Makətūbə̄ kə́ ta kəga dɔ yā Mban̄g gə̄ 21
21
Mban̄g Akab əya̰ adə̄ de gə̄ tɔ̄lə̄n̄ Nabot
1Gō yá̰a̰ gə̄ ń noō tə́ ní, yá̰á̰ ń rāā yá̰á̰ ní n toó. Nabot kə́ Jisreel aw̄ kə ndɔr̄ *kāgə̄ nduú kem ɓē kə́ Jisreel tə́. Ndɔr̄ ní i kadə kújə yā Akab mban̄g kə́ Samari tə́, 2anī Akab əda Nabot na:
Ə́ya̰ ndɔr̄ *kāgə̄ nduú yāí ādə̄m̄ ādə̄ m̄-rāā loo ndɔr̄ tá̰a̰ yāḿ tə́, tɔdɔ̄ ndɔr̄ kāgə̄ nduú yāí ní i kadə kújə yāḿ tə́ ngɔr ngá̰ý. M-ā m-ādī kə́ rang kə́ majə tɔȳ kum gotə, aláa ré ī-gḛy anī m-ādī gúrsə gírí.
3Banī Nabot tél əda Akab na:
Ta kum Kɔ́ɔ̄ɓē tə́ kə́ njɔ́ḿ gə̄ tə́, m-ásə kadī ndɔr̄ *kāgə̄ nduú ń kaaḿ gə̄ əya̰n̄ adə̄mə̄n̄ ní alé!
4Rɔ̄ Akab ur̄ wak ō, wōn̄g rāān ō, tām̄ kəda ń Nabot tél ədan na n-a n-adə̄n yá̰a̰ ndəbā yā kaan gə̄ alé ní tə́. Ni-tél dɔ tə́ aw̄ gogə́ ɓēé, aw̄ to dɔ tə̄rá yān tə́ ba tūr̄ kumən kə̄ kadə bɔr tə́ ō, mbātə́ kəsa yá̰a̰ ō. 5Nə̄yá̰n Jesabel reē rɔ̄n tə́ ba dəjen na ké i ba̰ý á rɔ̄n nelə̄n aĺ beē ō, mbātə́ kəsa yá̰a̰ ō ní wa. 6Anī ni-tél əda nə̄yá̰n na:
I tām̄ m-ə́da Nabot na kə əya̰ ndɔr̄ *kāgə̄ nduú yān kə adə̄m̄, ba kə m-ādə̄n gúrsə gírí, aláa ré gḛy anī kə m-ādə̄n ndɔr̄ kāgə̄ nduú kə́ rang m̄-mbéləń gír yān. Anī ni-tél ədam̄ na n-a n-əya̰ ndɔr̄ kāgə̄ nduú yān yā kadə̄m̄ alé.
7Nə̄yá̰n Jesabel tél ədan na:
I ḭ̄ n i nge ko̰o̰ ɓē dɔ *Israel gə̄ tə́ ní aĺ a! Ḭ́ḭ dɔɔ́ ə́sa yá̰a̰, ādə̄ rɔ̄í nelī. I mā n m-ā m-ādī ndɔr̄ kāgə̄ nduú yā Nabot kə́ Jisreel ní.
8Jesabel ndang makətūbə̄ kə rī Akab ba əndā *tambō̰o̰ *yā Akab dɔ tə́. Ni-əla kə makətūbə̄ ní adə̄ *kum kɔɔ̄ gə̄ ō, ngār gə̄ ō, kə́ kem ɓē yā Nabot tə́. 9Najə̄ gə̄ ń ni ndang kem makətūbūú ní n toó:
Ə̄nīī mbēr̄ kadə̄ de gə̄ *ndin̄ ɓō tām̄ yā Nə́ɓā tə́, ba ə̄ndāī Nabot no ngé kán̄ naā gə̄ tə́ malang. 10Əndāī de kə́ ngé rāā yá̰a̰ gōtə́ aĺ gə̄ jōó non tə́ ādə̄ ədan̄ najə̄ ń toō dɔn tə́: ni na ndɔ̄ĺ Nə́ɓā ō, na ndɔ̄ĺ mban̄g ō. Gō tə́ anī ī-teēī seneé gidə ɓē tə́ ndágá ba ī-tə́nāin̄ kə mbalá ādə̄ oy.
11De kə́ kem ɓē kə́ Jisreel tə́ gə̄, adə̄ i *kum kɔɔ̄ gə̄ ō, ngār gə̄ ō ń ndin̄ kem ɓēé ní, rāān̄ yá̰á̰ ń Jesabel ədadə́ kadə̄ rāān̄ ní kə gō ń ni ndang adə̄ńdə́ kem makətūbūú ní. 12Nin̄ ənīn̄ mbēr̄ kadə̄ de gə̄ *ndin̄ ɓō tām̄ yā Nə́ɓā tə́ ō, əndān̄ Nabot kété no ngé kán̄ naā gə̄ tə́ malang ō. 13De kə́ jōó gə̄ kə́ ngé rāā yá̰a̰ gōtə́ aĺ gə̄ ní reē ran̄ no Nabot tə́, ba ədan̄ ta kum kósə de gə̄ tə́ malang na Nabot na ndɔ̄ĺ Nə́ɓā ō, na ndɔ̄ĺ mban̄g ō. Anī kə̄ ta jī tə́ beē de gə̄ teēn̄ kə Nabotoó aw̄n̄ seneé gidə ɓē tə́ ndágá aw̄ tə́nīnən̄ kə mbalá adə̄ oy. 14Əlan̄ ədan̄ Jesabel na tə́nīn̄ Nabot kə mbalá adə̄ oy, 15anī Jesabel əda Akab na kə ḭḭ dɔɔ́ kə aw̄ kə taā ndɔr̄ *kāgə̄ nduú yā Nabot kə́ Jisreel ń mbātə́ kadə̄n gíŕ gúrsuú ní, tɔdɔ̄ Nabot na i kə kumneé to̰ alé, na oy kɔ̄ɔ́. 16Dan ń Akab oō kadə̄ Nabot na oy anī, ḭḭ dɔɔ́ aw̄ kə̄ taā ndɔr̄ kāgə̄ nduú yā Nabot kə́ Jisreel tə́.
