PĀ GƏ̄ 7
7
Kɔ́ɔ̄ɓē, ī-gān̄g sarya yāḿ
1Pā nōō rɔ̄ yā Dabid. Ni-ənī pā ní i kə Kus kə́ Benjamḛ n adə̄ Kɔ́ɔ̄ɓē ní.
2Kɔ́ɔ̄ɓē, Nə́ɓā yāḿ, m̄-namī.
Ájəm̄, ī-taām̄ jī ngé rāā kumḿ ndoō tə́ gə̄ tə́ malang.
3Ré i beé aĺ anī a rə́yā̰mə̄n̄ naā tə́ tītə̄ ɓɔl gə̄
kanjə̄ kadə̄ deē taām̄ jīdə́ tə́.
4Kɔ́ɔ̄ɓē, Nə́ɓā yāḿ, ré m̄-rāā yá̰á̰ ń ədan̄ ní,
ré jīḿ rāā yá̰á̰ kə́rēý kə́ gōtə́ aĺ,
5ré deē ń rāām̄ kə́ majaĺ ní m̄-rāān kə́ majaĺ kum gotə,
ré deē ń gír̄ kə́ majaĺ i kemən tə́ seḿ
kanjə̄ kumən ní m̄-taā yá̰a̰ yān,
6anī ādə̄ madə̄ ba̰ā̰ḿ ngɔ̄də̄ əhɔm̄ ō,
ənīm̄ nang tə́ kum bumbə́ru tə́ ba tə́ɓām̄ kə njaneé ō,
əlań rɔ̄sɔl̄ dɔḿ tə́.
7Kɔ́ɔ̄ɓē, ḭ́ḭ dɔɔ́ kə wōngōó!
Ngé rɔ̄ḿ gə̄ ń wōn̄g rāādə́ ngá̰ý ní ī-ta̰də́ rɔ̄.
Ḭ̄ nge kəda yá̰á̰ kə́ gōtə́, ī-ra já̰já̰ kadəḿ tə́!
8Gír de gə̄ kánə̄n̄ naā gīrə̄n̄ gidií,
ī-tél āw̄ ī-ndi gotií tə́ dɔɔ́ dɔdə́ tə́!
9Kɔ́ɔ̄ɓē, nge gān̄g sarya yā nápar de gə̄,
ī-gān̄g sarya yāḿ sɔɔ̄ń yá̰a̰ rāāḿ kə́ gōtə́ ō, najə̄ kə́ gətóo dɔḿ tə́ ō!
10Ī-ɗogə́rō ta kəla yā ngé kem ndul gə̄!
Ī-mbūsə̄ de kə́ súmūú adə̄ ra ngan̄g!
Tɔdɔ̄ nge ger̄ gír̄ kə́ kem deē tə́ i Nə́ɓā kə́ súmūú.
11Der yāḿ kə́ nge taā dɔḿ i Nə́ɓā
kə́ nge kajə de gə̄ ń kemdə́ i súmūú ní.
12Nə́ɓā i nge gān̄g sarya kə́ gōtə́.
Ni i nge rāā ngan̄g ngá̰ý kə de gēé kə ndɔ̄ gə̄.
13Ré nge kem ndul əya̰ gír majaĺ yān aĺ anī,
Nə́ɓā a ɔl̄ kum kaskar yān kadə̄ atə ō,
a əndā gərā tū kəlā ga̰ gərā tə́ ō, a ɔr gō ō, a serən ō.
14Yá̰a̰ rɔ̄ɔ̄ gə̄ kə́ yā tɔ̄ləń deē ní ni-əndā dɔ jīn,
Ni-əndā hor ta kum gərā yān gə̄ tə́ yā kə róoń loo.
15Deē ń a gír̄ i yá̰á̰ kə́ majaĺ ō,
a núm̄ i rāā yá̰á̰ kə́ gōtə́ aĺ ō ní,
a ojə i najə̄ kə́ rɔ̄kum alé.
16Ni əga dɔ mbḛ̄ kə jīneé, ndēr̄ adə̄ lú
ba nəkɔ́ a tél yā kəsō kemeé.
17Yá̰á̰ kə́ majaĺ ń sāā rāā ní tetə ənda i dɔn nəkɔ́.
Yá̰á̰ ń ni sāā rāā kə dɔ́nɔ́ ní tél əsō i kār̄ dɔn nəkɔ́ tə́.
18M-ā m̄-ndadə̄ Kɔ́ɔ̄ɓē tām̄ háĺ kə́ gōtə́ yān tə́ ō,
m-ā m̄-tɔ̄ȳ rī Kɔ́ɔ̄ɓē Nə́ɓā kə́ dɔɔ́ sa̰y ngá̰ý ō.
Currently Selected:
PĀ GƏ̄ 7: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
