə́?

10Anī ni tūr̄ əda Kɔ́ɔ̄ɓē na:

Kemḿ təngām̄ ngá̰ý tām̄ yā Kɔ́ɔ̄ɓē Nə́ɓā kə́ bo kə́ tɔ́gən i ngá̰ý tə́. Ngán *Israel gə̄ əya̰n̄ *madə̄ naā yāí ń ə́hɔ sedə́ ní kɔ̄ɔ́ ō, tɔ̄ɔ̄n̄ *loo tun̄ yá̰a̰ yāí gə̄ kɔ̄ɔ́ ō, tɔ̄lə̄n̄ *ngé koō ta yāí gə̄ kə kaskaraá ō. I mə̄kɔ́ kógə̄ḿ beē ngóy n m̄-nay ní, ba a sāān̄ tɔ̄lə̄m̄ kɔ̄ɔ́ ɓáý to̰.

11Kɔ́ɔ̄ɓē əda *Eli na kə teē kə aw̄ kə ra dɔ mbalá ta kumən tə́ na n-a n-mān̄. Kə ta jī tə́ noō néĺ kógə̄ḿ kə́ ngan̄g ngá̰ý mān̄ kə tɔ́gɔ́ kété no Kɔ́ɔ̄ɓē tə́. Néĺ ní usə kadə mbal̄ bo gə̄ adə̄ ur̄ pul pul ō, tɔ̄ɔ̄ ngán mbal̄ gə̄ ō, banī Kɔ́ɔ̄ɓē i kum néĺ ní tə́ alé. Gō néĺ ní tə́ anī dɔ nang ndebə, banī Kɔ́ɔ̄ɓē i tū dɔ nang ń ndebə ní tə́ alé. 12Gō dɔ nang ń ndebə tə́ ní hor unjə̄, banī Kɔ́ɔ̄ɓē i kum hor ní tə́ alé. Gō hor tə́ anī néĺ kógə̄ḿ kə́ dūú ngá̰ý əla pelele adə̄ deē oō kōn. 13Dan ń *Eli oō kōō néĺ ní anī, utə̄ ta kumən kɔ̄ɔ́ kə kūbə̄ yānneé. Ni teē aw̄ ra ndágá ta bəlo mbal̄ tə́, anī ndū deē ń ɔr̄ najə̄ seneé kété ní tél ɔr̄ najə̄ seneé ɓáý to̰ əda na:

Eli, ā ī-rāā i rí laā?

14Anī Eli əda na:

Kemḿ təngām̄ ngá̰ý tām̄ yā Kɔ́ɔ̄ɓē kə́ bo kə́ tɔ́gən i ngá̰ý tə́. Ngán *Israel gə̄ əya̰n̄ *madə̄ naā yāí ń ī-rāā sedə́ ní kɔ̄ɔ́ ō, tɔ̄ɔ̄n̄ *loo tun̄ yá̰a̰ yāí gə̄ kɔ̄ɔ́ ō, tɔ̄lə̄n̄ *ngé koō ta yāí gə̄ kə kaskaraá ō. I mə̄kɔ́ kógə̄ḿ beē ngóy n m̄-na̰y ní, ba a sāān̄ tɔ̄lə̄m̄ kɔ̄ɔ́ ɓáý to̰.

15Banī Kɔ́ɔ̄ɓē ədan na:

Ī-tél úń róbə́ gír njaí kem dəla loo tá ta kaw̄ kə̄ Damas. Ré ūgə̄ Damas anī, *úr yibə̄ dɔ Hajael tə́ ə̄ndānneé mban̄g dɔ ɓē kə́ Aram tə́. 16Gō tə́ anī āw̄ *úr yibə̄ dɔ Yehu kə́ ngōn̄ Nimsi tə́ ə̄ndānneé mban̄g dɔ ɓē kə́ *Israel tə́ ō, úr yibə̄ dɔ Elije ngōn̄ Sapat kə́ Abel Mehola tə́ kadə̄ ni i *nge koō ta yāḿ gotií tə́ ō. 17Deē ń a teē ta kaskar yā Hajael tə́ ní, Yehu a tɔ̄lən ō, deē ń a teē ta kaskar yā Yehu tə́ ní, Elije a tɔ̄lən ō. 18Banī m-ā m-ə́ya̰ de gə̄ dūbú sīrí dan ngán Israel gə̄ tə́ kadə̄ ndin̄ kə kumdə́. I de gə̄ ń nin̄-tə́tēn̄ kejədə́ no *Baal tə́ aĺ ō, njíbə̄nən̄ kə tadə́ aĺ ō ní.

Eli ənda Elije kum gotən

19*Eli ḭḭ loo ń noō tə́ aw̄. Ni-ənge Elije ngōn̄ Sapat. Ndɔr̄ yān i kəla kutə gidə i jōó, ba ni a ndɔr̄ i kə man̄g gēé kem kəlān kə́ nge ko̰ kutə gidə i jōó tə́. Eli mān̄ kadən tə́ ba ənī kūbə̄ yān dɔn tə́.

20Anī Elije əya̰ man̄g gə̄, ni a̰ȳ ngɔ̄də̄ gō *Eli tə́ ba ədan na:

Ādə̄m̄ ta róbə ādə̄ m-āw̄ m-ə́hɔ bɔbə́ḿ ō, kó̰ó̰ḿ ō kə̄ rɔ̄ḿ tə́, pá tá m-āw̄ gōí tə́ ɓáý.

Anī Eli ədan na:

Āw̄ loo yāí, m̄-rāā i rí seí?

21Elije tél aw̄ ta ndɔr̄ yān tə́ əhɔ man̄g yān kə́ jōó gə̄ tɔ̄l̄ ba tun̄ adə̄ Nə́ɓā. Ni-rāā hor kə júgə́ kə́ kɔ́ɔ man̄g gə̄ tə́ ō, kə kāgə̄ kɔsə ń do̰ō̰ gír man̄g gə̄ tə́ a ndɔrə̄ń ní ō, ndīrəń dā̰ man̄g gə̄ ní adə̄ deē yān gə̄ adə̄ əsan̄. Gō tə́ anī aw̄ gō *Eli tə́ yā rāā kəla yān.

Currently Selected:

Makətūbə̄ kə́ ta kəga dɔ yā Mban̄g gə̄ 19: BS

Highlight

Copy