Nə́ɓā gān̄g sarya dɔ hál Akab tə́ ō, dɔ hál Jesabel tə́ ō
17Kɔ́ɔ̄ɓē ɔr̄ najə̄ kə *Eli kə́ Tisbe, ədan na:
18Akab mban̄g kə́ *Israel tə́ ń ndi kem ɓē kə́ Samari tə́ ní, ḭ́ḭ dɔɔ́ āw̄ ī-tə́nā tan. Ni i kem ndɔr̄ *kāgə̄ nduú yā Nabot ń aw̄ taā tə́ ní. 19Āw̄ ə́dan na Kɔ́ɔ̄ɓē əda na: Adə̄ ī-tɔ̄l̄ deē ba ī-reē yā taā yá̰a̰ yān dɔ tə́ ní! Gō tə́ anī ə́dan na Kɔ́ɔ̄ɓē əda ɓáý to̰ na: Loo ń bísə gə̄ tō̰nə́n̄ mósə Nabot tū tə́ ní, bísə gə̄ a tō̰nə́n̄ mósí īkɔ́ tū tə́ ō.
20Akab əda *Eli na: Madə̄ ba̰ā̰ḿ, ī-téĺ ə́ngem̄ gogə́ ɓáý ḿ?
Eli tél ədan na: m̄-tél m-ə́ngeī gogə́ ɓáý to̰ i tām̄ ə́ya̰ rɔ̄í ī-rāań yá̰á̰ kə́ majaĺ ta kum Kɔ́ɔ̄ɓē tə́. 21M-ā m̄-rāā kadə̄ yá̰á̰ kə́ to kum kaȳ aĺ teē dɔí tə́. M-ā m̄-rāā kadə̄ ā ī-gətóo kɔ̄ɔ́. M-ā m̄-tɔ̄l̄ de kə́ dəngam gə̄ kə́ gír yāí tə́ malang, ngáń kə́ dūú gə̄gē, de kə́ tɔgə gə̄gē, m-ā m̄-tɔ̄l̄də́ kɔ̄ɔ́ malang dɔ nang kə́ *Israel tə́. 22M-ā m̄-rāā gír kojə yāí yá̰á̰ ń m̄-rāā kə gír kojə yā Jeroboam ngōn̄ Nebat ní ō, yá̰á̰ ń m̄-rāā kə gír kojə yā Baasa ngōn̄ Ahia ní ō, tām̄ ī-rāām̄ ādə̄ wōn̄g rāām̄ ngá̰ý ō, ī-sə̄lā ngán Israel gə̄ ādə̄ rāān̄ yá̰á̰ kə́ majaĺ ō.
23Kɔ́ɔ̄ɓē əda najə̄ kə́ dɔ Jesabel tə́ ō, əda na bísə gə̄ a əsan̄ Jesabel kem ndɔr̄ yā de kə́ Jisreel tə́. 24De kə́ gír kojə yā Akab tə́ ń a oy kem ɓēé ní bísə gə̄ a əsanən̄ ō, nge ń a oy bembeé ní yel̄ kə́ dɔɔ́ gə̄ a əsanən̄ ō.
25Jóo toó deē a̰a̰ de kə́ nelə̄n rāā yá̰á̰ kə́ majaĺ ta kum Kɔ́ɔ̄ɓē tə́ tītə̄ yā mban̄g Akab beé aĺ ɓáý, tɔdɔ̄ nə̄yá̰n Jesabel sə̄lān. 26Ni-rāā yá̰á̰ kə́ majaĺ ngá̰ý tɔdɔ̄ ni rāā ɓesə̄ gə̄ tītə̄ yā *Amor gə̄ ń Kɔ́ɔ̄ɓē tə̄ɓādə́ kɔ̄ɔ́ ba əya̰ń loo adə̄ ngán *Israel gə̄ ní
Akab tél kə rɔ̄neé kə̄ nang tə́
27Dan ń Akab oō najə̄ gə̄ ń noō anī, ni *rə̄yā̰ kūbə̄ kə́ rɔ̄n tə́ ba əla kūbə̄ sákə̄ rɔ̄n tə́ adə̄ ɔdə ndārə́n ō, *ndi ɓō tām̄ yā Nə́ɓā tə́ ō, a to i kə *kūbə̄ sákə̄ ní ō, a njə̄rā i jəke jəke ō. 28Tā anī Kɔ́ɔ̄ɓē əda *Eli kə́ Tisbe na:
29Á̰á̰ téĺ ń Akab tél kə rɔ̄neé kə̄ nang tə́ ta kumḿ tə́ ní a? Dan ń ni-tél kə rɔ̄neé kə̄ nang tə́ beē ɓá ní, m-ā m-ādə̄ yá̰á̰ kə́ to kum kaȳ aĺ a rāā de gə̄ kə́ gír kojə yān tə́ ɓāl̄ yān tə́ alé, banī m-ā m-ādə̄ a rāādə́ i ɓāl̄ yā ngōnən tə́.
Currently Selected:
Makətūbə̄ kə́ ta kəga dɔ yā Mban̄g gə̄ 21: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
